Luk 24
24
Jisɔs kɔ ɔshɔwa ko obo
1Igwu tsi ittitso kɨ ngwu nsenaffa, ke ekpewa irɨng-irɨng#24:1 Ke ekpewa irɨng-irɨng Ɛwɔngkwoga kwu tsa Aju ini ittitso kɛ ɛtsɔga tsɨ ngwu nsasɨn tar ete ewem kɛ ɛtsɔga tsɨ ngwu nsenaffa. Uppanɨng ata ga kɔ ɔwang kwa aba annɔng Jisɔs ekpewa irɨng-irɨng kɨ ngwu tse eyong ɛwɔngkwoga gwu., upanɨng ataga akwongtɔng pa aba alew irɨg pa abɛ ka adda, aba atɨma apfona ga ke eppekwur. 2Aba ase ɛta tsa aba abuw ke eppekwur, abɛ ka atsɛ anuna atsog ɔkanɔkan, 3ibe ra aba anwa ke appekwur, abɛ ɛkpakpa tsɔ Ɔvaar Jisɔs adag nassa. 4Masɛ akwɛ okkon bɛ, adwunɨng affa aba akwa ayɨn, anɔma apyupyɛ pyɛ ɛnna dambɛ ekpon zɔ, aba akwa abe abanga abubɛ. 5Ozora ɔtɔw bɛ, aba ataga ntitiga ra abɛ akuwa ki iseg, anang mbo aben bɛ abɛ, “Bugudɨg gwɔ kwa abanga ana aror ɔnang kwu unɨng ka akpen ki iwang ra apfuranang? 6Mama ɔdag kode, kɔ ɔshɔwa, zɨma otse kwo oteg banga, ibe rɛ utɨm unɨng banga abubɛ ga Galili. 7‘Unwa kwu Udwunɨng abɛ na ataga anang aluloma kɨ mbɔg, abɛ ammɨn-ɛ kɛ ɛkpaga, sɔ ɔgba ngwu nttan nɔkɔrɔ ɔshɔwa ɔmanga unɨnga ka akpen.’ ” 8Aba azɨma itɔnga rɛ.
9Sa aba akwɨn ke appekwur, aba akwa ateg atɔmɔtɔm pɛ Jisɔs zowazan idɨg ra aba ase, ɔttara ka anang ɔdwag. 10Upanɨng mba ode Meri Magdalin ɔttara Johana ɔttara Meri ɔkka kwɛ Jems, ɔttara upanɨng ɔdwag pa attar pa abɛ na ateg atɔmɔtɔm pɛ Jisɔs idɨg ndo. 11Itɔnga ra aba awang iker bɛ idɨg azaga, abɛ na tsera abubɛ. 12Pitɛ ubɨna obe, ɔraw opfona ga ke appekwur, owowa-owowa umyɨnga kɛ ɛtanga, ose ivara kpa wur mɨntsen, ɛma ɔmanga innam, akwɛ nokkon-ɛ abɛ bugudɨg gwɔ akwɛ ku uyɨna.
Jisɔs ɔkɔga ɛma oyen ɔnang abuwinnam affa
13Igwu nzo zan, abuwinnam affa pa Jisɔs abɛ na pfona ko ofon kwo okpen Ɛmaɔs, ɔttɔg fa ammal asenaffa sa abɨn ka Jɛrusɛlɛm. 14Abɛ na atɔnga anang ayog ki idɨg nda ra arɛ ki iyɨna. 15Masɛ abɛ na atɔnga, atsera anang ayog, Jisɔs ukwu ofor bɛ, osenga abubɛ. 16Ubɨnɔkpaabyi ussi bɛ abɛ anang-ɛ atɨn. 17Jisɔs ɔbɔw bɛ abɛ, “Bigidɨg dɔ ra abanga na atɔnga ayog abɛ sa abanga na asenga?”
