Ap'u 9
9
Atua ien turanien m'ei a Nua
1 #
Ap'u 1:28. Atua imhmah an a Nua m'er a natn dui, kavr anr, kavr ti a, “A netm'i apavstudau kavnelnal kavlinkar nadep'. 2Si dm udlani arna nadep', m'anh udlani avtetv eia, si udlani avharev' arna nadep' m'er tilau udlani al nata, apavdedrn kavrdedrn a kam'i. Ntaur al lm'am'i. 3Si udlani avv'el kavsilv' apavv'i tim'ah pavhani. Ntu si udlani a kam'i inep'a nut nttu sera nava nai udlani a kam'i inap'ei. 4#Livai 7:26,27; 17:10-14; 19:26; TVH 12:16,23; 15:23.V'eti mavhan m'dah a sei m'a din, sena ti din iv'i silv'ienan. 5Nvrdaui, si dm udlani la apavani ti di silv'ienam'i ipararev' ha, p'utakm anr sanan, m'er m'ertu udlani la apavrp silv'ienar tv'alr ha, p'utakm anr sanan. 6#Avruh 20:13; Ap'u 1:26.M'ertu la iparp m'ertu kani ti din ipararev' ha, m'ertu iparpi ml a ti din ipararev'. Sena ti Atua ien m'ertu iv'i m'lkn. 7#Ap'u 1:28.V'eti kam'i a netm'i apavstudau kavnelnal. Pavlev' a netm'i apavstudau arna nadep', kavnelnal.”
8Laha, Atua ivr an a Nua m'er a natn dui kavr ti a, 9“Pavlei, kana p'ani ti turanienak ipap'tir asnm'i m'er a netm'i udlani ipatauatah a kam'i, 10m'a si udlani isilv' kalak asnm'i, m'anh udlani, si slm udlani m'er si dm udlani arna nadep', si udlani la avaan al nauak ha, si dm udlani arna nadep'. 11P'en turanienak ipap'tir asnm'i. Nauei ikalinkar nadep' ml karp silv'iena si udlani isilv', nauei ikalinkar nadep' ml kutakm ani udlani.”
12Atua ivri ml kavr ti a, “Ki laha iv'i sei iv'iv'en ti turanienak ipap'tir arna p't nut nak m'a kam'i m'er si udlani avsilv' la avlak asnm'i ha, m'er a netm'i dav'a ikahiris naran. 13Nen nev'ielak eia arna p'knaran. Ki lera ipav'i sei ipav'iv'en ti turanienak ipap'tir arna p't nut nak m'a nadep'. 14Dav'a naran p'ani ti p'knaran ipanpakar nadep', apala nev'iel arna p'knaran. 15Laha, Kana p'ev'ahur turanienak ip'tir a p't nut nak m'a kam'i m'er si udlani isilv'. Nauei ikalinkar nadep' karp si udlani isilv' ml naran kinkin. 16Nev'iel ipater eia arna p'knaran, laha naran p'ep'ei p'ev'ahur turanien la ip'tir arna p't nut nak nv'i Atua, m'er si udlani avsilv' kavlak arna nadep' ha.” 17Laha, Atua ivr an a Nua kavr ti a, “Ki laha iv'i sei p'ani kav'iv'en turanien la nani ip'tir arna p't nut nak m'a si udlani isilv' arna nadep'.”
A Nua im'nm'n
18A natn a Nua avaan al nauak avv'i a Sem, a Ham m'ei a Sep'et. A Ham iv'i a tetian a Kenan. 19Hir artl avv'i a natn a Nua, kavv'i pla nelnal udlani avlak unanut arna nadep'.
20Laha, a Nua ima kav'i dui ien pitvet kalu nahau iv'i krep. 21Laha, im'n ui krep lera kinkin kam'nm'n kahsla klusan al nmah kanuisan. 22Dav'a, a Ham, a tetian a Kenan, ila p'akn a tetian ti imalmal kavr anr tv'aln arru arlak av'aran. 23Laha, a Sem m'ei a Sep'et arlev' kalik kartaui arna var, karv'el kartetvan tahr kartukar p'akn a tetiar la imalmal hara. Artetvan tahr a ti amarla ti a tetiar imalmal.
24Dav'a, naran naui m'iel iarpi ml, a Nua ithal karndu sei a natn dui titiatah iani asnn, kavr ti a, 25“A Kenan ipalak a nv' nl reran Atua. Asnr tv'aln, hin ipav'i dui na m'akarienar m'ertu na m'akarien.”
26Ivri ml kavr ti a, “Npatei a Mlin Eia, la iv'i Atuan a Sem ha. A Kenan ipav'i dui na m'akarienan. 27Atua ipani ti nut huan a Sep'et ipama kalil mau, dav'a hin ipalev' nadep' nmah kanuisan a Sem avrater aranan. Laha, a Kenan ipav'i dui na m'akarienan.”
28Itauatah a ti nauei m'a nata ilinkar nadep', a Nua isilv' pai inelnal iv'atl pln inellm' (350) aranan ml. 29Paian a Nua udlani inelnal iv'asav'et pln inellm' (950), sarei im'a.
© 2023 Presbyterian Reformed Church of Australia
