Yowana 5
5
Yeesu kaawosya omurwaye
1Ejo jejire jaawa, Yeesu ˆnaagenda Yerusareemu mu‑chikukuru indebhe ya Abhayawudi. 2Mu‑Yerusareemu omwo, ryariga riri‑wo rirango rinene rinu eritogwa ati, Rirango rya Jinaama.#5:2 Omusi gwa Yerusareemu gwone gwariga gwiyindirwe orugo runu rwariga ruumbakirwe na amabhuyi. Orugo orwo rwariga ruri na amarango maafu. Bhuri rango ryariga riri na risiina ryaryo. Rirango rimwi ryatogwaga ati, Rirango rya Jinaama kwa okubha ryariga riri yeeyi na riguriro rinu bhaariga nibhagusya‑mo jinaama na ebhitunganwa ebhindi. Ringira Neemiya 3:1, 12:39. Ayeeyi na rirango eryo, ryariga riri‑wo ritanga rinene rinu risiina ryaryo mu‑nyaayika ya Echiyebhuraniya ni Bhetijaata. Ritanga eryo ryariga risingiiywe na amagaragariro gataanu ganu gaariga gagwatiriiywe na jingʼingi. 3Mu‑magaragariro ago, bhamaamaga‑mo abharwaye bhaafu. Bhaariga bhari‑mo abhawofu, abharema, na bhanu bhafuuwe emibhiri. [Bhaariga nibharindirira amanji gaserurwe, 4kwa okubha omwanya ogundi maraayika wa Nyamuwanga aariga ˆnaaja, ˆnaaserura amanji mw‑itanga eryo. Omurwaye unu aariga ˆnaabha wa okwamba okwingira mu‑manji omwo, oyo niwe aariga ˆnaawora obhurwaye bhunu aariga ari nabhwo.] 5Mu‑bharwaye abho, aariga ari‑mo omumura umwi unu aariga ari murwaye kwa omwanya gwa miguuga makumi gasatu na etaanu na esatu. 6Niwo Yeesu ˆnaamurora amaamire awo. ꞉Aasombookeeywe ati omuunu oyo ni murwaye kwa omwanya omureera, ˆnaamubhuusya ati, “Angu, oweenda okuwora?” 7Omurwaye oyo ˆnaamusubhya ati, “Mwami, omwanya gunu amanji agaserurwa, anye nitari na omuunu wa okunyingisya mw‑itanga. Omwanya gunu enibha nichagenda okwingira mu‑manji, omuunu owundi kaaja na okuntangatira okwingira‑mo.” 8Niwo Yeesu ˆnaamubhwira ati, “Imereeguru! Ugege riraro ryawo, uribhate.” 9Awoawo, omuunu oyo ˆnaawora, ˆnaagega riraro ryaye, ˆnaamba okuribhata.
Nawe omusango gunu ꞉gwakorekeene ku‑rusuku rwa Isabhaato.#5:9 Isabhaato. Ku‑Bhayawudi ni rusuku rwa okuramya Nyamuwanga na okwisya omwoyo era. Ku‑meeresyo amaafu, ringira mu‑Meeresyo inguru ya Emisango Emikomeeye. 10Kurwa ejo, abhatangasya bha Abhayawudi nibhabhwira omuunu unu ꞉aawosiibhwe ati, “Reero ni rusuku rwa Isabhaato. Ebhiraagiro bhyeswe bhitakuchiikirisisya okugega riraro.” 11Nawe omwene ˆnaabhasubhya ati, “Omuunu unu aamosya, niwe aambwira ati, ‘Gega riraro ryawo, uribhate.’” 12Abhatangasya abho nibhamubhuusya ati, “Angu, niga unu aakubhwira okukora kutyo?” 13Nawe omuunu oyo ꞉ataamenyere unu ꞉aamuwosiisye, kwa okubha Yeesu aariga atakubhonekana rindi okuruubhana na echise echinene cha abhaanu bhanu bhaariga bhari awo.
