Luk 22
22
Judas otsera abɛ okkpe Jisɔs
1Ibe rɛ anang pi Izɨrɛl na si Elowa tsɛ Brɛd#22:1 Elowa tsɛ Brɛd Kɛ ɛshagwu nzama, anang pi Izɨrɛl ana assi elowa abɛ azɨma otse kwa araw ki Ijip. Sa abɛ na araw abɛ fɨna atɨga abɛ brɛd ubur pɛrɛ aba assi wɛ. Ma ke elowa nza abɛ ana atsi brɛd kwɔ ɔnanu ubura aba azɨma okpe nzo. kwa abɛ na ɔttɔg pfu unu uburubur na aka ke effora, elowa nzo aba agba ajer tse Ezzega. 2Avaar pa affɔnɛzza ɔttara ka akpewinyɨna tsɛ Mosis abɛ na aror eden sa abɛ ma afɔ Jisɔs, ozora ussi bɛ ukwurabɛ abɛ narora abɛ anang asonga. 3Sɛtan ɔkwɔ ɔnwa Judas kwo okpen Iskariyɔt, ɔtɔmɔtɔm wan kwi ikana zowaffa. 4Judas ubɨn okewa avaar pa affɔnɛzza ɔttara atsonang pɛ na atɨg ɔtsɔm kwa atɨm ɔttara ɔtɔnga abubɛ otsekwɛ ɛma mɔ ɔtaga Jisɔs ɔnang bɛ aba afɔ. 5Olew bɛ, aba atsera akpog pa abɛ ma anang-ɛ. 6Ɛma otsera, oror ɛwang tsɛ ɛma mɔ ɔnang bɛ Jisɔs ki iduwa.
Jisɔs utsi utsapfɛ ɔttara abuwinnam pɛ
7Igwu tsɛ Elowa tsi Brɛd kwa abɛ na ɔttɔg pfu unu uburubur na aka ekwe ewem, ibe ra abɛ na afɔ ɔrɔmaan nwa kwe Ezzega. 8Jisɔs ɔtɔma Pitɛ ɔttara ka Jɔn abɛ, “Asɔng ata addo ɔwang kwa amana ma atsi Elowa tse Ezzega.”
9Abɛ abɔw-ɛ, “Maan wɔ kwa amana ma ta anddo kwɛ?” 10Ɔpɔn bɛ, “Masɛ abanga ma anwa ko ofon, abanga na agba udwunɨng kwɔ ɔttɔg isɔga ra assi, abuw-ɛ innam tar anwa kɔ ɔtsɔm. 11Ateg oyenɔtsɔm abɛ, ‘Okpewnnwer ɔbɔw abɛ: Iwur tsa akiken na anɨnga inɨng mann, amma nti ntsi Elowa tse Ezzega abuwinnam pam abubɛ?’ 12Ɛma nɔ kɔg banga iwur tsɛ ejeg-ojeg ga kɛ ɛnyɔng kɛ ɛrang tsa abɛ ka adda ibɨng, abanga assi utsapfɛ muma.”
13Aba abɨna ata ase ekpo byo ibɨng otse kwɛ Jisɔs oteg bɛ, aba assi Elowa tse Ezzega atsog.
14Ibe ri ibe arɛ iwem, Jisɔs ɔttara atɔmɔtɔm pɛ aba ata anɨnga abɛ atsi utsapfɛ. 15Jisɔs oben abɛ, “Amma wɛrɛ nnang kɨ nror eden tsɛ mu ntsi Elowa tse Ezzega abangama abubɛ pɛrɛ si ndɔw irem.” 16Nteg banga abɛ, Elowa nza tse Ezzega ndag mɨntsi pɛrɛ ntsi tsɛ kɛ Ɛvaar tsu Ubɨnɔkpaabyi.
