Matiyə̈ 8
8
Jezü tchä ngâ earə̂ broma
(Mar 1.40-45; Luk 5.12-14)
1Ndə̂ Jezü trô tə̂ aga nə̈, gbölö kpûlû azü zâ tchêngbâ yê. 2Ngâ earə̂ broma nə̂ ndola tchë, kə̈ gʉ̂te ëtchâtchâ yê, kə̈ tô rə̂ sə̈ tchë päkëdə̂: «Gbölö Gbïɛ̈, âdə mo ânyində̂ nə̈, amö mbo rə̂ tə̂ mê dâka-ê.» 3Jezü yî könô yê kə̈ grʉ̂ tchë kə̈ tô rə̂ päkëdə̂: «Më nyîndə̂ nə̈ nə̂, tə̂ zə̈ däka-ê!» Posə̂nə̈, broma nə̈ gbôtə̂ köchë lâme-ê. 4Pânə̈ Jezü tô rə̂ sə̈ tchë päkëdə̂: «Deka tü zə̈ kə̈ djê mê ânyë! Toabô rə̂ tô sə̈ ngâ akrə-ê. Praâbalë amö gu, kə̂ matə̂ zə̈ tə̂ earə̂ kə̂ wa ngela sə̈ Ndjapä, kə̂ wa ngela bëte tə̂ zə̈ ndə̂ âdâka lâme, batə̂ rə̂ ndə̂ Ndïɛ̈ ndə̂ Möyîze yûkû nə̈, ânyë azü gbɛ̂ wun rə̂ pä tə̂ zə̈ dâka nə̂#8.4 Nyë dɨ̈ Luk 17.14..»
Jezü tchâ earə̂ kua ndə̂ ngâ kabïta ndə̂ aturûgu ndə̂ Rômo
(Luk 7.1-10; Jan 4.46-54)
5Ndə̂ Jezü li âtə̂lə̂ gö ndə̂ Käpërënäyûmo, ngâ kabïta ndə̂ aturûgu ndə̂ Rômo nə̂ ndola tchë, 6kə̈ dɨ̂ tchə̂lə̂ ma yê sə̈ tchë päkëdə̂: «Gbölö Gbïɛ̈, earə̂ kua ndə̂ mê kä tchâalê, ndə̂ tə̂ yê ngêwele, ânyë tə̂ yê kä tchë tə̂ gbölösə̂nə̈. Köbo ndə̂kə̂ pa tche alafô wâbo ndjë balë-a.» 7Jezü tô rə̂ sə̈ tchë päkëdə̂: «Mê eadje ndə̂kə̂ tcha tchë lə̂ tə̂kömbô ndə̂ yê.» 8Praâbalë kabïta nə̈ tô rə̂ ndə̂nə̈ sə̈ tchë päkëdə̂: «Gbölö Gbïɛ̈, më kʉ̂âbo sə̂nə̈ pä mo li bhâ tchâalê ndə̂ mê-a. Äwäpä mo to kütû pö la ma zə̈, earə̂ kua ndə̂ mê tchadje. 9Bëte mëmê la tə̂ mê, më wä tchâtchâ agbölö azü gö ndə̂ andjë wâ pâ mê. Më wä ndjë la aturûgu tchâtchâ mê. Më tö rə̂ sə̈ ngânə̈ päkëdə̂: ‹Amö e təbhâ›, tche e ndjë; âdə më âto rə̂ sə̈ ngânə̈ päkëdə̂: ‹Amö nə tchâtə›, tche nə ndjë. Më tö rə̂ sə̈ ngbâa ndə̂ mê päkëdə̂: ‹Amö mbo nə̈ âtə›, tche mbo ndjë rə̂.» 10Ndə̂ Jezü djê pö lâme, kə̈ gâmba kabïta nə̈, kə̈ tô rə̂ sə̈ kpûlû azü ndə̂ andjë zâ tchêngbâ yê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Më gbôâbo ngâ akrə balë kâkë bhâ Isarayële ndə̂kə̂ za su yê sə̈ mê wâ gbölö batə̂ anə̈ âtə-a. 11Më tö rə̂ sə̈ nyê, angbängbä azü ânəadje dəsə̂nə̈ ndə̂ lo wutu tâ, ndjë dəsə̂nə̈ ndə̂ lo li tâ ndə̂kə̂ sə lə̂ kpülü ndə̂kə̂ zɨ rə la Abrahâmo, la Izâke, la Jakôbo bhâlə̂ Gbölö gö-gbïɛ̈ ndə̂ tchêlafô. 12Praâbalë azü ndə̂ a dɨ̂ andjê bëte Gbölö gö-gbïɛ̈ ndə̂ tchêlafô, a âyiadje andjê bhâ sûwu lə̂ bübü tchô; tchâme kä ndə̂ kɨ̈ lakə̂ zɨ tchə̂lə̂ da jï wâ tâ.» 13Pânə̈ Jezü tô rə̂ sə̈ kabïta nə̈ päkëdə̂: «Gu atə̂ndə̂ zə̈. Äwäpä rə nə̈ mbo gundə̂sə̂ kə̂ za su zə̈ sə̈ mê.» Kütû lə̂ dalo nə̈ lâme, tə̂ earə̂ kua nə̈ krâ ngrôô.
