Svun Mateo 15
15
Ja' li' yaloj ti c'usitic ta sta o smul li crixchanoetique
(Mc 7.1-23)
1Tey ic'otic jayvo' jfariseoetic xchi'uc jayvo' ti much'utic ta xchanubtasvanic ta smantaltac Riox li' liquemic ech'el ta Jerusalene. C'ot sjac'beic ti Jesuse:
2―¿C'u yu'un ti mu xich'ic ta muc' ti c'usi liquem ta jtotic ta jme'tic ta más vo'ne la vajchanc'optaque? ¿C'u yu'un ti mu spasic yech chac c'u cha'al jtaleltic ti ba'yi ta jpoc lec jc'obtic c'alal mu to'ox chive'otique? ―Xiic.
3Ijac'batic yu'un ti Jesuse:
―¿C'u yu'un li vo'oxuc uque ti mu xa ch'unic li smantaltac Rioxe, ti ja' no'ox chach'unic li c'usi acostumbreic atuquique? 4Ti Rioxe ja' yech yaloj mantal chac li'i: “Ich'o ta muc' atot ame'”, xi. “Mi oy much'u chopol c'usi chalbe li stot sme'e, ac'u yich' milel”, —xi. 5Yan li vo'oxuque, chachanubtasic li jun ch'amalile, ti xu' ja' yech chalbe li stot sme' chac li'i: “Ti c'uyepal sc'oplal chajcoltaique, ical xa jc'op ti chcac' ta smoton Rioxe” —xa chi'ic; 6ti much'utic ja yech chalic chac taje, mu xa persauc tscolta o li stot sme'ique. Yech'o un, li vo'oxuque, ja' mu xavich'ic ta muc' li smantal Rioxe. Ja' chavaq'uic ta chanel li acostumbre atuquique. 7¡Jlo'lovanejetic! Yech xal ya'uc ti c'usi iyal ti j'alc'op Isaías ti c'alal iyal ac'oplalic ta vo'nee:
8“Li jteclum li'i, ta sba no'ox yeic ti chiyich'ic ta muc' yilele;
pero li yo'onique ma'uc yech.
9Yech no'ox ti chiyich'ic ta muc' ta alele.
Li c'usi ch-chanubtasvanic oe smantal no'ox crixchano” —xi.
10Ti Jesuse, iyic' tal li crixchanoetique, ja' yech iyalbe chac li'i:
—La' a'yiic li c'usi chcale, a'yibeic lec smelol: 11Li c'usi ch-och ta ye li crixchanoe ma'uc tsoc o. Ja' tsoc o li c'usitic chopol chloc' ta yee ―xi.
12Yech'o un, ti yajchanc'optaque inopojic ech'el yo' bu ti Jesuse, isjac'beic:
¿Mi ana'oj ti chopol iya'i li jfariseoetic ti x'elan avalbee? ―Xutic.
13Itac'batic yu'un ti Jesuse:
—Scotol te'etic ti bu ma'uc sts'unoj ti Jtot tey ta vinajele, ta ono'ox xich' bulel chi'uc yisim. 14Teyuc mu c'u atu'unic, yu'un ma'satetic ti tsnitic ech'el yan ma'satetique. Li jun ma'sat ti tsnit ech'el xchi'il ta ma'satile, co'ol chp'ajic yalel ta ch'en ―x'utatic yu'un ti Jesuse.
15Ti Pedroe iyalbe ti Jesuse:
—Alboticotic smelol li lo'il avale ―xut.
16Itac'av ti Jesuse:
—¿Mi mu xava'ibeic smelol ya'el uc? 17¿Mi mu xana'ic ya'el ti ta ach'utic no'ox chc'ot li c'usitic chalajesique, ti ts'acal chba ach'ayique? 18Yan li c'usitic chopol chavalique, ta avo'onic chlic tal, ja' cha soquic o. 19Yu'un li crixchanoe ta yut yo'on chlictal li c'usitic chopol tsnope, ti chmilvane, ti tsa' yantse, ti tsa' yajmule, ti ch-chi'insbaic c'alal muc'bu nupunemique (fornicación), ti scotol no'ox c'usi tspas xchi'uc li sbectalique (Inmoralidad sexual), ti ch-elc'ajique, xchi'uc ti scotol c'usi tsp'is o li xchi'ile. 20Scotol taje ja tsoc o li crixchanoe; pero c'alal muc' bu lec chapoc ac'obic chac c'ucha'al atalelic c'alal chave'ique, le'e mu xa soquic o —x'utatic yu'un ti Jesuse.
