Matta 2
2
Nu̱ zu̱ndi si Anjinjeku nu̱ ɗa ɓa ki Ɗokhatla
1Wa kha Yesu mbu̱ Baitalami nu̱ke a mbu̱ dlar ghai Yakhudiya, sarchi kwaaɗar ɓu̱ kuji gwaanji Khiridus. Nu̱ zu̱ndi su̱ anjinjeku a nje na viki ku ɗokhatla, tu̱ ɗa ɓa Urshalima tu̱ shi zhamndi ku za, 2“A fu̱n ke kuji ɓu̱ Yakhudeku nu̱ khaki nda na? Chem wa na anjinje ɓaran ɗokhatla, yang chem a ɓa ma ghar ghai yenda.”
3Nu̱ tu̱kti labar nang, tu̱ kuji Khiridus ndu̱ nduki nu̱ Urshalima kap damta. 4Tu̱ kuji Khiridus taba Maalu̱m Taurete ku ndu̱ kuruku rututundi ɓu̱ Yakhudekwang tu̱ zham wor za, “Woɗye annabyang zu̱ za ka kha Masiya nu̱ fu̱n kwa?” 5Tu̱ tlogha ku za, “Mbu̱ Baitalami nu̱ke a mbu̱ dlar ghai Yakhudiya, ku̱me annabyang bu̱la za, 6‘To Baitalami mbu̱ dlar ghai Yakhudiya, to ghai koɗommandi chele ghai kwaaɗarku ɓu̱ Yakhudiya ɓa. Ku̱me to ke maa nu̱ke ka ɓa khaki gorkir nu̱ kwaaɗari, njif nu̱ke a ma khutlo ndukiku ɓang Israila.’ ”
7Tu̱ kuji gwaanji Khiridus qa nu̱ zu̱ndi su̱ anjinjekwang mbu̱ tuka, tu̱ zham wor sarchi nu̱ anjinjang a viki. 8Nu̱ zu̱ki yenda ku tu̱ ru̱k wor nu̱ Baitalami za, “Ɗu̱ ma tun a laɓ maa nu̱ke woyang a si mbari, mbu̱ tun wa gwa nda, tun a gaɓi tun zu̱ ya ku̱me ɗu̱ nga ta nga ghar ghai yenda tu̱k.”
9Viri ɓaanda ɓar gume kuji qu̱rse tu̱kti ɓalarang, tu̱ na anjinje nu̱ ɗa viki ɗokhatlang gume wora, tu̱ anjinjang mbu ndu̱ wora tu̱ ɗa ching gha ɗyine rafti nu̱ke woyang a si. 10Nu̱ naki anjinjang wa ching gha, tu̱ kasha ku maɗyi. 11Nu̱ viki nu̱ mbu̱ raftang, ta gwa woyang ndu̱ man, Maryam, tu̱ kurum gha ku tu̱ ghar ghai yenda. Gaandan, tu̱ qu̱n kulup ɓaanda, tu̱ vu̱r ginarwe ndu̱ lubban ndu̱ mur nu̱ke ɗya ɗye zhi mu̱nkandi ku, nu̱ vari kom ndu̱ nu̱ pashari nu̱ me mu̱zhindi yenda. 12Tu̱ gaɓ nu̱ mbu̱ ghai ɓaanda ve njiv nggur zu̱mndi, ku̱me Magham wa wu wor mbu̱ zhine za ku̱ gaɓ nu̱ she Khiridus ɓa.
Ɗar ma yir Masar
13Gaanje peetar ɓaanda, tu̱ nu̱ ru̱kti ɓu̱ Magham a ɓa ye Yusufu mbu̱ zhine. A za, “Ju to da woyang ndu̱ man tun ɗan Masar, tun a khan fara kope nga zu̱ ɗye shir ye nu gana fan ku̱me Khiridus ka laɓ nyifi ɓu̱ woyang.” 14Tu̱ Yusufu da woyang ndu̱ man mbu̱ virkirang tu̱ ɗan Masar ku. 15Nu̱ njig Masar ku ɓa kope gaanje mu̱ti ɓu̱ kuji gwaanji Khiridus ma ku̱ nyel ɗyi nu̱ Magham zu̱ki nu̱ ku̱nshe annabyang za, “Ngga qa woi ɓang ɓar Masar.”
Tlaghar qusa Khuzuku
16Nang ɗo, nu̱ kuji gwaanji Khiridus daki mban za nu̱ zu̱ndi su̱ anjinjekwang wa gaɓ ndu̱ chin ma nggu̱bu̱ng, tu̱ shokhna maɗyi. Tu̱ sa za ku̱ tlagha qusa khuzuku nu̱ mbu̱ ghai Baitalami ndu̱ nu̱ke a mbu̱ bu̱n wor ru̱m nu̱gha, ji yin sonyi rap ma yir yaghai. Ku̱me nang ke sarchi vi ɓu̱ anjinjang, wa ni nu̱ zu̱ndi su̱ anjinjekwang zu̱ki yenda. 17Nang ke nyedli pitli ɓu̱ annabi Yirmiya nu̱ zu̱ki za, 18“Su̱ qura vi ghai Rama, su̱qur ghoori chiti mbi maɗyikandi, Rakhila kya gho qusonggi ɓaran, yang wa zhang tu̱k du̱ngndi memu̱na gha, ku̱me wa mu̱ɗ ku.”
Njigti Masar
19Gaanje mu̱ti ɓu̱ kuji gwaanji Khiridus, Yusufu a Masar, tu̱ nu̱ ru̱kti ɓu̱ Magham a ɓa yenda mbu̱ zhine. Za, 20“Ju to da woyang ndu̱ man tun gaɓ nu̱ maa Israila, ku̱me nu̱ gangndi nyifi ɓu̱ woyang wa mu̱ɗ ku.”
21Tu̱ Yusufu da woyang ndu̱ man, tu̱ gaɓ nu̱ mbu̱ dlar maa ɓu̱ Israila. 22Yang nu̱ tu̱kki Arkilawus woi ɓu̱ kuji gwaanji Khiridus zu̱mki kwaaɗar Yakhudiya me ɓu̱ zhin, tu̱ tu̱k sawar yir fara. Nu̱ Magham wuki nda mbu̱ zhine, tu̱ ɗu̱kya mbu̱ dlar ghai Galili. 23Nu̱ khu̱lkiku, tu̱ ɗa kha gha ku Nazaret ma ku̱ nyel ɗyi nu̱ annabikwang zu̱ki za, “Ka qa nda ye Nazaret.”
Currently Selected:
Matta 2: ttrNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
