MWANDUSO 35
35
Mulungu Kommoteza Yakobo ako Beteli
1Mulungu kamulongela Yakobo, “Genda Beteli na ukakale hiko, na ukanizengele nie kilingo cha kulavila nhosa, nie iyo Mulungu nikulawilile gweye kipigiti vuukalile umkimbila mkulu wako Esau.”
2Avo Yakobo kawalongela wanhu wa mulango wake na wanhu wose wakalile hamoja na heyo, “Segezeni miungu yose ya Wamhazi imulinayo, yogeni, na m'vale vivalo ving'alile, 3abaho mwize tuchole Beteli, nikazenge kilingo cha kulavila nhosa ha Mulungu yanhazile mmazua ga migayo yangu na yakalile na nie kokose kunicholile.” 4Avo wamgwelela Yakobo miungu yose ya Wamhazi iwakalile nayo, na heleni ziwakalile wavalile, na Yakobo kavihimbilila hasi ya m'biki ukemigwa mwaloni haja Shekemu.
5Yakobo na wanage viwasongile kusegela, Mulungu kawatenda wanhu wose wa miwambo ija ikalile behi wone bwembwe ng'hani, na haduhu munhu yawakoleleze. 6Yakobo hamoja na wanhu wose iyakalile nao wavika hanhu hakemigwe Luzi ama mtwaga diyagwe Beteli muisi ya Kanaani. 7Yakobo kazenga kilingo cha kulavila nhosa, na kuhakema hanhu haja Eli-Beteli,#35:7 Mkieblania Eli-Beteli nhegulo yake Mulungu wa Beteli. kwavija haja baho Mulungu hayaigubule kumwake kipigiti viyakalile yomkimbila Esau mkulu wake. 8Debola, yaya wa Lebeka, kadanganhika, na kazikigwa hasi ya m'biki ukemigwa mwaloni muisi ya Beteli. Avo Yakobo kaukema m'biki uja Aloni-Bakusi nhegulo yake “Mwaloni wa Mahozi.”
9Yakobo viyabwelile kulawa Padani-Alamu, Mulungu kamulawilila kabili na kummoteza. 10Mulungu kamulongela, “Twaga jako Yakobo, ila hukemigwa kabili Yakobo,#35:10 Mkieblania Yakobo nhegulo yake kananahila kisiginho na vivija m'vwizi. ila kokemigwa Islaeli.”#35:10 Mkieblania Islaeli nhegulo yake kagomba na Mulungu. Avo kakemigwa Islaeli. 11Abaho Mulungu kamulongela, “Nie iyo Mulungu Mwene Mhiko. Ukalele wongezeke, ndewa bwando zolawa kumwako, na wandewa wolawa mulukuli lwako gweye. 12Isi inimgwelele Ablaham na Isaka, isi ino nokugwelela gweye na lukolo lwako londalwize.” 13Abaho Mulungu kamuleka, kachola uchana kulawa hanhu haja kuyalongile na Yakobo. 14Yakobo kasimika nguzo hanhu haja Mulungu hayalongile nayo, kasimika nguzo ya dibwe, kaigidila nhosa ya divai, abaho kaigidila mavuta. 15Yakobo kahakema hanhu haja Mulungu hayalongile nayo, “Beteli.”#35:15 Mkieblania Beteli nhegulo yake ng'anda ya Mulungu.
Laheli Kodanganhika
16Yakobo na mulango wake wasegela Beteli, na viwakalile wang'hali kutali na wambo da Eflati, kipigiti cha Laheli kulela kivika, avo kasonga kona usungu ng'hani. 17Na usungu wa kulela vuubanzile, ija yakalile imng'hunga kamulongela, “Sambiudumbe, kulela mwana mbigalo iyagwe.” 18Laheli viyakalile behi na kudanganhika, kamgwelela twaga imwana, kamkema Beni-Oni,#35:18 Mkieblania Beni-Oni nhegulo yake mwana wa mgayo wangu. ila tataake kamkema Benjamini.#35:18 Mkieblania Benjamini nhegulo yake mwana wa mkono wangu wa ukulume.
19Avo Laheli kadanganhika, kazikigwa hamgwazo wa inzila ichola Eflati, wambo dikalile na twaga diyagwe dikemigwa Betelehemu. 20Yakobo keka nguzo hadipanga da Laheli kamba ng'humbukila, nguzo ija ya baho mbaka lelo.#35:20 Mbaka lelo nhegulo yake mbaka kipigiti vichandikigwe kitabu kino. 21Yakobo, ayo vivija yakemigwe Islaeli, kagendelela na mwanza wake na kwika ng'hambi ng'ambu ya ikabili ya ulingo wa Edeli.#35:21 Ulingo wa Edeli nhegulo yake ulingo wa kwimilizila ng'hondolo sambiwebigwe.
Wana wa Yakobo
(1Vipig. 2:1-2)
22Yakobo viyakalile yokala muisi ija, Lubeni kachola kuwasa na Bilha mtwanzi wa kunze wa tataake, na Yakobo kahulika.
Yakobo kakala na wana mbigalo longo dimwe na wabili. 23Wana wa Lea wakala Lubeni, yakalile chaudele wa Yakobo, Simioni, Lawi, Yuda, Isakali, na Zabuloni. 24Wana wa Laheli wakala Usufu na Benjamini. 25Wana wa Bilha nyakadala wa Laheli wakala Dani na Naftali. 26Wana wa Zilpa nyakadala wa Lea wakala Gadi na Asheli. Wano wao wana wa kimbigalo wa Yakobo iyawalelile viyakalile Padani-Alamu.
Isaka Kodanganhika
27Yakobo kachola ha tataake Isaka ako Mamle behi Kiliasi-Aliba, sambi hokemigwa Hebloni, ako Ablaham na Isaka kuwakalile wokala kamba wahenza. 28Isaka kakala na uvyele wa milao mia na malongo manane. 29Isaka kadanganhika kuno yali na milao bwando na kuilumba hamoja na wahenga zake. Wanage Esau na Yakobo wamzika tataao.
Currently Selected:
MWANDUSO 35: Kizalamo
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
