Noo Mian 8
8
CAB. VIII.
1Tra ve er jeet neose jeh’n clieau, deiyr earrooyn moar dy leih er.
2As cur‐my‐ner haink lourane as hug e ooashley da, gra, Hiarn, my she dt’aigney eh, foddee oo mish y yanoo glen.
3As hug Yeesey magh e laue as venn e rish, gra, M’aigneys eh, bee er dty ghlenney. As chelleeragh va’n louranys echey er ny ghlenney.
4As doort Yeesey rish, Jeagh nagh ninsh oo shoh da dooinney erbee, agh gow, as jeagh oo hene da’n taggyrt, as cheb yn gioot doardee Moses, dy ve son fenish daue.
5¶ As tra va Yeesey er gholl stiagh ayns Capernaum, haink captan‐keead huggey guee er,
6As gra, Hiarn, ta my er‐mooinjerey ny lhie ec y thie, ching jeh’n chingys‐cra, ayns stayd feer treih.
7As doort Yeesey rish, Higgyms as neem e y leihys.
8As dreggyr y captan‐keead gra, Hiarn, Cha vel mee feeu, oo dy heet stiagh fo my chlea: agh ny lomarcan loar y fockle, as bee my er‐mooinjerey er ny leihys.
9Son ta mish mee hene my ghooinney ta fo pooar, as ta sidooryn aym foym: as ta mee gra [rish shoh, Immee, as te goll; as] rish fer elley, Tar, as te cheet: as rish my harvaant, Jean shoh, as te dy yanoo eh.
10Tra cheayl Yeesey shoh, ghow e yyndyss, as doort e roosyn va geyrt er, Dy firrinagh ta mee gra riu, Leid y credjue lajer shoh, cha vel mee er gheddyn ayns Israel hene.
11As ta mee gra riu, dy jig ymmodee veih’n Niar as yn Neear, as dy soie ad sheese marish Abraham as Isaac as Jacob, ayns reeriaght Niau.
12Agh bee cloan y reeriaght er nyn dilgey magh gys y dorraghys sodjey mooie: ayns shen vees keaney as snaggeraght feeacklyn.
13As doort Yeesey rish y captan‐keead, Immee royd, as ’naght myr t’ow er chredjal, myr shen dy jig oo jeh. As va e er‐mooinjerey er ny leihys ayns yn oor keddyn.
14¶ As tra va Yeesey er jeet stiagh ayns thie Pheddyr, honnick e Moir y Ven echey ny lhie as ching ayns y chiassaghey.
15As venn e rish y laue eck, as daag y chiassaghey ee: as hug ee e headdagh y mee, as ren ee ad y hirveish.
16¶ Tra va’n fastyr er jeet, hug ad lieu huggey ymmodee va drogh spyrrydyn ayndoo, as deiyr e magh ny spyrrydyn lesh fockle, as laanee e ooilley ny va ching.
17Dy voddagh shen ve cooilleenit va loarit liorish Esaias y Phadeyr, gra, Ghow e hene er nyn aslaintyn, as dymmyrk e nyn jingyssyn.
18Nish tra honnick Yeesey earrooyn moarey dy leih my‐geart y mish, hug e sarey dy gholl gys y cheu elley.
19As haink scrudere dy row huggey, as doort e rish, Vainshter, eiyryms ort raad erbee dy jeu.
20As doort Yeesey rish, Ta tuill ec ny shynnee, as idd ec eeanlee’n aer, agh ec Mac y dooinney cha vel boal dy chur e chione ayn.
21As doort fer elley jeusyn va sheer geyrt er, rish, Hiarn, cur kied dou hoshiaght goll thie, dy oanluckey my ayr#8.21 Tra yiow e baase..
22Agh doort Yeesey rish, Eiyr orryms, as lig da ny merriu nyn merriu y oanluckey.
23¶ As tra ve er ghoall luingys, hie yn vooinjer va sheer geyrt er marish.
24As cur‐my‐ner, dirree sterrym moar ayns y cheayn, ayns wheesh as dy row yn long coodit rish ny tonnyn; agh ve eshyn ny chadley.
25As haink adsyn va sheer geyrt er huggey, as ghooisht ad e, gra, Hiarn, saue shin, bee mad callit.
26As doort e roo, cre’n fa ta shiu agglagh, shiuish dy chredjue moal? Eisht dirree e seose, as smaghtee e ny geayghyn as y faarkey, as va kuiney woar ayn.
27Agh ghow ny deney yyndyss, gra, Cre’n keint dy ghooinney e shoh, dy vel ny eer geayghyn as y faarkey cur bialys da!
28¶ As tra ve er jeet gys y cheu elley gys cheer ny Gergesenee, haink daa ghooinney va drogh spyrrydyn ayndoo, magh ny whail, veih mastey ny hoaiaghyn, as cha keoie shen va’d, nagh by loys da dooinney erbee goll shiaghey yn raad shen.
29As cur‐my‐ner deie ad, gra, Cre’n eie t’ayd orrin, Yeesey Vac Yee? vel oo er jeet dy nyn dorchaghey roish y tra?
30As va foddey vow griagh moar dy vuckyn fo bochillyn.
31As ghuee ny drogh spyrrydyn er, gra, My eiyrys oo shin magh, cur kied dooin goll stiagh ayns ny muckyn.
32As doort e roo, Gow‐jee reue, as tra va’d er jeet ass ny deney, hie ad stiagh ayns y ghriagh dy vuckyn; as cur‐my‐ner, roie yn slane ghriagh gouyr nyn mullee, lesh yn ughtagh gys y cheayn, as va’d baiht ayns ny ushtaghyn.
33As roie ny bochillyn rowe, as haink ad gys yn ard‐valley, as dinsh ad dy chooilley nee, as my‐chione ny deney va ny drogh spyrrydyn ayndoo.
34As cur‐my‐ner, haink y slane ard‐valley magh quail Yeesey, as tra honnick ad e, ghuee ad er, e dy gholl roish ass ny ardjyn oc.
Currently Selected:
Noo Mian 8: NMian
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
historic text maintained in digital form by the British and Foreign Bible Society (Sheshaght y Vible)
