Markus 5
5
Yesu wa Shaana nu̱ khu̱kheeti
(Mat 8:28-34; Luk 8:36-39)
1Tu̱ Yesu ndu̱ nu̱ mburi nda kwa dla ɗyim chitndang nu̱ dam, tu̱ ɗu̱ ku mbu̱ dlar ghai Garasin. 2Nu̱ Yesu viki ɓar mbu̱ du̱mbu̱lang, fan ndu̱ fan tu̱ nu̱ khu̱kheeti malkandi nggur nu̱ ɗa viki ye maa ku̱jipku yeta nda. 3Ye maa par mu̱tang ke maa khar ɓaran, yang nduka nje nu̱ke ka ɗu̱maki gu̱ndi nda gha ɓa, aa kaa shi kya boote ndu̱ yakhli. 4Wa ka gu̱n kharan ndu̱ saaran nu̱gha ndu̱ yakhli sar khang, yang tu̱ka ɗakh nu̱gha tu̱ zha vi nu̱ ve saaran nu̱gha nang ke ɗyi nu̱ saki nduka nje nu̱ ɗu̱maki nda tu̱k ɓa. 5Aakochi virkir ndu̱ fu̱ɗar a mbu̱ baara maari mbu̱ dlengku ndu̱ maa par mu̱tiku, a zhaano a turɗa vaaran ndu̱ ndogdiku.
6Yang baa nu̱ naki Yesu ɓakh, tu̱ ɗan she nda tu̱ kurum gha gume nda. 7Tu̱ shi zhaano nu̱ du̱mbu̱r ɓaran tu̱ ze Yesu za, “Ta ma shikya nu̱m ya? Yesu yi ɓu̱ Magham nu̱ viɗi, ngaa khutoro, vu̱r na bonye ya ɓa.”
8Zu̱ wanang ku̱me Yesu wa ze nda za, “Vyu ɓar mbe njifang to khu̱kheeti malkandi!”
9Tu̱ Yesu zham nda za, “Dlu̱mo za kima?” Tu̱ tlogha yenda za, “Dlu̱ma za du̱pu njong ku̱me chem khang.”
10Tu̱ yang khuɗ Yesu maɗyi za ku̱ komba wor ɓar vu̱ maarang ɓa.
11Yang aledeku a nje khang nu̱ke a khutloriku sa dlengang. 12Tu̱ khu̱kheetiku a khuɗ nda za, “Njigterem chem vi nu̱ mbu̱ aledeku nang.”
13Tu̱ Yesu tlogha ye wora. Nu̱ khu̱kheeti malkandi kwa viki nu̱ mbu̱ aledekwang, tu̱ aledeku a zhur nu̱ ɗari vu̱ me gu̱mndang, tu̱ koban mbu̱ ɗyim chitndang tu̱ mu̱ɗku kap, yang khang ɓaanda ka shi ɗye du̱pu rap.
14Ni nu̱ khutlo aledekwang naki wanang, tu̱ ɗu̱ ku mbu̱ ghaiku ndu̱ gureku ɓaanda tu̱ zu̱ ɗyi nu̱ ɗatlki ye nduki, tu̱ ndukikwang vi ma na ɗyi nu̱ kya nje. 15Nu̱ ndukikwang a ɓa ki she Yesu tu̱ na yirti nu̱ khu̱kheeti malkandiku khangndi mbeendang kharan gha ndu̱ lukti saran ve nda, a mbu̱ khangkal ɓaran, tu̱ tu̱k sawarku. 16Tu̱ nduki nu̱ naki ɗyi nu̱ ɗatlkyang vu̱r labar ɗyi nu̱ gwaki nu̱ khu̱kheetang kom ndu̱ Aledekwang. 17Tu̱ ndukikwang khuɗ Yesu za ku̱ njig maa ɓaanda.
18Nu̱ke Yesu a viri nu̱ mbu̱ du̱mbu̱lang tu̱ njif nu̱ shakki ndu̱ khu̱kheeti kwang khuti nda za chin a shim mbu gaanje nda. 19Tu̱ yang Yesu zhang gha yenda, tu̱ ze nda za, “Goɓ nu̱ kaari she nyeezoro to zu̱ ɗyi gwaanji nu̱ Magham shiki yoro kom ndu̱ nar zhiyaye nu̱ shiki yor tu̱k.”
20Tu̱ njifang ɗu̱ varan, tu̱ ku̱s zu̱ labar ɗyiku nu̱ Yesu shiki yenda nu̱ mbu̱ dlar ghai Dikapolis (mban za ghaiku gwang kya mbu̱ maarang) tu̱ ndukiku kap ki lazham ɗyen.
