Mose I, 7
7
Nyu kpekpemi ɔ
1Yawɛ de Noa ke, “Yaa sɛ lɛ ɔ mi; mo, kɛ nihi nɛ ngɛ o we ɔ mi ɔ tsuo; ejakaa i na kaa mo pɛ ji nɔ nɛ peeɔ nɔ́ nɛ da ngɛ je ɔ mi tsuo. 2Ngɔɔ lohwe nane eywiɛɛywiɛtsɛmɛ nɛ a he tsɔ, eku kpaago kɛ eyo kpaago, kɛ ní nɛmɛ nɛ a he tsɔ we lɛɛ eku kɛ eyo kakaaka pɛ kɛ wo lɛ ɔ mi. 3Lohwe pɛlitsɛmɛ hu, ngɔɔ eko tsuaa eko eku kpaago kɛ eyo kpaago kɛ wo lɛ ɔ mi. Moo pee enɛ ɔ, konɛ lohwe ɔmɛ tsuo a yi nɛ na wami, nɛ a fɔ kɛ wo je ɔ mi ekohu. 4Hiɛmɛ nɛ ɔ otsi ɔ, ma ha nɛ hiɔmi maa nɛ ngɛ je ɔ mi nyɔ kɛ pia ligbi nyingmi eywiɛ, nɛ ma kpata níhi tsuo nɛ i bɔ nɛ wami ngɛ a mi ɔ a hɛ mi.” 5Noa pee nɔ́ tsuaa nɔ́ nɛ Yawɛ fa lɛ ke e pee ɔ.
6Noa ye jeha lafa ekpa benɛ nyu kpekpemi ɔ ba je ɔ mi ɔ. 7#Mat 24.38-39; Luk 17.27 E kɛ e yo, kɛ e binyumu ɔmɛ, kɛ a yi ɔmɛ ya sɛ lɛ ɔ mi nɛ a kɛ tu nyu kpekpemi ɔ nya fo. 8-9Nɛ kaa bɔ nɛ Mawu fa Noa a, lohwe tsuaa lohwe ya sɛ lɛ ɔ mi, eku kɛ eyo eku kɛ eyo: lohwehi nɛ a he tsɔ kɛ ní nɛmɛ nɛ a he tsɔ we, pɛlitsɛmɛ, nane eywiɛɛywiɛtsɛmɛ, kɛ ní nɛmɛ nɛ sãã si tsuo. 10Ligbi kpaago se ɔ, nyu kpekpemi ɔ nɛ ngɔ pue zugba a nɔ.
11 #
Pet II, 3.6
Benɛ Noa ye jeha lafa ekpa a, jamɛ a jeha a we hlami enyɔne ɔ ligbi nɛ ji nyɔngma kɛ kpaago ɔ nɔ ɔ, zugba a nɔ nyu hɛngmɛhi babauu ɔ tsuo hia, nɛ hiɔwe saflɛ ɔmɛ tsuo bli, 12nɛ hiɔmi nɛ ngɔ pue zugba a nɔ nyɔ kɛ pia ligbi nyingmi eywiɛ. 13Jamɛ a ligbi ɔ nɔuu ɔ, Noa kɛ e yo ɔ, kɛ e binyumu etɛ ɔmɛ, Shem, Ham, kɛ Yafet, kɛ mɛ hu a yi ɔmɛ sɛ lɛ ɔ mi. 14A kɛ lohwe slɔɔtoslɔɔtohi sɛ lɛ ɔ mi: we mi lohwehi, pu mi lohwehi, lohwe nguahi kɛ wawihi, kɛ pɛlitsɛmɛ. 15-16Kaa bɔ nɛ Mawu fa Noa a, nɔ́ tsuaa nɔ́ nɛ wami ngɛ e mi ɔ kɛ mɛ sɛ lɛ ɔ mi eku kɛ eyo eku kɛ eyo. Kɛkɛ nɛ Yawɛ nga sinya a kɛ wo Noa yi.
17Nyu kpekpemi ɔ nɛ ngɔ pue zugba a nɔ ligbi nyingmi eywiɛ. Benɛ nyu ɔ ba hiɛ saii ɔ, e wo lɛ ɔ nɔ kɛ je zugba. 18Enɛ ɔ se ɔ, nyu ɔ ba babauu ngɛ zugba a nɔ. Kɛkɛ nɛ lɛ ɔ hia nɛ e bɔni nyɛɛmi kɛ ngɛ yae kɛ ngɛ bae ngɛ nyu ɔ hɛ mi. 19-20Jehanɛ, nyu ɔ ba babauu nitsɛ kɛ ya si e ha yo gagaaga amɛ tsuo a nɔ nɛ a yi laa maa pee gugue eywiɛ. 21Nɔ́ tsuaa nɔ́ ngɛ je ɔ mi nɛ wami ngɛ e mi ɔ gbo: lohwe pɛlitsɛmɛ, we mi lohwehi, pu mi lohwehi, kɛ ní nɛmɛ nɛ sãã si, kɛ nimli adesahi tsuo pɛpɛɛpɛ. 22Je mi nɔ́ tsuaa nɔ́ nɛ woɔ mumi ɔ gbo. 23Yawɛ kpata nɔ́ tsuaa nɔ́ nɛ ngɛ hɛ ngmengmle ngɛ je ɔ mi ɔ hɛ mi: nimli adesahi, lohwe pɛlitsɛmɛ, lohwe nane eywiɛɛywiɛtsɛmɛ, kɛ ní nɛmɛ nɛ sãã si. Noa kɛ ni nɛmɛ nɛ e kɛ mɛ ngɛ lɛ ɔ mi ɔ pɛ nɛ a piɛ. 24Nyu kpekpemi ɔ ha zugba a nɔ ligbi lafa kɛ nyingmi enuɔ.
Currently Selected:
Mose I, 7: Dangme
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible in Dangme © Bible Society of Ghana, 2018.
