Luka 6
6
Yesu atə bək həts mbas
(Matta 12:1-8; Markus 2:23-28)
1Bigeɗe bək həts mbas, wutə Yesu ɗa likede a kuvak hay s'alkame ka ga, ɗa kutə wuran ɗa kakaɗika ŋa s'alkame, ɗa hwahwarəkpəna, ɗa kutska. 2Farisa hay s'iŋgeɗe ɗa dzəktəna, wa: «Amnaya kwa giya igə me gurɗay man mbəkpəna gəɗiya ene bək həts mbas saŋa?» 3Yesu zləmkənhətənaŋa, wa: «Kwene mà, kwa zak ba a dzaɗiyede igə wutə Davit ɗa gəka bigeɗe atə ɗagadiyana a aŋəde may vəɗəktan saŋa təku? 4Lide a adaw s'Askwaf de, tsəməkpəna dipeŋ hay gə ɗa ɗəfkənka sadake ene a Askwaf‑a saŋa, pika, vərəktəna a ɗagadiyana kini. Amá me gurɗay man ga, vərəktən ciba aba ɗa slumə ɗaha hay atə Askwaf a pə dipeŋ hay sahan#Lewi 24:5-9.» 5Yesu ane ɗəfkənhətənaŋade adəɓa, wa: «Ɗuduwuna gə gure bək həts mbas ga, ba Kine ɗu səlammərzheŋ.»
Yesu mbər dagwa gə alay ene ɓile i mətsɗay
(Matta 12:9-14; Markus 3:1-6)
6Bək həts mbas s'iŋgeɗe kini Yesu laka ala a adaw guɓaɗay Zhuwif hay de, takənmandar‑a a tsugəɗilhətan away a ɗaha hay. Dagwa s'iŋgeɗe alay ɗəfka ene i mətsɗay kini niya ede. 7Malum hay me gurɗay atə Farisa hay ɗa ɗəf ba sləmay apə Yesu‑a a tsatsəɗiya gəni ɗece mà, ǎ mbəra he ɗaha bək həts mbas, ta wutan ɗa nzəki ciba a hətsɗinaŋade me. 8Mbatse, Yesu sənkede tsaw a dzəmŋa tan sahan. Mezlene dzakəna a dagwa gə alay ene i mətsɗay ane, wa: «Slabakude, tava a dagava ɗaha hay de.» Dagwa ane slabakakude, tavaka. 9Yesu dzəktəna, wa: «Na əŋ mbucekunamiya me: Me gurɗay s'Askwaf mà, vərəkmən ciba a gə s'ama bək həts mbas? Səlam tsəre təku, ɓutsam tsəre he? Zluɗika shifa ɗaha təku, səsɗila he?» 10Wuran ane tsatsəktənakude ba cecena tan, dzakəna a dagwa ane, wa: «Parede alay aka.» Pərkede ga, alay ene sahan mbəraka. 11Amá bərəktən bembec awiba a malum hay me gurɗay atə Farisa hay, ɗa takənmandar‑a a təf sawari a duvak tan de ala apə igə ka à ɗá gɨna a Yesu.
Yesu dzadzər ɗa slənɗay ene jaŋwa brecaw
(Matta 10:1-4; Markus 3:13-19)
12Bigeɗe ga, Yesu dzənaka ala akunde a gə maduwa, hənak ba pəŋŋa al aray a ŋaŋəl s'Askwaf. 13Mandaka ga, həktənakude ɗa kutə wuran, dzadzarika ɗaha jaŋwa brecaw ayitənde, həktan i ɗa slənɗay: 14Wutə Simuŋ gə wuran ɗəfkənka Piyer saŋa atə dagwa məman s'Andre, wutə Zhak atə Zhaŋ, wutə Filip atə Bartelemi, 15wutə Matta atə Tumas, wutə Zhak dagwa Halfa atə Simuŋ gə a giwa Zelut hay de saŋa, 16wutə Yahuda dagwa Zhak atə Yahuda Iskariyut gə səmkəla Yesu saŋa.
Yesu atə abaga ɗaha hay
(Matta 4:23-25)
17Yesu fatayede ada kuwan‑a atə ɗa slənɗay ene ane, tavaka a faday faday ene de. Ɗa kutə wuran s'iŋgeɗe kini ɗa niya akənahan ba tə duna. Abaga ɗa s'iŋgeɗe kini ɗa niya i fuɗəɗay akənahan ba diŋiliŋŋa, ɗa nay ada mene hay‑a ba cecena a higay Zhude de, ada Zheruzalem‑a, ada ande a me heye Tirus‑a, ŋa ada Sidun‑a. 18Ɗa naya a tsukw s'igə wuran dzawa atə a mburaɗaya a kuza hay tan de. Ɗa gə jini hay ɗa zak gəɗitən palase kini, mburəktəna. 19Ba cecena abaga ɗaha hay sahan ɗa bɨrde ba zhek ala a ma ene de a ɗəfɗipan alay, aɗaba nzəɗa niya nikede ayina a mburɗitan ba cecena.
