Luka 8
8
Hər hay gə ɗa kute Yesu
1Adede ahan ga, Yesu takənmandar‑a a həsɗay ala a bərni hay de atə ala a hu hay de, a dzaɗitəna atə a nanɗilhətan Labara Sələmna s'i gurɗay s'Askwaf a ɗaha hay. Ɗa slənɗay ene jaŋwa brecaw kini ba tə caca. 2Hər hay s'iŋgeɗe gə ɗa ɓurəkede jini hay ayitəna, ɗa mburakede ada kuza hay tan‑a gərgəra saŋa kini, wutə aba a ma ene de. Na sləmay hay tan: Mari gə ɗa hawa i Marie hər ɗa Magdala saŋa, wuran tsaw jini hay ciɓa ɗa nayede ada ayina saŋa, 3atə Yuwanna hər Huza məlmal ɗa sləra bay Hirudus, atə Suzan ŋa hər hay s'iŋgeɗe ba tə duna ɗa huməktənande a wutə Yesu al almane hay tan saŋa.
Araja i ɗu gə həts shef s'away
(Matta 13:1-9; Markus 4:1-9)
4Ɗaha hay duna ɗa nay ada hu hay‑a gərgərgəra, ɗa guɓaka a ma Yesu de. Mezlene takənmandar‑a a dzaɗitən me al araja saŋa, wa: 5«Ɗu mbətsɗay s'iŋgeɗe niya, laka a hətsɗil shef a kuvak ene de. A aŋəde hadzəl ga, shef hay s'iŋgeɗe ɗa hadzaka ala ande a ciba. Ɗaha hay ɗa naya a dzunɗinaŋade, fan hay ɗa pəkakude ba cecena. 6Shef hay s'iŋgeɗe, ɗa hadzaka apə tsuktsakw‑a, ba ɗa hahayede ga, ciɗa ɗa dulaka, aɗaba arase niba. 7Shef hay s'iŋgeɗe adəɓa ga, ɗa hadzaka ala a adəga de. Adəga ghərkənaŋade, shishiɗiktənakude. 8Amá shef hay s'iŋgeɗe ga, ɗa hadzaka apə higay sələmna ka, ɗa gaka, ɗa ləkəlede ŋa: Kine dərmak dərmak‑a apəna.» Mezlene Yesu ane pakənŋakude a taŋw ba dunduna, wa: «Ɗu gə abə sləmay ene dikkwa, á cukka me saŋa.»
Igə tsakul Yesu a dzaɗay al araja
(Matta 13:10-17; Markus 4:10-12)
9Adede ahan ga, ɗa kutə wuran ɗa mbutsəkənamiya igə araja sahan gus dzaɗiya. 10Zləmkənhətənaŋa, wa: «Ayikuna ga, ɗa vərəkkun ciba a sənɗiyede a ashilire hay gurɗay s'Askwaf, amá a ɗa s'iŋgeɗe ga, əŋ dzatəna aba al araja hay sahan, gəni:
Ɗa ceciya aba al aray tan, amá ɗa caka ba,
ɗa tsukwa abi sləmay tan, amá ɗa shinkiyede ba#Ezayi 6:9-10.»
Yesu papər səlay s'araja ɗu hətsɗil shef
(Matta 13:18-23; Markus 4:13-20)
11«Na igə araja sahan gus dzaɗiya: Shef ga, ba me s'Askwaf. 12Shef hay gə a adaw ciba de saŋa ga, ba ɗa gə ɗa cukka me s'Askwaf, amá Shetene nike a ɗugəɗiyede me sahan a bembec hay tan‑a, gəni ɗá ɗəfpənŋa ba a Askwaf‑a, ɗá zluwa ba. 13Shef hay gə apə tsuktsakw‑a saŋa ga, ɗa gə ɗa tivɨka tsa me s'Askwaf abi higəɗay abə ɗa sənay, amá gə slilke niba arde a ayitəna. Ɗa ɗəfpənŋa aba hənɗay dzakkwa de, amá abə zlaɗa nzəktan gə ɗa harənde. 14Shef hay gə a adəga de saŋa ga, ɗa gə ɗa cukka tsa me s'Askwaf, amá gə iduniya atə gus s'almane, ŋa məɗay tsəre duniya saŋa ndimka nzəɗa tan, giya bə piɗa ayitənde. 15Shef hay gə apə higay sələmna ka saŋa ga, ɗa gə abə ɗa tsukwika me s'Askwaf, ɗa bəra abi bembec tan ɓile, i bembec sələmna, ɗa ge piɗa duna i shir s'aray tan sahan.»