Jezü tchä angbängbä azü ndə̂ andjë wâ la tə̂kömbô
(Mar 1.29-34; Luk 4.38-41)
14Ndə̂ Jezü ê atə̂ tchâalê ndə̂ Pîêre, tche wûn ɛ̈chë-mbïɛ̈ nə̈ ndə̂ tche lô bêche bëte tə̂ yê wö tə̂ gbölösə̂nə̈. 15Jezü grʉ̂ könô yê ânyë tə̂ yê ndə̂ âwô lâme gbôtə̂ yê. Tche âlafô kə̈ zâ kɨ̈zɨ̂ sə̈ Jezü.
16La tchêndə̂gölo, azü nə̂ la kpûlû azü ndə̂ andjë wâ la angbongbo atchozö sə̈ Jezü. Jezü grô angbongbo atchozö nə̈, kə̈ tchâ a-earə̂ tə̂kömbô nə̈ kütû lə̂ köbosə̂ pö ma yê. 17Jezü mbö rə̂ käko ndə̂kə̂ pa pö ndə̂ Ezayï earə̂ ndə̂ma Ndjapä mbo gundə̂sə̂ nə̈. Tche tö rə̂ alême päkëdə̂:
«Tche zä yûkü ndə̂ azə̂,
ânyë kə̈ zâ tə̂kömbô ndə̂ azə̂ ëpâ yê#8.17 Nyë dɨ̈ Eza 53.4..»
Azü ndə̂ andjë nyîndə̂ kə̂ za tchêngbâ Jezü
(Luk 9.57-62)
18Ndə̂ Jezü wûn kpûlû azü ndə̂ andjë tâkpa ndrotə̂ yê, tche zâma sə̈ adjisîpili ndə̂ yê ndə̂kə̂ pa tchetchë la andjê zu atə̂ kalâ ngû. 19Ngâ earə̂ kə̂ nyisə̂ ndïɛ̈ nə̂ ndola tchë, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, tchô gbɛ̂ ndə̂ mo e tâ, më ânə ngbâ zə̈.» 20Jezü tô rə̂ sə̈ tchë päkëdə̂: «Agrawe kä la grʉ̈ andjê lə̂ täme, anyïɛ̈nə̈ kä la kʉmâ andjê tâ, praâbalë Modô ndə̂ Akrə wâbo la ngâ tchô ndə̂kə̂ za küma yê tâ-a.»
21Ngânə̈ balë lə̂ gûtə̂ adjisîpili ndə̂ yê tô rə̂ sə̈ tchë päkëdə̂: «Gbölö Gbïɛ̈, amö gbotə̂ mê, më ê kə̈ chî bha mê ânyë.» 22Jezü tô rə̂ ndə̂nə̈ sə̈ tchë päkëdə̂: «Amö za tchêngbâ mê, kə̂ gbotə̂ akuzü andjë chi akuzü ndə̂ andjê.»
