ಮತ್ತಾಯ 28
28
ಯೆಸುನು ಪುನರುತ್ಥಾನ
(ಮಾರ್ಕ 16:1-10; ಲುಕ 24:1-10; ಯೊಹಾನ 20:1-18)
1ಸಬ್ಬತ ದಿನ್ನ ಥಯಲ್ಪರ ಐತವಾರ ಪಾಟ ಥಾವಾನಿ ವ್ಹತ್ತಿ. ಮಗ್ದಲನಿ ಮರಿಯಳ ವರಿ ಬಿಜಿ಼ ಮರಿಯಳ ಮಜಾ಼ರನೆ ದೆಕಾನೆ ಗಯ್ಯೊ. 2ತೆಳಾಮಾ ಘನ್ನು ಮ್ಹೊಟು ಭುಕಂಪ ಥಯು. ಕ್ಹುದಾನೊ ದುತ ಹಬಾಳತೊ ಉತ್ರಿನ ಆಯೊ. ತೆ ದುತ ಮಜಾ಼ರಕನ ಗೈನ, ಮಜಾ಼ರನಾ ಬಾಕಲಕಂತು ಮ್ಹೊಟೊ ದಗ್ಡೊ ಸರ್ಕೈನ ತೆ ದಗ್ಡಾಪರ ಬೈಟ್ಯೊ. 3ಕ್ಹುದಾನಾ ದುತನು ಮ್ಹೊಡು ಬಿಜ಼ಲಿ ಲಿಂಗತ ಚಮ್ಕಾಡುತು. ತಿನಾ ವಣ್ಣಾ ಮಿಂಚ ಲಿಂಗತ ಧೊಳಾ ವ್ಹತ್ತಾ. 4ಮಜಾ಼ರ ಕೈದಾಲಾ ಸೈನಿಕೊ ಕ್ಹುದಾನಾ ದುತನೆ ದೆಕಿನ ಘನ್ನಾ ಭುಚ್ಕಿ಼ನ ಘಾಬ್ರಾ ಥೈನ ಮರ್ಯಲವಾಲಾ ಲಿಂಗತ ಥಯಾ.
5ದುತ ತೆ ಬಾಕ್ಡಿಯೊನೆ, "ತುಮೆ ಭುಚ್ಕೊ಼ ನಕೊ; ಶಿಲುವಿಪರ ಘಾಲಲ ಯೆಸುನೆ ತುಮೆ ಹುಡ್ಕಾಡಾಸ ಕವಾನು ಮನೆ ಗ್ವತ್ತ ಛೆ. 6ತೆನೈಸೊ ಯೆಸು ನ್ಹ್ಯಾ ನತ್ತಿ. ತೆ ಕದಲ ತಿಮ್ಮ ಪುನರುತ್ಥಾನ ವ್ಹಂದ್ಯೊಸ. ಆವೊ, ತಿನು ಅಂಗ ರ್ಹಯಲ ಜ಼ಗಾ ದೆಕೊ. 7ಜಲ್ದಿ ಗೈನ ತಿನಾ ಶಿಶ್ಯಾವೊನೆ, "ಯೆಸು ಪುನರುತ್ಥಾನ ವ್ಹಂದ್ಯೊಸ. ತೆ ಗಲಿಲಾಯೆ ಚಾ಼ಲ್ಯೊಸ. ತುಮಾರಾತಿ ಪೈಲಾಜ಼ ತೆ ತ್ಯಾ ರ್ಹವಸ. ತುಮೆ ತಿನೆ ತ್ಯಾ ದೆಕೊಶಿ” ಕೈನ ಕವೊ. ಮಿ ತುಮೊನೆ ಕವಾನಿ ಸುದ್ದಿ ಎಜ಼ ವ್ಹೈ, ಇಕ್ಹರೊ ನಕೊ” ಕದ್ಯೊ.
8ತೆಳಾಮಾಜ಼ ತೆ ಬಾಕ್ಡಿಯೊ ಭೆಂಕ್ಹುಬಿ ಕ್ಹುಶಿಕ್ಹುಬಿ ಮಜಾ಼ರ ಕಂತಾ ಗಯಾ. ಥಯಲ ಕ್ಹಾರು ಶಿಶ್ಯಾವೊನೆ ಕವಾನೆ ತ್ಯುನೆ ನ್ಹಾಟಿನ ಜಾ಼ತಾಮಾ, 9ಯೆಸು ತ್ಯುನಾ ಕ್ಹಾಮೊ ದಿಕ್ಹಿನ, "ತುಮೊನೆ ಶುಭ ಥಾವಾದೆ” ಕದ್ಯೊ. ತೆ ಬಾಕ್ಡಿಯೊ ಯೆಸುಕನ ಗೈನ, ತಿನಾ ಪಗೊ ಧರಿನ ಆರಾಧನಾ ಕರ್ಯಾ.
