Markus 2
2
Yesu wa Shaana Njif Zurɗakandi
(Mat 9:1-8; Luk 5:17-26)
1Nu̱ qanki koɗom, tu̱ Yesu gaɓ nu̱ mbu̱ ghai Kaparnakhum tu̱k, tu̱ nduki tu̱k za a nje kaari. 2Ta ɓa ku tu̱ taba khang nu̱ke maarang nu̱ da wor ɓa. Ku̱me aa me virang nyeedlan ndu̱ nduki tu̱ ku̱s waazu labar mu̱nkandi ye wora. 3Tu̱ ndukiku nggur wor vat nu̱ ɗa daki njif nggur zurɗakandi ta ɓa she nda, 4yang nu̱ gwa ma viri nu̱ she Yesu ku ɓa kha khang ɓu̱ nduki. Ku̱me nang, tu̱ shukhta ɗyin kib nu̱ kya mbanang nu̱gha ba ye maa nu̱ke Yesu a sang, kom ta zhur ndu̱ njif zurɗakandang ku qaandan ɗyine ku̱rbuk ɓaran. 5Nu̱ Yesu naki maito ɓa nda, tu̱ ze njif zurɗakandang za, “Yi ɓanga, wa yaapa solarku ɓa yoro.”
6Yang ɓeena Maalu̱m Taurete kwa nje ye maaran, tu̱ nggaasi kwariku mbu̱ memu̱na wora 7a zu̱ran ku za, “Shwat nu̱m saki tu̱ khuski nang ki poona ɓalar nanga? Ai wa ndu̱m Magham mbe ɓalar nu̱ shiki nang, mbu̱ Magham ɗyenda ɓa, ki ka ɗu̱maki yaapar solar ɓu̱ nduka?”
8Fan ndu̱ fan tu̱ Yesu zu̱n mbe jiimba ɗyi nu̱ke a kwaaran ku mbu̱ memu̱na wora, tu̱ yang ze wor za, “Nu̱m saki tun ki kwaari ku nang na? 9Nyi dukki ndu̱ ndolndola, ku̱ nduk ze nu̱ zurɗarang za wa yaapa solar ɓa yor mu? Yang ku̱ nduk zu̱ za ju to da ɗye qaandi ba to ɗu̱ va mu. 10Yang ku̱me ku̱ zu̱n nu za zalale a nje kha Yi ɓu̱ nduku ɗyine larji ma ku̱ yaapa solar ɓu̱ nduki.”
Tu̱ yang ze njif zurɗakandang tu̱k a za, 11“Nga zu̱ran yoro! Ju to da ku̱rbuk ɓa to ɗu̱ kaari.”
12Fan ndu̱ fan tu̱ ji nu̱ viɗi mbiyiti wora tu̱ da ku̱rbuk ɓaran tu̱ ɗu̱ varan, tu̱ yang shi lazham ku tu̱ gor dlu̱m Magham a zu̱ran ku a za, “Sar da nyem na tun wanang ɓa.”
Yesu wa Qa Lawi
(Mat 9:9-13; Luk 5:27-32)
13Tu̱ Yesu gaɓ tu̱ ɗu̱ me ɗyim chitndi nu̱ Galili tu̱k, tu̱ nduki khang taba nu̱ she nda tu̱ shi shogar ye wora. 14A peetar tu̱ na Lawi Yi ɓu̱ Alfawus kharan gha ye maa dlu̱r zhaanggali, tu̱ ze nda za, “A mburi nga.” Tu̱ yang ji tu̱ mburi nda.
15Gaanje nang, Yesu ndu̱ nu̱ mburi nda kwa zu̱m ɗye zu̱mndi mbu̱ rafti ɓu̱ Lawi. Yang a zu̱mndanku su̱yen ndu̱ nu̱ dlu̱r zhaanggal ku ndu̱ nu̱ solarku ku̱me nduki khang chele ɓaanda wa kha ma nu̱ mbu nda ku. 16Yang ba nu̱ ɓeena Maalu̱m Taurete ku ndu̱ Parisekwang naki a zu̱m ɗye zu̱mndi ndu̱ poona ndukiku nang, tu̱ zham nu̱ mburi nda kwang. A za, “Nu̱m saki tu̱ Yesu ki zu̱m ɗye zu̱mndi ndu̱ nu̱ dlu̱r zhaanggal ku ndu̱ nu̱ solar kwang na?”
