Génesis 3

Adán y Eva Tayta Diosta mana cäsukushqan

1Tayta Dios kamashqan uywakunapitapis mas astütumi karqan culebraqa.#Apoc. 12.9; 20.2. Tsaymi warmi kaykashqan kaqman witiykur kayno nirqan: <<¿Rasunpaku qamkunata Dios nishushqanki mayqan yörapa wayuynintapis mana mikupäkunaykipaq?>>

2Tsayno tapuptin warmi kayno nirqan: <<Lapan yörapa wayuyninta mikunäpaqmi nipäkamashqa. 3Huerta chawpincho kaykaq yörapa wayuyninpaqmi itsanqa mana mikupäkunäpaq ni yataylapis mana yatapäkunäpaq nipäkamashqa. Tsay yörapa wayuyninta mikurqa wanupäkushaqshi>>.

4Tsayno niptinmi culebra kayno nirqan: <<Manami wanupäkunkipaqtsu. 5Tsay yörapa wayuyninta mikunayki junaqqa Diosnömi tantiyapäkunkipaq ali kashqanta y mana ali kashqantapis. Tsaymi mikunaykita Dios mana munantsu>>.

6Tsayno niptinmi tsay yörapa wayuynin maypis mikurkuypaq kashqanta rikar pasaypa munaparqan. Tsaymi yachaq y musyaq kayta munar yörapa wayuyninta palarkur mikurqan. Nirkurnami runanman apapaptin paypis mikurqan. 7Tsawraqa jinan hörami tantiyapäkurqan qarapächula karkaykashqanta. Tsaymi hïgus yörapa rapranta jirarkur penqayninta tsapakärirqan.

8Tsay tardi inti jeqaykaptinnami huertacho Tayta Dios puriykarqan. Tsayta mayarmi ishkan pakakärirqan yörakuna rurinman. 9Tsaymi Tayta Dios qayakur kayno nirqan: <<Adán, ¿maychötaq kaykanki?>>

10Tsayno qayakuptin Adán kayno nirqan: <<Huertacho puriykashqaykita mayarmi qarapächula kashpä penqakur pakakushqä, Tayta>>.

11Tsawraqa Tayta Dios kayno tapurqan: <<¿Pitaq nishushqanki qarapächu kashqaykita? Paqta mikushqanki <ama mikunkitsu> nishqä yörapa wayuyninta>>.

12Niptinmi Adán kayno nirqan: <<Warmïpaq kamashqayki warmi apapämaptinmi tsay yörapa wayuyninta mikushqä, Tayta>>.

13Tsawraqa warmita Tayta Dios tapurqan: <<¿Imatataq rurashqanki?>>

Warminami kayno nirqan: <<Culebra lulapämar shakyätsimaptinmi mikushqä tsay yörapa wayuyninta>>.#2Cor. 11.3; 1Tim. 2.14.

Jutsata rurashqanpita Adán y Eva nakananpaq nishqan

14Tsawraqa culebrata Tayta Dios kayno nirqan:

<<Tsayno lulapashqaykipitami lapan uywakunapitapis maldicionädu kankipaq.

Tsaynöpis pachalaykipami purinkipaq.

Alpata mikularmi kawankipaqpis.#3.14 Alpata mikularmi kawankipaqpis nishqanqa pasaypa penqayman churashqami kankipaq ninanmi.

15Kananpitaqa warmiwan fiyupami chikinakunkipaq.

Tsaynölami warmipita yuriqpis qampita miraqkunata rikaytapis mana munanqatsu.#Apoc. 12.17.

Warmipita yuriqtami talonnincho#3.15a Wakin runakunaqa chunchuqnincho nipäkun. picankipaq.

Paynami itsanqa umaykita chamchanqapaq#3.15b Wakin runakunaqa tamshunqapaq nipäkun.>>.

16Nirkur Evatana kayno nirqan:

<<Tsayno rurashqaykipitami qeshyaq rikakur fiyupa nakankipaq.

Tsaynöpis fiyupa nanaywanraqmi wachakunkipaq.

Runaykitapis munaynikimanmi churayta munankipaq.#3.16 O runayuq kaytami munankipaq.

Tsayno kaptinpis paypa munayninchömi imaypis kankipaq>>.

17Nirkurnami Adánta kayno nirqan:

<<Mana mikunaykipaq niykaptïpis warmikita cäsukurmi tsay yörapa wayuyninta mikushqanki.

Tsayno mikushqaykipitami chakrakunapis maldicionashqa kanqapaq.

Tsaymi waran waran fiyupa nakarraq arunki mikunaykipaq.

18Chakrachöpis tukuy casta kashakuna y mana ali jachakunami winamunqapaq.#Rom. 8.20; Heb. 6.8.

Tsayno kaptinpis munti jachakunapa wayuynintanami mikunkipaq.

19Kawashqaykiyaqqa mikunaykipaq pasaypa südarraqmi arunkipaq.

Alpapita kamashqami kaykanki.

Tsaymi wanushpayki alpaman kutinkipaq>>.

20Tsaypita warminpa jutinta Adán churaparqan Eva#3.20 Hebreo idiömacho Eva ninanqa kaway ninanmi. jutin kananpaq. Tsay jutita churaparqan paylapita lapan runakunapis y warmikunapis mirananpaq kaptinmi. 21Adán y Eva jatikunanpaqnami uywakunapa qaratsanpita röpankunata Tayta Dios ruraparqan.

22Nirkurnami Tayta Dios kayno nirqan: <<Kananqa noqantsino karnami ali kaqta mana ali kaqtapis runa musyan. Tsayno kaptinqa imayyaqpis kawatsikuq yörapa wayuyninta ama mikutsuntsu. Tsayta mikurqa imayyaqpis kawanqapaqmi>>.#Apoc. 22.14.

23Tsaymi Edén huertapita Tayta Dios runata qarqurqan alpapita kamashqa kar chakracho arur kawananpaq. 24Runata tsayno qarqurir inti jeqamunan läduman querubinkunata#Éxo. 25.18-22; 26.31; 1Rey. 6.23-29; Eze. 10.1-22; 41.18-19. Tayta Dios churarqan nina rataykaq espädawan huertata täpananpaq. Tsaymi querubinkunaqa täparqan imayyaqpis kawatsikuq yöraman pipis mana yaykunanpaq.

Currently Selected:

Génesis 3: qvmB

ማድመቅ

Copy