Ja' li' yaloj ti oy jun jcanaanil ants ti oy lec xch'unojel yo'one
(Mc 7.24-30)
21Ti Jesuse iloc' ech'el, ibat ta yosilal Tiro xchi'uc Sidón. 22Tey ic'ot jun jcanaanil ants, iyapta ti Jesuse:
―¡Cajval, smom David, c'uxubinon! ¡Li jtsebe, abol sba tajmec yu'un ch-ilbajinat yu'un pucuj! ―Xi.
23Ti Jesuse muc xtac'av. Li yajchanc'optaque inopojic ech'el yo' bu ti Jesuse, isc'anbeic vocol:
—Abulajan taco ech'el li antse yu'un toj tsots chiyaptaotic tal ta jpatic —xutic.
24Ti Jesuse itac'av:
—Li vo'one ja' no'ox tacbilon tal ta scuenta jch'ayel chijetic li' ta slumal Israele―xut.
25Ti antse inopoj ech'el isquejan sba ta stojol ti Jesuse, isc'anbe vocol:
―¡Cajval, c'uxubinon!―Xut.
26Ti Jesuse istac'be li antse:
—Muc'bu lec mi ta jpojbetic spanic li jch'amaltique, mi ja' chcac'betic slajes li c'ox ts'i'etique ―x'utat yu'un ti Jesuse.
27Ti antse ja' yech iyalbe ti Jesuse:
—Yecha'a, Cajval; pero li ts'i'etique ja tstamic c'alal chp'aj xch'uch'ulil spanic ta yolon smexa li yajvalique ―xi ti antse.
28Yech'o un, ti Jesuse istac'be:
—¡Ants chquil ti sjunul avo'on ach'unoj ti oy jyu'ele! Ac'u c'otuc li c'usi ac'anbone ―x'utat yu'un ti Jesuse.
C'alal ja' o yech i'albate, icol ta ora li stsebe.
Ja' li' yaloj ti iyet'esbe xchamel jchameletic ti Jesuse
29Ti Jesuse iloc' ech'el teyo'e, ibat ta ti'nab ta Galilea. Imuy ta ch'ut vits, ichoti. 30Tey ic'otic epal crixchanoetic yo' bu ti Jesuse. Yic'ojic c'otel coxoetic, xchi'uc ma'satetic, xchi'uc uma'etic, xchi'uc tuncoetic, xchi'uc yan jchameletic; tey c'ot yaq'uic yo' bu ti Jesuse. Iyet'esbe xchamel scotol ti jchameletique. 31Ti crixchanoetique xch'ayet xa yo'onic ti c'alal ijam yeic ti much'utic uma'etic to'oxe, ti lec xa yoc sc'obic ti much'utic tunco to'oxe, ti lec xa chanavic ti much'utic coxoetic to'oxe, ti ijam xa satic ti much'utic ma'satetic to'oxe. Iyich'ic ta muc' ti Riox yu'un Israele.
Ja' li' yaloj ti ismac'lin chanmil crixchanoetic ti Jesuse
(Mc 8.1-10)
32Ti Jesuse istsob li yajchanc'optaque, xi iyalbee:
―Toj abol sbaic chquil li crixchanoetic li'i, yu'un yoxibal xa c'ac'al li' jchi'uque, mu xa c'u slajesic. Mu jc'an jtac ech'el ta snaic lavi muc bu ve'emique, yic'al xlubtsajic ta be ―x'utatic yu'un ti Jesuse.
33Itac'av ti yajchanc'optaque:
—¿Bu ta jtaticotic ep pan li' ta xocol balamile ti ta jmac'linticotic o li epal crixchanoetique? ―Xutic.
34Ijac'batic yu'un ti Jesuse:
—¿Jayp'ej pan oy avu'unic? ―X'utatic.
―Oy vucp'ej xchi'uc jaycot c'ox choyetic ―xi'ic.
35Ti Jesuse iyalbe ti crixchanoetique ti ac'u chotlicuc ta lumtique, 36ixch'am li vucp'ej pane xchi'uc li jaycot choye, iyalbe coliyal ti Rioxe, ixutilan li pane iyac'be li yajchanc'optaque, ja' xa ixch'acbeic li crixchanoetique. 37Ive' scotolic, lec inojic. Istsob-beic li sobrae, inoj vucub moch. 38Ti c'u yepal ive'ique oy chanmil (4,000) viniquetic. Muc' bu nitbil li antsetique xchi'uc li c'oxetique. 39Ti c'alal isc'opon comel li crixchanoetique, ja' o i'och ta canova. Ibat ta slumal Jmagdalaetic.
Currently Selected:
Svun Mateo 15: LeqAC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Biblica de Mexico AC