Yesu wa Nakha Mu̱ti Woi ɓu̱ Jairus tu̱ Shaana Nokhzi nu̱ Khaati mbu̱ti Tom
(Mat 9:18-26; Luk 8:40-56)
21Nu̱ Yesu gaɓki tu̱ dlan dam ma yir megu̱mndang dam far mbu̱ du̱mbu̱l ɗyimang, tu̱ nduki khang taba nu̱ she nda sarchi nu̱ke a me ɗyimang. 22Tu̱ da chele ɓu̱ dle gume ɓu̱ maa tabar ɓu̱ Yakhudeku nggur dlu̱man za Jairus a ɓa she nda, nu̱ naki Yesu, tu̱ nggu̱ɗ nu̱ gume nda. 23Tu̱ khuti nda maɗyi a zu̱ran za, “Woi ɓang nu̱ke ɗya wonkha nje qaandan me mu̱ti, yang ku̱gam a ɓo to sa kha nu̱ ɗyine nda ma ku̱ gwa shaanar tu̱ ɗana me mu̱tang.”
24Tu̱ Yesu ɗu̱ su̱yen ndu̱ chin, tu̱ yang nduki khang mbu gaanje nda ku̱ku̱sh ndu̱ chin a khi vaanda nu̱ ve nda. 25Yang nokhzi nggur a nje nu̱ shiki sonyi gwaanggu̱m rap tom a mbu̱ti ve nda. 26Wa za bonye maɗyi ku̱me wa baara ɗyin nu̱ kuzhiku khang, tu̱ sagha ɗyin me kharan ɓar kap ye ma laɓti kuzhiri. Yang khaatang ba a shikya shaatari. 27Nu̱ tu̱kki labar ɓu̱ Yesu, tu̱ vi nu̱ mbu̱ tabar ndukyang, ta ɓa gaanje Yesu tu̱ su̱ɓa lukti ɓaran. 28Ku̱me wa shi kwari mbu̱ memu̱naran za, “Aa nga su̱ɓa kya lukti ɓaran ɗyenda, ngga shaana.”
29Fan ndu̱ fan, tu̱ mbu̱ti tomang ching gha, tu̱ tu̱k varan wa shaana mbe khaatang.
30Fan ndu̱ fan tu̱ Yesu zu̱n za zalale nggur wa vi ve nda, tu̱ yang mbu̱m nu̱ she tabar ndukyang a za, “Ki su̱ɓaki lukti ɓanga?” 31Tu̱ nu̱ mburi nda kwa tlogha yenda za, “Yoori! Ta na aakya khi varan nu̱ ve ro, yang ta zhamndan no za, ‘ki su̱ɓaki nga?’ ”
32Tu̱ yang Yesu ki nggu̱tan mbu̱ ndukyang ma na njif nu̱ su̱ɓaki ndang. 33Tu̱ nokhzang nggu̱ɗ nu̱ gume nda varanang dlu̱rti ku̱me wa zu̱n ɗyi nu̱ shiki yenda, tu̱ zu̱ zhire ɓu̱ ɗyi nu̱ kya nje kap. 34Tu̱ yang Yesu ze nda za, “Yi ɓanga, maito ɓa wa shaana ro, ɗu̱ laya, ta shaana mbe khaati ɓaaro.”
35A mbu̱ ɓalarang, tu̱ ndukiku nggur nu̱ ɗa viki kaa ɓu̱ Jairus, dle gume ɓu̱ maa tabar ɓu̱ Yakhudeku a ɓa tu̱ ze Jairus za, “Ai, woi ɓaarang wa mu̱ɗi ku̱me nang, ku̱ Maalu̱mang nggum ndu̱ ɓar bam ɓa.”
36Yang Yesu nu̱ damta nu̱ tu̱kki ɓalar nu̱ke a san kwa ɓa tu̱ ze dle gume maa tabarang za, “Tu̱k na sawa ɓa, maito.”
37Yang nu̱ njig aaki ku̱ mbu nda ɓa kope Biturus ndu̱ Yaqub ndu̱ Yokhana khachin Yaqub. 38Nu̱ ɗa khu̱lki kaari she Jairus, dle gume ɓu̱ maa tabar ɓu̱ Yakhudeku, tu̱ Yesu na ndukikwang rokhdlaran mbu̱ yen a ghoori ku ndu̱ zhaano. 39Nu̱ Yesu viki mbu tu̱ ze wor za, “Nu̱m saki tun a ghoori ndu̱ zhaanwa? Ai wonkharang nu̱ mu̱ɗ ɓa, a shi kya ɗyeni.”
40Tu̱ ndukikwang shi mu̱si nar nggu̱bu̱ng yenda. Tu̱ Yesu komba aaki nu̱ dam, tu̱ njigkya zhin mu̱tang, ndu̱ man, kom ndu̱ nu̱ mburi nda ku nu̱ke a su̱yen ndu̱ chinang, tu̱ vi ku nu̱ ye maa nu̱ khu̱tlaki mu̱tang nu̱ nje. 41Tu̱ yang khuɓ khar mu̱tang tu̱ ze nda za, “Talita kumi” Mban za, “Wonkha, ju nu̱ viɗi.”
42Fan ndu̱ fan tu̱ wonkharang ji nu̱ viɗi, tu̱ shi yiri, yang sonyi ɓaran gwaanggu̱m rap. Tu̱ wor nu̱ke a nje shi lazham maɗyikandi. 43Tu̱ yang Yesu wu wor za ku̱ aaki tu̱k labar na ɓa, kom tu̱ zu̱ tu̱k za ku̱ vu̱r ɗye zu̱mndi ye wonkharang.
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