14Ejo jejire jaawa, Yeesu ˆnaasongʼana omuunu oyo mu‑rubhuga rwa Riyekaru, ˆnaamubhwira ati, “Tegeresya, woori waawora. Waasiga okukora ebhibhiibhi rindi, kwa okubha ukagenderera okukora ebhibhiibhi, owuja okunyaaka okukira kutyo waariga nuunyaaka ku‑bhwambiro.” 15Awoawo, omuunu oyo ˆnaagenda ku‑bhatangasya bha Abhayawudi, ˆnaabhabhwira ati, Yeesu niwe ꞉aamuwosiisye.
16Niwo abhatangasya bha Abhayawudi nibhaamba okunyaasya Yeesu, kwa okubha aawosyaga abhaanu ku‑rusuku rwa Isabhaato. 17Nawe Yeesu ˆnaabhabhwira ati, “Raata waani kaakora emirimu siku joone, ogwo nigwo ogukora anye wone nikore rwa omwene.” 18Mbe, okuruubhana na ejo, abhatangasya bha Abhayawudi nibhaamba okuyenjeresya muno injira ya okwita Yeesu. Jitari ku‑songa ya okunyamura orusuku rwa Isabhaato era, tari kwa okubha wone ꞉aayikire ati, Nyamuwanga ni Semwene. Mu‑kwayika kutyo, aariga ˆneeringʼaanya na Nyamuwanga.#5:18 Ringira Abhafiriipi 2:6.
Obhuturo bhwa Omwana wa Nyamuwanga
19Yeesu ˆnaabhwira abhatangasya abho ati, “Ni chimari enibhabhwira ati, Omwana wa Nyamuwanga atakutura okukora omusango gwonegwone ku‑bhuturo bhwaye. Tari kaakora era jinu kaarora Esemwene ˆnaakora. Joone jinu Esemwene kaakora, nijo Omwana wone kaakora. 20Okubha Raata keenda Omwana waaye, niyo isonga kaamweresya emirimu joone jinu kaakora. Ka wone, Esemwene kaja okumweresya kutyo kaja okukora emisango emisito okukira jinu aakorere, ka emwe omuja okuruguura muno. 21Rwa kutyo Raata kaasuurura abhafuuwe na okubhayaana obhuwanga, nikwo kutyo Omwana wone kaayaana obhuwanga bhwa akajaanende koone abhaanu bhanu omwene keenda ayaane. 22Raata atakuramura omuunu woonewoone, tari ayaaye Omwana waaye obhuturo bhwone bhwa okuramura abhaanu. 23Raata ꞉aakorere kutyo, korereki abhaanu bhoone bhayaane Omwana echibharo rwa kutyo abhayaana Esemwene echibharo. Omuunu woonewoone unu atakuyaana Omwana echibharo, oyo atakuyaana echibharo Raata unu ꞉aamutumire.
24“Ni chimari enibhabhwira ati, omuunu woonewoone unu kaategeresya emisango jaani na okwikirisya Nyamuwanga unu ꞉aantumire, oyo ari na obhuwanga bhwa akajaanende koone. Omuunu oyo atariramurwa, tari aambukire okusooka mu‑kufwa na okwingira mu‑bhuwanga bhwa kajaanende koone. 25Ni chimari enibhabhwira ati, omwanya oguuja, ka wone gwakingire, gunu abhafuuwe bharyungwa obhuraka bhwa Omwana wa Nyamuwanga. Niwo abhaanu bhanu bharibhaga nibhamutegeresya, bharibhaga na obhuwanga bhwa akajaanende koone. 26Rwa kutyo Raata ari bhusimukwa bhwa obhuwanga bhwa akajaanende koone, nikwo kutyo wone akorere Omwana waaye okubha obhusimukwa bhwa obhuwanga obhwo. 27Ka wone, ayaaye Omwana waaye obhuturo bhwa okuramura abhaanu, kwa okubha niwe Omwana wa Omuunu. 28Mwasiga okuruguura inguru ya emisango ejo! Omwanya oguuja gunu abhafuuwe bhoone bharyungwa obhuraka bhwa Omwana wa Omuunu, 29bharisuuruka na okusooka mu‑fwa jeebhwe. Abhaanu bhanu bhaakoraga emisango ja ekisi, bhariyaanwa obhuwanga bhwa akajaanende koone, nawe bhanu bhaakoraga ebhibhiibhi, bhariramurwa.”
