San Mateo 1

Ni dia lá ca benni datía Jesucristu

(Lc. 3:23-38)

1Lo sitsi-ni dia lá ca benni datía Jesucristu. Lee anque benni datía David, benni datía Abraham lhe.

2Abraham ucabi tata gue Isaac.

Isaac ucabi tata gue Jacob.

Jacob ucabi tata gue Judá, adí ca betsibiha lhe.

3Judá ucabi tata gue Fares, Zara lhe.

Nan guecabi nna uca Tamar.

Fares ucabi tata gue Esrom.

Esrom ucabi tata gue Aram.

4Aram ucabi tata gue Aminadab.

Aminadab ucabi tata gue Naasón.

Naasón ucabi tata gue Salmón.

5Salmón ucabi tata gue Booz.

Nan gue Booz nna lábi Rahab.

Booz ucabi tata gue Obed.

Nan guenna lábi Rut. Obed ucabi tata gue Isaí.

6Isaí ucabi tata gue David biꞌini unnabia ca benni Israel.

David ucabi tata gue Salomón.

Nan gue Salomón nna ucabi nuila gue Urías.

7Salomón ucabi tata gue Roboam.

Roboam ucabi tata gue Abías.

Abías ucabi tata gue Asa.

8Asa ucabi tata gue Josafat.

Josafat ucabi tata gue Joram.

Joram ucabi tata gue Uzías.

9Uzías ucabi tata gue Jotam.

Jotam ucabi tata gue Acaz.

Acaz ucabi tata gue Ezequías.

10Ezequías ucabi tata gue Manasés.

Manasés ucabi tata gue Amón.

Amón ucabi tata gue Josías.

11Josías ucabi tata gue Jeconías tata gue ca betsi biꞌiniha lhe.

La idaha nua atti bedaxxu ca nu Babilonia ca benni Israel bechecan cabi daca lo yu guecaniha.

12Dequide chi bisíncabi Babilonia nna

Jeconías nna ucabi tata gue Salatiel.

Salatiel ucabi tata gue Zorobabel.

13Zorobabel ucabi tata gue Abiud.

Abiud ucabi tata gue Eliaquim.

Eliaquim ucabi tata gue Azor.

14Azor ucabi tata gue Sadoc.

Sadoc ucabi tata gue Aquim.

Aquim ucabi tata gue Eliud.

15Eliud ucabi tata gue Eleazar.

Eleazar ucabi tata gue Matán.

Matán ucabi tata gue Jacob.

16Jacob ucabi tata gue José biꞌini uca unbiyuu gue María,

nan gue Jesús, Benni anque Cristu.

17Larcala nna sitá (14) libixxi chi utee desdeba Abraham axta atti uli David. A sitá (14) libixxi chi ute ridú lori leni David axta atti beche ca nu Babilonia ca benni Israel daca lo yu guecaniha. A sitá (14) libixxi chi ute ridú lori desde lania axta atti bisía Benni anque Cristu.

Aní uca atti uli Jesús

(Lc. 2:1-7)

18Aní uca atti uli Jesucristuha: María, nan gue Jesús, chiba du José rinnababi biꞌiniha qui utsá nácabi, ttiaca antisla tseꞌe len loescabi nna beni Espíritu gue Tata Do Iyyabaaha bija xiꞌini María. 19José biꞌini dhi María nna ancabi ttu benni du tsee lebi. Denuala nna bittu raca lebi inne güe benni gue María. Larcala nna belaba le José sigába uquiettabi lo biꞌiniha. 20Ttiaca laca rulaba lebi unbi anía, lo bisiela guebi nna beleꞌenbi ttu ingeli udhelha Tata Do Iyyabaaha, nianna rá ingeliha bi:

—José, biꞌini datía David, bittu gasinlu utsá nálu leni María-na, cumu Espíritu gue Tata Do Iyyabaahaba benie qui ujabi unto nujabi-na. 21Labi nna cuꞌubi ttu unbiyuuto. Benniha nna quixxalu lee Jesús. Aná gatta lee cumu Ben-na odile ca benni guee lo nu lä anca tsee runcana.

22Iyába unní uca qui guaxxína nu chi rá Tata Do Iyyabaaha profeta Isaías. Biꞌiniha nna utixxiꞌabi rábi:

23Ttu nu rbani uja xiꞌinbi,

Labi nna cuꞌubi ttu unbiyuuto.

Untoha nna gatta lee Emanuel.

Emanuel nna dienna innána: Tata Do Iyyabaaha due len riꞌi.#1:23 Isaías 7:14

24Atti bebani José nna benbabi nu beni ingeli gue Tata Do Iyyabaaha mandadu unbi, labi nna betsába nábi leni María. 25Ttiaca läga bisá loescabi, axta liba dequide chi uli untoha. Labi nna begüeebi lá untoha Jesús.

Currently Selected:

San Mateo 1: zaq

ማድመቅ

Copy