മത്തായി 23
23
ഏച്ചു നേമകാറെരളെ കുറ്റപടുത്തിന്റു
1പിന്നെ ഏച്ചു നെരേയണ്ടൊന്റമു തന്റ ബൊവുകെട്ടിയണ്ടൊന്റമു പറേഞ്ചു: 2“നേമകാറെരമു പരീച്ചെമാരുവമു മോച്ചെന്റ കച്ചാലെലി അദിഗാരകീന്റെരളായി ഉളേക്കിന്റൊരു. 3അയിനെകോണ്ടു അയിര പടേപ്പിക്കിന്റെനൊക്ക നീങ്ക കേട്ടിന്തു ചെയ്യൊണു. എന്റെങ്കി അയിര ചെയിന്റപല്ലെ നീങ്ക ചെയിവനാഗയ്. എന്നെഗെന്റെങ്കി അയിര പടേപ്പിക്കിന്റ കാരിയമൊന്റുമു അയിര ചെയിവകാണിയില്ല. 4മയിച്ചെരളെ കട്ടപ്പടുത്തിന്റ പല്ലത്ത നേമമൊക്ക അയിര ഉണ്ടാക്കിന്റൊരു. എന്റെങ്കി ആ നേമ കേട്ടിന്തുനടാപ്പബേണ്ടി അയിര മയിച്ചെരക്കു ഒരു ചഗായമു ചെയിദുകൊടുഗരു.
5അയിര നല്ലകാരിയമൊക്ക ചെയിന്റെയെയ് മയിച്ചെരക്കു കാട്ടുവബേണ്ടിച്ചാന്റു. താങ്ക ഈച്ചിരന്റ ഇട്ട ചെയിന്റെര എന്റു കാട്ടുവബേണ്ടി അയിര തങ്കട മേവെക്കു ഈച്ചിരബാക്കു എവുദിന ബലിയ പട്ടെ കെട്ടിന്റൊരു. അയിര തങ്കട കുപ്പെയത്തെക്കു തൂങ്കിന്റ ബള്ളിയൊക്ക തുന്നിപുടിപ്പിച്ചിച്ചു താങ്ക നേരുകാറെരളെന്റു കാട്ടിന്റൊരു. 6ബിരുന്തു കുള്ളിലിമു പള്ളിലിമു തങ്കക്കു മുന്തിന താന ബേണെന്റു അയിര അലാക്കിന്റൊരു. 7അങ്ങടിലി ഒക്കായിമു തങ്കളെ തൊവ്വൊണെന്റുമു ‘ഗുരുവേ’ എന്റു ബുളിക്കൊണെന്റുമു അയിര അലാക്കിന്റൊരു.
8എന്റെങ്കി നിങ്കളെ ‘ഗുരുവേ’ എന്റു ബേറെകീന്റെര ബുളിക്കൊണെന്റു നീങ്ക അലാപ്പപാടുകാണി. നിങ്കക്കു ഒരു ഗുരു മാത്തിരമെ കീന്റെയെയ്. നിങ്കളൊക്കായിമു അണ്ണെരളേയെരളാന്റു. 9ബൂമിലി നീങ്ക ആരുനെമു ‘അപ്പാ’ എന്റു ബുളിപ്പനാഗയ്. ചൊറുഗത്തികീന്റ ഒരു അപ്പെയ് മാത്തിരമാന്റു നിങ്കക്കു കീന്റെയെയ്. 10നീങ്ക ആരുനെമു ‘നേദാവു’ എന്റുമു ബുളിപ്പനാഗയ്. നിങ്കക്കു ഒരു നേദാവു മാത്തിരമാന്റു കീന്റെയെയ്, അദു കിറുത്തുവാന്റു. 11നിങ്കളിലി ഒക്കായിനെകാട്ടിമു മുന്തിന മയിച്ചെയ് ഒക്കായിനെമു നോക്കിമാടിണ്ട മയിച്ചെനാഗൊണു. 12താനേ ബലിയെനെന്റു നിനേക്കിന്റെരളെ ഈച്ചിര താവുത്തുവു. താനേ താവുന്തെനെന്റു നിനേക്കിന്റെരളെ ഈച്ചിര ബലിയെരളാക്കുവു.
13ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! ചൊറുഗനാടിലെരളാവ അലാക്കിന്റെരക്കു നീങ്ക തടേവുമാടിന്റെരി. ചൊറുഗനാടിലെരളാവ നിങ്കക്കു മന കാണി. എന്റെങ്കി മനാകീന്റെരളെ നീങ്ക തടേഞ്ചുബെപ്പനുമു ചെയിന്റെരി. 14[ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! നീങ്ക പുണ്ടത്തിയളെ പറ്റിച്ചുകാന്റു അയിരണ്ട കുള്ളില മൊദേലുനെ കട്ടുതിന്റൊണ്ടു നടാക്കിന്റെരി. നിങ്കക്കു എന്നെനെങ്കില കിട്ടൊണെന്റൊണ്ടു നീങ്ക ചുമാറു ഗളിഗെ പുറാത്തിക്കിന്റെരി.]#23.14 ഈ ബരി കുറെ എവുത്തിലി കാണി.
15ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! മയിച്ചെരളെ നിങ്കട പള്ളിക്കു കൂട്ടുവബേണ്ടി നീങ്ക കരേമു കടേലുമു കടാന്തു നാടുപരാക്ക തടാക്കികോണ്ടു നടാക്കിന്റെരി. അയിര നിങ്കടൊന്റ കൂടിനെങ്കി നിങ്കക്കിന്തുമു അദിഗമായി നീങ്ക അയിരക്കു ചിച്ചെ കേളുപ്പമാടിന്റെരി.
16കണ്ണുകണ്ടുബാരദെ പൊരുബൊവ്വു കാട്ടിന്റെരളേ, നിങ്കക്കു ചാല ഗിരാച്ചാരമായിപ്പൊയ്! എന്നെഗെന്റെങ്കി ‘ആരെങ്കില ദേവരുഗുടിനെ പറേഞ്ചൊണ്ടു ചത്തിയ ചെയിദെങ്കി ചാരകാണി എന്റുമു ദേവരുഗുടില ചൊറുണത്തിനെ പറേഞ്ചൊണ്ടു ചത്തിയ ചെയിദെങ്കി അയിനു ആ കാരിയ ചെയിവ കടാകാറെനാന്റു’ എന്റുമു നീങ്ക പറേന്റെരി. 17ബുദ്ദികാണത്തെരളുമു കുറുടെരളുമാന മയിച്ചെരളേ, ഏവെയ് ബലിയെയ്? ചൊറുണമോ ചൊറുണത്തിനെ ചുദ്ദമാണ്ട ദേവരുഗുടിയോ? 18‘മണ്ടത്തിനെ പറേഞ്ചൊണ്ടു ചത്തിയ ചെയിദെങ്കി ചാരകാണി എന്റുമു മണ്ടത്തി ബെച്ചുകീന്റ നേരിച്ചെനെ പറേഞ്ചൊണ്ടു ചത്തിയ ചെയിദെങ്കി അയിനു ആ കാരിയ ചെയിവ കടാകാറെനാന്റു’ എന്റുമു നീങ്ക പറേന്റെരി. 19കുറുടെരളാന മയിച്ചെരളേ, ഏവെയ് ബലിയെയ്? നേരിച്ചെയോ നേരിച്ചെനെ ചുദ്ദമാണ്ട മണ്ടമോ? 20മണ്ടത്തിനെ പറേഞ്ചൊണ്ടു ചത്തിയ ചെയിന്റെയെയ് മണ്ടത്തിനെമു അയിലിബെച്ചുകീന്റ ഒക്കാ നേരിച്ചെനെമു പറേഞ്ചൊണ്ടു ചത്തിയ ചെയിന്റൊയ്. 21ദേവരുഗുടിനെ പറേഞ്ചൊണ്ടു ചത്തിയ ചെയിന്റെയെയ് ദേവരുഗുടിനെമു അയിലികീന്റ ഈച്ചിരനെമു പറേഞ്ചൊണ്ടു ചത്തിയ ചെയിന്റൊയ്. 22ചൊറുഗത്തിനെ പറേഞ്ചൊണ്ടു ചത്തിയ ചെയിന്റെയെയ് ഈച്ചിരന്റ റാജകച്ചാലെനെമു അയിലി ഉളേച്ചുകീന്റ ഈച്ചിരനെമു പറേഞ്ചൊണ്ടാന്റു ചത്തിയ ചെയിന്റൊയ്.
23ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! നീങ്ക നട്ടുണ്ടാക്കിന്റ തൊളേച്ചിലിന്തുമു നാക്കുദാളിലിന്തുമു ജീരഗത്തിലിന്തുമൊക്ക പത്തിലൊന്റു ഈച്ചിരങ്കു കൊടുക്കിന്റെരി. എന്റെങ്കി നേമത്തി പറേഞ്ചുകീന്റ ബിലേപട്ട കാരിയമൊന്റമു നീങ്ക ചെയ്യെരി. നേരാന കാരിയ ചെയിന്റെയെയ്, ബാറുകത്തെലു കാട്ടിന്റെയെയ്, ഈച്ചിരനിലി നമ്പെലുകീന്റെരളായി ബദുക്കിന്റെയെയ് ഇങ്ങാണെകീന്റ ബലിബലിയ കാരിയമൊക്ക നീങ്ക ബേണ്ടെന്റു ബെച്ചുകീന്റെരി. നീങ്ക ഈ കാരിയമൊക്ക ചെയിവനുമു ഈച്ചിരങ്കു കൊടുക്കിന്റെനെ ബേണ്ടെന്റു ബെപ്പനുമു ചെയിവനാഗയ്. 24കണ്ണുകണ്ടുബാരദെ പൊരുബൊവ്വു കാട്ടിന്റെരളേ, കുടിക്കിന്റെലിന്തു ചെറിയ ഈച്ചെനെ അരിച്ചെടുപ്പനുമു ഒട്ടഗത്തിനെ ഉറാക്കുവനുമു ചെയിന്റെരളെ പല്ലത്തെരളാന്റു നീങ്ക.
25ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! നീങ്ക ചെമ്പുതപ്പലെന്റമു ബട്ടെലുന്റമു പുറ ബെടുപ്പുമാണ്ടെരി. എന്റെങ്കി നിങ്കട മനാത്തിന്റഗാത്തു കീന്റെനൊക്ക ആഗത്തെനാന്റു. അങ്ങാണെതന്നെ നീങ്ക പുറാമെ നല്ലെരളാന്റു. എന്റെങ്കി നിങ്കട മനാത്തിന്റഗാത്തു നീങ്ക ആവെച്ചപുടിച്ചൊണ്ടു നടാപ്പനുമു പാപ്പകറുമ ചെയിദൊണ്ടു നടാപ്പനുമു ചെയിന്റെരി. 26കണ്ണുകണ്ടുബാരത്ത പരീച്ചെമാരുവളേ, മുല്ലെ ചെമ്പുതപ്പലെന്റ അഗ ഉജ്ജിബെടുപ്പുമാടുമി. എമ്മടെക്കു അയിന്റ പുറാമു ബെടുപ്പായിപ്പൊയ്.
27ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! കുമ്മായ ചേച്ച ചാവുഗുണ്ടുപല്ലെയാന്റു നീങ്ക. ഗുണ്ടുന്റ മുഗാളു മെലേവ നല്ലൊരുചന്ത ഇപ്പൊയ്. എന്റെങ്കി അയിന്റ അഗാത്തു ചത്തെരണ്ട ചീഞ്ചുനാറിന്റ മേലുമു ആഗത്ത ഒക്കാ കാരിയമു നിറേഞ്ചിപ്പൊയ്. 28അങ്ങാണെതന്നെ നിങ്കട പുറാമെ മെലേവടെക്കു നീങ്ക നേരുകാറെരളെന്റു മയിച്ചെരക്കു തോന്റുവൊയ്. എന്റെങ്കി നീങ്ക നല്ലെരളെന്റു കാട്ടികോണ്ടു ബുളേവിലി നടാക്കിന്റെരളാന്റു. ഒക്കാ ബേണ്ടത്തകാരിയമു നിങ്കട മനാത്തി നിറേഞ്ചുകീന്റൊയ്.
29ബുളേവിലി ഈച്ചിരനെ തൊവുന്റ നേമകാറെരളുമു പരീച്ചെമാരുവളുമായികീന്റെരളേ, നിങ്കക്കു ചാല ഗിരാച്ചാരമായിപ്പൊയ്! നീങ്ക തമ്മടികാറെരണ്ട ചാവുഗുണ്ടുന്റ മുഗാളു ബെടുപ്പുമാടി ബെപ്പനുമു നേരുകാറെരണ്ട ചാവുഗുണ്ടുന്റ മുഗാളെക്കു ചന്തബരുത്തുവനുമു ചെയിന്റെരി. 30‘നാങ്ക അച്ചെരപ്പെരണ്ട കാലത്തി ജീവിച്ചിന്തെങ്കി തമ്മടിയളെ കൊല്ലുവ കൂട്ടുനില്ലദാവന്ത’ എന്റു നീങ്ക പറേന്റെരി.