17Nu̱ Yesu tu̱kki ɓalar nu̱ shiki kwang, tu̱ tlogha ye wor a za, “Njif nu̱ke varan mu̱ni nu̱ka laɓ nu̱ kuzhi ɓa, yang njif nu̱ke khaatan ka laɓki nu̱ kuzhi. Yang ngaa ɓakya ma qa nu̱ jeembu ku ɓa, ngaa ɓakya ma qa nu̱ solarku ma ku̱ nggoɗ ku̱ tu̱ njig solarku ɓaanda.”
Zhamndi ɗyine Shir Zhumti
(Mat 9:14-17; Luk 5:33-39)
18Yang nu̱ke nu̱ mbu Yokhana ndu̱ nu̱ mbu parisekwang wa ka shi zhumti ku. Tu̱ ndukiku nggur a ɓa ndu̱ zhamndi ye Yesu a za, “Nu̱ mbu Yokhana ndu̱ nu̱ mbu parisekwang wa ka shi zhumti ku, yang nu̱m saki nu̱ mburoro kwa nu̱ka shi zhumti ku ɓa?”
19Tu̱ yang Yesu tlogha ye wor a za, “Woɗye raptikirku ɓu̱ nu̱ zhin ɓu̱rti wa ka shi zhumti ku mbu̱ nu̱ zhin ɓu̱rtang a nje su̱yen ndu̱ wor mu? Ba mbu̱ nu̱ zhin ɓu̱rtang a nje su̱yen ndu̱ wor shwat ɓu̱ shi zhumti ku ɓa. 20Yang sarchi a nje a ɓari nu̱ke ka ɓa daki nu̱ zhin ɓu̱rtang ɓar she wora, kom ka shi zhumti ku mbu̱ qaandiku naandang.
21“Sar da nduk nu̱ka tatl mewar kapa nu̱ ve gu̱makandi ɓa, mbu̱ wa shi wanang, kapar Mewakandang ka ɓyakh gu̱makandang nu̱gha, yang ɓyakhtanang ka duk nu̱ sot nda maatli. 22Wanang tu̱k sar da nduk nu̱ka khi ɗyim anap mewakandi nu̱ mbu̱ kidlingndi ku̱zu̱mndi gu̱makandi ɓa. Ku̱me ɗyim anap Mewakandang ka ɗal ku̱dlingndi gu̱makandang nu̱gha tu̱ ɗyim anapang mbu̱ɗ ɓara, wonji ku̱dlingndang wa su̱bu̱r tu̱k. Ai nduk ka sakya ɗyim anap mewakandi nu̱ mbu̱ ku̱dlingndi ku̱zu̱mndi mewakandi.”
Zhamndi ɗyine Fu̱ɗar Maasi
(Mat 12:1-8; Luk 6:1-5)
23Ye Fu̱ɗar Maasi ɓu̱ Yakhudekwang, Yesu ndu̱ nu̱ mburi nda kwa peeta vaanda tu̱ gal ku nu̱ mbu̱ damku, tu̱ nu̱ mburi nda kwa ki zha ɗyin ɗyi kaɓkandi nu̱ mbu̱ damkwang. 24Tu̱ Parisekwang shi zhamndi yenda za, “Nu̱m saki tu̱ nu̱ mburoro kwa ki tlu̱na ɗyi nu̱ke nu̱ shipa ku̱ nduk shi ye Fu̱ɗar Maasi ɓa nda na?”
25Tu̱ yang Yesu tlogha ye wor a za, “Alapa nun na ɗyi nu̱ lagarkatang zu̱ki ɗyine ɗyi nu̱ Dauda shiki sarchi nu̱ke meeri a shi yenda chin ndu̱ nduki nu̱ke a su̱yen ndu̱ chin, yang ɗye zu̱m kha wor ɓa. 26Ye sarchi nang, tu̱ Dauda ɗu̱ ta da ɓurti tolir nu̱ke a mbu̱ rafti ɓu̱ Maghamang. Aa nu̱ke ɗya ɓurti tolir du̱ngkandi nu̱ke nu̱ shipa ku̱ aaki nji ɓa kope kuruku ɗyenda. Tu̱ yang Dauda da tu̱ nji tu̱ vu̱r ɓeenan ye nduki nu̱ke a gaanje nda ɓa goma? Ai shi ɗyinang sarchi nu̱ke Abiyata ke gorkir ɓu̱ kurukwang.”
27Tu̱ Yesu gaɓ tu̱ ze wor tu̱k a za, “Ai shi fu̱ɗar maasang ye nduku, yang sarda nu̱ shi nduk ku̱me Fu̱ɗar Maasi ɓa. 28Ku̱me nang, Yi ɓu̱ Nduk ɗya Zhinkir gwaanji kap ndu̱ ɓu̱ Fu̱ɗar Maasi.”
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
