Chiyambo 9
9
Ambuya achita phanganu ndi Nowa
1Ndipo Chiuta wangutumbika Nowa ndi ŵana ŵake ŵanthurumi ndipo wanguti kwaku iwo, “Papanane ndi mwandane ndi muzaze charu. 2Ndipo chofyu chinu ndi kupofya kwinu vikaŵanga pa nyama yose yapa charu ndi pa chiyuni chose cha mude, pa chinthu chose cho chikwaŵa pa charu ndi somba zose zamu nyanja vyakupaskika mu janja linu. 3Chinthu chose chakwenda cho nchamoyo chikaŵanga kurgha kwinu; nge ndimo ndingukupaskiyani mbeu ziŵisi, nditukupaskani vyose. 4Chimoza pe kuti mukargbanga nyama ndi umoyo wake cha, wo ndi ndopa zake. 5Ndopa za umoyo winu, kwakuneneska ndikakhumbanga kuzifumbiliya; ku chinyama chose ndizifumbiliyenge ndi ku munthu; ku mbali wa munthu we yose ndikakhumbanga umoyo wa munthu. 6We yose wakudira ndopa za munthu, ndopa zake nazo zidikenge ndi munthu munyake; pakuti Chiuta wangulenga munthu mu chikozgu chake. 7Ndipo imwe mupapane ndi mwandane, tapatane mu charu ndi mwandane mwenimo.”
8Sono Chiuta wanguti kwaku Nowa ndi ku ŵana ŵake ŵanthurumi pamoza nayo, 9“Ehe, ndimika phanganu langu ndi imwe ndi mphapu zinu za pavuli pinu, 10ndi vyamoyo vyose vyo vye pamoza namwe, viyuni, viŵeto, ndi nyama yose yamu charu pamoza namwe, zose zo zingutuliya mu ngaraŵa. 11Ndimika phanganu langu ndi imwe, kuti kukachitilanga so cha kuti nyama zose zimare ndi maji gha zandi, ndipo kuti wakaŵangako zandi so cha, wakunanga charu chapasi.” 12Ndipo Chiuta wanguti, “Ichi nchisimikizgu cha phanganu wo ndichita pakati paku ine ndi imwe ndi vyose vyamoyo pamoza namwe, mu mgonezi wose wa mukucha. 13Ndimiha chiŵingavuwa changu mu mtambo, ndipo chikaŵanga chisimikizgu cha phanganu lo pakati paku ine ndi charu chapasi. 14Asani nditole mitambo pachanya pa charu ndipo chiŵingavuwa chiwoneka mu mitambo, 15ndikakumbukanga phanganu langu lo le pakati paku ine ndi imwe ndi nyama zose zamoyo; ndipo maji kuti ghakawerengapo cha kusanduka zandi kwachinanga nyama zose. 16Panipo chiŵingavuwa chemu mitambo, ndichilereskenge ndi nkhakumbukanga phanganu la muyaya pakati paku Chiuta ndi vyose vyo vye pa charu.” 17Chiuta wanguti kwaku Nowa, “Ichi nchisimikozgu cho cha phanganu lo ndamika pakati paku ine ndi imwe ndi nyama zose zo ze pa charu.” 18Ŵana ŵanthurumi ŵaku Nowa wo ŵangutuwa mu ngaraŵa ŵenga Shemu, Hamu, ndi Yafete. Hamu wenga wiske waku Kanani. 19Yaŵa ŵatatu ŵenga ŵana ŵanthurumi ŵaku Nowa, Ndipo kutuliya mwaku yaŵa charu chose chapasi chinguŵa ndi ŵanthu. 20Nowa wenga mlimi makudanga wa nyata. Wangupanda munda wa mphereska, 21ndipo wangumwa vinyo, ndi wanguloŵe, ndipo wangula nkhuli mu hema. 22Ndipo Hamu, wiske waku Kanani wanguwona nkhuli ya awiske, ndi wangunene ŵana ŵanyake ŵaŵi kubwalo. 23Sono Shemu ndi Yafete ŵanguto chivwinkhu ŵanguchiŵika pa maphewa ghawo ghose, ndipo ŵangwenda chitunu-tunu ndi ŵanguvwinkha nkhuli ya uskeu cha. 24Penipo wanguyuka ku vinyo wake ndi wanguziŵa chenicho mwana wake mumana ukongwa wanguchita kwaku iyo, wanguti,
25“Watembeke Kanani muŵanda
wa ŵaŵanda wakaŵanga iyo ku ŵana ŵanyake.”
26Wangukamba so,
“Watumbikike Shemu ndi Ambuya Chiuta wangu;
ndipo Kanani waŵe muŵanda wake.
27Chiuta watandazge Yafete,
ndipo waje mu mahema ghaku Shemu;
ndipo Kanani waŵe muŵanda wake.”
28Pavuli pa zandi Nowa wanguŵa wa virimika machumi pe chumi ghatatu pachanya machumi ghankhonde (350). 29Mazuŵa ghose ghaku Nowa ghenga virimika machumi pe chumi ghankhonde ndi ghanayi pachanya machumi ghankhonde (950); ndipo wangufwa.
Currently Selected:
Chiyambo 9: TongaMw
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of Malawi
