Matai 12
12
1Pamwaka gugwa palitsuva ilinge UJesu akaluta munzila jya nsilimila sya ngano palitsuva lya sabati. Avene avakongi va vamwene vwu vakavona inzala jivava, pwu vakasulubula isisotso sya ngano vakalya. 2Avene avapalisai vwu vavavwene pwu vakata: Lola avakongi vako vivomba itsinge itsili mwiko ukuvomba pasabati. 3Umwene akanda akata: Nantsivweni uńe mwa kalata itsu avombage UNdaviti upwu jivavage inzala najujwa navali nave? 4Upwu ingilaga nńumba jya Nguluve akalya isivanda isivalatse, isyu sikutsoni nasyave sya kulya najujwa navale nave, isyu sikutsoni syale sya kulya va vateketsi vene? 5Itsene nantsivweni mwa kalata va similitso, itsu sikutsoni pasabati avateketsi mwa Tempeli natsiva nongwa nupwu vangave vibeda ilitsuva lya sabati. 6Ndikuvavula ndita: Pwale apa umbaha nakwa Tempeli. 7Lwelingave mwalimańaga umwu livelye ilita: Une ndilonda ikisa, nandilonda isya kutekela, pwu ndili namuvatsovili uvuvivi avatsilanongwa ava. 8Nalyene ilitsuva lya sabati Uńamunu nkuludeva va lyene.
9Pwu UJesu akahuma baho akatsikwingila nńumba jya vene jya kwisajilamwo. 10Akambona mumwa umunu uvi ikivoko kyumile. Pwu avene vakambutsa vakata: Nda kunnonu ukumponya umunu pasabati? Ulwakuva vatetsaga mwu tutsivonelage itsa pakumbulila. 11Umwene akavutsa akata: Uńe umwu mbelye veni avetsage niṅolo jya mwene mamato jyene, pwu jigwitsage mwiguli pasabati, nda ajilekage mwiguli mumwa? Nda nibiha ukujihumya ilitsuva ili vuvule? 12Umunu nda najilutili sitso uvutengo ing'olo? Pwu ndita kunogye ukuvomba innonu une pasabati. 13Pwu akambula uńakivoko akata: Golosa ikivoko kyako. Umwene akakigolosa. Pwu ikivoko kya mwene kikanduka kikava kinnonu vuvule ndikinine. 14Avene avapalisai vakahuma panzi, pwu vakatsitsovana vakidiṅana itsa kuta tumbudage.
15Umwene UJesu vwu avwene tsitsitsi pwu akakimbila umwu ale. Vakankonga avanu isipuga syongosu vuvule. Umwene akavaponya voni. 16Akavabetsa sitso akata: Mulatsovaga. 17Kwu kwitsa tsitsile baho itsu atsovaga uńamalago UJesaja upwu atetsage: 18Lola vi vi nkivaga vango uju, uvi ndimalile, ungane vuvule kwane, uvi ninumbula jyango ajikelye. Ndikumbikapwo UMepo vango, alavavula uvuhigi avapanzi. 19Umwene nalalwe navange, nalapwate nilimeńu lya mwene nujyunge nalapulike mmalekano. 20Nulugugu uludeńike naladumulile ṅani umwene, nakasiki ka mwoto nalatsimihitse ṅani. Tango umwene isikaga upwu uvuhigi ikuvugegaga ukuta vutengage vuvule vusilage. 21Avapanzi valahuvila li litavwa lya mwene.
