Luka 10

Yesu slən ɗa kutə wuran kurkur ciɓa ŋa ene caw

1Adede a ahan ga, Ɗuduwuna dzadzarika ɗa s'iŋgeɗe a ɗa kutə wuran de kurkur ciɓa ŋa ene caw. Slənəktan caw caw‑a apə miya ayina ala a hu hay de atə ala a ma hay de gə wuran a lələkay saŋa ba cecena. 2Dzəktəna, wa: «Away ga, gaka duna apə kuvak‑a a nzərɗiya, amá ɗa nzərɗiya ene tə duna ba. Aɗaba sahan, ŋeŋelɨn ɗu kuvak gəni á ɗəfnaŋade a slən ɗa sləra s'iŋgeɗe ala a kuvak ene de. 3Len, əŋ slinkwene ba ka wayə təmbagay ala a dagava kəla kiɓe hay de. 4Gha pərtete shiŋgu, gha mbalaw, gha kimak kini, tivɨnde ba a alay de. Tetevɨn ba ande a ciba a gə sa atə ɗaha hay. 5Adaw gə abə kwa lide ede ga, jɨntəna te a ɗa s'adaw sahan kwene, ika: “Lapiya tsəre á zakwa a adaw saŋa de.” 6Abə ɗu micɗiya i lapiya tsəre niya a adaw sahan de ga, lapiya tsəre kwan sahan ǎ le zaɗay a ɗuhan de. Abə kugwan bə ga, ǎ mbəɗiŋa ala a ma kwan de. 7Zhɨnkwen aba adaw sahan de. Pɨna, shena igə abə ɗa vərəkkuna, aɗaba ɗu sləra ga, zlaya njiya ihive ene. Mbuɗɨna ba adaw a hu sahan de. 8Gha kwa laka a hu gəna de kini, abə ɗa tivikkwena ga, pɨna igə abə ɗa vərəkkuna. 9Mburɨntəna ɗa gə wutə apə kuza ka a hu sahan de. Jɨntəna kwene, ika: “Sləŋa gurɗay s'Askwaf naya a ma kwan de.” 10Amá hu gə abə kwa lide ni, ɗa tivikkwene bə ga, len ala ande a ciba hay tan, jɨntəna kwene, ika: 11“Aba atə argutak hu kwan gə apə səlay hay man‑a kini, tá ma tanpəkuna ikwan, amá gə shinɨnede kwene ika sləŋa gurɗay s'Askwaf naya.” 12Na əŋ dzakuna, bək sheriya ga, ǎ za i ndusləɗay ba sheriya ɗa Suduma#Tamandar 19:24-28 aŋade a i ɗa hu sahan.»

Palase ǎ za a hu hay gə ɗa ɗəfəkpənŋa ba a Yesu‑a

(Matta 11:20-24)

13«Palase a ɗa Kurajin! Palase a ɗa Baytisayda! Aɗaba ajipu hay gə Askwaf gəka adikwen saŋa, abə a gəkiya a Tirus atə a Sidun ga, kwakwahan ɗa hu hay sahan ɗa mbəɗkiyakude zaɗay tan, ɗa fafətkide a ashasha hay de, ɗa zazakayakade a arɓak de, ɗa takide ŋa tan ede. 14Aɗaba sahan tsaw, bək sheriya ga, ǎ za i ndusləɗay ba sheriya wutə Tirus atə Sidun aŋade a i kwan. 15Kwa ɗa Kafarnahum mà, kwa gurəkəl à ɗá pakunŋakude ha à kwá liya ala a askwaf de təku? Bira à ɗá ndikkunde ŋa ala adə ɗa gə a mika de.»

16Yesu ane ɗəfkənhətənaŋade adəɓa a ɗa kutə wuran, wa: «Ɗu gə abə tsukwika me kwan ga, tsukuk ba me hwa ayuwa, ɗu gə abə ɓərəkpəkuna a zhek‑a kini, ɓərəkpuwa ba s'ənne a zhek‑a. Ɗu gə ɓərəkpuwa ənne a zhek‑a ga, ɓərəkpəna ba ɗu gə sləninaw a zhek‑a.»

Ɗaha kurkur ciɓa ŋa ene caw ane ɗa mbəɗiŋa

17Ɗaha kurkur ciɓa ŋa ene caw ane ɗa nidaw abi higəɗay, ɗa dzakəna a Yesu, wa: «Ɗuduwuna, aba atə jini hay kini ɗa gəka igə mene ma dzəktəna i sləmay aka!» 18Yesu zləmkənhətənaŋa, wa: «Aŋa gə ba kugwan, əŋ tsək Shetene niŋkike ada askwaf‑a ba ka pə s'aray s'aveŋ. 19Cɨkuna, əŋ vərəkkun hakuma ŋgərəsl s'azam hay atə ardzak hay, ŋa hakuma a ŋgərəsl nzəɗa ɗu dawa man ba cecena. Niba igə jukka gəɗikunarde. 20Amá gə higen ba aɗaba jini hay ɗa tsukwika me kwan, higen aɗaba sləmay hay kwan niya i hətsɗay a askwaf de.»

Higəɗay Yesu

(Matta 11:25-27; 13:16-17)

21Aba a ahan de sahan, Shinekw Cuɗiɗɗina ruhkede Yesu i higəɗay, dzaka, wa: «Əŋ sləkəɗək me Paba hwa, ike Ɗuduwuna gə askwaf atə higay a alay de ayika saŋa, aɗaba kə shiɓkəlhətənamiya ihay sahan a ɗa həŋkale ka atə a ɗa sənɗiya a away‑a, kə mitənede a ɗa mishishina. Ba kugunhan Paba hwa, gaka aba apə aŋa ka ike kə micka. 22Paba hətskude away hay ba cecena a alay de. Niba ɗu gə səna a Kine, abə Pəbe ba. Pəbe kini, niba ɗu gə səna, si ba Kine ene atə ɗu gə abə Kine ene sahan mickinhan a mbəslɗilhan.»