Higəɗay duwuna bi zlaɗa
(Matta 5:1-12)
20Yesu tsatsəktənakude ɗa kutə wuran ga, dzaka, wa:
«Gədəɗɗay ayikuna kwa talage hay,
aɗaba gurɗay s'Askwaf saŋa i kwan.
21Gədəɗɗay ayikuna kwa ɗa gə kwene i may a tənday de səgan saŋa,
aɗaba zlama tənday kwan ǎ ruhwa.
Gədəɗɗay ayikuna kwa ɗa gə kwene al arishahwam a aray de səgan saŋa,
aɗaba zlama à kwá mushiya.
22Gədəɗɗay ayikuna abə ni, ɗaha hay ɗa gɨlkwena ɗa dawa tan,
ɗa ɓərəkpəkuna a zhek‑a, ɗa giginihkwene,
ɗa nenɨla avaŋe ala apə kwan‑a arde a Kine ɗu səlammərzheŋ saŋa.
23Higen bək sahan, heheven i higəɗay, aɗaba Askwaf ǎ le a mbəlɗikunede ihive kwan zləkte ene niba a askwaf de. Ceje hay tan kini ɗa zak gəɗitəna ba kugunhan zuwuna a ɗa mbəɗɗitənande me s'Askwaf a ɗaha hay.
24Amá palase ayikuna kwa ɗa gelipe,
aɗaba kwene kwa pika tsaw məɗay tsəre kwan.
25Palase ayikuna kwa ɗa gə may kwan i mətsɗay səgan saŋa,
aɗaba zlama may ǎ viɗkwene.
Palase ayikuna kwa ɗa gə kwa mushɨke səgan saŋa,
aɗaba zlama məɗay bə tsəre ǎ njɨkwene, à kwá yam.
26Palase ayikuna kwa ɗa gə ɗaha hay ba cecena ɗa zlibekwene səgan saŋa, aɗaba ceje hay tan kini ɗa zak gəɗitəna ba kugunhan zuwuna a ɗa fida gə wa ma ɗa mbəɗɗitənande me s'Askwaf a ɗaha hay saŋa.»
Micɨntan i ɗa dawa kwan
(Matta 5:38-48; 7:12)
27«Na əŋ dzakuna zla, kwa ɗa gə kwa tsukw me hwa saŋa: Micɨntan i ɗa dawa kwan, gɨntən səlam tsəre a ɗa gə ɗa mickwene ba aride saŋa. 28Ɗikɨntənande barka a ɗa gə ɗa kakəɗkun slahan, ŋeŋelɨntənande Askwaf a ɗa gə ɗa gɨkun palase. 29Abə ɗa slaɗiyaka a slərsləmay de ga, mbəɗənakude slərsləmay s'iŋgeɗe adəɓa a ɗuhan. Gha ɗa tsəmipaka səɗava aka kini, ghanŋa ba a ɗuhan a tsəmɗipaka jampa ene. 30Gha wiya mbutsəka away a ma aka de kini, vərna. Ɗu gə abə təvəkpaka iyaka kini mbuciya ba. 31Ba kəla igə kwene kwa gus ɗaha ɗa gəkikuna ayikuna saŋa ga, kwene kini gɨntəna a ɗaha hay ba kugunhan.
32«Abə kwa mictan abi ɗa gə wutan kini ɗa mickwene mà, wiya ǎ zlibekwene? Aɗaba ɗa hipe kini ɗa mictan abi ɗa gə ɗa mictan al ayitəna. 33Abə kwa gɨtən səlam tsəre aba ɗa gə wutan kini ɗa gɨkun səlam tsəre mà, wiya ǎ zlibekwene? Aɗaba ɗa hipe kini ɗa giya ba kugunhan. 34Abə kwa kəltəna away aba a ɗa gə kwa səna à ɗá mbəlkunka mà, wiya ǎ zlibekwene? Abi ɗa hipe kini ɗa kəltəna away aba ɗa hipe a mbəlɗitəna aba apə kalkala ene ka. 35Amá kwene ga, micɨntan i ɗa dawa kwan, gɨntən səlam tsəre, kilɨntəna away, tama kwan á za bə cine apə isahan‑a a mbəɗɗilhəkunariya. Kugwan ga, kwene à kwá nje ribe duwuna, à kwá giya wayə s'Askwaf gə i kufa ka aŋa a away hay‑a ba cecena saŋa. Aɗaba wuran gɨtən səlam tsəre a ɗa gə ɗa sləkəɗəna bə me ayina atə a ɗa zlasaw. 36Yinmɨntənde mərga a ɗaha hay ka i Pəbe kwan gə yəmtənde mərga a ɗaha hay saŋa.»
