Tio 15

Uvaʼs talt quBʼaal Jesuus tiʼ kam uvaʼ nik yansan u xaol

Kuxh 7.1-23

1Yaʼne ijetxhoʼk tibʼ kaʼl inqʼa fariseeo vatz Jesuus tuchʼ kaʼt inqʼa nikich txhusun ibʼekʼbʼal inqʼa tij imam Israeel, inqʼa eenaqich tzajnaʼql tu tenam Jerusaleen. Tul ech motx tal te Jesuus s-eche: 2—¡Kam s-tiʼil yeʼ nik inima txhaqnaq inqʼa txhusel aaʼn inqʼa yol uvaʼ jeqel tzaan taʼn inqʼa kʼuy qumam! Tan yeʼ nik motx itxʼaj txhaqnaq iqʼabʼ uvaʼs nik itxʼaʼon txhaqnaq, —xeʼtaq te Jesuus.{*}#15.2 Aʼ nikich tal inqʼa fariseeo tiʼ inimal jolol inqʼa bʼekʼbʼal uvaʼ jeqbʼamalich vet tzaan taʼn inqʼa kʼuy imam. Tul jit aʼ inqʼa bʼekʼbʼal uvaʼ tal quBʼaal Tiuxh te Moisees, pet aʼaq kuxh inqʼa iqʼesal uqʼeʼybʼal motx jeqbʼan vet ka uvaʼs maʼtich ikam vet Moisees. Aʼetz u bʼekʼbʼale uvaʼ nik tal tu versiikulo kaʼvaʼl tiʼ u txʼajo ibʼ vatz quBʼaal Tiuxh s-vatz. Tan aʼ qeichaq taʼn uvaʼ txhaqpaq laʼ motx itxʼajtaq tibʼ, tul aʼ nik motx ijetxhoʼk tibʼ vatz quBʼaal Tiuxh s-vatz. Echetz s-tiʼile motx ijeqbʼa vet u txʼajoʼm. Tan nikich motx itxʼaj iqʼabʼ txhaqpaq nikich tex xoʼl inqʼa xaol, inqʼa jit niman tetz Tiuxh. Atz nikich itxʼaj iqʼabʼ txhaqpaq nikich tul t-kʼayibʼal. Tul nikich motx itxʼaj inqʼa kamaq tetz, atz nikich itxʼaj itxʼatxh.

3Yaʼne tzaqʼbʼ Jesuus. Tul ech tal Jesuus s-eche: —¿Keʼch ex? ¡Kamatetz s-tiʼil yeʼ nik motx enima inqʼa ibʼekʼbʼal quBʼaal Tiuxh!, tul aʼ nik motx enima inqʼa yol uvaʼ jeqel tzaan taʼn inqʼa kʼuy mam. 4Tan ech uvaʼ alel ka taʼn quBʼaal Tiuxh s-eche: «Laʼ anima abʼaal, atz laʼ anima atxutx,» Pet: «Jaʼl uvaʼ laʼ alon yeʼbʼaʼn tiʼ vitxutx atzoq tiʼ vibʼaal, tul aʼetz uvaʼe, tira laʼ yatzʼax el,» chich u yol uvaʼ tzʼibʼamal ka.#Eeksodo 21.17

5Pet ex, tan ech inqʼa yol nik motx etxhus inqʼa xaol s-tiʼ s-eche: «Laʼ isaʼa uvaʼ ech laʼ etal te etxutx atzoq te ebʼaal s-eche: –Jankʼalxh u lotxhbʼal uvaʼ saʼ vaqʼ see, tan yeʼ laʼ utxhi laʼ vaqʼ veteʼ, tan atxh vet el vaʼn tiʼ vaqʼt te Tiuxh, –chaq ex,» chich etxhust inqʼa xaol, —xeʼt Jesuus.

6Tul echat tal Jesuus s-eche: —Echetz nik etale tiʼ yeʼ ilotxht inqʼa xaol [itxutx] ibʼaal, tul aʼ nik inima vet inqʼa xaol, kam inqʼa jeqel tzaan taʼn inqʼa kʼuy mam. Tul aʼ yeʼ nik inima vet inqʼa ibʼekʼbʼal quBʼaal Tiuxh. 7Poro ¡bʼan vatz kuxh nik ebʼaneʼ! Tan antat ex atoʼk ex tuul val u yol uvaʼ itzʼibʼa ka Isaiias, u qʼexsanich tetz viyol quBʼaal Tiuxh, uvaʼ ech nik tal s-eche:

8«U tenam uvaʼa,

tan oqxh ikam toksal inqʼij taʼn.

