Matta 8
8
N Yesu a be naba mwa̱liye
(Mar 1:40-45; Luk 5:12-16)
1Yo n Yesu a suwe we kunne, ni̱bu nabwen a bung ki̱mi̱n ti̱n. 2Yinu wuka naba mwa̱liye a be fi a di̱ki̱ne a sung we kakku Yesungu a yi ko, “Tewuduwe, Ka mwang kenge, yo m be.”
3N Yesu a kuku fa̱la̱ng kangu a twai ki̱n ko, “N ke, ya beku. Bi̱nabi̱na, naba mwa̱liye a ya beku. 4N Yesu a yi ki̱n ko, kedu fwa wuka ni minduwe, aya yika bwa fansetiye n yung yimwiyu, ya ma ni ki̱ku m Musa a fwangu a kau chimi̱n di̱mwar.”
N Yesu a be bwe wuti̱mbi̱re tikake Roma
(Luk 7:1-10)
5Yo Yesu a le Kafanawu we, wuka naba tikake ni̱bu ki̱rang Roma a be fi a di̱ki̱ne a wannan ko, 6“Tewuduwe, ni wuki̱mami nangange a ngi̱rmane we lo a bu ki̱ni dukan.”
7N Yesu a yi ki̱n ko, “Mang yadu, man be ki̱nu. 8Naba ki̱range wu, a yi ki̱n ko, Tewuduwe mang lwebu mwang be lomi, fwa ya̱mu, bwe mi ka ya beku. 9N mi̱n ti̱n ki̱ni bi̱seli̱m bi̱bu ki̱tum mi̱ni̱mu, yinu m min, ki̱ni ni̱bu ki̱rangmu mi̱n tundi̱mu. Mi̱n yale bi̱bi bwa, mi̱n tum bi̱bi bwa, ki̱mati̱nu. Mi̱n yi bwe nangange mi, a ma ti̱tu, ki̱mati̱nu.”
10Yo n Yesu a nwe bi̱be, a ya̱r yii, yinu a yi ni̱bu ki̱bunti̱ ki̱ni̱mu ko, “N fwa chimi̱n bi̱yili̱m, mang yabu wuka ni we Yisrela ki̱nii keku bi̱yili̱mang ki̱ku.” 11Mi̱n fwa chimi̱nu, ni̱bu nabwen ka bedu kasi no a wuwule fwiti̱ne ti̱ti̱niye, ka swedu n ti Yibrayim n ti Yichaku n ti Yakubu we yiye Yaa Kwama. 12Aya bi̱bu a no ka kau ni̱bu Kwamamu a ki̱la komu, ka mar chidu a ki̱liki̱liye wu kwane, fi n chi ka ki̱wi kani̱n ki̱rti̱ti̱ nuume.
13Yinu n Yesu a yi tikake ni̱bu ki̱rang Roma ko, “Yikan! Ka fwedu yinangu mwang ke ka fwedangu. Burangu a be we naba nangange ki̱dang kangu.”
N Yesu a be nela Biti̱r
(Mar 1:29-34; Luk 4:38-41)
14Yo n Yesu a le lo Biti̱r, n ki̱n a ku nela Biti̱r a dada di̱ne ki̱kwam a ngau ki̱n. 15A twai fa̱la̱ng nayengu, ki̱kwam a be ti̱n. N ki̱n a kun a do ki̱mi̱n chabtu.
Yesu a be ni̱bu nabwen
(Luk 9:57-62)
16Ki̱ni me, ni̱bu a be Yesu mi̱ne ki̱ni ni̱bu ki̱fi̱btimu nabwen. N ki̱n a chaka ki̱fi̱btiyu ki̱ni di̱kwa̱l yiin, a beti̱ ni̱bu buramu nabwen. 17Ti̱tu a fwe ying ke a ri chitu fa̱ku Yichaya a fwaatu,
A da̱u nimi̱n bwini chiyu,
“A beti̱ buri̱n chi̱retu.”
Riye bunti̱ki̱ Yesuwange
(Luk 9:57-62)
18Yo n Yesu a ku ki̱tuu ni̱be a bwa̱l ki̱ni di̱bi̱re, n ki̱n a yi miyari̱m ki̱mu ko a yabu wuka bale wu a far di̱dune. 19Wuka naba ni̱bu yungku yili̱ne a be, a yi ki̱n ko, “Naba yungke, mang bumi̱n ti̱nu kasi no mwang yadi bwa̱le.”
20N Yesu a yi ki̱n ko, “Wuba futu ki̱ni bwartu chi ti̱tu ki̱daandi, ki̱ni̱biyu ki̱ni ki̱kuli. Aya Bwe Nii a newe ki̱ni fi.”
21Wuka we miyari̱m ki̱mu a yi ki̱n ko, “Tewuduwe yam n ya, n fure temi didin.”
22Aya Yesu a yi ki̱n ko, “Bumite, du kwa̱miyu a fur kwa̱mi chiyu.”
N Yesu a kwabu ki̱fi̱be a la
(Mar 4:35-41; Luk 8:22-25)
23N Yesu a le kwa̱mbi̱re mwe, miyari̱mu a nabi̱ ti̱n. 24Ki̱fi̱be wuduwe a kun we mwe la wu a yo labi mwetu a fi̱l kwa̱mbi̱re mwe. Aya duum a da̱u Yesu. 25N chi a rung ki̱n ko, “Tewuduwe, yanang twiyadu!”
26A yi chi ko, “A mayireti̱ nwe taye? N ti̱n bi̱bu keki̱ bi̱yili̱mang changu a ki̱tani̱mu. Yinu n ki̱n a kun, a wela ki̱fi̱be n ti labi mwetu, a tii si̱k.”
27Chitu a ya̱r ni̱bu yii. N chi ki̱bi̱du ko, “Wuwule ki̱duum niim wu ki̱fi̱be ki̱nweti̱ ya̱m ki̱me?”
N Yesu a be ni̱bu ki̱fi̱bti̱m
(Mar 5:1-20; Luk 8:26-39)
28Yo n Yesu a yabu wuka bale we ti̱m Ka̱ra̱siname, ni̱bu ki̱ni ki̱fi̱btimi burau a chire a bwa fute. Ni̱bu bi̱bu ki̱ni ki̱fi̱btimu ti̱nti̱n di̱ne bwila chi ni̱bu a tabu ware wuko. 29Bi̱nabi̱na a bwe keme ko, “Lwangang mwang wule n ti ni̱n Bwe Kwama? M be mwang ni ni̱n riye yo ki̱swi a tibu landa?”
30We ki̱twalang kangu, sulti̱kumi loi we, a mabu kutan n ti chi, ki̱chau cham. 31Ki̱fi̱btiyu a wana Yesu ko, “Dub ni̱n le ki̱ran sulti̱kumiyu ka n chaku ni̱ne.”
32A yi chi ko, “Ngo, ti̱ya!” N chi a yikan, a le sulti̱kumiyu. Ki̱ran sulti̱kuminu a bulan a wul a le far di̱dunu a bwaran. 33Ni̱bu ki̱to sulti̱kumimu a wulan a yika bi̱n, a ya, a fwa ni̱bu mi̱n chi a fwe ki̱ni ni̱bu ki̱fi̱btime. 34Ni̱bu bi̱ni̱mi kwang a chire be ka da̱ng Yesu. Yo n chi a be kuwe, a wana ki̱n ko a du ti̱m chimu.
Currently Selected:
Matta 8: Tula
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2015, The Nigeria Bible Translation Trust and Wycliffe Bible Translators, Inc. All rights reserved.