Aba abe ɔwang gwan ititiga ikwosisi, ikwosisi. 18Oyog wan kwo okpen Klopas ɔbɔw-ɛ abɛ, “Ɔma wɔ ade ukuken wan mɨntsen ma ka Jɛrusɛlɛm sa kwa ana idɨg nda ra arɛ kiyina asong?” 19Ɔbɔw-ɛ abɛ, “Bigidɨg?” Aba ateg-ɛ, “Idɨg nda ri ibang Jisɔs Kwɛ Nazarɛt, kwo ode otegɛkkawa kwu Ubɨnɔkpaabyi, kwɔ ɔkam ɛffa kɔ ɔtɔnga ɔttara ki idɨg ri ititam ussa ki ititiga tsu Ubɨnɔkpaabyi ɔttara ka ayoganang ibɨng. 20Ɔttara otsekwɛ avaar pa affɔnɛzza pa amana ɔttara atsonang aba ataga anang bɛ, aba ata ammɨn-ɛ kɛ ɛkpaga. 21Abba antsog itsen abɛ ɛma wɔ mɔ ode ɔkkana kwi Izɨrɛl, so oyong ngwa, tsemma no ode ngwu nttan ri idɨg nda iyɨn. 22Sɔ ɔjag muma, upanɨng ban pa atar mana ki ikana. Abɛ assi idɨg ri ikkon mana, sa aba akwɨn ge appekwur ma ke ekpewa irɨng irɨng, 23abɛ aba upfura kpakpa nassa. Sa aba ammang, abɛ akwa ateg mana abɛ abɛma ase atɔmɔtɔm pu Ubɨnɔkpaabyi pa ateg bɛ abɛ Jisɔs kɔ ɔshɔwa unɨnga ka akpen. 24Ayog pa amana ban aba ayɨn attara ase ke appekwur, aba ase ku udɨg ɔkka tsekwɛ upanɨng mbo aba ateg bɛ, udɨg gwan, abɛ Jisɔs nassa.”
25Jisɔs oben bɛ abɛ, “Abangama agwungkpa, abanga itɔnga ɛwɛrɛwɛrɛ kana atsera ra ategnkkawa pu Ubɨnɔkpaabyi atɔng. 26Abanga ka asong abɛ Krais nuse irem nda ibɨng pɛrɛ aba anang-ɛ abarada pɛ?” 27Jisɔs utitso ogwonga oteg bɛ ɔbanga ɛma oyen otse kwa aba akkɛr ka anwɛr pa Mosis ɔttara ka anwɛr pa ategnkkawa pu Ubɨnɔkpaabyi ibɨng.
28Masɛ abɛ ka afora ko ofon kwa abɛ na ayɨn, Jisɔs ussi dambɛ ɛma mo oyong ofon ngwo. 29Aba atsɨn-ɛ abɛ “Nɨnga mama abbabɛ, ɛtsɔga zɔ ma, igwu ɛnam ɛra.” Jisɔs ɔtwan abubɛ utu uwung.
30Sa abɛ ata atsi utsapfɛ, Jisɔs ɔtaga brɛd, ɔzɔm atɨm, omeg ɔnang bɛ. 31Atsen pa abɛ akwonga, aba atɨn-ɛ, ɛma ɔfara urɨg bɛ. 32Aba awag atɔnga abɛma oyen abubɛ abɛ, “Ettem amana nelewa sɛ ɔnɔ ogwonga itɔnga nda ra aba akkɛr kɨ nnwɛr kwu Ubɨnɔkpaabyi ɔnang mana?” 33Aba abɨna ma kɛ ɛtwag aba akwuna ka Jɛrusɛlɛm, aba kwa ase atɔmɔtɔm pɛ Jisɔs zowazan, aba anɨnga ɔwang gwan ɔttara ka anang pa anɨng abubɛ. 34Abɛ na atɔnga, “Ku udɨg ɔkka, Ɔvaar kɔ ɔshɔwa ko obo, kɛ ɛma oyen ɔtaga ɔkɔga Saimɔn.” 35Anang mbo affa aba ateg idɨg ri iyɨn bɛ ke eden, otsekwɛ aba atɨn Ɔvaar Jisɔs ibe rɛ omeg brɛd ɔnang bɛ.