23Mezlene mbəɗkakude aray ala a ma ɗa kutə wuran de, dzəktəna ba wutan i ŋa tan, wa: «Gədəɗɗay a ɗa gə aray tan caka igə na kwene kwa ceciya saŋa. 24Na əŋ dzakuna zla, ɗa mbəɗɗitənande me s'Askwaf a ɗaha hay atə bay hay duna ɗa gwasək ba tsaɗika igə na kwene kwa ceciya saŋa, amá ɗa tsaka ba. Ɗa gwasək ba ɗa sənkay a igə na kwene kwa tsukwa saŋa, amá ɗa sənay ba.»

Araja i humas Samariya sələmna

25Malum me gurɗay s'iŋgeɗe slabakakude, gwasək bər Yesu apə me‑a, mbutsəkənamiya, wa: «Malum, əŋ gɨka ama, ta əŋ nje shifa gə kəɗɗay ene niba aride saŋa?» 26Yesu zləmkənhənaŋa, wa: «Igə i hətsɗay a me gurɗay man de mà, ama? Abə kə dzawa mà, kə shinkay kəma?» 27Dagwa ane zləmkənhənaŋa, wa: «Mica i Ɗuduwuna Askwaf aka i bembec ɓile, i shifa aka ba cecena, i nzəɗa aka ba cecena atə i dzəmŋa aka ba cecena#Me Gurɗay 6:5. Adəɓa gə wa: Mica i ɗu gə kwa caca ba ka ŋa aka#Lewi 19:18.» 28Yesu dzakəna, wa: «Aŋa ga, kə zləmkənaŋa ba kalkala ene, giya zla apə ahan‑a, ikə nje shifa gə kiɗke ba aride.» 29Amá wuran sahan gus gəɗilka ŋa ene ɗu jire, dzakəna a Yesu, wa: «Wiya wuran ɗu gə ma caca sahan?»

30Yesu zləmkənhənaŋa, wa: «Ɗu s'iŋgeɗe niya slabakakude ada Zheruzalem‑a, fatak ala a Yeriku ga, laka slaɗitənande a abra hay. Ɗa tsəməkpəna away hay ene ba cecena, ɗa slakəlna i taɗay, ɗa hərkənde shifa mide aba bembec de. 31Ɗu slumə ɗaha hay atə Askwaf s'iŋgeɗe kutək ba ciba sahan, naya a zlərɗipənŋa a dagwa ane ga, ŋgəɗkənpan a ciba, ba huɗay ene. 32Humas ɗa Lewi s'iŋgeɗe kini nayede abi ma sahan‑a, wuran kini ba tsaka ga, ŋgəɗkənpan a ciba, ba huɗay ene. 33Amá humas Samariya s'iŋgeɗe niya like a shula, laka a ma sahan de, ba tsək dagwa sahan ga, yəmkənde mərga. 34Laka ala a ma ene de, gəgəkənhənande ambár atə ajiba məhay eɗe a mbəlkay hay, nanəkənka. Mezlene pakakude, zakəlpəna a izhuŋwa ene ka, ləkəla ala adaw ma tsukɗay mbirkwe hay de, ɗəfkənande sləmay akənahan. 35Mandaka ene, tsəmkede gursa caw, vərkəna a ɗu s'adaw ma tsukɗay mbirkwe hay sahan, wa: “Ɗəfənande sləmay a dagwa saŋa, ba kəla igə ikə səzəla aŋade aŋa saŋa, ə̌ŋ naya a mbəlɗiyakede abə ə̌ŋ mbəɗiŋa.”»

36Mezlene Yesu, wa: «Apə ayika mà, a ɗaha məŋgan de saŋa mà, wiya ɗu gə tə caca atə dagwa gə abra hay ɗa gəkənka palase saŋa?» 37Wuran ane, wa: «Ɗu gə tə caca ba ɗu gə yəmkənde mərga saŋa.» Yesu dzakəna, wa: «Ike kini, le giya zlə ba kugunhan.»

Yesu adə wutə Marta atə Mari

38A aŋəde wutə Yesu atə ɗa kutə wuran wutə apə ŋa ciba ka, laka a hu s'iŋgeɗe de ga, hər s'iŋgeɗe, sləmay ene Marta, hakakude ala adiyana. 39Di məman a Marta sahan niya, sləmay ene Mari, naya a zaɗipan a Ɗuduwuna agide, tsukw me ene#Zhaŋ 11:1. 40Marta ga, didəŋa aba a gə sləra hay gərgəra. Ahan tsaw, naya a dzaɗina, wa: «Ɗuduwuna hwa, amnaya ike lambe aka niba apə sləra hay‑a gə di mama hərkənhude, əŋ giya ənne ɓile saŋa? Dzana səke á humawande!» 41Amá Ɗuduwuna zləmkənhənaŋa, wa: «Marta, Marta, ike kə slan zluwa a ŋa aka i shiŋwil s'away hay gərgərgəra. 42Igə zlaya shiŋwilɗiya gə ba ɓile. Mari təfkede i sələmna, niba ɗu gə ǎ təfpəna.»

Currently Selected:

Luka 10: mlr

ማድመቅ

Copy