Jezü zäma sə̈ gbölö yi
(Mar 4.35-41; Luk 8.22-25)
23Jezü ä lə̂ külû ânyë adjisîpili ndə̂ yê â ndrotə̂ yê. 24Djîrə̂, ngâ gbölö yi sə̂ lakə̂ mbo la gbölö ngû nə̈. Ngû sə̂ lakə̂ tu âtə̂lə̂ külû nə̈. Jezü tê andə̂ ye nə̈ gbô kə̈ lô-ê. 25Adjisîpili nə̂ ndola Jezü, kə̈ jô tchë, kə̈ tô rə̂ sə̈ tchë päkëdə̂: «Gbölö Gbïɛ̈, amö tcha azə̂! Azə̈ âtchu!» 26Jezü tô rə̂ sə̈ andjê päkëdə̂: «Nyënyê ndə̂ kə̂ za su nyê sə̈ Ndjapä wâ kpîɛ̂kpîɛ̂ rə̂ âtə, wawa mbö nyê bëte giamâ?» Pânə̈, tche âlafô kə̈ hrô la yi la ngû nə̈ ânyë tchô zɨ̂ tɨɨ. 27Tchə̂lə̂ küma andjê djîngɨli, andjë tô rə̂ päkëdə̂: «Köchë âtə də̈ tchabâ ânyë yi la gbölö ngû ngbro gbɛ̂ djê ndjë tchë âtə?»
Jezü tchä aköchë bïchuû ndə̂ andjë wâ la angbongbo atchozö
(Mar 5.1-20; Luk 8.26-39)
28Ndə̂ Jezü wûtu dəkalâ ngû nə̈, lə̂ gö ndə̂ Gadarä, aköchë bïchuû tô bhâ sə̂nə̈ ndə̂ a chi akuzü tâ, kə̈ nə̂ pu tchë. Aköchë lâme kä la angbongbo atchozö lə̂ andjê. Andjë wätə̂ angbongbo azü tə̂ gbölösə̂nə̈, bëte rə̂ kä ndə̂ akrə balë wâbo ndə̂kə̂ ro lə̂ köbo ndə̂ andjë sə̂ tâ lâme-a. 29Andjë tâ wârə̂ kə̈ tô rə̂ päkëdə̂: «Modô ndə̂ Ndjapä! Giamâ mo wûn rə̂ tə̂ ârâ? Mo nə̈ ndə̂kə̂ djingɨli tchə̂lə̂ küma ârâ dokʉ̈tchê ndə̂kə̂ pa lö nə̈ wutu?»
30Dëkë tchô nə̈ lâme wä ndola ngâ gbölö kpûlû akoso ndə̂ andjë sə̂ lakə̂ pu kɨ̈zɨ̂ ndə̂kə̂ zɨ rə̂. 31Angbongbo atchozö nə̈ dɨ̂ tchə̂lə̂ ma andjê sə̈ Jezü päkëdə̂: «Âdə mo ânyində̂ kə̂ gro ârâ, amö wan ârâ lə̂ kpûlû akoso təbhâ.» 32Jezü tô rə̂ sə̈ andjê päkëdə̂: «Nyë êë!» Angbongbo atchozö nə̈ wûtu lə̂ aköchë nə̈ lâme, kə̈ lî lə̂ akoso nə̈. Tchâme, akoso nə̈ tô la rö bhâlə̂ küma aga lâme, kə̈ tû gbɛ̂ âtə̂lə̂ gbölö kpakpa ngû, kə̈ tchû-î.
33A-earə̂ kə̂ nyiale akoso nə̈ kpê etə̂ âtə̂lə̂ gö nə̈ kə̈ tô pö ndə̂ arə gbɛ̂ ndə̂ âwûtu, la pö ndə̂ aköchë bïchuû ndə̂ andjë wâ la angbongbo atchozö lâme. 34Käko azü gö nə̈ gbɛ̂ wûtu kə̈ ê ndola Jezü. Ndə̂ andjë wûn tchë, andjë dɨ̂ tchə̂lə̂ ma andjê sə̈ tchë ndə̂kə̂ pa tche gbo lə̂ gö ndə̂ anyê kə̂ ro etə̂.
Currently Selected:
Matiyə̈ 8: lnl
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Wycliffe Bible Translators, Inc.