17Jisɔs ɔtaga nkɔw, usuma Ubɨnɔkpaabyi, oben abɛ, “Abanga ataga agwo arɨg ayog. 18Nɨ mbenbɛ nteg banga abɛ amma ndag atwug mɨngwo tarr Ɛvaar tsu Ubɨnɔkpaabyi ikwu.”
19Ɔtaga brɛd, usuma Ubɨnɔkpaabyi, ɔkpara wɛ ɔtaga ɔnang bɛ, oben abɛ, “Mama wɔ ode ɛkpakpa tsam tsa aba anang banga, assi otse ngwa abanga atɨma azɨm-m.”
20Ke eden nzo zan, sa abɛ ka brɛd nwo atsa, ɔtaga nkɔw kwa atwug, oben abɛ, “Nkɔw nwa wo ode nnwɔngɔ ɔwarɛ ki isɛ ram ra aba apyeng anang banga. 21Ɔnang kwɛ no oben abɛ ɔtag-m ɔnang apyupyuwa anang unɨng mama unu utsi utsapfɛ ammabɛ. 22Unwa kwu Udwunɨng noppe tsekwɛ Ubɨnɔkpaabyi ɔtɔng abɛ mo oppɛ, nupyuw ɔnang ɔnang kwɔ ɔtag-ɛ ɔnang bɛ.” 23Aba atitso abɔw abɛma oyen, anɛwɔ kwɛ mu ussi udɨg ngwo otse ngwo.
24Ɔmmakkara uyin bɛ ɔbanga ɔnang kwɔ ɔbar ɔyɔnga ayog. 25Jisɔs oteg bɛ abɛ, “Avaar pa anang pa ana Izɨrɛl na bɨna abɛ na atɨm bɛ kɛ ɛffa, ɔttara atsonang pa abɛ, abɛ ajer abɛma oyen ayogudikko pa anang ibɨng. 26Akwɛ otse ngwo mo ode abangama bɛ, akwɛ node abɛ, ɔnangttama node masɛ unwanwa, ɔttara ɔnang kwu utɨm ɔwang node masɛ otserɔtɔm. 27Anɛwɔ ɔbar ɔyɔnga, ɔnang kwu unɨng ɛyar utsi utsapfɛ sa, ɔnang kwu otsen-ɛ utsapfɛ? Ɔnang kwu unɨng ɛyar utsi utsapfɛ sang sa? Amma mmanga inɨnga abangama abubɛ masɛ otserɔtɔm. 28Abangama bɔ anɨng amabɛ ki irem ram. 29Ka abanga ɛvaar nnanga otsekwɛ adere ɔnang-m. 30Abanga na atsi attara agwo ko okpokoro kwɛ Ɛvaar tsam, abanga na anɨng kɨ nvaar tsi, abanga aponga nffona zowaffa pi Izɨrɛl.
31“Saimɔn, Saimɔn, Sɛtan, kɛ ɛffa ɔtaga abɛ oyom banga otsekwɛ abɛ na agɨma atsifog. 32Amma ka atɨm nzɔma nnang-ɔ, Saimɔn, fasɛ etsera tsɔ ɛnang etto, ibe rɛ ki innam ammanga, nang uvakka ɔkpakpa kpɔg.” 33Pitɛ ɔpɔn-ɛ abɛ, “Ɔvaar amma kɛ ɛkpakpa nda tsi ngbakɔw ɔttara tso obo ɔmabɛ.”
34Jisɔs oteg Pitɛ abɛ, “Nteg-ɔ, pɛrɛ ɛnɔndɨm ɛkɔra tsemma, ɔma na afɨm nden ntan abɛ kam ka asong.”
35Jisɔs ɔbɔw bɛ abɛ, “Ibe rɛ ntɔm abanga ayɨn ki iyan ra abanga ana akpog, ɛkpa ɔttara ki ntwak na atɨma, ɔttɔg unɨng muma pfo owor banga?” Aba ɔpɔn-ɛ, “Ɔttɔg kode.”
