Mat'fey 22
22
Lašk'oyi barada məsələ
(Luk'. 14:15-24)
1İsusen şot'oğo sa məsələl exlətebi: 2«Göye padçağluğ iz ğara lašk'oybala sa padçağ k'inək'e. 3Şot'in iz k'ulurxo yaq'anebsa ki, iz k'alpi amdarxo lašk'oyeq'at'un eçeri, k'ulurxone ama k'alpi amdarxo lašk'oye eysun tet'un çuresa. 4T'e vədə padçağen q'erəz k'ulurxone tapşurbi yaq'absa: "Şot'oğo upanan ki, zu bez həzirluğa běğez, bez öküzxo saal q'erəz ukest'i heyvanxo šameśene, hər şey həzire. Hayzeri lašk'oyeq'at'un hari!" 5Ama k'aleśit'oğon içoğoy nu saymişbsuna ak'est'i soğo iz q'oruğa, t'e soğo iz dükənene taysa. 6Sa hemaran isə lap şot'ay k'ulurxo biq'i t'api best'unbsa. 7Mot'o ibakat'an padçaği əcuğon bineq'sa. İz q'oşuna yaq'abi t'e amdarbesp'alxo əfçibest'i, içoğoy şəhərəl bok'osp'esest'a. 8Oşa iz k'ulurxo metəre nex: "Lašk'oyi ukun həzire, ama k'aleśiyorox bez ist'olin bel arst'una layiğ tet'un baki. 9İsə yaq' cöybakala ganxo takinan, şu ak'aynan lašk'oye k'alpanan".
10T'e k'ulurxoval hayzeri c'et'unsa yaq'a, pis-şaat' şu at'unksa, bitova k'alt'unne. Lašk'oy c'ovakest'ala gaal hari q'onağxon buyebaksa. 11Padçağen baśi q'onağxo běğat'an, t'et'iya lašk'oyi paltar nu lapi sa amdarane aksa. 12Şot'o nexe: "Bez dost'! Hun lašk'oyi paltar lapinut' memiya hetəren baśi?" T'e amdaren isə uk'ala əyit tene bə̌ğə̌bsa. 13T'e vədə padçağen iz q'ulluğçiğo nexe: "Kot'ay kul-tura ğaç̌p'i c'öş bosanan, ǒnepsun q'a uluxxo ğırıc'enst'un bakala t'e bayinq'una!" #22:13 Mat'. 8:12; 25:30; Luk'. 13:28 14Şot'aynak' ki, k'aleśiyorox gele, c'ək'eśiyorox isə male».
İmp'erat'ori haq'q'a imp'erat'ora, Buxačuğoy haq'q'a Buxačuğo tast'un
(Mrk'. 12:13-17; Luk'. 20:20-26)
15Oşa fariseyxon gireśi burt'unqi fikirbsa ki, İsusa İzi pi əyiti loxol hetərq'at'un biq'i. 16Şot'oğon içoğoy şagirdxo padçağ İrodi tərəf bakalt'oğoxun sagala İsusi t'ǒğǒlt'un yaq'abi. Şot'oğonal İsusi t'ǒǧǒl hari Şot'oxun metər sa əyitt'un xavar haq'i: «Məəlim, yan avayan ki, Hun düzgün amdarnu, Buxačuğoy yaq'al düzen zombsa, şuk'k'aleynak' tərəfkəşluğtenbsa, bitot'ay loxolal sa piinen běğsa. 17İsə yax upa běyn, Vi zənden beşi Rime imp'erat'ora nalog tast'un düze yoxsa təə?» 18Ama İsusen şot'oğoy pis niyətə avabaki pine: «Ay p'ə̌ç̌olorox, Zanan sinəyinşbsa? 19Ef nalog pi tadala tənginə Za ak'est'anan». Şot'oğonal sa dinara #22:19 Sa dinar sa ğiin əşlin haq'q'ey. eçeri ak'est'undi. 20İsusen şot'oğoxun xavare haq'i: «Təngin loxol bakala me şikil saal s'i şiya?» 21Şot'oğon "imp'erat'ori" pit'un. T'e vədə İsusen şot'oğo pine: «Ketəresa, imp'erat'oraxun imp'erat'ori, Buxačuğoxunal Buxačuğoy haq'q'a kammabanan». 22Mot'o ibaki şorox məət't'əlt'un mandi, İsusa bartiyal tat'unśi.
