MATIU 20
20
A gato tavalu huri ira tangaloi tabanagi lolo talui vaen
1“A mwasoana garaqa God mo ratahigi lolona u mwere na tangaloi a huqegi talo talui vaen ngehi mo mwalue mo vano lolo robongi siaga vena ware na tangaloi tabanagi lavasigi talolo talune. 2Nge u lado bubugi meire huri na vatu vudolue vagarue lo rani gatagale, ko mo horara vano lolo talune. 3Siu nge mo mwalue vano lategi lo aho gaisiwo, ko mo lehire lavasigi ram labelabe vurogi lo sarai volivoli. 4Ko inge mo veve lawera vena, ‘Gimiu vage nen vano lolo talui vaen, ko nain voli gimiu vin tatarise.’ 5Ko ingere ram vano. Nge mo vano taligu lategi lo matenaho tu vovohoi, ko lo aho gaitolu, mo vai mwerehi vage. 6Ko inge mo vano taligu mo kakarani lo aho gailime, mo haqera tangaloi lavasigi vage ram labelabe vurogi, ko mo veve lawera vena, ‘?Huri hava gineu gimiu nem labe kukunegi na rani vurogi?’ 7Ingere ram veve lawea vena, ‘A vevenagi a tangaloi he ware gamai tea.’ Nge mo veve lawera vena, ‘Gimiu vage nen vano lolo talui vaen.’ 8“Siu lune mo revirevi, a huqegi talo talui vaen mo veve lawe na nona leogoro vena, ‘Gon warera tangaloi tabanagi, ko gon bete na gaitawera, gon tauvuigi lure hi vagasigi mo vano dadari lure hi tomuegi.’ 9Ngerehi u warera lategi lo aho gailime ram vonai, ingere doluegi ram lai na vatu vudolue. 10Nge lune ngerehi u warera tomuegi ram vonai, ingere ram lado huri ve rain lei na gaitawe vin liu ko ingere vage ram lai na vatu vudolue vataha tangaloi. 11Ko lune ingere rau leie beno, ram singo tutubugi na huqegi, 12ram veve vena, ‘Ngere ngaha gu warera vagasigi rau kea huri na mahoi aho gatagale, nge gom volire u tatarise mei gamai, gamai gau keakea mo bongi lolo mwamwavie.’ 13A huqegi mo duvi goroe gatagale denire, mo veve vena, ‘Buluana, na he vai asiesi ginigo tea. Iniko gu lado bubugi meieu huri na vatu vudolue. 14Gon lai na gaitawemu ko gon vano. Nam tarani ve nain bete lawe na tangaloi hi nau warea vagasigi mwerehi nam bete lawego. 15?Wa he eno tea laweau ve nain vei mwere nam tarani gina buleku homu? ?Sige mo garasigo a vevenagi a noku vaiveigarea?’ ” 16Ko i Jisas mo veve vena, “Mwerehi, ingere ram tu tagu rain tomue, ko ingere ram tomue rain tu tagu.”
I Jisas mo veve vagatoligi huri na nona mateana ko nona maragaana
17Lune i Jisas mo hage Jerusalem, nge mo lai beraginire rorongtagi hangavulu domwagi gairue, ko mo laqa lawera gahera lo turegi vena, 18“Nen rorongtagi, dain hage Jerusalem, ko rain lei i Netui Tangaloi lawera muei rugurugu ko ira huhui talo Leo hora noi Mosis. Rain vevegi vagamatea 19ko rain sireginie lawera haroharo, huri ve rain sovue, rain telie ko rain toto vehavehaginie. Ko lo bongi gaitoligi nge vin maraga taligu sulo mwasoana.
A leo navunevu noi retahi Jemis ko i Jon
20Siu i horai Sebedi mo vonai lobei Jisas mei netune gairue, ram hudu goroe, ram navu na gineu denie. 21I Jisas mo huie vena, “?Gom tarani na hava gineu?” Nge mo duvi lawea vena, “Gon waratau ve i netuku gairue ngaha roin toga, tuegi lo matuemu, tuegi lo mawirimu, lune goin voragi ratahigi.” 22I Jisas mo duvi lawera vena, “Nero he ilo na hava gineu tea hi nerum navue denieu. Neri inu lei lolo laha nain inu lolona?” Ngere rom duvi lawea vena, “Gori vei lei.” 23I Jisas mo veve lawera vena, “A hogo, neri inu lolo noku laha, nge hatie noku ve nain leowahe ve ihine vin toga lo matueku sige lo mawiriku, nge a noi Tamaku ve vin siregi lawe rahine nge u vei vagatai hurire.”
Mo eno ve ira tomtomuegi rain voragi tangaloi tabanagi
24Lune ingere hangavulu ram rongo na leo hi, ram lologagasi gina reretehigi gairue. 25Ko i Jisas mo warera vonai lobena, mo veve lawera vena: “Neu ilo huri ve a tangaloi lalawua nora haroharo, a nora leo huhui rau huire ko a nora tomtomuegi ram vosangi na nora huireana. 26Nge ngaha vin he mwerehi te mei gimiu. Nge ihine mei gimiu mo tarani ve vin lawua, nge vin voragi na nomiu tangaloi lalakogi; 27Ko ihine mei gimiu mo tarani ve vin tomue, ne vin voragi na tangaloi tabanagi lawe gimiu - 28mwerehi i Netui Tangaloi sibona he vonai tea ve rain tabana lawea, nge ve vin tabana ko vin siregi na mwasoana gi gaivolire tangaloi sao.
I Jisas mo vagaleleohagi na matadodo gairue
29Lune ingere ram mwalue den Jeriko, a sinobu lawua ram hurie. 30A matadodo gairue rom toga lo mwararai turegi, rom rongo ve i Jisas mo dige utu, rom ulo rom veve vena, “Huqe, Netui Devet, gon hagavi gamaru!” 31A sinobu ram gato gorora ve ron toga rorongo. Nge rom ulo siaga taligu denie tomue vena, “Huqe, Netui Devet, gon hagavi gamaru!” 32I Jisas mo labe, mo warera vonai, mo veve vena, “?Nerom taranieu ve nain vei na hava gineu lawe gimiru?” 33Rom veve lawea vena, “Huqe, gorom tarani ve gon waga na matamaru!” 34I Jisas mo hagavire, mo tango vano lo matara; ko siserigi rom leo taligu, ko rom huri Jisas.
Currently Selected:
MATIU 20: HNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific, 2013
