प्रेरितान काम 20
20
मकादुनिया एने अखाया माय पौलुस
1जेवी देंगो थोब गीयो, तेवी पौलुस विश्वासीह हादिन उत्साह वोड़ायो। एने तान खुबेर लेन तो मकादुनियाम जात रेनो। 2पौलुस ता आखा देसा माय जाणेन बुखेत, तावाला माणहाह जुलूम उत्साहित केरती लेन अखाया माय पोचनो। 3पौलुस ताहरी तीन मोयना वोर रिनो, एने जेवी तो डोंडह्याम बोहीन सीरीया देसाम जाण्यो ईतो, तेवी यहुदि माणहे ताह मारनेन केरता योजना बाणावणे बाजरियेल एता, तानकेरता पौलुस मकादुनियाम रेन पोशो वोलीन जाणेन निर्णय किऱ्यो। 4बिरीयान पुरूर्स ने बिटोख सोपत्रुस, थिस्सलुनिक्यो माय रेन अरीस्तर्खुस एने सीकुन्दुस; दिरबेन गयुस; एने आसीया ईलाकान तुखीकुस एने त्रुफिमुस; एने तीमुथीयुस ज्या आखा पौलुसा हेऱ्या एता। 5पुण ता ओंगाण जात रेना एने त्रोआस माय आमरी वाट जोवते रेना। 6एने अखमीरी रोटान तिवार निवेरनेन पासाण आमु फिलेपी रेन डोंडह्याम बोहीन पाच दिह्यान पासाण त्रोआस माय ता फाय पोच गीया, एने आमु ताहरी हात दिह वोर रेना।
पौलुसान त्रोआस माय सेवली वार बेट केरनो
7 # 20:7 सेनिवार नाहते दितवार जेवी आमु एप्तान पेल्ले दिह हांज पोर रूटो खाणेन केरता एकठा एना। तेवी पौलुस ता हिऱ्यो आदि रात वोर ता हिऱ्यो वातु किरते रिनो, काहाकाय दिहरे दिह जाण्यो ईतो केरीन पौलुस आदि रात वोर हिकवोण दिते रिनो। 8जी उपेरली खोली माय आमु टोलवायेल एता, ताहरी जुलूम होवटा दिवा हेलेगताला। 9एने युतूखुस नावान एक जुवान खिड़की हिऱ्यो बोहीन बारी निंद से डोलाणे बाजरियेल ईतो, जेवी पौलुस जुलूम वार वोर बोलते रिनो, ते ताह निंद आव लागी, एने तो तिसरी खोली पोर रेन जाय पोड़नो। एने जेवी ताह उगाड्या, तेवी तो मुरेल ईतो। 10पुण पौलुस बुंदे उतरीन ता हिऱ्यो विलगी गीयो, एने गेले मिलीन केयो, “बिवो मा; काहाकाय ज्यो उंजु जीवतालोच हे।” 11ओवतो पौलुस उपेर गीयो रूटो मुड़ीन खादो, एने ता हिऱ्यो उठ्यान वेगोच वोर वातु किरते रिनो, ओवतो ता रेन पौलुस जात रिनो। 12एने ता जुवानाह ता जीवतालो लावा एने ताह जुलूम उत्साह जुड़नो।
त्रोआस माय रेन मीलेतुस माय जाणो
13आमु पेलुच जाईन डोंडह्या माय बोहीन अस्सुस निही ज्यी विचार से ओंगाण गीया, काय ता रेन आमु पौलुसाह बोहाड़ लेहु। काहाकाय तो खुद ठेरायेल ईतो काय पाय पाये आवुह। 14जेवी पौलुस अस्सुस माय आमुह मिलनो ते आमु ताह डोंडह्या माय बोहाड़ लेदा, एने मीतुलेन गाव माय जात रेना। 15ता रेन डोंडह्या माय आमु दिहरे दिह खीयुस हेयरान सामने आवा। एने तान ओगले दिह सामुस गाव माय पोचना, ओवता ओगले दिह मीलेतुस गावा माय आवा। 16माहु आसीया माय जुलूम दिह रेणे नाय पोड़ी, केरीन इफिसुसाह टेलीन जाणेन पौलुस ठेरायेल ईतो। काहाकाय किहीक बी केरीन पिन्तेकुस्त ने दिह्या तिवारा माय मी यरूशलेम माय रेणे जुवे, ज्यानकेरता तो उतवाल केरतालो।
पौलुस इफिसुस ने डावालाह आखरी वार पारचार केरनो