Saduk'eyxoy běyinbaksuni barada xavar haq'sun
(Mrk'. 12:18-27; Luk'. 20:27-40)
23Hat'e ği İsusi t'ǒğǒl saduk'eyxone hari. Şorox amdari běyinbaksuna větet'unbaksay, şot'aynak'al İsusaxun xavart'un haq'i: #22:23 Ap'ost'. 23:8 24«Məəlim, Moiseyen pene ki, "əgər sa amdar iz əyel bakinut biyayin, iz viçen şot'ay süpür mandi çuğo haq'i p'uri viçey nəsilə davambeq'an". #22:24 K'an. 25:5 25İsə běğa: beşt'oğoy boş vǔğ viçi bakala sa ailəne buy. Samcit'in sa çuux haneq'i, ama içoğoy əyel bakinut iç p'ure. Viçey nəsilə davambala əyel nu baksuna görəl t'e çuğo p'ə̌mci viçene haq'i. 26Ama t'e viçiyal p'ure, oşa xibimciyoval p'ure. Hametər, lap vǔğǔmcit'ul śirik' bito p'urt'un. 27Axırda çuux içal p'ure. 28P'oy isə p'uriyorox běyinbakat'an me çuux t'e vǔğ viçey mat'ay çuux bakale? Axıri, bitot'in me çuğo haq'eney».
29İsusen şot'oğo coğabe tadi: «Və̌n Ǐvel Śamurxo saal Buxačuğoy kiyexun ayeğalt'oğo nu avabaksuna görənən sərfbaksa. 30Běyinbakit'uxun oşa amdarxon nə çuux tet'un haq'al, nə işq'ara tet'un tağal, şorox göynul bakala angelxollarik' bakalt'un. 31Ama p'urit'oğoy běyinbaksuna mandat'an isə śameśit'oğo ef eyex badanan. Buxačuğon k'ə pe? 32Şot'in pene: "Zu Avrahami Buxačux, İsaak'i Buxačux saal İak'ovi Buxačuxzu". Buxačux p'urit'oğoy təə, dirist't'oğoy Buxačuxe». #22:31-32 C'eys. 3:6
33Mot'oğo ibakala camaatenal Şot'ay zombsuna məət't'əle manst'ay.
Buxačuğoy ən vacib əmir
(Mrk'. 12:28-34; Luk'. 10:25-28)
34 Fariseyxon İsusi saduk'eyxoy səsə bost'una ak'at'an hari girt'unśi. 35Şot'oğoy boşt'an sa k'anun zombalen İsusa əyiti loxol biq'seynak' Şot'oxun xavare haq'i: 36«Məəlim, Moiseyi k'anuni boş ən vacib əmir manuva?» 37İsusen şot'o pine: «"Vi Buxačux bakala Q'ončuğo vi bütüm elmoğon, vi bütüm ük'en saal vi bütüm fikiren çureki". #22:37 K'an. 6:5 38Mo samci hamal ən vacib əmire. 39Samcit'ullarik' p'ə̌mci vacibo isə mone: "Vi ı̌šat'u hun va çureğalt'ullarik' çureki". #22:39 Lev. 19:18 40Moiseyi k'anunxo q'a xavareçalxoy śampiyorox bito hari me p'ə̌ k'anunane c'eysa».
Xrist'os şi Ğare?
(Mrk'. 12:35-37; Luk'. 20:41-44)
41İsusen İz bel gireśi fariseyxoxun xavare haq'i: 42«Xrist'osi barada k'ənan fikirbsa? Şo şi Ğare?» Şot'oğonal "Davidi Ğar" pit'un. 43İsusen şot'oğo pine: «Ketəresa, Davida Urufen əyitp'est'at'an Şot'o "Q'ončux" pi het'aynak'e k'ale?
44"Q'ončuğon bez Q'ončuğo pine:
Zu Vi düşmənxo Vi turin oq'a sakamin
Bez yön tərəf arśa." #22:44 Ǐvel mə̌ğ. 110:1
45Əgər Daviden Şot'o "Q'ončux" pine k'alesa, Şo Davidi ğar hetəre bakes bakon?»
46Me əyitin běš İsusa şuk'k'alen sa əyit pes tene baki. T'e ğinaxun oşal ene şuk'k'alen Şot'oxun sa şey xavar haq'suna ük' tenebi.
© Translation Services International Ltd.
