Ap'u 7
7
Nata m'a nu ilinkar nadep'
1 Sarei, a Mlin Eia ivr an a Nua kavr ti a, “Nakm m'er nl nam'elam udlani pavrama al nauak, sena ti nla ti nakm kviviln arna nahk asnr m'ertu avsilv' hilaha. 2Palev' nki ipasaru arna si slm udlani iviviln a ti apahani kalev' pua nen m'a prapar nen. Asnr si dm udlani iaviviln a ti apahani palev' nki iparu, pua nen m'a prapar nen. 3Palev' nki ipasaru arna m'anh udlani itetv eia, pua nen m'a prapar nen, a ti a natr apavsilv' arna nadep'. 4Sena ti napn ipasaru ipav'siau, Kana p'ani ti nu ipau arna nadep' arna napn ipanelv'a (40) m'a nut lihat ipanelv'a (40). Laha, p'utakm a si udlani nani avsilv' a ti apavhiris arna nadep'.” 5Laha, a Nua ien si udlani inep'a nut a Mlin Eia ivr ani inap'ei. 6A Nua paian inelnal iv'alm'sei (600) naran nata m'a nauei ilinkar nadep'.
7 #
Mat 24:38,39; Luk 17:27. Laha, a Nua iv'a al nauak, hin, m'er a natn dui udlani, a naun m'er a naur a natn, sena ti nata m'a nauei ipalinkar nadep'. 8Si slm udlani nki iviviln a ti apahani, si dm udlani nki iaviviln a ti apahani, m'anh udlani, m'a si udlani avharev' arna nadep', 9pua nen m'a prapar nen, avrama asn a Nua, kavruru kavrav'a al nauak, inep'a nut Atua ittu sera v'nen an a Nua inap'ei. 10Naran napn isaru iv'siau, nauei m'a nata ima kalinkar nadep'. 11#2 P'ita 3:6.Naran paian a Nua inelnal iv'alm'sei (600), arna napn inal lman isaru, arna tv'el nal na pai lera, arna napn lera, nauei udlani itpeia dan al nadep', laha Atua iani ti nu iu istudau, inep'a ti iela uidua na nut eia. 12Dav'a nu iu arna nadep' nut ren inelv'a (40) m'a nut lihat inelv'a (40).
13Arna napn lera, a Nua m'er a natn dui, a Sem, a Ham, a Sep'et, m'ei a naun a Nua, m'er a naur a natn artl, avrav'a al nauak. 14Hir udlani avrav'a a nln, m'a si dm udlani avviviln a p'klr p'sev', si slm udlani avviviln a p'klr p'sev', si udlani avharev' arna nadep' avviviln a p'klr p'sev', m'a m'anh udlani avviviln a p'klr p'sev', si udlani la nil heiar iak ha. 15Si udlani avsilv' avruru kavrama asn a Nua kavrav'a al nauak. 16Hir udlani avrav'a eim avv'i pua nen m'a prapar nen, inep'a nut Atua ittu sera v'nen ani inap'ei. Sarei, a Mlin Eia ip'leskar liu itauatah ani.
17Laha, nauei m'a nata ilinkar nadep' napn inelv'a, kadama kalil dav'a karmanla nauak iv'a eia. 18Nauei m'a nata ima kalil kahua arna nadep', laha nauak iv'el eia arna nata. 19Nauei m'a nata ima kahua ihuadau arna nadep' dav'a kalinkar ptha lilil udlani iter arna nadep'. 20Nauei m'a nata ilinkar ptha udlani kasiv' mita isaru. 21Si udlani la p'akn iak kav'el arna nadep' ha, m'anh, si slm, si dm, si udlani iharev' arna nadep', m'er arm'ertu udlani, avrhapep'n udlani. 22Si udlani im'im'in kasilv', si udlani ilak arna nadep' uaki, avrhapep'n udlani. 23Si udlani avsilv' arna nadep' avhiris, m'ertu, si slm, sei avharev', m'a m'anh avtetv eia, si udlani lera avhiris arna nadep'. A Nua uaki, m'a si udlani avlak m'ei al nauak, hir avsilv'. 24Nata iuakar nadep' dav'a napn inelnal iv'amk pln inellm' (150).
© 2023 Presbyterian Reformed Church of Australia