Poro ech koqe,

tan sibʼ ateʼl sinkʼatza,

tan yeʼ nik motx iqej in.

9Niketz kuxh motx ibʼutxh tibʼ

tiʼ toksal inqʼij.

Tan nik taqʼ bʼen s-eche inbʼekʼbʼal

inqʼa itxhusuʼm uvaʼ tetz kuxh xaol,»

chich viyol quBʼaal Tiuxh,

—xeʼt Jesuus.#Isaiias 29.13

Uvaʼs talt quBʼaal Jesuus uvaʼ jit aʼ inqʼa etxhbʼubʼal nik yansan taanima inqʼa xaol vatz quBʼaal Tiuxh

10Yaʼne isaʼ tzaan Jesuus inqʼa tenam s-vatz. Tul ech tal Jesuus s-xoʼl s-eche: —Abʼivaq u yol uvaʼ toq valeʼ; tul bʼenoq inuqul sete: 11Tan jit aʼ laʼ yansan u xaol tiʼ kam uvaʼ laʼ paloʼk titziʼ. Pet aʼ laʼ yansan u xaol tiʼ kam uvaʼ laʼ jaʼul titziʼ, —xeʼt Jesuus.

12Yaʼne molmotxh tok inqʼa nikich itxhus tibʼ kʼatz Jesuus. Tul ech motx tal te Jesuus s-eche: —¿Maq qat eela uvaʼ qat ul iviʼ inqʼa fariseeo tiʼ u yol uvaʼ qat aala? —xeʼtaqe.

13Tul ech tal Jesuus s-eche: —Ech tatin inqʼa fariseeo vatz quBʼaal Tiuxh, eche inqʼa tzeʼ uvaʼ laʼ kuxh itzʼi. Tan laʼ opoon invaʼl qʼij, tul laʼ bʼuqʼux el tuchʼ taqʼil. Echetz laʼ ulbʼele inqʼa fariseeo taʼn quBʼaal Tiuxh. 14Pet til kuxh txhaqnaq tzi. Tan ech kuxh tatin txhaqnaq, eche tatin invaʼq tzot. Tan [oq laʼ itxhʼiqi u tzot invaʼtoʼq imol s-tzotil,] tul tzum kuxh laʼ motx ibʼen t-jul s-kaʼbʼil, —xeʼt Jesuus te inqʼa nikich itxhus tibʼ s-kʼatza.{*}#15.14 ¿Kam s-tiʼil tal quBʼaal Jesuus inqʼa fariseeo s-tzot? Tiʼ uvaʼ tan, yeʼaq tootzaqle kam laʼ motx tule taqʼbʼ kʼatz quBʼaal Tiuxh, eche vaʼq tzot uvaʼ yeʼ nik tileʼ tal kʼaqel taʼn. ¿Kam s-tiʼil tal quBʼaal Jesuus uvaʼ antxh txhʼiqin tzot inqʼa fariseeo? Tiʼ uvaʼ tan, aʼ inqʼa fariseeo nikich iqʼon iviʼ tiʼ tootzaqil inqʼa uqʼeʼybʼal xoʼl inqʼa xaol. Atz aʼich tiqatz itxhusux inqʼa xaol, atz toksal inqʼa xaol t-bʼey. Echetz aʼ nikich tal inqʼa fariseeo uvaʼ txhʼiqinich tetz inqʼa xaol tiʼ tok bʼen tiʼ Tiuxh s-vatz. ¿Kam s-tiʼil tal quBʼaal Jesuus uvaʼ tzot inqʼa xaol txhʼiqimal taʼn inqʼa fariseeo? Tiʼ uvaʼ tan, kʼuxh tootzaqlich inqʼa xaol inqʼa bʼekʼbʼal, poro tira yeʼ nikich motx itxʼol tiqʼol t-taanima, kʼuxh nikich motx itzʼeʼsa inqʼa oya vatz Tiuxh.

15Yaʼne ech tal Luʼ te Jesuus s-eche: —Al inuqul u yol s-qe uvaʼ txumbʼalimal qat aalt tiʼ u etxhbʼubʼal, —xeʼt Luʼ.

