MWANDUSO 38
38
Yuda na Tamali
1Kipigiti kija Yuda kawaleka wandugu zake na kuchola kukala na munhu wa kiwambo cha Adulamu yokemigwa Hila. 2Yuda kipigiti viyakalile haja kamona mndele kulawa isi ya Kanaani, ayo tataake yakalile yokemigwa Shua. Kamsola na kuwasa nayo. 3Kapata inda, kalela mwana mbigalo, na kumgwelela twaga dikemigwa Eli. 4Kapata inda iyagwe, kalela mwana mbigalo, na kumgwelela twaga dikemigwa Onani. 5Abaho kapata inda mwanza uyagwe, kalela mwana mbigalo, na kumgwelela twaga dikemigwa Shela. Yuda kakala mkiwambo kikemigwe Kezibu kipigiti viyavumbuke Shela.
6Yuda kamsolela mtwanzi mwanage wa udele yokemigwa Eli, twaga jake mtwanzi ija kakala yokemigwa Tamali. 7Ila Eli mwana wa udele wa Yuda kakala yehile hameso ga MNDEWA, avo MNDEWA kamkoma. 8Avo Yuda kamulongela Onani, “Genda kawase na mtwanzi wa mkulu wako, utende gaja goulondigwa kutenda kumwake giladi umulelele wana mkulu wako.” 9Ila Onani kavimanya kamba wana wondawavumbuke si wake heyo, avo kila yahachola kuwasa nayo ketila hasi zimbeyu giladi sambiyamulele wana mkulu wake. 10Mbuli ija imgevuza MNDEWA, avo na heyo kamkoma. 11Abaho Yuda kamulongela mkwe yake Tamali, “Ukale kamba kizuka muing'anda ya tataako mbaka mwanangu Shela yakule.” Kalonga vino kwavija kadumba siku na heyo kodanganhika kamba wakulu zake. Avo Tamali kachola kukala mng'anda ya tataake.
12Viibitile milao bwando, mwehe wa Yuda, ija imwana wa Shua, kadanganhika. Yuda viyamambukize kumulilila mwehe wake, heyo na mbwigaake Hila munhu wa Adulamu wachola Timna ako ng'hondolo zake kuwakalile wokanhigwa mijusu. 13Munhu imwe kamulongela Tamali kamba mkwe yake kakala yochola Timna kuwakanha mijusu ng'hondolo zake. 14Avo kavula vivalo vake va ukizuka viyakalile yavalile, kaitanda kiziweziwe na kuigalula, abaho kakala hasi hana ulwivi lwa ikiwambo cha Enaimu mnzila ya kuchola Timna, kwavija kona kamba Shela kakula ila halavigwe yawe mtwanzi wake.
15Yuda viyamuwene, kagiza mtenda ugoni ndwanga, kwavija kaigubika mkihanga. 16Kamcholela kuja kumgwazo wa inzila na kumulongela, “Izo niwase nagwe,” kwavija Yuda kakala hanavitanga kamba heyo kakala mkwe yake.
Na heyo kamuuza, “Niheza kuwasa na gweye kongwelela choni?”
17Kamulongela, “Nokulagizila mwanamenhe kulawa mkikwama changu.”
Na heyo kamulongela, “Nigwelele kinhu kiwe zamana mbaka kipigiti vondaumgale.”
18Kamulongela, “Zamana ilihi yondanikugwelele?”
Kalonga, “Luzabi lwako luli na kitindi kili na utango wako hamoja na fimbo yako.” Avo kamgwelela abaho kawasa nayo, avo kapata inda. 19Abaho kachola ukae yake, kakisegeza kiziweziwe chake na kuvala kabili vivalo vake va ukizuka.
20Mkipigiti kidodo hamwande, Yuda kamtuma mbwigaake Hila yamsole ija imenhe yakamgwelele ija imtwanzi na kuvisola vija ivinhu viyamgwelele ija imtwanzi kamba zamana, ila Hila ham'vikile ija imtwanzi. 21Kawauza wanhu wakalile wokala haja Enaimu, “Kakwahi ija imtenda ugoni ndwanga yakalile hano hamgwazo wa inzila?”
Wamulongela, “Hano hakukalile na mtenda ugoni ndwanga.”
22Avo kabweleganya ha Yuda na kulonga, “Sim'vikile. Wanhu wa haja walonga kamba haja hakukalile na mtenda ugoni ndwanga.”
23Yuda kamwidika, “Natumulekele vija ivinhu viwe vake, kamba hatutendile hivo wanhu wokwiza kutuseka. Nimgalila menhe ino, ila hum'vikile.”
24Viibitile milenge midatu, Yuda kalongeligwa, “Mkwe yako Tamali katenda ugoni ndwanga, na sambi kana inda.”
Yuda kalonga, “Mulaveni hanze mumsome moto mbaka yadanganhike.”
25Viwakalile womulava hanze, katuma usenga ha mkwe yake kalonga, “Munhu mwene vinhu vino iyo yangwelele inda ino,” abaho kongeza, “Lola, kokitambula kitindi kino na luzabi luno na fimbo ino va munhu yalihi.”
26Yuda kavitambula na kulonga, “Heyo katenda galumbile kunibanza nie, kwavija nie simgwelele mwanangu Shela yamsole.” Avo Yuda hawasile nayo kabili.
27Kipigiti cha kulela vikivikile, kakala na wana ubasa wa kimbigalo muinda yake. 28Viyakalile yolela mwana, imwe kalava hanze mkono wake, ija imng'hunga kasola luzi ludung'hu na kulufunga mumkono wake na kulonga, “Ino iyo yasongile kulawa.” 29Ila viyaubwezile mgati mkono wake, miyage kavumbuka, ija imng'hunga kalonga, “Vino vivo vuuitulile nzila mwenyego.” Avo kakemigwa twaga da Pelezi.#38:29 Mkieblania Pelezi nhegulo yake kutula. 30Abaho ija imwana yakalile yafungigwe luzi ludung'hu mumkono wake kavumbuka na kagweleligwa twaga dikemigwa Zela.#38:30 Mkieblania Zela nhegulo yake udung'hu ama mhwani yau.
Currently Selected:
MWANDUSO 38: Kizalamo
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
