Mâreke 3
3
Jezü tchä ngâ köchë lə̂ lö sabäa
(Mat 12.9-14; Luk 6.6-11)
1Jezü kä lî bhâlə̂ nda kə̂ voga Ndjapä ndə̂ ajuîfu; ngâ köchë kä bhâye ndə̂ könô yê ngêwele. 2Afarizïɛ̈n chêko Jezü ndə̂kə̂ pa, âdə tche âtcha ngâ akrə lə̂ lö sabäa, ânyë andjê gboadje köbo ndə̂kə̂ yi pö lə̂ küma yê. 3Käko Jezü tô rə̂ sə̈ köchë ndə̂ könô yê ngêwele lâme päkëdə̂: «Alafô tchâtə, kə̈ krʉ̂ lə̂ gûtə̂ azü gbɛ̂.» 4Pânə̈ tche tô rə̂ sə̈ andjê päkëdə̂: «Giamâ kä ndə̂ ndïɛ̈ zâ köbo ndə̂kə̂ mbo rə̂ lə̂ lö sabäa? Kə̂ mbo tchôtchô rə âdəndjë kə̂ mbo ngbongbo rə? Kə̂ tcha akrə âdəndjë ndə̂kə̂ won tchë?» Praâbalë andjë ngbô ma andjê ëtâ. 5Jezü wûn tchə̂lə̂ la andjê balë balë la mêrâ, kə̈ wâ la nyonyo bëte gbôgbô su andjê. Tche tô rə̂ sə̈ köchë lâme päkëdə̂: «Yorʉa tchə̂lə̂ könô zə̈.» Tche yôrʉa tchə̂lə̂ nə̈, ânyë könô yê nə̈ dâka-ê. 6Afarizïɛ̈n wûtu lə̂ nda kə̂ voga Ndjapä ndə̂ ajuîfu nə̈, kə̈ djêtə̂ andjê gasa la azü ndə̂ andjë wâ lə̂ kpûlû ndə̂ gbïɛ̈#3.6 Änyïndə̂ kə̂ to pö ndə̂ azü ndə̂ andjë sə̂ lə̂ kpûlû (kâmâ porosö) ndə̂ gbïɛ̈ Hërôde. Hërôde tə̂ akänyï ndə̂kə̂ won Jezü.
Jezü la kpûlû azü
(Mat 4.25; 12.15-16; Luk 6.17-19)
7Jezü la adjisîpili ndə̂ yê gbɨ̂tɨ tə̂ andjê kə̈ ê atə̂ maga gbölö kpakpa ngû. Angâ angbängbä agbölö kpûlû azü ndə̂ andjë tô bhâ Galilë ndjë la Judë, andjë nə̂ kə̈ zâ tchêngbâ yê. 8Andjë tö bhâ Jerûzalêmo, bhâ Ïdûme, dəkalâ ngû ndə̂ Jurudɛ̈n, lə̂ agö ndə̂ Tîre la Sidön. Angbängbä agbölö kpûlû azü nə̈ nə̂ pu Jezü, bëte andjë djë pö ndə̂ arə gbɛ̂ ndə̂ tche mbô rə̂. 9Käko Jezü tô rə̂ sə̈ adjisîpili ndə̂ yê ndə̂kə̂ pa andjë nyikrə ngâ külû bëte tchë, ânyë azü nə̈ frofroabô tchë frôfro-ê. 10Bëte, tə̂ pö ndə̂nə̈ ndə̂ tche tchâ a-earə̂ tə̂kömbô tə̂ gbölösə̂nə̈, käko a-earə̂ tə̂kömbô gbɛ̂ sə̂ lakə̂ gbrogbrotə̂ andjê ndə̂kə̂ grʉ tchë. 11Ndə̂ azü ndə̂ andjë wâ la angbongbo atchozö lə̂ andjê âsə̈ wun tchë, kə̈ tê tchâtchâ yê lakə̂ ta wârə̂ päkëdə̂: «Mo də̈ Modô ndə̂ Ndjapä!» 12Praâbalë Jezü zâma sə̈ andjê la gbôgbô ndə̂kə̂ pa andjë toabô sə̂ yê tô ânyë azü wunsə̂ yê-ê.
Jezü dɨ̂ abadjângele 12
(Mat 10.1-4; Luk 6.12-16)
13Pânə̈ Jezü kênga atə̂lə̂ küma aga, tche ê azü ndə̂ su yê nyîndə̂ nə̈, ânyë andjë nə̂ pu tchë. 14Tche dɨ̂ andjê lə̂ könô gbɛ̂ tchêpâ nə̈ bïchuû kə̈ ê rə̂ tə̂ andjê pä abadjângele, ndə̂kə̂ pa andjë sə ndrotə̂ yê, ânyë tche wân andjê ndə̂kə̂ mu Tchôtchô Pö. 15Tche zâ gbôgbô sə̈ andjê ndə̂kə̂ gro angbongbo atchozö. 16Azü lə̂ könô gbɛ̂ tchêpâ nə̈ bïchuû nə̈ də̈: Chemön ndə̂ Jezü ê rə̂ tə̂ yê pä Pîêre, 17Jâke la yîngâ yê Jâan amodô ndə̂ Zebede, Jezü ê rə̂ tə̂ andjê pä Böänërëjêse ndə̂ ânyîndə̂ kə̂ to rə̂ päkëdə̂: «Abechë ndə̂ nyïvrö ndə̂ âsoa,» 18Anderë, la Fïlîpe la Bartelemï la Matiyə̈ la Tomä la Jâke, modô ndə̂ Alefë la Tadë la Chemön, akrə gö ndə̂ Kanän, 19la Jüdâse Ïsïkärïyôte, akrə ndə̂ tchê yoadje sə̂ Jezü.
