Kejadian 6
6
Aphwami enebabut modok wiak togu legesa wene
1 #
Ayu. 1:6; 2:1 Aphwami enebe asogo dagetil waga legesarik, enebe modok a’bik egesarik, o di owi yu owi modok wiyalegesa. Asogo wiyal agai welat, malik logon hwelani dagenebigisa. 2Asogo dagenebigisema, is ap Allah eiyagai a’ge en hwelani modok op a’ge enil entigisarik e, is enagai epegesa a’ge enebe wogenebigisa. 3Asogo wogenebigisema, at Nenaik ’gain Onuk Logo a’ge en e,
“Is aphwami ai enelaluk modok wolom ai re, nebit o. Enebe wiak, modok warom a’ge nak oruak o. Holuk e, is enebe umur hwerli 120 tahun welemarik logon emin welema modok erlak o,” oluk egei.
4 #
Bil. 13:33
O hwerli eria pam emin, pobuk emin, aphwami ’gwiangma enebagase lok a’ge logon welegesayat. Is aphwami enebagase lok a’ge ai re, hwami enebe op modok a’ge is ap Allah eiyagai a’ge en wogenebigisa a’ge ebano en dagenebigisa a’ge. Is ap enebagase lok ai re, naduk welegesa eria pam e, ononuk oruakhwe enebam harowiak welat ’gainat welegesa ai o.
5 #
Mat. 24:37; Luk. 17:26; 1Pet. 3:20 Asogo welat, aphwami ’gwiangma a’ge enebabut modok wiak, nin hwedik nan hwedik onogola modok wiak a’ge nak eberogwi modok oruakma, Nenaik ’gain Onuk Logo a’ge en il yerentesi. 6Asogo yerentesirik, disogo egei,
“Aphwami ai ne’bigene en walsogo ’gwiangma enebegi o,” oluk ede modok wiak aga. 7Asogo ede wiak agarik, disogo egei,
“Ne’bigene en is ai walentegis o, oluk egi ai en aphwami an en walentegis a’ge ai enebe modok erlagap enebasulat, wam, tue, ’baik, di a’ge yu a’ge e’gik erlak oruak ’berlegat erlagap paik o,” oluk egei. 8Asogo egei a’geat de, at Nuh nak e, Allah ebam lo’buk ese laga.
Nuh en taga laga wene
9-10 #
2Pet. 2:5
Nuh en taga laga re, disogo. At eiyagai ap enebe henagan a’ge eria re, Set emin, Yafet emin, Ham emin. Ye, at Nuh ebe ebabut e, at Allah emin hwedik welat, ebabut wiak mesik tu erlakma en hegitsogo nak taga laga. Eria hegit e, at ematek nak op taga laga. 11At asogo taga laga a’geat de, aphwami logon ’berlegat Allah ilem enebabut modok wiak togulat, o di owi yu owi enebe enedeap onobo erlakma en wiagap onobogu legesa. 12Aphwami ’berlegat enebabut modok wiak togu legesa ai en, Allah en aphwami ’gwiangma a’ge il entasuam e, modok wiak nak oruakma il entasu laga.
13Allah il asogo entasu laga ai en, Nuh disogo mo’gulesi,
“Aphwami o di owi yu owi enebabut is logon enebe enedeap onobo erlakma en, modok wiak togwi ai en, aphwami enebe emin, di a’ge yu a’ge ’berlegat emin, ’gwiang emin, modok erlagap paik o. 14Holuk, hat hebaget, ik so e anni a’ge hu’gwarek hebaget werip o. Asogo weriselat, o hwerli ’bal-’bal hwerlisogo werip o. Asogo werik poluk, a’bosu ’boruk akhwi a’bosu ’gela’ge sing a’ge o’borl o’gwe ogola o’gwe eminat modok werip o. 15So ai dum akhit en hwerli labot akhit e, 133 meter, ye, o abel pema en, hwerli no’gurlik abel pema re, 22 meter, ye, o holumu en ’bekhit dum pam e, 13 meter werip o. 16Werik poluk e, sel salip o. Sel ologun hegit en ’bekhit hebat pam en, wi-waling emde hwerli re, 44 senti pam ’balogo werip o. Ik so ai holi’bo re, hwerli henagan pam werik poluk e, ’goduk esa’goma mesigat nak delip o. 17Asogo werik pasuam, aphwami emin, di a’ge yu a’ge ’gwiangma elaluk welago a’ge ’berlegat emin, waronobuagoluk, an en ik ebe lok a’ge mesik perakpou weik o. Asogo perakpou wagoam, di a’ge yu a’ge ’gwiangma elaluk welago a’ge ’berlegat warema o. 18Asogo a’geat de, hat nak e, wene yu werakhebaik,
Hat hugwe he’birek emin, heiyagai onugwami emin, ik so ai ogola ’gwi lu o.
19-20Asogo ’gogulat e, wam, tue, ’baik, di a’ge yu a’ge e’gik erlak oruak a’gul onuk lo’bok waronobuano oluk e, mesik-mesik ogun ugwe lo’bokhegeik woluk so ogola ’gwi lu o. 21Asogo woluk ’gogulat e, di so’boru yu so’boru his henebe emin, di a’ge yu a’ge woluk ’gogup a’ge ai emin, nagup a’ge paget woluk ’gwibat o,” oluk mo’gulesi. 22#Ibr. 11:7Asogo mo’gulesimu, at Nuh wene Allah en,
“Di togu lomup yu togu lomup,” oluk mo’gulesi hegitsogoat tegei o.
Currently Selected:
Kejadian 6: Wul
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
