Génesis 12

Tumpa ueni Abram

1Pëti ara Tumpa jei Abram pe: “Eë jare eya kua ndeɨwɨ jare nerëtáɨwa reta jare nderu jëta, jare ekua pëti ɨwɨ aikuaakata aï ndewe wae pe. 2Echa’ä ayapota aï niñemoñaa reta jetaete ye,” jei. “Ayapota aï ndewe ikawi wae chiñee rupi jare numɨeräkuakata aï opaete ɨwɨ rupi. Jare ïru wae reta uyekouta ñonoï jokua ndewe mbaembae ikawi wae ayapo wae re. 3Ipotawe kía reta uyapo ndewe ikawi wae pe che ayapota ikawi wae. Erëi ipotawe kía reta uyepɨpeyu nderé wae pe che aiporarakata aï. Jare nde rupi opaete ɨwɨ pewa reta uyekouta ñonoï,” jei Tumpa Abram pe.

4Jayawe Abram setenta y cinco año wɨreko yawe, oë oo tëta wasu Harán wi kërái Tumpa jei chupe rami. Oo jae ndiwe wi jiɨ Lot. 5Jayawe Abram wɨraa jembireko Sarai, jare jiɨ Lot, jare opaete uyeyokui chupe wae reta jae owa iyupe Harán pe wae, jare opaete mbaembae reta jae onoi wae. Jare oë reta yuraa ɨwɨ Canaán jee wae kotɨ.

6Joko wi yuraa uwäe reta yawe ɨwɨ Canaán pe, Abram jare ïru reta uwata jokua ɨwɨ rupi yuraa uwäe rewa tëta wasu raɨ Siquem jee wae pe. Siquem wi koiño ime pëti ɨwɨrayapeturu echa wae, ɨwɨ Moré jee wae pe. Ndei Abram ou mbowe, jokua ɨwɨ pewa reta yuweruse joko pe umbɨadora waerä itumparaanga reta re jokua ɨwɨra iyɨpɨ rupi. Jare ɨwɨ Canaán pewa reta yureko jokua ɨwɨ pe.

7Joko pe Tumpa uyekuaa Abram pe jare jei chupe: “Niñemoñaa reta pe ameeta aï kua ɨwɨ,” jei. Jayawe Abram joko pe uyapo pëti mbaerenda ita pewa Tumpa jee umbutuicha waerä, echa’ä joko pe Tumpa uyekuaa chupe ramo.

8Joko wi Abram jare ïru reta oë yuraa reta warasɨ oë wae kotɨ ɨwɨ jeta ñaipe wae kotɨ. Jare umbɨyemboɨ reta jëta wakapi pewa tëta wasu raɨ Betel jee wae warasɨ uike wae kotɨ jare tëta wasu raɨ Hai jee wae warasɨ oë wae kotɨ ipäu pe. Joko pe Abram uyapo ye ambɨe mbaerenda ita pewa. Jare joko pe imandúa Tumpa re, jare umbutuicha wi Tumpa jee. 9Joko wi Abram jare ïru reta yuraa yembɨ kotɨ ndewe ndewe rupi ɨwɨ Neguev jee wae kotɨ. Ɨwɨ Neguev oï Canaán pe.

Abram oo ɨwɨ Egipto pe

10Jokua año rupi ime iko karuái tuicha wae jokua ɨwɨ Canaán pe. Jáeramo Abram jare jëtara reta oë yuraa ɨwɨ Egipto kotɨ ñonoï waerä joko pe karuái uasa rewa. 11Jare uwäe seri ma ɨwɨ Egipto pe yawe, Abram jei jembireko Sarai pe: “Mase, nde ko jae kuña nemaepöraete wae,” jei. 12“Jáeramo kuimbae Egipto pewa reta nderecha yawe, jeita iyupe reta nde rewa: ‘Jae ko jokua kuimbae jembireko. Yayuka ñañono ñapɨ̈ro waerä chuwi jembireko,’ jeita reta iyupe,” jei. 13“Jáeramo ere chupe reta kuri nde ko jae cherindɨ wae. Jayawe Egipto pewa reta ndarau cheyuka ndereko pewa, jare aiko kawita jae reta ndiwe,” jei chupe.

14Jayawe Abram jare Sarai yuraa uwäe reta ɨwɨ Egipto pe yawe, Egipto pewa reta jukuärái uecha Sarai ko jae pëti kuña maepöraete wae. 15Jare mburuwicha wasu#12.15 Jae reta jei mburuwicha wasu Egipto pewa pe “Faraón.” Kua yandeɨwɨ Bolivia pe yae chupe “Presidente.” Egipto pewa imborɨa umbɨarakuaa wae reta uecha wi, jare imiäri kawiete jese chupe. Jayawe wɨraa reta Sarai mburuwicha wasu jëta pe iko waerä tëi jembirekorä.

16Jayawe Sarai jeko pewa mburuwicha wasu iko kawi Abram ndiwe. Jae umeeño Abram pe owecha reta, jare waka reta, jare mburika reta, jare mbaemɨmba camello jee wae reta. Jae nunga wi umee chupe kuimbae jare kuña reta Abram pe uyeyokui waerä.

17Erëi Tumpa uiporaraka mburuwicha wasu pe jare jëtara reta pe pëti mbaerasɨ jasɨete wae pɨpe Sarai jeko pewa. 18Jayawe mburuwicha wasu ueruruka Abram jare jei chupe: “¿Maera pa ndapu chewe? ¿Maera pa nembeu’ä chewe Sarai ko jae nembireko wae?” jei chupe. 19“Nde ndere chewe jae ko nderindɨ wae; jáeramo areko tëi aiko chembirekorä. ¡Añawe ko oï nembireko! ¡Eraa ye nembireko jare pekua ye wɨrae!” jei mburuwicha wasu Abram pe. 20Jayawe mburuwicha wasu oyokui isɨndaro reta omondo ye waerä Abram jare jembireko opaete imbaembae reta rewe ɨwɨ Egipto wi.

Currently Selected:

Génesis 12: gnwPB

ማድመቅ

Copy