iMatiu 1

Unuẹkpẹ oyi iJesu iKirisiti

(iLuk 3.23-38)

1Ona o khi akẹkẹ shi ekẹ abi unuẹkpẹ oyi iJesu iKirisiti Omi iDefidi ni ọ khi Omi Aburaamu o li zẹ.

2Aburaamu ọ bia Aziki,

Aziki ọ bia iGiekọpu,

IGiekọpu ọ bia iJuda

ali inyọghuo ọli nya.

3IJuda ọ bia iPẹrẹzi

ali iZẹra, ọkpotso ni ọ bia wẹ,

a lu iTama.

IPẹrẹzi ọ bia Ezirọni.

Ezirọni ọ bia iRamu.

4IRamu ọ bia Aminadabu.

Aminadabu ọ bia iNashọni,

iNashọni ọ bia iSalimọni.

5ISalimọni ọ bia iBoazi,

ọkpotso ni ọ bia iBoazi,

a lu iRe-abu.

IBoazi ọ bia Obẹdi

ni a lu inyọli iRutu.

Obẹdi ọ bia iJese.

6IJese ọ bia iDefidi

ni ọ khi oghie.

IDefidi ọ bia iSolomoni

ni inyọli ọ kpẹ khi ughuẹ Uraya.

7ISolomoni ọ bia iReobuamu.

IReobuamu ọ bia Abija.

Abija ọ bia Asa.

8Asa ọ bia iJeoshafati.

IJeoshafati ọ bia iJeoramu,

iJeoramu ọ bia Uzaya.

9Uzaya ọ bia iJotamu.

IJotamu ọ bia Aazi.

Aazi ọ bia Ezekaya.

10Ezekaya ọ bia iManasẹ,

iManasẹ ọ bia Amọni.

Amọni ọ bia iJosaya.

11IJosaya ọ bia iJekonaya

ali inyọghuo ọli nya

ẹghẹghẹ ni a rọ muno

ẹgbọ iZirẹni ighumha je iBabilọ.#1.11 Li zẹ 2 Ighie 24.14-15; 2 Okhẹ 36.10; iJere 27.20.

12Abi e ke rọ rọte iBabilọ jele,

iJekonaya ọ bia iShalitiẹni.

IShalitiẹni ọ bia IZerubabẹli.

13IZerubabẹli ọ bia Abiudu.

Abiudu ọ bia Eliakimu.

Eliakimu ọ bia Azori.

14Azori ọ bia iZadọki.

IZadọki ọ bia Akimu.

Akimu ọ bia Eliudu.

15Eliudu ọ bia Eliaza.

Eliaza ọ bia iMataani.

IMataani ọ bia iGiekọpu.

16IGiekọpu ọ bia iJosẹfu,

ni ọ rue iMeli inyi iJesu shi

ni a lu iKirisiti.

17Rọte ẹghẹghẹ Aburaamu bhale ẹghẹghẹ iDefidi, e khi agbhotu igbẹne. Ke rọte ẹghẹghẹ iDefidi bhale ẹghẹghẹ ni a rọ muno ẹgbọ iZirẹni ighumha je iBabilọ, e khi agbhotu igbẹne. Ke rọte ẹghẹghẹ iBabilọ bhale ẹghẹghẹ ni a rọ bia iJesu iKirisiti, e gbo li khi agbhotu igbẹne ghọ.

Abi a li bia iJesu iKirisiti

(iLuk 2.1-7)

18Abi a li bia iJesu iKirisiti na. Neni iMeli inyọli ọ ngeli na iJosẹfu ni ọọ gue ọli. A bhale ya ẹ khi iMeli ọọ mẹ ọmọ ni ọ rọte obọ oyi Ayẹmhẹ-nọ-pfuasẹ bhale.#1.18 Li zẹ iLuk 1.27. 19Itobọ khi iJosẹfu ughuọli, ọ khi ọgbọ ni ọ guẹ angeli, ọọ sali shi udu khi lọli ya kuegbe-a ri imeli shi ekẹ, ini lọli khi yẹghẹ ọlia ukpẹloe agbọ.

20Abi ọ lii sa ona shi udu, agẹni ọ bhale deba li alo ẹlena, ọọ li, “IJosẹfu omi iDefidi, khi ke zẹ ni ulishi o mu ẹ abi u li ya rue iMeli shi ughuẹ, irari khi ọmọ ni ọọ mẹ, obọ oyi Ayẹmhẹ-nọ-pfuasẹ ọ te bhale. 21Ọ ya bia ọmọ ọmọse, eva ni u ya lu ọni ọmọ khi iJesu, irari khi ọ ya mie ẹgbọ eyọli olamhẹ pfuese.”#1.21 Li zẹ iLuk 1.31.

22Eri a mẹ enana ni a rọ bhẹ ya ẹ khi ingmemhi ni Ẹshinẹgba ọ rọte unu oyi ọmekẹguele ngme, ni e bhale ya tsẹ. Ni ọọ, 23“Ghe khẹ! Ọmueshi ni ọa lẹ deba ọmọse ghue ọ ya ke mẹ ọmọ, ọ bia ọmọ ọmọse, eva oyọli a ya ke lu iManuẹni.”#1.23 Li zẹ Aza 7.14; 8.8,10. Abi ona o ngme khi, “Ẹshinẹgba ọ nu awa la.”

24Abi iJosẹfu ọ rọ guale, ọ riẹlẹ emini Ọnọmhuẹ ọ mhẹsẹ na li ọ riẹlẹ, ọ rue iMeli ughuẹ abi Ẹshinẹgba ọ gueyẹ ọli. 25Eri-tsẹ khi iJosẹfu ọa tigbe lẹ deba iMeli, ramhi ni ọ rọ bia ọni ọmọ ọmọse. IJosẹfu ọ lu eva oyi ọni ọmọ, iJesu.#1.25 Li zẹ iLuk 2.21.

Currently Selected:

iMatiu 1: atgNT

ማድመቅ

Copy