Matyu 16

A̱yaakwak A̱son A̱yahudawa Chat Li Kyang A̱ga̱de

(Ma̱r 8:11-13; Luk 12:54-56)

1Á̱ghyang á̱tuk A̱fa̱risawa ma̱ng A̱sa̱ndukiyawa si̱ bai ba̱ mak Yesu. Ba̱ si̱ chat gu tak mba kyang a̱ga̱de ku yet a̱lama ku neet Ma A̱gwaza tswazwa, ku na tak tyok nggu hu kpa̱sai a̱ni.

2Yesu si̱ nwuak ba shim di̱ kidee nyia̱, “Nyi lyen nang á̱ nyia̱,

‘Ki̱ kyai tswazwa hu shong jenshyung,

á̱ ni̱ fa nang a̱vwuo ka wu nsai a̱tson.

3Ki̱ kyai tswazwa hu shong a̱tsotson,

á̱ ni̱ fa nang a̱vwuo ka na nsai a̱tuk a̱kya bah.’

“Nyi lyen si̱sak ji nang nyi na nfi̱k a̱yaalama kyai tswazwa hu a̱ni. A̱wot nyi si̱ mi̱n dyen si̱sak nyi na nfi̱k a̱yaalama jen jini a̱ni bah. 4Nyin á̱ka̱tuk á̱niet nyi nwai khwi tsotswat mi̱ che a̱fwun huni! Nyi chat li a̱yaalama ba̱ yet nkyang a̱ga̱de. A̱wot mi̱ a̱lama nang n na tak nyin a̱ni, gu wa yet a̱si̱ Yunana wu ma̱nyin gu.” A̱jawa Yesu si̱ ghwon baa, a̱ si̱si̱ nkat.

Yesu Tyan Tyiet A̱yaakwak A̱son A̱yahudawa ma̱ng Yit

(Ma̱r 8:14-21)

5Nang mman ta̱m Yesu na ngwak a̱ byia̱k a̱gba̱ndang jok Ga̱lili wu á̱ nat a̱ma̱nyi keniaau a̱ni, ba̱ si̱ jhyung nang ba̱ mbwung kyiak burodi. 6Yesu si̱ gba mba nyia̱, “Nyi chok á̱pyia̱ nyin. Nyi ta̱bam ma̱ng yit A̱fa̱risawa ma̱ng si̱ A̱sa̱ndukiyawa wu!”

7Ba̱ si̱ ta̱bat ya fwuang tsi̱tsak mba nyia̱, “A̱ hyia̱ a̱nia mat zi̱ bwung zi̱ kyiak burodi wu, zi̱ ba̱ng.” 8A̱wot nang Yesu nfi̱k kyang ba̱ lyiat a̱ni, a̱ si̱ nyia̱ ma̱ng a̱mba, “Nyin á̱niet nwuak a̱chuchuk ma̱ a̱da̱dei! Yihwa mbyia̱ nyi ngya fwuang ma̱ng á̱ghyang nyin tazwa nwai ba̱ng burodi? 9Ba̱ng ba̱ tat a̱fwun nyi ka̱n fi̱k baa? Nyi jhyung á̱niet chyikwop tsuon nang n ku tsuung ma̱ng burodi a̱fwuon? A̱wot a̱ka̱cheang burodi a̱mang nia ku bwat, nyi si̱ kwok? 10Ku burodi a̱natat wu nang á̱ ku ka̱u á̱niet chyikwop nyaai ba a̱ni, a̱wot a̱cha̱chet a̱ka̱cheang a̱mang nia nyi ku kwok? 11Yihwa mbyia̱ nyi nwai fi̱k nyia̱ da̱ a̱lyiat burodi nia nang n dyiat bah? A̱wot n bu na hyia̱ ma̱ng a̱nyin, ‘Nyi chok á̱pyia̱ nyin! Nyi ta̱bam ma̱ng yit A̱fa̱risawa ma̱ng si̱ A̱sa̱ndukiyawa wu.’ ”

12A̱jawa ba̱ si̱ fi̱k da̱nang Yesu ndyiat ma̱ng a̱mba tazwa yit nang á̱ ni̱ tyia̱ mi̱ burodi gu mwai wa a̱ni bah. A̱wot a̱lyiat tazwa tyiet bwoi a̱ka̱laa A̱fa̱risawa ma̱ng A̱sa̱ndukiyawa ku tyei á̱niet ba teap hwa a̱ni.

Bitut Tak Kpa̱sai nang Yesu wa ngyet Kristi wu

(Ma̱r 8:27-30; Luk 9:18-21)

13Nang Yesu nnwuo fam a̱byin Kaisa̱riya Filibi a̱ni, a̱ja wa gu si̱ lyip mman ta̱m nggu na nyia̱, “Zang tangka̱i a̱yin hwa nang á̱niet ba nyia̱ nung, Nggwon A̱tyubishyi,#16:13 Wa̱i a̱lyiat: Nggwon A̱tyubishyi yet a̱lyoot tyok nang Yesu ku yei a̱pyia̱ nggu a̱ni. Mat 8:20. n gyet?”

14Ba̱ si̱ nyia̱, “Á̱ghyang á̱niet nyia̱ nwan wa yet Yoona a̱tyu nyian ba̱ptisman. Á̱ghyang nyia̱ a yet Iliya wa. Á̱ghyang si̱ bu nyia̱ Iri̱miya wa, ku a̱tyo nyiung ma̱ a̱yaata̱m a̱kwonu A̱gwaza á̱ghyang bya.”