22Pwu vakagega kumwene umunu va mepo imbivi, uvi aboswe uvi ale kinunu. Umwene akamponya, pwu umunu uvi ale kinunu akata nukutsova akata nukulola. 23Pwu voni avanu umwu vavelye ikipuga kyoni vakajetuka mwitumbu vakata: Pange vi vi nswambe va Ndaviti uju? 24Avene avapalisai vwu vakata: Umunu uju ndatetsaga ikutsihumya vuvule imepo imbivi. Bako ikutsihumihitsa mwa Belisibuli umbaha va mepo imbivi. 25Umwene UJesu vwu atsivwene itsu vikisagilaga mwitumbu pwu akavavula akata: kyoni ikilunga kingave kihambuṅine kikyo kyene, kyu kiseneluka vuvule. Syoni vuvule, vungave vwu vutsenge, ndajingave ji ńumba, isyu singave sihambuṅine sisyo syene, syu nasivakwo lusiku. 26Namwene nu-Setano angave ikumumya USetano unine, vwu ihambuṅine vuvule jujwa mwene. Pwu uludeva lwa mwene luvetsagekwo ndeti? 27Nupwu ndingave une imepo imbivi ndikutsihumihitsa mwa Belisibuli, pwu avene avana vińo vikutsihumihitsa mwani upwu vikutsihumya? Tswitsi valavahigaga avana vińo. 28Apene upwu ndingave imepo imbivi ndikutsihumihitsa mwa Mepo va Nguluve, pwu humbe uludeva lwa Nguluve luvitsye vuvule uńe. 29Veni ate ingilage ndeti nńumba jya ńangusu nkugoma isyuma sya mwene vwu nankungili tango uńangusu? Lweli angave ankungile tango, pwu lweli pwu igomaga isya nńumba jya mwene. 30Uvi natwiva twivoni nune, vi twiva ngoso, uvi nikunanga ukulundamanya, vi ivejanga vuvule. 31Pwu ndikuvavula ndita: Tsoni inongwa itsu vitula avanu, tsoni nitsa kuhelula tsu visyikilivwa, mańa itsa kumelula UMepo tswu nakuli uvi ikuvasyikila avanu. 32Nuvi angave ikunduka ilinge Uńamunu vi isyikilivwa, mańa uvi angave ikunduka ilinge UMepo umbalatse vi nalasyikilivwe nakunu nuku. 33Umbiki ngave mwita nnonu, vwu natsene iseke tsa gwene nnonu vuvule. Ngave mwita umbiki mbivi, pwu natsene iseke tsa gwene mbivi vuvule. Mańa imibiki gyoni umunu ikugimańila paseke tsa gyene. 34Ńi lukona lwa ńandalwe uńe, ńi mwatetsaga mutsove ndeti innonu vwu ndi vagalagala vuvule. Mańa mundomo umu mwu umunu itsova itsilesuka munumbula. 35Umunu unnonu isakula innonu umwu alundike vwu vunnonu, umwene umunu umbivi vi isakula imbivi umwu alundike vwu vuvivi. 36Ndikuvavula ndita: Goni amameńu amatsimu ugwu vitsova avanu valavutsivwa lipamato-lipamato palitsuva lilya lya kuhigilivwa. 37Ulwakuva tsilahumaga mumameńu ugwu vwatsovile uve vi munu itsa kutsovelivwa uvugolosu uve, natsene nitsa kutsovelivwa uvuvivi uve tsilahumaga mumameńu ugwu vwatsovile uve.
38Pwu avange avamańakalata navapalisai vakanda vakata: Vi mańisi twatetsaga vukutupelela ikinge ikipelwa kya kukumańilamwo uve. 39Umwene akanda akata: Avanu va lino avavivi ava avaligu vidova ikipelwa. Navikukivonaga nikinge ikipelwa, ki kipelwa kilya kyavetsaga nu-Jona uńamalago, kyu vikukivonaga kyene. 40Mańa vwu palya UJona avetsage mwitumbu lya somba imbaha jilya amatsuva gadatu napamuńi napakilo, vwu namwene nu-Ńamunu alagahaga vuvule-vule, alava, ngati nkilunga amatsuva gadatu napamuńi napakilo. 41Avanu va mu-Ninive valimikilaga lunine navanu va lino ava palitsuva lya kuhigila inongwa valavatsovaga uvuvivi, mańa avene vakilivwike upwu UJona avavulage inongwa. Mańa pwale apa umbaha nakwa Jona. 42Unkuludeva undala ulya ahumile nkilunga kya uku ikyakusika alimikilaga lunine navanu va lino ava palitsuva lya kuhigila inongwa alavatsovaga uvuvivi, mańa umwene ahumile ukwu kisilye ikilunga, akitsa, kupulika uluhala lwa Selomoni. Mańa pwale apa umbaha nakwa Selomoni. 43Lola upwu jingave imepo imbivi jihumile mumunu, pwu jitsungula poni pavutsilamagasi, jilonda apa kugataluka, mańa jivona napivoneka. 44Pwu jita ndikilivukage kuńumba jyango mulya ndahumile. Vwu jivujile pwu jivona ińumba jili vuvule uva kugonamwo, jivona vakunile vanotsitse. 45Pwu jibiha nkutola itsinge imepo lekelakupamato inine itsilutile uvuvivi nakujeyne. Vwu tsingye pwu tsiva mumwa, pwu umunu ulwambele lino pwu ahambuke vuvule, alute nakululongotsi. Vwu valagahaga vuvule-vule avanu avavivi va lino ava.
46Lino vwu ali pakutsova navanu avalundamine baho isipuga vuvule pwu vakavona nuvańina navalukololwe vimile mumbele mbanu vita tutsove nave. 47Ujyunge umunu akambula akata: Nuvańoko navalukololwo vimile mumbele mbanu mulya vita tutsove nuve. 48Umwene akanda akata: Veni ujuva, avalukololwango vwu valiku? 49Pwu akalungikila kuvakongi va mwene akata: Muvavwene ava Vi-juva, vwu valukololwango ava! 50Ulwakuva uvi ivomba its-anogilwe udada kukyańa ukuta tsivombwagwe, vi lukololwango, vi matsa vango, vi jyuva jujwa.
Currently Selected:
Matai 12: Kinga
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
New Testament in Kikinga © British and Foreign Bible Society, 1961.