Jezü la Bëlëzëbûlu
(Mat 12.24-32; Luk 11.15-23; 12.10)
20Pânə̈ Jezü dôtə̂ yê atə̂ tchâalê. Kpûlû azü kä pâlatə̂ andjê kə̈ zâ tchô gbɛ̂, âmbô rə̂ pä köbo ndə̂kə̂ pa Jezü la adjisîpili ndə̂ yê zɨ kɨ̈zɨ̂ wâbo-a. 21Ndə̂ azü lə̂ bûngrɨ̂ ndə̂ Jezü âsə̈ dje pö ndə̂nə̈, andjë nə̂ ndə̂kə̂ za tchë bëte andjë tö rə̂ päkëdə̂: «Nyî kä lakə̂ mbo tchë.» 22Angâ a-earə̂ kə̂ nyisə̂ ndïɛ̈ ndə̂ andjë tô bhâ Jerûzalêmo, andjë tô rə̂ päkëdə̂: «Bëlëzëbûlu kä lə̂ yê, bëte rə̂ kä ndə̂ tche gro angbongbo atchozö lâme la gbôgbô ndə̂ makündji ndə̂ andjê.» 23Jezü ê andjê kə̈ nyîsə̂ ngâ pö sə̈ andjê la ndoka päkëdə̂: «Satäa âgro tə̂ yê la tə̂ yê atöko? 24Âdə azü lə̂ ngâ gö-gbïɛ̈ âkrʉ tchə̂lə̂ tə̂ andjê, ânyë kə̈ sə̂ lakə̂ mbo kʉ̈ʉ̈ lə̂ gbâtə̂ andjê, gö-gbïɛ̈ nə̈ lâme krʉabô tee-a. 25Âdə tchə̂lə̂ azü lə̂ ngâ bûngrɨ̂ âkrʉ tchə̂lə̂ tə̂ yê ânyë kə̈ sə̂ lakə̂ mbo kʉ̈ʉ̈ lə̂ gbâtə̂ andjê, bûngrɨ̂ nə̈ lâme wa bata lə̂ kpâlâ yê tee-a. 26Âdə Satäa âalafô ndə̂kə̂ mbo kʉ̈ʉ̈ tə̂ yê la tə̂ yê, âdəndjë rə̂ ndə̂ tchə̂lə̂ yê krʉ̂, gbôgbô ndə̂ yê kä wa bata tee-a.
27«Ngâ akrə wâbo ndə̂kə̂ li bhâ tchâalê ndə̂ ngâ gbôgbô köchë ndə̂kə̂ zɨ ngbä arə ndə̂ yê-a, praâbalë äwäpä tche i tchë dokʉ̈tchê ânyë kə̂ zɨadje ngbä arə tchâalê nə̈. 28Ɛn-ɛn, tə̂ lëge nə̈ më tö rə̂ sə̈ nyê, angbongbo arə gbɛ̂ ndə̂ azü mbo rə̂ âdəndjë kə̂ dro Ndjapä, a âkoadje pö nə̈ lə̂ küma andjê. 29Praâbalë âdə ngâ akrə âdro Kpɨ̂ki Yingö, Ndjapä âkoabô pö nə̈ lə̂ küma yê balë tee-a, pö nə̈ âwa lə̂ küma yê pïï etə̂.»
30Jezü tö pö lâme sə̈ andjê bëte andjë tö rə̂ päkëdə̂: «Tche kä la ngâ ngbongbo tchozö lə̂ yê.»
Anyï Jezü la ayîngâ yê
(Mat 12.46-50; Luk 8.19-21)
31Anyï Jezü la ayîngâ yê wûtu. Andjë sə̂ bhâ sûwu kə̈ wân ngâ akrə ndə̂kə̂ e tchë. 32Kpûlû azü sə̂ ndrotə̂ yê bêche, a tô rə̂ sə̈ tchë päkëdə̂: «Anyï zə̈ la ayîngâ zə̈ la anyînə̂ zə̈ kä sûwu, andjë nyïndə̂ kə̂ wun mö.» 33Tche tô rə̂ ndə̂nə̈ sə̈ andjê päkëdə̂: «Anyï mê la ayîngâ mê də̈ andjanə̈bâ?» 34Pânə̈ tche wûn azü ndə̂ andjë sə̂ ndrotə̂ yê, ânyë kə̈ tô rə̂ sə̈ andjê päkëdə̂: «Nyë wünsa anyï mê la ayîngâ mê kä âtə. 35Bëte akrə ndə̂ tche mbô rə ndə̂ su Ndjapä nyîndə̂ nə̈, akrə nə̈ lâme də̈ yîngâ mê, nyînə̂ mê la anyï mê.»
© Wycliffe Bible Translators, Inc.