ಕೈದಾಲಾನಿ ಸುದ್ದಿ
10ಯೆಸು ತೆ ಬಾಕ್ಡಿಯೊನೆ, ಭುಚ್ಕೊ಼ ನಕೊ; ಮಾರಾ ಭಾಯೊಕನ ಗೈನ ಗಲಿಲಾಯೆ ಆವಾನೆ ಕವೊ. ತ್ಯುನೆ ಮನೆ ದೆಕಸ” ಕೈನ ಕದ್ಯೊ. 11ತೆ ಬಾಕ್ಡಿಯೊ ಶಿಶ್ಯಾವೊನೆ ಕವಾನೆ ಗಯಾ. ತ್ಯಾ ಮಜಾ಼ರ ಕೈದಾಲಾ ದಕ್ಹಾ ಸೈನಿಕೊ ಗಾಮಮಾ ಗೈನ ಥಯಲ ಕ್ಹಾರು ಮಹಾಯಾಜಕೊನೆ ಕದ್ಯಾ.
12ತೆಳಾಮಾ ಮಹಾಯಾಜಕೊ ಮ್ಹೊಟಾ ಯಹುದ್ಯೊನೆ ಮಳಿನ ಚರ್ಚೆ ಕರ್ಯಾ ವರಿ ಸೈನಿಕೊನೆ ಘನ್ನಾ ದೊಕ್ಡಾ ದಿನ ತ್ಯುನೊಕ್ಹು ಸುಳ್ಳ ಕವಾಲಗಾಡಾನು ಉಪಾಯ ಕರ್ಯಾ. 13ತ್ಯುನೆ ಸೈನಿಕೊನೆ, "ರಾತೆ ಹಮೆ ಕ್ಹುರಯಲ ಟೈಮಮಾ ಯೆಸುನಾ ಶಿಶ್ಯಾ ಐನ ತಿನು ಅಂಗ ಕಾಳಿಲಿನ ಗಯಾ ಮನಕ್ಹೊನೆ ತಿಳ್ಸಾವೊ. 14ಎ ರಾಜ್ಯಪಾಲನೆ ಗ್ವತ್ತ ಥಯುಮ ಹಮೆ ತಿನೆ ಸಮಾದಾನ ಕರಿಯೆಸ ವರಿ ತುಮೊನೆ ಕಯುಜ಼ ತ್ರಾಸ ಥಯಾ ಬಗರ ದೆಕಿಲಿಯೆಸ” ಕೈನ ಕದ್ಯಾ.
15ಸೈನಿಕೊ ದೊಕ್ಡಾ ಲಿನ, ತ್ಯುನೆ ಕದಲ ತಿಮ್ಮ ಕರ್ಯಾ. ಎ ಕಾನಿ ಹಜು಼ನಲಕ್ಕಾಬಿ ಯಹುದಿಯೊಮಾ ಫೈಲ್ಯಲ ಛೆ.
ಯೆಸುನಿ ಲಾಸ್ಟನಿ ಅಪ್ಪಣೆ
16ತೆ ಥಯಲ್ಪರ ಗ್ಯಾರಾ ಜ಼ನಾ ಶಿಷ್ಯಾ ಗಲಿಲಾಯನೆ ಗೈನ ಯೆಸು ಕದ್ಯಲ ಡೊಂಗರಪರ ಗಯಾ. 17ಶಿಶ್ಯಾ ಡೊಂಗರಪರ ಯೆಸುನೆ ದೆಕಿನ ತಿನೆ ಆರಾಧನಾ ಕರ್ಯಾ. ತೆನೈಸೊ ದಕ್ಹಾ ಶಿಶ್ಯಾ ತೆಜ಼ ಕ್ಹರಿನೊ ಯೆಸು ವ್ಹೈ ಕವಾನು ಬರೊಕ್ಹೊ ಕರ್ಯಾ ನೈ. 18ತಿನಾಹುತಿ ಯೆಸು ತ್ಯುನೊಕನ ಐನ, ಸ್ವರ್ಗ ವರಿ ಎ ದುನಿಯಾನಿ ಕ್ಹಾರಿ ಅದಿಕಾರ ಮನೆ ದಿದಲ ಛೆ. 19ತಿನಾಹುತಿ ತುಮೆ ಗೈನ, ದುನಿಯಾಮಾ ರ್ಹವಾನಾ ಕ್ಹಾರಾ ಮನಕ್ಹೊನೆ ಮಾರಾ ಶಿಶ್ಯಾ ಕರೊ. ಬಾನಾ, ದಿಕ್ರಾನಾ ವರಿ ಪವಿತ್ರ ಆತ್ಮಾನಾ ನಾಮಪರ ತ್ಯುನೊನೆ ಬಾಪ್ತಿಸ್ಮಾ ಕರಾವೊ. 20ಮಿ ತುಮೊನೆ ಆಗನ್ಯಾ ದಿದ್ಯಲ ಕ್ಹಾರಾವೊನೆ ವಿದೆಲ ಥಾಯೆಲಿಂಗತ ಮನಕ್ಹೊನೆ ಉಪದೆಶ ಕರೊ, ಜಗತ್ತನು ಅಂತ್ಯ ಥಯೆಲಕ್ಕಾ ಹಮೆಶಾಬಿ ಮಿ ತುಮಾರಾ ಕ್ಹಾತೆ ರ್ಹೌಸ” ಕೈನ ಕದ್ಯೊ.
Currently Selected:
ಮತ್ತಾಯ 28: Srr25
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
The Sikkiligar Bible © The Word for the World International and Sikkiligar Bhasha Samiti, Madhya Pradesh, 2025
