Markus 1
1
Waazu ɓu̱ Yokhana nu̱ Baptisme ma Nggoti njigti Solari
(Mat 3:1-12; Luk 3:1-9, 15-17; Ykh 1:19-28)
1Nang ke nggarsi Labar Mbarkandi ɓu̱ Yesu Masiya Yi ɓu̱ Magham, 2ba wa nu̱ bu̱laki nu̱ gha mbu̱ lagarkati ɓu̱ annabi Yishaya. Nu̱ Magham zu̱ki za,
“Nggu̱ɗu, ngaa ru̱k nu̱ ru̱kti ɓang
ku̱ ɗa ɓa gume ɓar ɓaaro
ma ku̱ daasa njiv yoro.”
3“Chin ke su̱qur nu̱ke a wopar
mbu̱ gaari a zu̱ran za,
‘Daasa ma njiv ɓar ɓu̱ Zhinerem gwaanji,
kwaɗama yiti njiva yenda nu̱gha kwatu̱ra.’ ”
4Yokhana nu̱ baptismya viki tu̱ki baptisme ye nduki mbu̱ gaari a waazu baptisme nggooti njigti solar ɓaanda ma gwa yaapar she Magham. 5Tu̱ nduki nu̱ mbu̱ dlar ghai Yakhudiya, ndu̱ Urshalima kapa ɓa she nda a zu̱ solar ɓaanda tu̱ ku̱s baptisme ye wor mbu̱ Gaawu Urdun. 6Yang Yokhana sakya lukti nu̱ shiki ndu̱ ghosi dliimokh, ɗye gu̱ndi mbu̱ varan ɗya ku̱zu̱m, ɗye zu̱mndi ɓaran ɗya mbeega ndu̱ ɗyim ɗyiiri. 7Tu̱ ku̱s waazu za, “Njif nu̱ dukki nga gwaari a nje a ɓari yang nang khu̱l shul nga gha tang kol zo paghamndi ɓaran nu̱gha ɓa. 8Nga baptismya ye nu ndu̱ ɗyimi, yang ɓaran ka shi baptismya ye nu ndu̱ Jiimbi Shakhshakhndi.”
Yokhana wa Shi Baptisme ye Yesu
(Mat 3:13-17; Luk 3:21-22)
9Mbu̱ qaandi virkirku naandang, tu̱ Yesu ɗa njig ghai Nazaret nu̱ke a mbu̱ dlar ghai Galili, ta ba she Yokhana tu̱ shi baptisme yenda mbu̱ Gaawu Urdun. 10Yesu a viri ɓar mbu̱ ɗyimang tu̱ na ma viɗi wa qu̱ni, tu̱ Jiimbi Shakhshakhndi wa mbola a lu̱bti nu̱ ɗyine nda. 11Tu̱ ɓalar a vi viɗi a zu̱ran za, “To Yi ɓang, ndolakandi, nga tu̱k mu̱ndi ɓa maɗyi.”
12Fan ndu̱ fan, tu̱ Jiimbi shakhshakhndi ɗu̱ ndu̱ chin mbu̱ gaari.
Sheɗan wa Buu Yesu ma Lamba nda
(Mat 4:1-11; Luk 4:1-13)
13Tu̱ Yesu shi qaandi ɗyin vat mbu̱ gaarang. Sheɗan a shim lamba nda. Aa nu̱ke dlu gaariku a nje mbu̱ gaarang su̱yen ndu̱ chin, yang nu̱ ru̱ktiku ɓu̱ Magham a buu ɗyinan.
14Gaanje wa khi Yokhana nu̱ baptismang gha zhaaru̱m, tu̱ Yesu a ɓa mbu̱ dlar ghai Galili a waazu labar mbarkandi ɓu̱ kwaaɗar ɓu̱ Magham. 15Tu̱ ku̱s zu̱ran za, “Sarchi wa shi ku̱me kwaaɗar ɓu̱ Magham wa shi bing, yang njig ma solar ɓaanu tun maita labar mbarkandang.”
Yesu wa Qa nu̱ Dumndiku Vat maa ku̱ Mburi nda ku
(Mat 4:18-22; Luk 5:1-11)
16Yesu a peetar me ɗyim chitndi nu̱ Galili, tu̱ na Siman ndu̱ khachin dlu̱man za Andu̱rawus a ku̱s yurviku ndu̱ lemi ku̱me ɗya nu̱ dumndiku. 17Tu̱ Yesu ze wor a za, “A mbu ma nga, ngga gaɓ ndu̱ tun ma nu̱ dumndi nduki ya.” 18Fan ndu̱ fan, tu̱ njig lem ɓaanda nu̱ nje tu̱ mbu̱ nda ku.
19Nu̱ songki nu̱ guma koɗom, tu̱ na Yaqub Yi ɓu̱ Zabadi ndu̱ khachin nu̱ka qaki nda za Yokhana mbu̱ du̱mbu̱li a kwaɗa lem ɓaanda. 20Fan ndu̱ fan, tu̱ Yesu qa wora, tu̱ yang mbu nda ku tu̱ njig ku̱maandi ɓaanda Zabadi nu̱ mbu̱ du̱mbu̱lang su̱yen ndu̱ nu̱ tlu̱nar mu̱zhindiku ye wora.