31അങ്ങാണെ തമ്മടിയളെ കൊന്റെരണ്ട മക്കളാന്റു നീങ്ക എന്റു നീങ്കതന്നെ തെളിപ്പിക്കിന്റെരി. 32നിങ്കട അച്ചെരപ്പെര ചെയിദുബെച്ച പാപ്പമൊക്ക നീങ്കളുമു ചെയിദു തിഗേക്കിന്റെരി. 33ആഗത്തകാരിയ ചെയിന്റെരളേ, പാമ്പുന്റപല്ലത്ത ബിച്ചകീന്റെരളേ, നീങ്ക തീനരാഗത്തിന്റ ചിച്ചെലിന്തു എങ്ങാണെ രെച്ചപടുവെരി?
34അയിനെകോണ്ടു ഇമ്മലേ, നാനു തമ്മടിയളെമു അറിവുകീന്റെരളെമു നേമകാറെരളെമു നിങ്കട ഇണ്ടുക്കു ചൊല്ലിബുണ്ടെയ്. അയിരളിലി കുറെ മയിച്ചെരളെ നീങ്ക കുരിച്ചിലി തറേച്ചു കൊല്ലുവെരി. കുറെ മയിച്ചെരക്കു നിങ്കട പള്ളിലിബെച്ചു ചാട്ടെബള്ളിലി അലേച്ചിച്ചു ഒരു അങ്ങടിലിന്തു ബേറെ അങ്ങടിക്കു അടുത്തുബുടുവെരി. 35അയിനെകോണ്ടു നേരുകാറെനാന ആബേലുന്റ ചോരെതൊട്ടു നീങ്ക ദേവരുഗുടിന്റമു മണ്ടത്തിന്റമു ഇടേലിബെച്ചു കൊന്റ ബെരെഗാമുന്റ മഗെനാന ചെക്കെരിയാവുന്റ ചോരെക്കുബരെ ബൂമിലിബെച്ചു കൊന്റ ഒക്കാ നേരുകാറെരണ്ട ചോരെക്കുമു നീങ്ക കണാക്കു കൊടുക്കൊണ്ടിബരുവൊയ്. 36ഏന്റൊക്ക കുറ്റ ഇപ്പൊ ബദുക്കികോണ്ടുകീന്റ നിങ്കട തിലേക്കുതന്നെ ബരുവൊയ് എന്റു നാനു നേരാച്ചുമു നിങ്കടൊന്റ പറേന്റെയ്.”
എരുച്ചലേമു പട്ടണത്തിലെരളെ നിനേച്ചൊണ്ടു ഏച്ചു കിരേന്റു
37“എരുച്ചലേമിലെരളേ, എരുച്ചലേമിലെരളേ, നീങ്ക തമ്മടിയളെ കൊല്ലുവനുമു ഈച്ചിര നിങ്കക്കുബേണ്ടി ചൊല്ലിബുട്ടെരളെ കല്ലെറിവനുമു ചെയിദെരിയില്ല. കോയി തന്റ മറിയളെ റാഗുന്റടിലി മറേക്കിന്റപല്ലെ നിങ്കളെ നോക്കിമാടിടുവ എത്തെനെകുറി എനാക്കു മന ഇന്തയ്. എന്റെങ്കി നിങ്കക്കു അയിങ്കു മനാകാണദിന്തയ്. 38ഇമ്മലേ, നിങ്കട കുള്ളു കാണദാവനുമു അവുടെ ആരുമു ഇരാദെ ഒക്കായിമു അയിനെ ബുട്ടുകാന്റു പോവനുമു ചെയിവൊരു. 39‘കറുത്താവുന്റ അദിഗാരത്തി ബന്റദുക്കു ഈച്ചിര നല്ലെയെയ് ബരുത്തികീന്റു’ എന്റു നീങ്ക പറേന്റബരെ എന്നെ മെലേയെരി എന്റു നാനു നിങ്കടൊന്റ പറേന്റെയ്.”
Currently Selected:
മത്തായി 23: റാവുള
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
New Life Computer Institute