30Yeesu ˆnaagenderera okwayika ati, “Gutari‑wo omusango gwonegwone gunu enitura okukora ku‑bhuturo bhwani era. Enisoosya indamu ku‑bhaanu okuruubhana na kutyo Raata kaambwira. Indamu yaani niyo ya rirenga, kwa okubha nitakukora rwa kutyo anye omwene eneenda, tari enikora rwa kutyo Raata unu ꞉aantumire keenda.
31“Araabha nikeesoosisya obhubhambaasi anye omwene, mutakutura okwikirisya ati, obhubhambaasi bhwani ni bhwa chimari. 32Nawe ari‑wo omubhambaasi owundi unu kaasoosya kw‑imwe obhubhambaasi inguru yaani, niwe Raata. Anye nimenyere ati, obhubhambaasi bhwaye ni bhwa chimari. 33Emwe ꞉mwatumire abhakosi ku‑Yowana Omubhatiija, omwene ˆnaasoosya obhubhambaasi bhwa echimari inguru yaani. 34Anye nitakwiyikanya obhubhambaasi bhwa abhaanu, nawe enibhabhwira emisango ejo joone, korereki muture okuchungurwa. 35Yowana Omubhatiija aariga ari rwa idara inu eyaaka na okumirika mu‑chisuute, ka emwe ꞉mwakondereeywe obhweru obhwo kwa omwanya mufuyi era. 36Nawe obhubhambaasi bhunu anye niri nabhwo ni bhunene okukira bhwa Yowana bhurya, kwa okubha emirimu jinu Raata ꞉aanaaye okukuumisya, nijo ejeeresya ati, Raata niwe ꞉aantumire. 37Noorwo Raata omwene unu ꞉aantumire, niwe aasoosya kw‑imwe obhubhambaasi inguru yaani. Emwe muchaariga okuungwa obhuraka bhwaye, noorwo okurora orususo rwaye kutyo ruri. 38Omusango gwaye, gutari mu‑myoyo jeemwe, kwa okubha mutakwikirisya anye unu ꞉naatumirwe kw‑imwe.
39“Omwikomeesya okuyenjeresya mu‑Bhikaame Ebhyeru, kwa okubha omwitogera ati omutura okubhona‑mo obhuwanga bhwa kajaanende koone. Mbe woori, Ebhikaame ebhyo nibhyo ebhimbambaarira anye! 40Nawe mutakwenda okuuja kw‑anye, korereki mubhone obhuwanga bhwa kajaanende koone. 41Anye nitakwiyikanya okubhona echibharo okusooka ku‑bhaanu. 42Nawe anye nimenyere kutyo muri, nimenyere ati, eryenda rya Nyamuwanga ritari mu‑myoyo jeemwe. 43Anye niijire ku‑bhuturo bhwa Raata waani, nawe emwe omurema okundamira. Nawe omuunu owundi akaaja ku‑bhuturo bhwaye omwene, omuja okumuramira. 44Emwe mwendere okukuuyibhwa na abheejaanyu, nawe mutakwikomeesya okuyenja echibharo chinu echisooka ku‑Nyamuwanga omwene. Woori, omutura kutiki okunyikirisya? 45Mwasiga okwitogera ati, anye enija okubhasitaaka ku‑Raata. Unu kaja okubhasitaaka ni Muusa, kwa okubha omwene oyo niwe omwiyikanya. 46Araabha chimari mukeekirisiisye emisango ja Muusa, mbe anye wone mwakanyiikirisiisye, kwa okubha Muusa ꞉aakaamire emisango inguru yaani. 47Nawe araabha mutakwikirisya emisango ja Muusa, mbe omutura kutiki okwikirisya emisango jaani?”
Currently Selected:
Yowana 5: jit
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