36Jisɔs oben bɛ, “Mazizan, ɔnang kwɔ ɔna ɛkpa nutɨma, utɨma, ɔttara kɛ ɛkpa sɛ ɛnya, odesɛ ana ogge nakama, kpe anɔma pyɔ adew wan. 37Abɛ ka kɛra, ‘Aba awug ɛma ɔttara ga aluloma,’ ɔttara nteg banga idɨg nda arɛ niyɨn ɛnang-m. Otsekwa aba akkɛr ɔbanga ammabɛ, akwɛ ɔna mu uyɨn.”
38Aba aben-ɛ abɛ, “Ker, Ɔvaar amana atɨm agge affa,” Ɛma oben bɛ abɛ, “ɔgba banga.”
Jisɔs ɔzɔm atɨm ko Okpetso kwo Olif
39Jisɔs ubɨna opfona ga ko okpetso kwo okpen Okpetso kwo Olif, abuwinnam pɛ aba abuw-ɛ innam. 40Sa aba awem kɔ ɔwang ngwo, oteg bɛ abɛ, “Azɔm atɨm fasɛ abanga ananga atto ke eyoma.” 41Ubɨna urɨg bɛ ɛwang nwa kwa akkema awar ɛta ewem, utu ukpuga ndwudwɨng ɔzɔm atɨm. 42Oben abɛ, “Adere, odesɛ ɔma ka atsera, taga nkɔw nwa arɨg-m, tsekwɛ amma ntser sang, tse kwɔ ɔma atser, akwɛ ode otse ngwo.” 43Ɔtɔmɔtɔm kwu Ubɨnɔkpaabyi ubɨna ga kɛ ɛrang ɔkwɔ owem, ɔnang-ɛ akpɔgidi. 44Ukwur irem, ɔzɔm atɨm mbo aba anwɛ, irɨg tsi iyɨn-ɛ ede dambɛ isɛ dɔ ni pyenga ki iseg.
45Ibe ru ubɨn ka atɨm mbo, ɔmanga innam oto okewa abuwinnam pɛ kɔ ɔda, ka bɔ ɔkɔna sa aba anɨng ikwosi. 46Jisɔs ɔbɔw bɛ, “Bugudɨg gwɔ kwa abanga na attawa? Ashɔwa azɔm atɨm fasɛ abanga ananga atto ke eyoma.”
Aba pfuw Jisɔs
47Masɛ Jisɔs nɔ tɔnga muma, anang pa sawɔsaw aba akwu, Judas, ɔnang wan kwɔ ɔttar abuwinnam zowanffa pɛ Jisɔs, ɛma wɔ oye bɛ eden, ɛma okewa Jisɔs abɛ ɔttag-ɛ#22:47 Ɔttag-ɛ Ode ɔmmana dɨg okpe ngwo abɛ udwunɨng ɔttag oyog ka agba masɛ isɨma.. 48Jisɔs ɔbɔw-ɛ abɛ, “Judas, ɔma ma ataga Unwa kwu Udwunɨng anang ɔyaw kɛ ɛttaga?”
49Ibe rɛ abuwinnam pa Jisɔs ase udɨg kwa kwɛ no oben abɛ uyɨn, aba abɔw, “Ɔvaar amana ampeg bɛ agge pya amana sa?” 50Oyog wan oppeg otserɔtɔm kwɔ ɔffɔnɛzza kwi ititam, ɔkpar-ɛ itɔngkpa ru udɨmbɔg.
51Jisɔs oben bɛ, “Kɔ ɔgba,” ɔwag ɔdan-ɛ ma ki itɔng, arɛ igweng.
52Muma wɔ Jisɔs oben avaar pa affɔnɛzza, atsonang pɛ na atɨg ɔtsɔm kwa atɨm kwu Ubɨnɔkpaabyi, ɔttara ka atsonang pa aba akwu aba kwa apfuw-ɛ, “Amma nde ururuwa sa, kwa abanga atɨm agge ɔttara ki itsi ra abanga ma apfuw-m? 53Amma nnɨng abangama abubɛ ngwu ridede kɔ ɔtsɔm kwa atɨm kwu Ubɨnɔkpaabyi, abanga ɔbɔg kana dana, mama wɔ ode ibe ra abanga ru ugwutwar nussi ɔtɔm.”
