Génesis 36
36
Esaúpita miraqkuna
1 Crónicas 1.34-43
1Kaychömi qellqashqa kaykan Esaúpa tsurinkunapaq y paykunapita miraqkunapaqpis. Esaúpa jukaq shutinmi karqan Edom.
2Esaúmi cananea warmikunawan churakashqa karqan.#Gén. 26.34-35. Jukaq warminpa shutinmi karqan Ada. Paymi karqan heteo runa Elónpa tsurin. Jukaq warminpa shutinnam karqan Aholibama. Paymi karqan heveo runa Zibeónpa willkan y Anápa tsurin. 3Tsaynöllam Esaú täkurqan prïman Basematwanpis. Basematmi karqan Ismaelpa tsurin y Nebaiotpa panin.#Gén. 28.9.
4Adapa wawanmi karqan Elifaz. Basematpa wawannam karqan Reuel. 5Aholibamapa wawankunanam kayarqan Jeús, Jaalam y Coré. Canaánchö Esaú täkuykaptinmi paykuna yuriyarqan.
6Wawqin Jacobwan täkuyanqanpita witikurmi Esaúqa juk partiman aywakurqan llapan warminkunata, tsurinkunata y serviqninkunatapis pushakurkur. Canaánchö täkur llapan imayka tarinqanta apakurkurmi aywakurqan. 7Jacobwan Esaú rïcuna kayaptinmi ishkan täkuyänanpaq tsay parti paqtarqannatsu. Maytsika wätankuna kaptinmi mitsikuyänanpaq qewapis paqtarqannatsu. 8Tsaynöpam Esaúpa ayllun kaq runakuna Seir jallqakunapa aywakuyarqan. Esaúpa jukaq shutinmi karqan Edom.
9Seir jallqakunachö täkuykäyaptinmi Esaúpa ayllunkuna maytsikaman mirayarqan. Paykunatam edomita runakuna kayanqanta niyaq. Kaynömi Esaúpita miraqkuna karqan:
10Esaúpa warmin Adachömi yurirqan Elifaz.
Warmin Basematchönam yurirqan Reuel.
11Elifazpa tsurinkunam kayarqan Temán, Omar, Zefo, Gatam y Cenaz.
12Elifazpa concubïna warmin Timnachöpis Amalec shutiyuq tsurin karqan. Paykunam kayarqan Esaúpawan warmin Adapa willkankuna.
13Reuelpa tsurinkunam kayarqan Nahat, Zera, Sama y Miza. Paykunam kayarqan Esaúpawan warmin Basematpa willkankuna.
14Esaúpa warmin Aholibamachömi tsurinkuna kayarqan Jeús, Jaalam y Coré. Aholibamam karqan Anápa tsurin Zibeónpa willkan.
15Esaúpa mayor tsurin Elifazpa tsurinkunam mandakuq kayarqan. Paykunam kayarqan Temán, Omar, Zefo, Cenaz, 16Coré, Gatam y Amalec. Tsay mandakuqkunam llapan kayarqan Elifazpa tsurinkuna. Paykunam Edom nacionchö mandakuq kayarqan. Paykunam kayarqan Esaúpawan warmin Adapa willkankuna.
17Esaúpa tsurin Reuelpa tsurinkunapis mandakuqmi kayarqan. Paykunam kayarqan Nahat, Zera, Sama y Miza. Paykunam kayarqan Esaúpa y warmin Basematpa willkankuna.
18Esaúpa jukaq warmin Aholibamapa wawankunapis mandakuqmi kayarqan. Paykunam kayarqan Jeús, Jaalam y Coré. Aholibamam Aná shutiyuq runapa tsurin karqan.
19Tsay llapan mandakuqkunam Esaúpa ayllun kayarqan. Esaúpa jukaq shutinmi karqan Edom.
20Seir partiman Esaú manaraq chaptinmi tsaychö täkuyarqan horeo runakuna. Paykunam mirayarqan Seir shutiyuq runapita. Seirpa tsurinkunam kayarqan Lotán, Sobal, Zibeón, Aná, 21Disón, Ezer y Disán. Paykunam kayarqan Edomchö Seir casta horeo runakunapa mandaqninkuna.
22Lotánpa tsurinkunam kayarqan Hori y Hemam. Lotánpa paninmi karqan Timna.
23Sobalpa tsurinkunam kayarqan Alván, Manahat, Ebal, Sefo y Onam.
24Zibeónpa tsurinkunam kayarqan Aja y Aná. Taytan Zibeónpa ashnunkunata mitsikuykarmi Aná tarirqan desiertuchö achaq yaku pukyukunata.
25Anápam tsurinkuna kayarqan warmi ollqu. Ollqu kaqpam shutin karqan Disón y warmikaqpanam Aholibama.
26Disónpa tsurinkunam kayarqan Hemdán, Esbán, Itrán y Querán.
27Ezerpa tsurinkunam kayarqan Bilhán, Zaaván y Acán.
28Disánpa tsurinkunam kayarqan Uzwan Arán.
29Horeo runakunapa mandaqninkunam kayarqan Lotán, Sobal, Zibeón, Aná, 30Disón, Ezer y Disán. Tsay runakunaqa juknin jukninpis horeo runakunapa mandaqninkunam kayarqan. Cada ayllupa shutinmi mandakuqninpa shutinlla karqan. Tsay ayllukunam Seir partichö täkuyarqan.
31Israel nacionchö rey manaraq kaptinmi Edom nacionchöqa reykuna kayarqanna. Kaychömi tsay reykunapa shutinkuna qellqashqa kaykan:
32Juk rey karqan Beorpa tsurin Bela. Belapa markanmi Dinaba karqan.
33Bela wañukuskiptinnam Zerapa tsurin Jobab rey karqan. Payqa Bosra markapitam karqan.
34Jobab wañukuskiptinnam rantin rey karqan Husam. Paymi temanita runakuna täkuyanqanpita karqan.
35Husam wañukuskiptinnam rantin rey karqan Bedadpa tsurin Hadad. Paymi Moab partichö madianita runakunata wañutsirqan. Hadadpa markanmi Avit karqan.
36Hadad wañukuskiptinnam rantin rey karqan Samla. Paymi Masreca markapita karqan.
37Samla wañukuskiptinnam rey karqan Saúl. Paymi Éufrates mayu kuchunchö kaykaq Rehobot markapita karqan.
38Saúl wañukuskiptinnam rey karqan Acborpa tsurin Baal-hanán.
39Baal-hanán wañukuskiptinnam rey karqan Hadar. Paymi Pau markapita karqan. Hadarpa warminpa shutinmi karqan Mehetabel. Mehetabelmi karqan Matredpa tsurin y Mezaabpa willkan.
40Esaúpita miraqkunapa mandaqninkuna kayarqan Timna, Alva, Jetet, 41Aholibama, Ela, Pinón, 42Cenaz, Temán, Mibzar, 43Magdiel y Iram. Tsay runakunapa shutinkunanöllam mandakuyanqan markakunapapis shutinkuna karqan. Tsaynöllam paykunapita miraqkunatapis reqiyaq mandaqninkunapa shutinllawan.
Tsay llapan runakunam edomita runakuna kayan.
© 2011, Wycliffe Bible Translators, Inc. All rights reserved.
