Markus 3

3
Nu̱ Zurɗar Khar ngguri mbu̱ Ghai Kaparnakhum
(Mat 12:9-14; Luk 6:6-11)
1Nu̱ Yesu gaɓki nu̱ mbu̱ kib tabar ɓu̱ Yakhudekwang, yang khuski nggur a nje ye maaran nu̱ke kharan zurɗaran. 2Tu̱ yang ɓeeni nduki zu̱ yiti ye Yesu ma nanda mbu̱ ka shaana nda nu̱ gha ye Fu̱ɗar Su̱bjang ma gwa nda ɗye zu̱r nu̱ ɗyine nda. 3Tu̱ Yesu ze nu̱ zurɗar khara za, “A vyu to ching gha guma.”
4Tu̱ Yesu shi zhamndi ye wor a za, “Wa shipa shem ɗyi mbarkandi ye Fu̱ɗar Maasi mu yang ɗyi malkandi? Ɗana mi kya nyifi mu yang tlaghami nu̱ gha mu?”
Tu̱ yang kha vaanda ku tu̱tu̱k.
5Tu̱ Yesu nggu̱t wor mbe shokhna, memu̱naran su̱bu̱rtan ku̱me kaaku̱ɗakh ɗyin ɓaanda. Tu̱ ze nu̱ zurɗar khara za, “Shorɗo khaara gha.”
Nu̱ shorɗaki, tu̱ kharanang shaana fan ndu̱ fan. 6Ba nu̱ Parisekwang naki wanang, tu̱ vi ɓar ku mbu̱ kib tabarang, tu̱ ɗu̱ ku she nduki ɓu̱ Kuji Khiridus tu̱ shi sawari ku ɗyine njiv nu̱ke wor ka tlaghaki nda.
Yesu wa Shaana Nduki khang me Ɗyim Chitndi
7Tu̱ Yesu ndu̱ nu̱ mburi nda kwa njig mbu̱ ghayang tu̱ ɗu̱ ku me ɗyim chitndi nu̱ Galili, tu̱ yang ndukiku khang maɗyi nu̱ ɗa viki ku mbu̱ dlar ghai Galili ndu̱ Yakhudiya mbu gaanje nda ku. 8Tu̱ nduki nu̱ ghai Urshalima, ndu̱ mbu̱ dlar ghai Idumiya, ndu̱ nduki nu̱ke a dam dlar Gaawu Urdun, kom ndu̱ nduki nu̱ Taya, ndu̱ Sidon, kapa ɓa she Yesu ku̱me wa tu̱k ɗyiku nu̱ shiki. 9Tu̱ Yesu ze nu̱ mburi nda kwa za ku̱ ɗa ɓa ku ndu̱ du̱mbu̱l koɗommandi yenda chin vi nu̱ mban ma ku̱ tabar ndukyang kha ku̱ku̱sh ndu̱ chin ɓa. 10Shi wanang ku̱me wa shaana nduki khang, yang nu̱ khaatiku ba komkomi su̱ɓa nda ku, 11wonji aakochi khu̱kheetiku malkandi naki nda tu̱ ka gu̱ɗa yaghai ku a zhaano a zu̱ran ku za, “To Yi ɓu̱ Magham.”
12Tu̱ yang ka wu wor za ku̱ zu̱r nda ye aaki ɓa.
Yesu wa Dat Pudeku ɓaran Gwaanggu̱m Rap
(Mat 10:1-4; Luk 6:12-16)
13Qu̱rsan, tu̱ Yesu dlan ɗyin dleng tu̱ yang qa ɓeena nduki nyin shimki ma ku̱ dlan she nda, yang tu̱ ɗu̱ ku. 14Tu̱ Yesu dat nduki gwaanggu̱m rap chele ɓaanda ma ku̱ kha gha su̱yen ndu̱ chin ku, tu̱ qa wor pudeku, ku̱me a shim ru̱k wor ma waazu, 15kom ku̱ gwa zalale kombar khu̱kheetiku ɓar tu̱k. 16Wonji dlu̱m nduki gwaanggu̱m rapndi nu̱ datkyang. Siman nu̱ Yesu ka qaki nda za Biturus, 17ndu̱ Yaqub yi ɓu̱ Zabadi, ndu̱ Yokhana khachin Yaqub nu̱ka qaki wor za, Buwarnajis, mban za, Qusa pedlang. 18Kom ndu̱ Andu̱rawus ndu̱ Filibus, ndu̱ Bartilomi, ndu̱ Matta, ndu̱ Toma, ndu̱ Yaqub yi ɓu̱ Alfawus ndu̱ Tadiyus, ndu̱ Siman ye Kanana, 19ndu̱ Yakhuda Iskariyoti nu̱ masaki Yesu ɓarang.