Nu̱ Khu̱kheeti ngguri
(Luk 4:31-37)
21Tu̱ Yesu ndu̱ nu̱ mburi nda kwa ɗu̱ ku mbu̱ ghai Kaparnakhum. Nu̱ Fu̱ɗar Maasi ɓu̱ Yakhude kwa shiki, tu̱ vi nu̱ mbu̱ kib tabar ɓu̱ Yakhude ku tu̱ ku̱s shogar ye wora. 22Tu̱ nduki kwa shi lazham pooni shogar ɓaran ku̱me wa ngga yen ndu̱ pooni shogar ɓu̱ Maalu̱m Taurete kwang. Yesu a shogar ye wor ndu̱ su̱qur zalala. 23Yang khuski nu̱ khu̱kheeti nggur a nje mbu̱ maa tabarang, 24fan ndu̱ fan tu̱ da su̱quran nu̱ viɗi, a zu̱ran za, “Njigterem, nu̱m baki rem ndu̱ twa? To Yesu khuzi Nazaret? Ta ɓa ma tlagha rem mu? Ngaa zu̱ndoro, to ke njif Shakhshakhndi ɓu̱ Maghamang.”
25Tu̱ yang Yesu wu khu̱kheetang za, “Kho yit to vi ɓar mbe njifang ka.”
26Nu̱ khu̱kheetang yakhtaki njifang tu̱ ghwat zhaano, kom tu̱ vi ɓar mbe nda.
27Tu̱ ndukyang kap ki lazham ɗyi nu̱ shikyang tu̱ yang ki zham yen a zu̱ran ku za, “Na ɗya nyi pooni tuna? Chabɗa, meeni nang, chem wa na pooni mewar shogar ngguri ku̱me wa ka shi ɓalar ndu̱ zalale ye khu̱kheetiku, yang tu̱ ka mbu su̱quran.”
28Fan ndu̱ fan tu̱ labar ɓaran ɗu̱ aa fu̱n mbu̱ dlar ghai Galili.
Yesu wa Shaana Su̱rvi Siman Nusukandi
(Mat 8:14-15; Luk 4:38-39)
29Ba nu̱ ɗa viki ku ɓar mbu̱ kib tabarang, tu̱ ɗu̱ ku kaa ɓu̱ nu̱ Siman ndu̱ Andu̱rawus su̱yen ndu̱ Yaqub ndu̱ Yokhana. 30Yang su̱rvi Siman nusukandi nu̱ da lawan ɓa ku̱me ɓalɓal ve nda, tu̱ ze Yesu ku. 31Yang tu̱ Yesu ɗu̱ she nda, nu̱ khubki kharan, tu̱ da nda nu̱ viɗi, tu̱ ɓalɓalang ngga nda gha, kom tu̱ ji tu̱ shi ɗye zu̱mndi ye wora.
Yesu wa Shaana Nduki Khang
(Mat 8:16-17; Luk 4:40-41)
32Nu̱ mugdi shiki qu̱rse nggu̱di fu̱ɗari, tu̱ ɗa ɓa ndu̱ nu̱ khaatiku su̱yen ndu̱ nu̱ khu̱kheetiku. 33Tu̱ nduki nu̱ mbu̱ ghayang kap taba nu̱ me raftang. 34Tu̱ Yesu shaana nu̱ khaatiku zum zum wor khang, tu̱ fet khu̱kheetiku ɓar mbe nduki khang. Yang nu̱ njig khu̱kheetikwang ku̱ shi ɓala ku ɓa ku̱me wa zu̱n nda ku.
Yesu wa Ɗu̱ ma Barar ndu̱ Waazu
(Luk 4:42-44)
35Tu̱ Yesu kwakh nu̱ dumaari ɗau, fan ku̱ maarang shaana, tu̱ ɗu̱ ye maa nu̱ke aaki nje ɓa tu̱ shi barari. 36Tu̱ yang Siman ndu̱ ɓeena nduki nu̱ke a su̱yen ndu̱ chin ɗu̱ ma laɓ nda ku. 37Nu̱ gwaki nda, tu̱ ze nda ku za, “Nduki kap a laɓ toro.”
38Tu̱ yang Yesu tlogha ye wor za, “Ɗyem mbu̱ ɓeena ghaiku nu̱ke a guma ma waazu nje ku̱me nang ke ɗyi nu̱ ɗa ɓa ki ndu̱ nga ɗo.”
39Tu̱ baara ma Galili kap a waazu ye wor mbu̱ kib tabar ɓaanda a fet khu̱kheetiku malkandi ɓara mbe nduki.
Yesu wa Shaana nu̱ Khaati gwaanji
(Mat 8:1-4; Luk 5:12-16)
40Tu̱ nu̱ khaati gwaanji nggur a ɓa she Yesu, tu̱ kurum gha a khuti nda za, “Mbu̱ ta shimi, to ka ɗu̱ma shaana nga nu̱ gha.”
41Nu̱ Yesu tu̱kki zhiyaye ɓaran, tu̱ zoɓa kharan tu̱ su̱ɓa nda, tu̱ ze nda za, “Ngaa shimi, shono.”
42Fan ndu̱ fan tu̱ shaana mbe khaati gwaanjang, tu̱ kha shakhshakh.
43Tu̱ Yesu ze nda za ku̱ ɗu̱ varan gaanje wa mata nda maɗyi a za, 44“Aa da zu̱ na ɗyinang ye aaki ɓa, yang ɗu to ɗa wut va ye kurukwang, to vu̱r sadke nu̱ khar shakhshakh ba wa nu̱ annabi Musa zu̱kyang. To shi wanang ku̱me ku̱ nduki zu̱n nu̱ ɗyine ta shaana mbe khaatang.”
45Tu̱ yang njifang ɗu̱ ta zu̱ ɓalarang nu̱ dam ye aaki ku̱ tu̱kki nu̱ke Yesu nu̱ ɗu̱ma viri nu̱ mbu̱ ghai nggur ye dalang tu̱k ɓa. Tu̱ ka kha varan gha gar ye maa nu̱ke nduka nje ɓa, yang kap ndu̱ nang, tu̱ nduki ki ɓar she nda mbu̱ aa nyi maa.
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
