Kuxh ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
KUXH
Uvaʼs toq qootzaqitaʼ jaʼl tzʼibʼan u uʼ Kuxh
Aʼetz u uʼe uvaʼ Kuxh ibʼij, tan Kuxh ibʼij uvaʼ tzʼibʼan u uʼ. Tan ech uvaʼ nik tal inqʼa niman tetz Jesuus, inqʼa txhusux ka taʼn inqʼa itxhaq quBʼaal Jesuus, inqʼa apoostol, jankʼale inqʼa ikʼaol, atz inqʼa tij imam inqʼa motx itxhus tibʼ kʼatz inqʼa itxhaq quBʼaal Jesuus: Jankʼale Papiias, Ireneeo, Klemeente, u aj Alejandriia, tuchʼ Oriigenes. Kʼuxhetz yeʼ nik tal tibʼ Kuxh s-tzʼibʼan tetz u uʼ, poro nimalen nik alon tiʼ Kuxh uvaʼ, aʼ Kuxh tzʼibʼan u uʼ. Tan aʼ Kuxhe, u xaak uvaʼ itzʼeq tibʼ uvaʼs itxeyp vet quBʼaal Jesuus. Tan ech uvaʼe nik tal tu Kuxh 14.51-52.
Tul tij imam Israeelich Kuxh. Itxhʼojich Kuxh Vernavee, val u iqʼon iviʼ xoʼl inqʼa niman tetz Jesuus. Tan ech uvaʼe nik tal t-Vibʼanoʼm inqʼa Apoostol 4.36 tuchʼ 13.1-2 tuchʼ Koloseenses 4.10. Tan iqʼol Kuxh taʼn Vernavee uvaʼs ibʼen Vernavee tuchʼ Paʼp tiʼ ipaxsal inqʼa bʼaʼnla txhaq yol tiʼ Jesuus s-bʼaxa. Ech uvaʼe nik tal t-Vibʼanoʼm inqʼa Apoostol 12.25. Kʼuxhetz el ka Kuxh tiʼ Paʼp, poro xamtel veteʼ, tul antxh Paʼp nik oksan iqʼij Kuxh uvaʼ vaʼl lotxhol tetz Paʼp Kuxh. Ech uvaʼe nik tal tu Filemoon 24. Maʼtichetz ikam vet Paʼp, tul imolich vet tibʼ Kuxh tuchʼ Luʼ tu mam tenam Rooma. Tan ech uvaʼe nik tal tu 1 Luʼ 5.13. Tan yekichxh ootzaqil Luʼ taʼn Kuxh tuulbʼal itxulitbʼal. Ech uvaʼe nik tal tu 1 Luʼ 5.13 tuchʼ t-Vibʼanoʼm inqʼa Apoostol 12.12-17. Echetz tootzaqit vet Kuxh inuqule inqʼa yol tiʼ quBʼaal Jesuus s-bʼaʼn kʼatz Luʼ.
Uvaʼs toq qootzaqitaʼ kam s-tuul tzʼibʼal u uʼ Kuxh
Atichetz ok val u mam iqʼesal tu mam tenam Rooma, uvaʼ Neroonich ibʼij. Aʼetz ibʼant Neroon iqʼesalil tu yaʼbʼ kajlaval toxkʼal tetxhal topoon t-vajxaqil imutxʼ (54-68) m.t.J. Tul xeʼt vet Neroon tiʼ tojqeʼlal, atz tiʼ iyatzʼax el inqʼa niman tetz Jesuus. Antetz Luʼ yatzʼax el taʼn Neroon, tiʼ uvaʼ nimanich tetz Jesuus Luʼ. Aʼetz iyatzʼax Luʼ tu yaʼbʼ juqvaʼl imutxʼ (67) m.t.J. Aʼetz itzʼibʼat Kuxh u tuʼ tixoʼl inqʼa yaʼbʼ kajvaʼl imutxʼ (64) tuchʼ tu vajxaqil imutxʼ (68) m.t.J.
Aʼetz itzʼibʼavat Kuxh u uʼ te inqʼa niman tetz Jesuus tu mam tenam Rooma. Tan aʼ nik kʼutxhun uvaʼ nik toksa Kuxh juunil inqʼa yol tu yolbʼal latiin tu tuʼ. Aloq antxh ibʼanbʼe Kuxh u yolbʼal grieego tiʼ itzʼibʼal u uʼ uvaʼa.
Uvaʼs toq qootzaqitaʼ kame u taqʼil vitxhusun Kuxh tuul u tuʼ
Aʼetz nikich isaʼ Kuxh uvaʼ laʼich bʼen inuqul te inqʼa niman tetz Jesuus tu mam tenam Rooma uvaʼ, aʼ quBʼaal Jesuus, u taqʼonvil quBʼaal Tiuxh, uvaʼ ul tiʼ ilotxhox inqʼa xaol vatz u txʼavaʼ. Tan ech uvaʼe nik tal tu Isaiias 42.1 tuchʼ 53.1-11 tuchʼ Sakariias 3.8. Aʼetz tiqʼo tzaan Kuxh s-tuul kame uvaʼ nikich tutxh tu mam tenam Rooma. Tan ayaʼlxh inqʼa niman tetz Jesuus loqʼelaqich tok tiʼ aqʼon taʼn inqʼa aj Rooma. Echetz ibʼant Kuxh eela quBʼaal Jesuuse tuchʼ inqʼa loqʼelich tok tiʼ aqʼon. Tan ayaʼl kuxh nik ibʼan u aqʼonvil kam inqʼa nik talax s-te taʼn u bʼaal taqʼon. Echetz uvaʼe nikich ibʼan quBʼaal Jesuus. Tan ayaʼlich kuxh bʼaʼn te quBʼaal Jesuus tiʼ inimal viyol viBʼaal, aʼe u quBʼaal Tiuxh. Ech uvaʼe nik tal tu Kuxh 10.45.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Kuxh
U uʼ Kuxh, uvaʼ itzʼibʼa ka Kuxh, tan kajvaʼlen nimla txhaq tanul elnaʼq inqʼa yol, uvaʼ nik tal s-tuul tiʼ kame uvaʼ pal ibʼan quBʼaal Jesuus vatz u txʼavaʼ.
1. Kuxh 1.1-13
U bʼaxa nimla tanul yol, tan aʼ tal Kuxh tiʼ u tul u taqʼonvil quBʼaal Tiuxh, aʼe u quBʼaal Jesuus, u Kriisto. Tan aʼ quBʼaal Jesuuse, uvaʼ tal ka Isaiias u tulebʼal uvaʼ tetxhal uli. Tan ech uvaʼe nik tal tu Isaiias 53.1-12.
2. Kuxh 1.14—13.37
Vikaʼv nimla tanul yol, tan aʼ tal Kuxh tiʼ kame inqʼa aqʼon ul ibʼan u taqʼonvil quBʼaal Tiuxh, aʼe u quBʼaal Jesuus, u Kriisto.
3. Kuxh 14.1—15.47
Vitoxv nimla tanul yol, tan aʼ tal Kuxh tiʼ kame inqʼa kʼaxbʼichil motx palk u taqʼonvil quBʼaal Tiuxh tetxhal ikameʼ.
4. Kuxh 16.1-20
Vikajv nimla tanul yol, tan aʼ tal Kuxh tiʼ kame uvaʼ utxhi uvaʼs titzʼeʼv vet quBʼaal Jesuus t-vitoxv qʼij.
Currently Selected:
Kuxh ALBʼAL INUQUL U YOL TIʼ U Uʼ: ixlC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016, Wycliffe Bible Translators, Inc. All rights reserved.