16Tul ech tal Jesuus s-eche: —¡Echatetz kol kuxh exe! ¡Yeʼatetz kol nik ibʼen sete! 17Atz ¡yeʼatetz kol nik etabʼi kam talaxeʼ! Tan jankʼalxh uvaʼ laʼ tetxhbʼu u xaol, tan yeʼxhkam laʼ ibʼan taʼn. Tan toq kuxh paloq paʼl t-tuul, tul yekleʼl. 18Pet aʼ laʼ yansan u xaol jankʼalxh u yol uvaʼ yeʼbʼaʼn laʼ tala, tan een nik tzajk tu taanima. 19Tan jankʼalxh inqʼa yaabʼla txhaq txumbʼal, tan een nik tzajk tu taanima inqʼa xaol, eche u yatzʼo ibʼ, u yansa ibʼ tuchʼ vaʼt xaol uvaʼ jit ikʼulel tibʼ s-tuchʼ, u yansa ibʼ, tiʼ uvaʼ yeʼ tzʼalonaʼqle, elaqʼ, tzʼeqo tzij, txhuli yol tiʼ imol. 20Aʼetz inqʼae, laʼ motx yansan inqʼa xaol vatz quBʼaal Tiuxh. Pet jit, tiʼ uvaʼ yeʼ laʼ motx itxʼaj inqʼa xaol iqʼabʼ uvaʼs laʼ itxʼaʼoneʼ, tul laʼ yan vatz quBʼaal Tiuxh, —xeʼt Jesuus.

Uvaʼs ikʼuqbʼat val u ixoq ikʼuul tiʼ quBʼaal Jesuus uvaʼ jitich tij imam Israeel

Kuxh 7.24-30

21Yaʼne el vet bʼen Jesuus tu txʼavaʼ Genesareet. Tul yekich vet Jesuus t-inqʼa txʼavaʼ tuulbʼal u tenam Tiiro, atz tuulbʼal u tenam Sidoon. 22Tul aʼ jeqlich val u ixoq tzitzi uvaʼ jitich tij imam Israeel; aj Kanaan. Tul txhʼuyich tzaan tiʼ iqul Jesuus. Atz xeʼt sichʼin. Tul ech nikich tal s-eche: —InBʼaal, ¡axh u Tij Imam Daviid! ¡Txum invatz, tan il valatz inixvaak kʼaxbʼiy taʼn demoonio! —chichich isichʼin tzaan u ixoq. 23Poro yeʼl u ixoq nikich itzaqʼbʼel taʼn Jesuus.

Yaʼne ech tal inqʼa nikich itxhus tibʼ kʼatz Jesuus s-eche: —Bʼan bʼaʼnil s-qe, tul abʼi kam uvaʼ nik tal u ixoq. Tul txhaq ka, tan oq kuxh ixhaakalil tok tzaan s-qiʼ, —xeʼtaq te Jesuus.

24Yaʼne ech tal Jesuus s-eche: —Yeʼ laʼ isaʼa laʼ inlotxha, tan aʼ txhaqel tzaan in tiʼ ilotxhox inqʼa tij imam Israeel, inqʼa ech itzʼeqx ka, eche itzʼeqx ka invaʼq karneʼl tiʼ imol, —xeʼt Jesuus.

25Yaʼne ex iqajbʼa tibʼ u ixoq vatz Jesuus. Tul ech tal te Jesuus s-eche: —¡InBʼaal, bʼan bʼaʼnil s-ve! Tul ¡lotxh in! —xeʼte.

26Tul ech tal Jesuus s-eche: —Yeʼ laʼ utxhi laʼ inbʼan bʼaʼnil see. Tan aʼ vintenam toq inbʼan bʼaʼnil s-te. Tan bʼane laʼ koq isaʼa uvaʼ, aʼ laʼ qaqʼvat vitxʼix inqʼa nitxaʼ te inqʼa talaq txʼiʼ, —xeʼt Jesuus te u ixoq.

27Yaʼne tzaqʼbʼ u ixoq. Tul ech tal te Jesuus s-eche: —Echxhte, inBʼaal. Pet nikat isikʼ inqʼa talaq txʼiʼ inqʼa juyaq paan uvaʼ nik isilp kuʼ jaqʼ imeexha u aj etz. Echatetz kuxh toq intxʼebʼte vabʼaʼnil, —xeʼt itzaqʼbʼ u ixoq.

28Yaʼne ech tal Jesuus te u ixoq s-eche: —¡Kamxh axhe, ixoq! ¡Sibʼ bʼakxh u kʼuqlebʼal akʼuul s-viʼ! Echetz toq inbʼante kam uvaʼ qat ajaq s-ve, —xeʼt Jesuus. Tul yekich ibʼan u ixvaak bʼaʼn taʼn Jesuus.