Pitɛ okona Jisɔs
54Aba daw-ɛ, atɨm-ɛ abɛ apfona kɔ ɔtsɔm kwɔ ɔffɔnɛzza kwi ititam, Pitɛ obe eden iwur ubuw-ɛ innam. 55Ibe ra aba akwa amuma ekpon ke etersha tem, abɛma anɨnga ɛyar na wɔwa, Pitɛ ɔkwɔ ɔttar bɛ ɔwɔwa ekpon. 56Unwa kwanɨng wan kwo ode otserɔtɔm ose Pitɛ sɛ nɔ ɔwɔwa ekpon, oker-ɛ tɨnɨm, oben abɛ, “Udwunɨng nwa ɔgbɔ ɔtwan Jisɔs bɛ.”
57Pitɛ okona abɛ, “Ukwanɨng, amma kɛ kɨnsong.”
58Ki ibe kɨma nwa, ɔnang ɔdwag-ɔdwag use-ɛ, oben-ɛ abɛ, “Ɔma agba attara.” Pitɛ oben-ɛ, “Udwunɨng, amma sang.” 59Ibe ɔdwag-ɔdwag, ɔnang wan ɔvaga ma kɔ ɔtɔnga ngwo, “Ɔnang nwa ku udɨg ɔkka, ɔgba ɔttar-ɛ ukwurabɛ abɨn ga Galili.”
60Pitɛ ɔpɔn-ɛ, “Udwunɨng, udɨg kɨnsong kwɛ na atɔnga,” ki ibe ndo, ɛnɔndɨm ɛkɔra. 61Ɔvaar Jisɔs ɔwag ɔker Pitɛ tɨnɨm, Pitɛ uzɨma ɔtɔnga kwɔ Ɔvaar ɔtɔng abɛ, “Pɛrɛ ɛnɔndɨm ɛkɔra tsemma, ɔma na afɨm amma nden nttan.” 62Pitɛ uyɨn ki iyan ɔgama pyuwa-pyuwa.
Anang amma Jisɔs ara
63Adwunɨng pa ana akker Jisɔs abɛ atɔnga, aba ammɛ ara, aba akpɨn-ɛ. 64Aba akpɛ ivara kpa ka atsen aba aben-ɛ abɛ, “Teg mana ɔnang kwu ukpɨn-ɔ.” 65Aba atɔnga irag dɨg ɔdwag-ɔdwag ri isawɔsaw anang-ɛ.
Jisɔs obe ko oro pfɛ Pailet ɔttara ka Hɛrɔd
66Si igwu atsɛ etsow, atsonang pa Izɨrɛl pa ade avaar pa affɔnɛzza ɔttara akpewinyɨna tsɛ Mosis aba agba. Aba atɨma Jisɔs atsen bɛ. 67Aba aben abɛ, “Odesɛ ɔma ade Krais, teg mana.”
Jisɔs ɔpɔn bɛ abɛ, “Odesɛ nteg banga, abanga matsera anang-m, 68ɔttara odesɛ mbɔw banga, abanga makke apɔna. 69So otto mazizan Unwa kwu Udwunɨng nu unɨng ɛyar ku udɨm bɔg kwu Ubɨnɔkpaabyi kwɔ ɔyɔng ɛffa.” 70Abɛma ibɨng aba aben, “Ɔma wɔ nade Unwa dwunɨng kwu Ubɨnɔkpaabyi sa?” Ɛma ɔpɔn bɛ, “Abangama oyen ba atɔng.” 71Aba aben abɛ, “Amana na anror baga attɛnsɛ ɔdwag, abba ibɨng ka awanga kakɛ kɛ ɛmma.”
©️2022 Luke Initiative for Scripture Translation