Araja i lalam
(Markus 4:21-25)
16«Ɗu gə hənnande akwa a lalam ni, humbɨnaŋade mudak, bi ɗəfnarde a mahənɗay gə niba. Bira ɗa wala aba apə ma wulɗila ka, ta ɗa gə ɗa like ala a kudak sahan de, ɗa caka parakka tsəre ene. 17Aɗaba ba cecena igə i shiɓɗay saŋa, ǎ nanayede. Ihay gə ɗa gaka ashilire saŋa kini, zlama à ɗá mbazla ba parakka. 18Kugwan ga, ɗifɨna zlə sləmay a tsukw me sahan de, aɗaba ɗu gə abə away niya a ma ene de ga, à ɗá ɗəfənhənaŋade adəɓa. Amá ɗu gə abə away niba a ma ene de ga, aba atə aŋa á nzəkiya kutew saŋa kini, à ɗá sləɗpəna.»
Wutə məman atə wayə məman a Yesu
(Matta 12:46-50; Markus 3:31-35)
19Bigeɗe ga, wutə məman atə wayə məman a Yesu ɗa laka a nzəɗiya, amá gə ɗa dzəgwika bə laɗaya ala a ma ene de, a ma duna tsəre ɗaha hay de. 20Ɗa dzakəna, wa: «Wutə mamay atə wayə mamay ɗa niya amide, ɗa naya a ma aka de.» 21Amá wuran zləmkənhətənaŋa, wa: «Mama hwa, atə wayə mama ga, ba ɗa gə ɗa tsukw me s'Askwaf, ghaya ɗa giya igə me sahan dzawa saŋa.»
Yesu tavəl valale apə ŋa heye ka
(Matta 8:23-27; Markus 4:35-41)
22Bigeɗe adəɓa ga, wutə Yesu atə ɗa kutə wuran ɗa dzənide a palambak s'ahwam de. Dzəktəna, wa: «Cuɗinmənede heye ala apə medeɓeca s'iŋgətan‑a.» Mezlene ba huɗay tan. 23A aŋəde ɗa cuɗiya ga, Yesu nzika han. Ciɗa hərdəŋdəŋ humaɗe slabakakude apə ŋa heye ka ane, sləŋa palambak s'ahwam ruhkede al ahwam, wutə a zlaɗa duwuna de. 24Wutan ane ɗa laka a sənɗilede Yesu, wa: «Malum, Malum, ma niba dəgiya!» Sənakede, sləkkənaŋade a valale ane atə a paɗuŋɗay s'ahwam hay saŋa ga, ɗa pakande tsəriyya. 25Mezlene Yesu dzəktəna, wa: «Mede ɗəfɗipənŋa kwan?» Amá wutan ɗa zləzləgutsakakude, ɗa ge ba s'ajipu ene, ghaya ɗa jeke a duvak tan de, wa: «Dagwa saŋa mà, wiya ta wuran ni, dzalan a valale atə a ahwam kini ɗa tsukw me ene saŋa!»