Uvaʼs ibʼant quBʼaal Jesuus bʼaʼn mamala yaabʼ

29Eletz vet bʼen Jesuus tu tenam Tiiro, atz tu tenam Sidoon, tul yekich vet Jesuus tziʼ u mam aʼ tuulbʼal Galileea. Eletz bʼen Jesuus tziʼ u mam aʼ, tul yekich jaʼ Jesuus kʼuqloq viʼ val u vitz. 30Tul mamalaxh xaol ex ikʼul tibʼ kʼatz Jesuus viʼ u vitz. Tul iqʼomalaqich yaabʼ taʼn inqʼa xaol. Tul at yaabʼ inqʼa koyelich ibʼenaʼ. Atz at inqʼa tzotiche. Atz at inqʼa memiche. Atz at inqʼa koxhelich iqʼabʼ. Atz at inqʼa kamaq kuxh yaabʼilil nikich motx bʼanon. Ayaʼletz inqʼae motx iqʼolaq ok vatz Jesuus, tul yekich ibʼan Jesuus bʼaʼn. 31Tul kaayaqich kuxh vet taanima inqʼa xaol uvaʼs tilt vet iyolon inqʼa mem, atz ijikeʼv iqʼabʼ inqʼa koxhelich iqʼabʼ, atz ixaon vet inqʼa koyeliche, atz isaqin vet inqʼa tzotiche. Tul nikich motx toksal vet iqʼij quBʼaal Tiuxh taʼn inqʼa xaol.#Isaiias 35.5-6

Uvaʼs inaʼsat quBʼaal Jesuus juqvaʼl paan tuchʼ kaʼt txay tiʼ itzuqbʼel kajvaʼl mil (4,000) xaol

Kuxh 8.1-10

32Yaʼne isaʼ tzaan Jesuus inqʼa nikich itxhus tibʼ s-kʼatza. Tul ech tal Jesuus s-te s-eche: —Nik intxum ivatz inqʼa xaol inqʼae, tan itoxv vet qʼije tatin sinkʼatza. Tul yeʼlaq tetxhbʼubʼal ati. Yeʼetz insaʼ laʼ motx intxhaq bʼen t-totzotz, tan avoqe toq motx uqloq tiʼ bʼey, —xeʼt Jesuus.

33Yaʼne ech tal inqʼa nikich itxhus tibʼ kʼatz Jesuus s-eche: —Poro yeʼxh tal laʼ tzajk mamala paan qaʼn, tul laʼ qaqʼ te inqʼa xaol. Tan mam tename inqʼae. Tul yeʼxhal jeqlel tzitza tal uvaʼ laʼ quloqʼvat paan, —xeʼtaq te Jesuus.

34Tul ech tal Jesuus s-eche: —¿Jatvaʼletz paan at sexeʼ? —xeʼt Jesuus.

Tul echaq tal inqʼa nikich itxhus tibʼ s-kʼatza s-eche: —Juqvaʼl paan tuchʼ kaʼt txay, —xeʼtaq te Jesuus.

35Yaʼne ibʼekʼ Jesuus inqʼa xaol tiʼ ikʼuqeʼv t-txʼavaʼ. 36Tul ikʼul Jesuus juqvaʼl u paan tuchʼ kaʼt inqʼa txay. Tul taqʼ Jesuus taʼntiuxh te quBʼaal Tiuxh s-tiʼ. Tul ijatx Jesuus inqʼa paan. Tul taqʼ Jesuus te inqʼa nikich itxhus tibʼ s-kʼatza. Yaʼne aʼ vet inqʼa nikich itxhus tibʼ kʼatz Jesuus jatxon el xoʼl inqʼa tenam s-kaqaayil. 37Tul jankʼalxh inqʼa xaol motx txʼaʼoni, tetxhal motx inoj s-kaqaayil. Tul aʼl tel iyalan u etxhbʼubʼal. Tan imol inqʼa nikich itxhus tibʼ kʼatz Jesuus juqvaʼt xuʼk uvaʼ nojnaʼqichxhtuʼ. 38Poro kajvaʼl mil (4,000) vinaq txʼaʼoni. Tul motx txʼaʼon inqʼa ixoq tuchʼ inqʼa nitxaʼ inpaqte, poro yeʼ motx ok s-atxh. 39Yaʼne itxhaq vet bʼen Jesuus inqʼa xaol. Tul ok vet bʼen Jesuus tuul vaarko. Tul yekich vet Jesuus tuulbʼal u txʼavaʼ Magdaala.

Currently Selected:

Tio 15: ixlC

ማድመቅ

Copy