Génesis 48
48
Josépa tsurinkunaman bendicionta Jacob churanqan
1Tsaypita pöcu tiempullatanam Joséta willayarqan taytan qeshyanqanta. Tsaymi tsurinkuna Manasésta y Efraínta pusharkur saslla rikaqnin aywarqan. 2José rikaqnin chanqanta willaykuyaptinmi cämachö ujuraykanqanpita imaykanö Israel jamarkurqan.
3Tsaymi Joséta nirqan: <<Dios El-Shaddaimi#48.3 El-Shaddai ninanqa poderösu Dios ninanmi. yuripamarqan Canaánchö Luz markachö. Tsaychömi bendicionninta noqaman churamur 4nimarqan: <Qammanmi bendicionnïta churamü tsurikikuna maytsika kananpaq. Tsaynöllam atska nacionkuna kayänanpaq tsurikikunamanpis, willkaykikunamanpis y paykunapita miraqkunamanpis bendicionnïta churashaq. Paykunatam Canaánta entregashaq imayyaqpis tsaychö täkuyänanpaq> >>.#Gén. 28.13-14; 35.9-13.
5Tsaynö niskirmi Jacob nirqan: <<Kay Egiptuman manaraq chämuptï yuriq tsurikikunam legïtimu tsurïkuna kayanqa. Tsaymi Rubén y Simeón tsurïkuna kayanqannö Efraín y Manaséspis tsurïnö kayanqa. 6Paykunapa qepanman yuriqkunam sïqa tsurikikuna kayanqa. Tsaymi Canaánman kutiyaptiki Efraín y Manasés herenciata chaskiyanqanchö paykunapis herenciankuna chaskiyanqa. 7Tsay tsurikikunam legïtimu tsurï kayanqa mamayki Raquel Canaánchö wañukushqa kaptin. Paymi wañukurqan Padan-arampita kutimur Efrata markaman tsayraq chaykaptï. Tsaymi payta pamparqä Efrataman aywana näni kuchullanman>>.#Gén. 35.16-20. (Efrataqa Belén markam.)
8Tsaynö nikanqanchömi Josépa tsurinkunata rikaykur Israel tapurqan: <<¿Pitan paykuna kayan?>>
9Tsaymi José nirqan: <<Taytay, kay Egiptuchö täkuykaptï Dios Yaya qaramanqan tsurïkunam kayan>>.
Taytannam nirqan: <<Bendicionnïta churanäpaq mas wititsimuy>>.
10Israel alläpa awkinna karmi shumaq rikarqannatsu. Tsaymi taytanpa lädunman tsurinkunata José witiykatsiptin abrazakurkur mutsarqan. 11Josétanam nirqan: <<Hïju, wañushqana kanqaykita yarparmi tinkunapaq kaqtaqa yarparqänatsu. Tsaynö yarpaykaptïpis Dios Yayam munashqa tsurikikunata rikänäpaqraq>>.
12Tsurinkunata taytanpa qonqurninpita José jipiskirmi taytanpa puntanman qonqurikuykurqan urkunpis patsaman töpanqanyaq. 13Sharkurnam tsurin Efraínta churarqan taytan Israelpa itsuq kaqläninman y Manaséstana derëchu kaqläninman. 14Tsaynö witiykatsiptinmi bendicionninta churananpaq paykunapa umanman makinta cruzaypa Israel churarqan. Tsaymi derëcha kaq makinta Efraínpa umanman churarqan, qepa kaq kaykaptinpis. Itsuq kaq makintanam Manaséspa umanman churarqan, mayor kaykaptinpis. 15Tsaynam Joséman y ishkan willkankunaman bendicionninta churar nirqan:
<<Awilü Abrahamwan taytä Isaac creyikuyanqan Dios Yaya, qammi yurinqäpita alli mitsikuqnö cuidamashkanki.
16Qammi imayka desgraciakunapita tsapämaq Angelnï kanki.
Kanan kay jövinkunaman bendicionnikita churaykullay.
Paykuna alli kawaykuyätsun noqata y awilü Abrahamtawan taytä Isaactapis runakuna imaypis yarpäyämänanpaq.
Efraínpa y Manaséspa tsurinkunapis atska kaykuyällätsun.
Paykunapita miraqkunapis kay patsachö maytsikaq kaykuyällätsun>>.
17Peru Josépaqnam allitsu karqan Efraínpa umanman derëcha kaq makinta taytan churanqan. Tsaymi taytanpa derëcha kaq makinta achkurkur Manaséspa umanman José churarqan. 18Tsaynam nirqan: <<Taytay, ama tsaynöqa ruraytsu. Kay kaqmi mayor tsurïqa. Paypa umanman derëcha kaq makikitaqa churaykullay>>.
19Peru taytannam tsaynö rurayta mana munar nirqan: <<Musyaykämi mayqan mayor kanqanta. Mayor kaqpis maytsikaman mirarmi jatun nación kanqa. Tsaynö kaptinpis qepa kaq tsurikim mas mandakuyyuq kanqa. Paypita miraqkunam maytsika nacionkuna kayanqa>>.
20Tsay junaq ishkan willkankunaman bendicionninta churarmi nirqan: <<Israel runakuna pimanpis bendicionta churarmi niyanqa: <Efraínta y Manasésta Dios Yaya yanapanqannölla qamkunatapis yanapaykuyäshuy> >>.
Tsaynömi churarqan Efraínta mayornö kananpaq y Manaséstana tapshinö kananpaq.#Heb. 11.21.
21Tsaypitanam Joséta nirqan: <<Hïju, rikämanqaykinöpis wañukushaqnam. Wañukuptïpis Dios Yayam qamkunawan imaypis kaykanqa. Paymi kutitsiyäshunki unay awiluyki Isaacwan taytan Abraham täkuyanqanman. 22Qamtam wawqikikunapita masta herenciayki entregashkaq. Tsaymi Siquem chakrakunatapis entregaq. Tsay chakrakunatam amorreo runakunata espädäwan y flëchäwan venciskir qechurqä>>.
© 2011, Wycliffe Bible Translators, Inc. All rights reserved.