Yesu mbər ɗu gə i jini a ŋa de
(Matta 8:28-34; Markus 5:1-20)
26Wutan ane ɗa laka apə higay Geraseni hay‑a, ndaŋŋa i Galile. 27Yesu fatayede ada palambak s'ahwam‑a ga, dagwa s'iŋgeɗe i jini a ŋa de aba a hu sahan de laka a ŋgərɗinande ba ŋgərɗay. Həhənaka fata bə ifətɗay, adide kini zheke ba, si aba a dagava ŋaŋasl hay de. 28Ba hadzəkpan aray a Yesu ga, laka a taŋaɗaya a səlay de ayina, tizha ŋgulahaka, wa: «Kə gwasa ama a ma hwa de Yesu, Kine s'Askwaf, Askwaf gə i kufa ka aŋa a away hay‑a ba cecena saŋa? Ba kəmkam, gɨwa bə palase!» 29Dzaka ahan sahan ga, aɗaba Yesu dzakəna a jini gə a zhek ene de saŋa wa á nayede ada ayina. Jini sahan zak hahəfɗinaŋade gha səlay kəmta kini, ɗa təkuskənka alay hay i tsavitsavay, ɗa nanəkənka səlay hay i kadərci a ghaɗinŋa a huɗay. Amá ba kakaɗakude, jini sahan səzəla aba ala akiɓde. 30Yesu mbutsəkənamiya, wa: «Sləmay aka wiya?» Wuran ane, wa: «Sləmay hwa Fuɗəɗay Ɗa Huma.» Dzaka kugwan saŋa ga, aɗaba jini hay duna ɗa lide ayinde. 31Jini hay sahan ɗa gəkən kəmkam a Yesu gəni á ɓərtənede ba ala a mika tsəgwanna de gə maga ene niba aride saŋa.
32Ŋgaɓa s'avizhaw hay zləkte tan niba, niya ɗa cigke apə ŋa tsəɓakw‑a akənahan. Jini hay ane ɗa gəkən kəmkam a Yesu a vərɗitən ciba a ləɗide a avizhaw hay sahan de, wuran kini vərəktəna. 33Mezlene jini hay ane, ɗa nayede ada dagwa sahan‑a, ɗa lide a avizhaw hay de sahan. Ba cecena ŋgaɓa s'avizhaw hay ane ɗa kaɗaya ada apə ŋa tsəɓakw sahan‑a, shibit ɗa mbəɗide ala a heye de, ba cecena tan ɗa kəɗide.
34Ɗa tsəg s'avizhaw hay ane, ba ɗa tsaka igə gaka sahan ga, ba ɗəvərɗitan, ɗa məktənka labara ene a ɗa gə a bərni de atə a ɗa gə a hu hay de. 35Ɗaha hay kaya a dzəfɗay a ləɗay a tsa s'igə gaka sahan, ɗa laka a ma Yesu de ga, ɗa laka a nzə dagwa gə jini hay ɗa nayede ada ayina ane i zaɗay apə zhek ene ka, a ifafətɗay de, həŋkale ene tavəkŋa ba laŋŋa. Wutan ane zləŋwaɗ vəɗəktəna. 36Ɗa gə ɗa tsaka isahan al aray tan saŋa, ɗa ruvəktənede a ɗa sahan, nay kəma ta dagwa gə zak i jini a ŋa de sahan mbəraka. 37Ɗa gə a higay Geraseni de ane ba cecena ɗa gəkən kəmkam a Yesu gəni á huwede a higay tan‑a, aɗaba ɗa zləgutsaka awiba. Mezlene dzənide a palambak s'ahwam de, ba mbəɗɗiŋa ene. 38Dagwa gə jini hay ɗa nayede ayina ane gəkən kəmkam a Yesu gəni wuran kini zheke a ma ene de. Amá mbəɗkəlŋa, wa: 39«Mbəɗŋa ala adiyaka, le papərtənede igə Askwaf giyakana saŋa ba cecena a ɗaha hay.» Mezlene wuran ane ba huɗay ene ala a hu de, gha i magəna kini laka a ruvəɗitənede igə Yesu gəkəna saŋa ba cecena a ɗaha hay.