Yesu ndu̱ Baalzabul
(Mat 12:22-32; Luk 11:14-23; 12:10)
20Nu̱ Yesu ɗu̱ki mbu̱ rafti ngguri, tu̱ nduki khanga ɓa she nda nu̱ke chin ndu̱ nu̱ mburi nda kwa nu̱ gwa maa zu̱m ɗye zu̱m ku ɓa. 21Nu̱ ndukiku ɓu̱ Yesu tu̱kki wanang, tu̱ ɗa ɓa ku ma ku̱si nda ku̱me a tamandan ku za wa gu̱r yirti.
22Tu̱ yang Maalu̱m Taurete ku nu̱ ɗa viki Urshalima zu̱ ku za, ai Yesu a su̱yen ndu̱ khu̱kheetiku ku̱me kombar khu̱kheetiku nu̱ke a shiranang, a shiran ndu̱ zalale ɓu̱ Baalzabul kuji ɓu̱ khu̱kheetiku.
23Tu̱ yang Yesu taba wor nu̱ she nda dong, kom tu̱ zu̱ ku̱rti ɓalar nang ye wor za, Sheɗan ka komba sheɗan kikimndi shoɗa? 24Yang mbu̱ kwaaɗar a dakhla ɗyinan tu̱ shakh rap, kwaaɗar nang ɓu̱ ching ɓa. 25Mbu̱ rafa wa shakh rap tu̱ ku̱s dakhla yen, raftang ɓu̱ ching ɓa. 26Mbu̱ sheɗan wa shakh rap tu̱ ku̱s dakhla ɗyinan, ɓu̱ ching ɓa yang nggu̱di ɓaran aa khu̱dli. 27Sar da nduka nje nu̱ke ka viki nu̱ mbu̱ rafti ɓu̱ nu̱ du̱mbu̱r tu̱ da ɗye varan ɓar ɓa kope wa gu̱n nu̱ du̱mbu̱rang nu̱gha dong, kom tu̱ ɗu̱ma da ɗye varanang ɓara. 28Zhire ngaa zu̱ran ye nu, ka yaapa aa nyi sola ndu̱ ɓalar ndu̱mndi nu̱ nduki shiki ye Magham. 29Yang aaki shiki ɓalar ndu̱mndi ye Jiimbi shakhshakhndi ɓu̱ yaapa yenda sar da ɓa, ku̱me wa shi solar nu̱ke yaapa su̱ ɓa.
30Yesu zu̱ wanangang ku̱me wa ze nda ku za a su̱yen ndu̱ khu̱kheeti malkandi.
Khachinkirku ɓu̱ Yesu ndu̱ Man
(Mat 12:46-50; Luk 8:19-21)
31A nje nu̱ si tu̱ khachin ku ndu̱ man ɗa ɓa tu̱ ching gha ku dam tu̱ yang ru̱k za ku̱ Yesu a ɓa. 32Yang nduki a nje kharan wa kara Yesu nu̱ tala, tu̱ ze nda ku za, “Wonji mo ndu̱ khatoku a kaala ku dam.”
33Tu̱ yang zham wor a za, “Nu̱ ki ke nana ndu̱ khachinkirku ɓang shoɗa?”
34Tu̱ Yesu nggu̱t nduki nu̱ khaki gha kararan ndu̱ chin a za, “Wonji mankirku ɓanga ndu̱ khataku fan, 35Ku̱me aaki nu̱ tlu̱naki shimndi ɓu̱ Magham, chin ke khata ndu̱ nana.”

Currently Selected:

Markus 3: ttrNT

ማድመቅ

ያጋሩ

ኮፒ

None

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