17ओवतो पौलुस मीलेतुस गाव रेन इफिसुस माय खुबेर लेय मुकल्यो, एने मोंडलीन डायडायाह हादाड़ लिदो। 18एने जेवी ता पौलुसा फाय आवा, ते ताह केयो, “तुमू खुद जाणतेह काय जेवी मी आसीया माय पेल्लेच दिह रेन पाय मिल्यो, किहकेरीन मी तुमरी हिऱ्यो पुरी टेम रेन रिनो। 19मतलब जुलूम गेरबोड़ाय से, एने आहवा गेलावी गेलावीन एने त्यु पारेख माय बी, जो यहुदिन योजनान वोजेसे जी मार पोर आव पुड़ेल एती, मी मालीकान सेवा किरतेच रिनो। 20एने ज्यु ज्यु वातु तुमरी बोलायीन केरता एत्यु, त्युह केणेन एने माणहान सामने एने गेरा गेरा हिकाड़नेन केसर नाह सोड्यो। 21पुण पापा माय रेन मोन फिरावीन बोगवानान उगे वोलो, एने आपणा मालीक यीशु मसी पोर बुरहो केरने ज्यान बाराम यहुदि एने बिगेर यहुदि न्याह मी गोवाय देतालो। 22पुण एवी दिखो, मी चोखाला जीवान उकुमान गेत यरूशलेम माय जाथु, एने ताहरी माहु काय काय एय तो मालुम नाह। 23मी ओलोस जाणथो काय एकेक गावा माय माहु चोखालो जीव चेतावणी आपेह, काय जेल एने तेकलीत मारी वाट जोवतेह। 24#2 तीमुथीयुस 4:7पुण मी मार जीवणान काय किमोत नाह सोमजेत; पुण मी ओलोस होदथु काय मालीक यीशुन होपेल कामाह पुरो केरू, तो काम ज्यो हे काय बोगवानान गीणीन हाजाली खोबरीन गोसणा केरू।”
25एने एवी दिखो, मी जाणथो, तुमू आखा जा माय मी बोगवानान राज ने पारचार किरते फिरेल ईतो। पुण माहु तुमू पोशा नाय दिखहो। 26तानकेरता मी आजीन दिह तुमूह गोसणा केरथु, “केदी तुमरे माय रेन एगदो खेतेम एय जाय, ते मी तान जिम्मेदार नाह सोतो। 27काहाकाय मी बोगवानान आखी योजनाह तुमरी केरता हे तुमूह केणेन केसर नाह सोड्यो। 28#20:28 बोगवान; थोड़ाक लेख माय मालीक लिखेल हे। तान बेटाख ने लुय केरीन; नाहते तान बेटाख ने खुद अर्पण किरेल मोत केरीन।तुमरो एने तुमरा आखा टोलान राखवाली किरते रिवो। चोखालो जीव ताम रेन तुमूह कालजी केरनार ठेरायेल हे काय तुमू बोगवानान ती मोंडलीन राखवाली किरो, जीह बोगवान तान लुयी केरीन वेचातो लियेल हे। 29मी जाणथो काय मार जाणेन पासाण फाड़ खाणारे कोलवा तुमरी विची माय आवती, एने ता बोला टोलाह नाय सोड़ती। 30एने ओहली टेम आवी काय तुमरा खुद ने टोला माय रेन ओहला माणहे उठती, जा विश्वासीह तान पासाण खेचणेन केरता जुठी वातु केती। 31तानकेरता जोगवीन रिवो, एने एर किरो काय मी तीन वोरह्या वोर रात दिह आहवा गाली गालीन एका एकाह हिकाड़ेल हे।”
32“एने एवी मी तुमूह बोगवान एने तान गीणीन खोबरीन आथाम चोखो केरीन होप देथु, तोस तुमूह बांद सिकेह एने बोगवानान आखा माणहा हेऱ्यो तुमूह बोरकेत आपाड़ सिकेह। 33मी कुणीन बी होना चांदीन एने फाड़कान लोब नाह किऱ्यो। 34तुमू खुद जाणतेह काय माहु एने मार हातीन गिरेज पुरी केरनेन केरता मी मार आथा केरीन काम किरेल हे। 35मी तुमूह आखो काय केरीन देखाड़ेल हे काय तुमू बी इहीचकेरीन केरीन केठीण मेहनेत केरीन कोमजोराह होमालो, एने मालीक यीशुन त्यु वातुह एर मीलो जो तो खुद कियेल हे, ‘लेणेह रेन आपणे हाजो हे।’”
36इहकेरीन केयीन पौलुस ता हिऱ्यो मांड्या वोलीन आखा विन्ता केऱ्या। 37तेवी ता आखा जुलूम रेड़ना एने पौलुसान गेले लागीन ताह जुलूम गुल्या दिन मोकेल देना। 38ता खास केरीन ज्यी वातीन केरता दुखी एता, जीह पौलुस कियेल ईतो काय तुमू मारो मुय पोशा नाय दिखहो, एने ता पौलुसाह डोंडह्या हेऱ्या वोर पोचाड़ देना।
Currently Selected:
प्रेरितान काम 20: NTNii2020
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