Labara di Jayrus atə i hər gə ɗəfəkpan alay a me s'ifətɗay Yesu
(Matta 9:18-26; Markus 5:21-43)
40A aŋəde Yesu mbəɗiŋa ga, fuɗəɗay ɗaha hay awiba ɗa təvika abi higəɗay, aɗaba ba cecena tan ɗa bək ba wuran. 41Mezlene dagwa s'iŋgeɗe niya sləmay ene Jayrus, məlmal s'adaw guɓaɗay Zhuwif hay, naya a taŋaɗaya ba təŋɗay a səlay de a Yesu, gəkən kəmkam a ləɗay ala adiyana. 42Aɗaba dile ene niya ɓile‑ɓilehan ba wuran, slɨkiya kine s'aveŋ jaŋwa brecaw, sləŋa shifa likede.
A aŋəde Yesu niya like ga, ɗaha hay ɗa zləŋkənariya, ɗa pisliya. 43Hər s'iŋgeɗe kini zak akənahan sahan, vaɗay jaŋwa brecaw yəm ba munje. Kəɗkəla almane ene ba cecena a ma duktar hay de, amá niba ɗu gə dzəgwika mbərɗiya. 44Wuran ane kəzəkpan a Yesu i dəɓa ka, ɗəfəkpan alay a me s'ifətɗay ene ga, ciɗa munje ane tavaka. 45Yesu, wa: «Wiya ɗəfəkpaw alay?» Ɗaha hay ba cecena gha wiya kini wa ənne ba. Mezlene Piyer dzakəna, wa: «Malum, aŋa ba ɗa gə ɗa zləŋiyakariya saŋa ɗa pislɨken.» 46Amá Yesu, wa: «Ɗeɗe niya ɗəfəkpaw alay, aɗaba əŋ təkəmika nzəɗa nayede ada ayuwa.» 47Hər saŋa ane tsawa ǎ shiɓa bə ga, nəɗay ene ala a ma Yesu de, ghaya dedike, taŋaka apə miya ayina. Papərkede apə miya a ɗaha hay‑a ba cecena, amnaya ɗəfəkpan alay ene, atə mbəraɗaya ene aba a ahan de saŋa. 48Mezlene Yesu dzakəna, wa: «Dile hwa, ɗəfɗipənŋa aka zluwikɨna, le a adaw a lapiya tsəre de.»
49Zlama ba me sahan kini Yesu kəɗkəlede bə ga, ɗu s'iŋgeɗe naya ada adaw Jayrus‑a ane, dzakəna, wa: «Dile aka ɓusika ba, wushɨna bə cine ŋa a malum.» 50Amá Yesu lək sənɗay a me sahan ga, dzana a Jayrus, wa: «Zləŋwaɗ á viɗken ba, ɗəfpənŋa ɗaya ike, dile aka ǎ mbəra.» 51Ɗa laka adiyana ane ga, Yesu vərəktəna bə ciba a ɗaha hay a kutəɗiya ala adide, si aba wutə Piyer, Zhaŋ atə Zhak, ŋa wutə pəban atə məman a kine. 52Ɗaha hay ba cecena ɗa yəm kine sahan, ɗa ɗugiya atə degwava. Amá Yesu, wa: «Yɨmen ba, kine saŋa mətsaka ba, nje ba han.» 53Amá wutan ɗa hətskəlde a musəɗay a fəsuɗila, aɗaba ɗa səna kine sahan niba i shifa. 54Yesu bərkənka alay a kine ka ane, dzakəna abi pa taŋw, wa: «Kine, slabakude.» 55Shifa lide adəɓa a kine de ane, ciɗa slabakakude. Mezlene Yesu dzəktəna, wa: Virɨnna ipəɗay. 56Wutə pəban atə məman ga, ɗa gəka ajipu awiba apəna. Amá Yesu, wa: Gha a wiya kini jɨnna bə igə na gaka saŋa.
© (Active), Wycliffe Bible Translators, Inc. All rights reserved.
