MWANDUSO 40
40
Usufu Kotapita Nzozi za Wanhu Wafungigwe
1Vugabitile mazua madodo hamwande, munhu yakalile mkulu wa waja womgomela ung'waji Falao, mndewa wa Misili, na ija yakalile mkulu wa waja womokela mikate, wamgevuza mkulu wao, Falao. 2Falao kagevuzigwa ng'hani na wakulu wano wabili, mkulu wa waja womgomela ung'waji na mkulu wa waja womokela mikate, 3na kawagela mkifungo muing'anda ya mkulu wa wemilizi amo mwayakalile yafungigwe Usufu. 4Wakala muja mkifungo mkipigiti kitali, ija imkulu wa wemilizi kamsagula Usufu yawe mtumigwa wao.
5Kilo imwe ija imkulu wa waja womgomela ung'waji mndewa na ija imkulu wa waja womokela mikate mndewa walota nzozi muja mkifungo, na kila nzozi ikala na nhegulo yake. 6Imitondo iyagwe Usufu viyawakwenhukile, kawona wanyunguala. 7Kawauza, “Habali lelo mnyunguale?”
8Wamwidika walonga, “Tweye tose tulota nzozi, na haduhu hata munhu imwe yadahile kutapita nhegulo ya nzozi zetu.”
Usufu kawalongela, “Si Mulungu yolava udaho wa kutapita nhegulo ya nzozi? Nilongeleni nzozi zenu.”
9Avo ija imkulu wa waja womgomela ung'waji mndewa kamulongela Usufu nzozi yake, kamulongela, “Mnzozi yangu, nyona mzabibu haulongozi wangu, 10Na muja mumzabibu kukala na matambi madatu. Kipigiti kikija vuusongile kuzuka, malua gake galika na kulela vikungwi vili na zabibu zipile. 11Kikasi cha Falao kikala mumkono wangu, avo nisola zija zizabibu nizikamulila mkikasi cha Falao na kumgwaa Falao.”
12Usufu kalonga, “Nhegulo ya nzozi ino iyo ino, matambi madatu gago mazua madatu. 13Mkipigiti cha mazua madatu, Falao kokufungula, na kokubweza hana isang'hano yako, na komgomela mndewa ung'waji kamba vuukalile utenda kipigiti vuukalile mkulu wa waja womgomela ung'waji mndewa. 14Ila mbuli zose zihakucholela goya sambiunisemwe, undagusile unhu, ukanhambule ha Falao siku konilava kulawa mkifungo kino. 15Nie ninyamuligwa bila kulonda kulawa muisi ya Waeblania, na hata hano Misili sitendile kinhu chochose kilumbile nie kugeligwa mkifungo.”
16Ija imkulu wa waja womokela mikate mndewa viyonile kamba Usufu kamulongela mbuli zinogile za nzozi yake, ija imkulu wa waja womgomela ung'waji mndewa kamulongela, “Na nie vivija nilota nzozi, mditwi jangu kukala na vigelo vidatu va mikate. 17Mkigelo kikalile uchana kukala na namna zose za mandia gokigwe sama ya Falao, ila ndege wagaja gamandia kipigiti vigakalile gang'hali mditwi jangu.”
18Usufu kalonga, “Ino iyo nhegulo yake, vigelo vidatu vima sama ya mazua madatu. 19Mkipigiti cha mazua madatu, Falao kokufungula, ila kukukanha ditwi jako na kulutungika lukuli lwako mum'biki. Na ndege woija nyama yako.”
20Zua da ikadatu dikala zua da ng'humbukila ya mvumbuka ya Falao, avo Falao kawatendela lusona watumigwa zake wose, kamfungula mkulu wa waja womgomela ung'waji mndewa na ija imkulu wa waja womokela mikate mndewa na kuwagala haulongozi wa waja iwatumigwa. 21Kam'bweza msang'hano yake ija mkulu wa waja womgomela ung'waji mndewa, giladi yagendelele kumgwelela Falao kikasi, 22ila ija imkulu wa waja womokela mikate mndewa kakanhigwa ditwi jake, na lukuli lwake lutungikigwa kamba Usufu viyawatapitile. 23Ila ija imkulu wa waja womgomela ung'waji mndewa kamwisemwa Usufu, hamkumbuke mmbuli yoyose.
Currently Selected:
MWANDUSO 40: Kizalamo
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