Bərɨna bə ɗaha i sheriya
(Matta 7:1-5)
37«Bərɨna bə ɗaha i sheriya, kwene kini Askwaf ǎ birkwene bə i sheriya. Nenɨna bə ɗaha i sheriya, kwene kini Askwaf ǎ ninkwene bə i sheriya. Ɓushɨn hipe a ɗaha, kwene kini Askwaf ǎ ɓushɨkunka i kwan. 38Virɨntəna away a ɗaha hay, kwene kini Askwaf ǎ vərkuna, wuran ǎ hahətskunde ba dunduna a bəhwa hay kwan de, i gurɗay ba hasha, i ndikɗay, i ruhɗay ha hicke ala agide. Aɗaba ba daram gə kwene kwa gurɨlhətan away a ɗaha hay al ayina saŋa ga, Askwaf kini ǎ le a gurɗilhəkwan aba al ahan.»
39Yesu ane dzəktəna araja saŋa adəɓa, wa: «Ŋgulaf ni, jukka gudzə miya ene ŋgulaf he? Ba cawuna tan ɗa le a hətsɗide a mika de bəhe? 40Gha ɗu tsugəɗay kini, ndimka bə ɗu tsugəɗilhan away, si babə kəɗkəlede tsugəɗay ene i ciba ene ga, gɨkiya ka ɗu gə tsugəkəlhan away sahan.
41«Amnaya kə cece ba s'afəka gə a aray de a kine mamay, mbatse iyaka ɗəma dada kulay ede ni, kə tikɨmka bə saŋa? 42Kə jukka kəma dzaɗina a kine mamay ika: “Kaya əŋ təvənpaka afəka a aray‑a,” mbatse iyaka ɗəma dada kulay ede ni, kə tikɨmka bə saŋa? Ike i miɗesl cawcaw‑a dəgiya, kətede həmba dada kulay gə a aray aka de saŋa, ta ikə caka aray parakka a təfɗinpəna afəka a aray‑a a kine mamay‑a.
Məman shishka ga, ɗa sənede aba apə kine ene ka
(Matta 7:17-20; 12:34-35)
43«Məman shishka sələmna ga, waha bə kine məɗay bə saŋa. Məman shishka gə al aray bə kini, waha bə kine məɗinna. 44Gha məman shishka gəna kini ɗa sənede aba apə kine ene ka. Aɗaba ɗa ɗugɨka bə kine bikwa apə məman shishka gə al adəga, kine s'inabuhi kini ɗa ɗugɨka ba apə hwəla ka. 45Ɗu sələmna ga, mɨkiyede ba s'iməɗinna caŋŋa ada bembec ene ka gə isələmna i ndikɗay ede saŋa. Ɗu ɓutsam kini mɨkiyede ba s'igə məɗay bə saŋa ada bembec ene ka gə ba məɗay bə tsəre caŋŋa i ndikɗay ede saŋa. Aɗaba me ga, dza ba s'igə i ndikɗay a bembec de a ɗuhan.
Adaw hay gərgəra caw
(Matta 7:24-27)
46«Amnaya kwa hanaw i “Ɗuduwuna, Ɗuduwuna,” amá igə ənne əŋ dzakuna gə kwa giya bə saŋa? 47Gha wiya aŋa naya ala a ma hwa de, tsukwika me hwa, gɨl sləra ga, na əŋ wanpəkwan ɗu gə ɗa gizhek atə ayina: 48Ɗa gizhek atə ɗu hən s'adaw gə rakede te ma ene ba səlakka, ta takənmandar apə pəpərɗak‑a saŋa. Nəɗay s'ahwam suwak, ŋgic naya a vərɗina, amá gigicika ba aride, aɗaba hanaka dəkdəka. 49Amá ɗu gə giya bə igə sənay a ma hwa de ga, ɗa gizhek atə ɗu gə hanika adaw ene apə higay‑a hadada, rakede bə ma ene a taɗinmandar saŋa. Nəɗay s'ahwam suwak, ŋgic naya a vərɗina a adaw sahan ga, ŋgirɗikka gənakakude.»
© (Active), Wycliffe Bible Translators, Inc. All rights reserved.