15A̱jawa Yesu si̱ nyia̱ ma̱ng a̱mba, “A̱wot nyin meang, zang tangka̱i a̱yin hwa nang nyi nyia̱ n gyet?”

16Siman Bitut si̱ nwuak gu shim nyia̱, “Nwan wa yet Kristi a̱tyu nang A̱gwaza kup gu tyok a̱ni. A bu yet Nggwon A̱gwaza a̱ shya̱ mi̱ swuan a̱ni.”

17Yesu si̱ nwuak gu shim nyia̱, “Siman a̱fai Yunana a yet a̱tyu a̱li̱ba̱rka wa, mat a̱tyubishyi wa tyai ang a̱lyiat nani bah. A̱tyia̱ nung wu a̱ shya̱ tswazwa ka a̱ni, nggu wa tyai ang ndyo. 18Ma̱ninika, n bu ntyia̱ ang a̱lyoot Bitut#16:18a Lyuut cha̱chaat: A̱fang.. Ka̱ n ba̱ kpaat á̱kpa#16:18b Ku: “Sot.” á̱niet khwi nung ka, nwan wa yet ‘a̱fang’ ka ka̱ na yet kuntyin hu a̱ni. A̱wot chet a̱khwu si̱ mi̱n swuo chet á̱kpa#16:18c Ku: “Sot.” á̱niet khwi ka bah. 19N na nwuak ang yaya Tyok Ma A̱gwaza tswazwa ba. Kyang nang a shim á̱ nyia̱ mi̱ swanta hu a̱ni, a̱nia wa A̱gwaza a̱ shya̱ tswazwa ka a̱ni na nshim á̱ nyia̱ nhu. A̱wot kyang nang a lak á̱ nyia̱ mi̱ swanta hu a̱ni, a̱nia wa A̱gwaza meang a̱ shya̱ tswazwa ka a̱ni na ndak nhu.”

20A̱ si̱ khwat mman ta̱m nggu na a̱fufwuo nyia̱, ba̱ yok tak ma̱ng a̱yin nang nggu wa ngyet Kristi wu bah.

Yesu Shei Á̱zanson tazwa A̱khwu Nggu

(Ma̱r 8:31; 9:1; Luk 9:22-27)

21Neet di̱n jen a̱ja, Yesu si̱ nwuo shei ma̱ng mman ta̱m nggu na, nang ku ngyet gu ta hwa gu nat Urusha̱lima, a̱ si̱ swuo a̱bung di̱ nkyang ma̱ a̱di̱di̱t mbwak á̱niet khwop á̱niet, a̱cha̱chet a̱yaapris ma̱ng á̱niet tyiet doka. A̱wot á̱ hyat gu, a̱tuk mam tat ka, a̱ doot ma̱ng swuan ma̱ á̱niet ba̱ ka̱n kwi a̱ni.

22Bitut si̱ khwop Yesu da̱ a̱beam. A̱ si̱ ta̱bat ngai ma̱ng a̱nggu nyia̱, “A̱tyoli, ku si̱ mi̱n mak mi̱ mak tyia̱ bah! A si̱ mi̱n mak swuo tangka̱i swuo a̱bung huni bah!”

23Yesu si̱ bwuak, a̱ si̱ nyia̱ ma̱ng Bitut, “Sha̱tan#16:23 Wa̱i a̱lyiat: Sha̱tan ku fa, “A̱ta̱nyeang.”, tyong a̱ji a ghwon nung! A tyei nung dyem di̱ nyia̱ ta̱m nung hu. A̱di̱dam ang wu yet a̱si̱ A̱gwaza bah. A̱ yet a̱si̱ a̱tyubishyi wa!”

24Yesu si̱ nyia̱ ma̱ng a̱mgba̱m mman ta̱m nggu na nyia̱, “Ka̱ a̱yin byia̱ a̱di̱dam a̱ khwi nung, ku yet ta hwa gu yok a̱di̱dam chat a̱pyia̱ gu, gu ni̱ nkyiak a̱team a̱khwu nggu wu a̱ faat a̱ khwi nung.

25“Konyan wa chat swuan gu ji a̱ni, a̱ na nwai ji. A̱wot konyan wa nwai swuan nggu ji da̱nian nung a̱ni, a̱ na shya̱ nji. 26Yihwa na yet kpangti̱n a̱tyubishyi, ka̱ a̱ shya̱ a̱mgba̱m nkyang mi̱ swanta na, a̱wot a̱ si̱ nwai swuan nggu ji? Kee yihwa a̱tyubishyi na nwuak ku maai yet zang swuan nggu ji?

27“Mat Nggwon A̱tyubishyi na bai mami a̱kyenkyai shi A̱tyia̱ nggu wu ma̱ng a̱yaata̱m tswá nggu ba. A̱wot a̱ na nwuak kuzang a̱yin zang ji, ji̱ maai cha̱chaat ma̱ng ta̱m nang gu nyia̱ a̱ni.#16:27 Dan 7:13-14. 28N tak nyin a̱tsak a̱lyiat, á̱ghyang á̱niet ba̱ yong a̱ji ma̱nini a̱ni, neet nang ba̱ ka̱n kwi bah, ba̱ na li Nggwon A̱tyubishyi ka̱ chobai ka̱ tyai a̱kyenkyai shi tyok nka wu.#16:28 Mat 17:1-13.”#16:28 Wa̱i a̱lyiat: Yesu ku lyiat tazwa shyak li nggu hu tazwa a̱fan, di̱n jen nang Musa ma̱ng Iliya wa ka̱n kwi ba̱ si̱ tyai á̱pyia̱ mba kpa̱sai.

Currently Selected:

Matyu 16: TyapNT

ማድመቅ

Copy