Matta 2
2
Siram ni̱bu yingki̱m chi a twiye
1A kuteng ki̱ku a bi̱u Yesu a bi̱n Beti̱lami di̱du a ti̱m Yafudiya, we ki̱dangu n Yiridu nang mai ki̱chau mati̱ne. Bi̱kam ni̱bu yingki̱m chi a twiye a chire a bwa twa̱re a be Wurchalima, a ma di̱bi̱du ko, 2“A bwa̱le Mai ni̱bu Yafudam wu fwiye ni̱bu a bi̱be? Di̱ne ni̱n kuwe ki̱swi ko we bwa twa̱re, ni̱n be nang sii ki̱nu.”
3Yo m Mai Yiridu a nwe ya̱m bi̱be, ni̱r ki̱nu a ti̱ren, a bwinbu nii we Wurchalima. 4Yinu n ki̱n a mur bi̱dum fansetiye n ti ni̱bu yungku yili̱n Musantu, a bi̱u chi finu ni̱ba bi̱n Masiya.
5N chi a yi ki̱n ko, “A bi̱n Beti̱lami di̱du a ti̱m Yafudiya, nangki̱n fa̱ku a mwal ko,
6‘M mun Beti̱lami bi̱n
di̱du a ti̱m Yafudan,
m mun n ke bi̱n di̱ti̱ri̱n we
bi̱bu ka ma mati̱n Yafudati̱mu.
Mai ka chiredu we di̱mune,
wu ka kau naba tore ni̱bu mi̱me,
ka nang chikiye Yisrela.’ ”
7N Yiridu a yale ni̱bu yinki̱m twiyemu i daan a swe ware n ti chi n chikun, a bi̱u chi ki̱dangu n chi a kuun ki̱swiyangu. 8N ki̱n a tum chi we Beti̱lami ko, “Yati̱ ta̱l miye ya̱m bwe wumu yinang. Kati̱ ya bi̱yili̱me, ti̱ki̱lawe be ti̱fwami, ke n ya, n sii ki̱n ti̱n.”
9Yo n chi a nwe ya̱m maime, a yika ti̱n. Yo a yaki̱ yikadu we wa̱re, ki̱swi n chi a no ku a twa̱re, a fwetewe a kakku chiyang, n chi a nabu ki̱swi a lanti̱ fi a bi̱n bwe. 10Yo n chi a ku ki̱swiye, a ma furi mwen. 11N chi a le lo, a ya bwe n ti neki̱n m Maryamu. N chi a sung a sii ki̱n. Yinu a kwi kuli̱n chi̱nu, a ni ki̱li̱mang sinariyang n ti ti̱nungri ti̱ti fi̱rfi̱ri ti̱tu ki̱yalu ko luban n ti muri.
12Yo n chi a yaki̱ ki̱la ti̱m chime, a bunti̱ wuka wa̱re di̱ne n Kwama a wu chimi̱n ki̱tele a dwakam ko a ki̱ladu bwa a di̱Yiridu se we.
Yusufu n ti Maryamu a wul Masar
13Yo ni̱bu yingki̱m a yikane, wuka naba di̱tumbi̱re Tewuduwe a mwa Yusufu a dwakam ko, “Kun, da̱u bwemo n ti ne ki̱n, ti̱yika Masar yati̱ swe a bwako, ka lami̱nti̱ yo mang yal chi̱n ne, di̱ne m Mai Yiridu ki̱baddu ka chi̱u bwe.”
14N Yusufu a kun we kum wuko a da̱u bwe n ti ne ki̱n a yikan Masar. 15N ki̱n a swe we bwako a lami̱nti̱ yo n Yiridu a bwange. Ti̱tu a fwe yiko ke a ri chi n Tewuduwe a fwa a yii fa̱kubu ko, “N yale bwemi a Masar.”
Bwesi̱m a bwaran a Beti̱lami
16Yo n Yiridu a swaan ko ni̱bu yingki̱m a buti̱ ki̱ne, ni̱r ki̱nu a kaiyan. Di̱ne ki̱fwiniye, n ki̱n a na yilang ko ni̱bu a chiben bwesi̱m bi̱bari̱mu a lam swa̱ti turabi̱mu n ti bi̱bu a lambi̱mu we Beti̱lami n ti bi̱bu a ki̱dire Beti̱lamimu ki̱ni kwang. N ki̱n a bunti̱ chi ni̱bu yingku chi a twiyemu a fwa ki̱mi̱n we bi̱be bwetu.
17Nang ki̱swi wu ya̱m Fa̱ku n Yirmiya a ri mi̱ne ko,
18“N nwe keme a Rama,
wii furi ki̱liki̱li di̱dune.
Rayila ki̱kii wii
di̱ne bwesi̱m ki̱mu,
A kebu wuka nii ka kire ki̱mi̱nu,
di̱ne n chi a bwa.”
N Yusufu a ki̱la Nasa̱ret
19A kuteng ki̱ku n Yiridu a bwangu, naba di̱tumbi̱re Tewuduwe a mwa Yusufu a dwakam we Masar ko, 20“Kun, da̱u bwe ti neki̱n ti̱yika Yisrela, di̱ne ni̱bu ki̱baddu ka chi̱u Bwemu a bwaran.” 21Yinu a kun a da̱u loko a yika ti̱m Yisrela.
22Yinangu n ki̱n a nwe ko n Arkilayu bwe Yiridu ki̱chau kula te ki̱ne we mati̱n Yafudiya tangu, tayi a tau ki̱n di̱ne bwe Yiridu. N Kwama a wu ki̱mi̱n ki̱tele a dwakam, yinu n ki̱n a twa̱ng a yika ti̱m Ka̱lili. 23N ki̱n a ya swe a di̱kan bi̱n di̱du ni̱bu ki̱yalu ko Nasa̱reti̱n, di̱ne ke a ri chi fa̱ku Kwama a fwa ko, “Ka yal ki̱nu ko naba Nasa̱rete.”
Currently Selected:
Matta 2: Tula
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2015, The Nigeria Bible Translation Trust and Wycliffe Bible Translators, Inc. All rights reserved.