Jisɔs uyɨn ɔkɔga abuwinnam pɛ
36Masɛ abɛ na ateg ayog idɨg ndo, Jisɔs ukwu uyɨn obe ma abubɛ, oben bɛ, “Ɔkpakpa dɨr unɨnga abangama abubɛ.”
37Ozora ussi bɛ, ɛkpakpa eppe bɛ, abɛ atan abɛ abɛma ase upfuranang. 38Oben bɛ abɛ, “Bugudɨg gwɔ no ozor banga, ode yan kwa abanga na akkara ɛmma kɨ nttem? 39Akker-m ma kɨ mbɔg ɔttara kɨ nfogkpatwak na ase abɛ amma oyen wɔ, addan-m abanga ase, ɔkpakpa ɛkpakpa ɔttara ka akaw kɔ ɔkam tsekwɛ amma nkam.”
40Su ukkɨm ɔtɔnga ngwo, ɔkɔg bɛ mbɔg rɛ ɔttara kɨ nfogkpatwak. 41Ɔkwɔn ode abɛ aba ataga atsera, ukwur olew ɔttara so okkon bɛ, ɔbɔw bɛ abɛ, “Abanga akam utsapfɛ ma pfa abanga ma atsi?” 42Aba anang-ɛ eten tsa abɛ kawawa. 43Ɔtaga utsi ma ki ititiga tsa abɛ.
44Oteg bɛ abɛ, “Mama wɔ ode itɔnga ram rɛ wɛrɛ nteg banga, idɨg ndo ibɨng arɛ ni iyɨn tsekwɛ aba akkɛr kɨ inyɨna tsɛ Mosis ɔttara ka anwɛr pya ategnkkawa pu Ubɨnɔkpaabyi ɔttara anwɛr pyɛ Mmang.”
45Ogwong bɛ nttem fasɛ ɔttan bɛ ku nnwɛr kwu Ubɨnɔkpaabyi. 46Oteg bɛ abɛ, “Abɛ ka akkɛra abɛ Krais nɔ ɔdɔw irem ɔttara mɔ ɔshɔwa ko obo sɔ ɔgba ngwu nttan. 47Anang ateg ɔnang kwidede abɛ awag akpen fasɛ Ubɨnɔkpaabyi ubɨna ɔnang bɛ, ke etse tsɛ, abɛ atitso ma ka Jɛrusɛlɛm. 48Abanga ade attɛnsɛ ki idɨg nda, abanga ateg ayog. 49Amma nɨntɔm ɔttɔg pfa Adere oben abɛ mɔ ɔnang banga ntsen banga, abanga anɨnga abɨn ma ko ofon tar ɛffa ikwu ekew banga.”
Jisɔs opfona kɛ ɛrang
50Jisɔs utɨma abɛ aba apfona ga Betani, ɔtaga mbɔg ɔtɔga kɛ ɛrang ɔkwɔ ɔzɔm atɨm zuwa ɔnang bɛ. 51Masɛ ɔnɔ ɔzɔm atɨm ɔnang bɛ, ubɨna urɨg bɛ, Ubɨnɔkpaabyi udɨr-ɛ opfona kɛ ɛrang. 52Aba akpɨg-ɛ, aba ammanga akwɨna ka Jɛrusɛlɛm olew pfi ititam apfupfɛ. 53Aba atɨma ibe ra abɛ ibɨng abɛ na attag Ubɨnɔkpaabyi kɔ ɔtsɔm kwa atɨm pɛ.
©️2022 Luke Initiative for Scripture Translation
