Aˇ dahˬ 8
8
Iˇ cuꞈ aw-iˇ-euˬ
1Noˇaˬ hawˇ-eu aˬ yawꞈ nehˬ-ehˇ saˇ baoˬ laꞈ kʼoeˇ kʼaˇ uˇ-eu jeˬ zaˬ deuˬ-ahˇ Miˬyehˇ maˬ ngehˇ-a. Aˬ yawꞈ jaˬ lehˇ bi baw laˇ-awˇ, iˇ cuꞈ bi aw-iˇ-euˬ meh. 2Miˇ tsaˬ dawˬ dah paw jaˆ-eu iˇ cuꞈ iˇ byoe dawˬ tawˆ luꞈ bi tsoeˬ-iˇ jiˇ-awˇ, mˬ kʼoeˇ taˆ paw jaˆ-eu iˇ cuꞈ laˇ gʼoˆ dawˬ tawˆ luꞈ piˬ tehˬ-euˬ meh. Uˬ yehˇ tsiˇ leˇ gʼaˬ-awˇ, 3tiˬ yaˇ ngaˬ tseˇ nah aˇ yamˬ laꞈ kʼoeˇ, tiˬ nah saˇ-iˬ tiˬ nah iˇ cuꞈ aw-iˇ-euˬ meh. 4Ba la shiꞈ siˬ tiˬ siˬ tseˇ shiꞈ nah tiˬ nah keuˆ laˇ ngeh, Aˬyaˬyaˇ gawˬ jawˬ jawˬ ma-ahˇ taꞈ-eu gawˬ jawˬ tiˬ jawˬ kʼoeˇ taˆ, saˇ baoˬ kʼoeˇ laˇ ga naˬ-iˇ-euˬ meh. 5Tiˬ nah saˇ-iˬ tiˬ nah iˇ cuꞈ paˇ aw-iˇ-awˇ, ba la tseˇ siˬ tiˬ siˬ yaw beh nah keuˆ laˇ ngeh, gawˬ jawˬ uˬ du deuˬ mawˇ laˇ-euˬ meh.
6Oeˬ tseˇ nah byah laˇ ngeh, Noˇaˬ laˇ gʼoˆ gʼoˆ zaˬ pah-awˇ, 7awꞈ-aꞈ tiˬ mawˇ pyehˬ doˆ gʼeh-euˬ meh. Awꞈ-aꞈ kʼoeˇ mawˇ maˬ gʼoꞈ laˇ-ehˇ, iˇ cuꞈ gui-iˇ jiˇ ngeh keuˆ ni, doe doe-ehˇ zaw zaw-ehˇ jawˇ-euˬ meh. 8Kʼoeˇ ngeh, iˇ cuꞈ aˇ naˆ ni aw-iˇ-euˬ gaˇ ya siˬ-eu gʼaˇ duˬ, kʼaˬ kʼoeˬ tiˬ mawˇ Noˇaˬ paˇ pyehˬ doˆ gʼeh-euˬ meh. 9Miˇ kʼahˬ kʼahˬ lah ni iˇ cuꞈ dahˬ byah taˬ-euˬ miˇ neh, kʼaˬ kʼoeˬ kʼoeˇ mawˇ tiˬ gaˇ-iˬ zaw dawꞈ kʼaˇ maˬ za-ehˇ, saˇ baoˬ jaˆ gaˇ paˇ zaw kʼoꞈ laꞈ-euˬ meh. Noˇaˬ aˬ laꞈ cawˬ doˆ-awˇ, kʼaˬ kʼoeˬ kʼoeˇ mawˇ-ahˇ saˇ baoˬ laꞈ kʼoeˇ paˇ nyehꞈ uˇ kʼoꞈ-euˬ meh. 10Shiꞈ nah paˇ dawˬ-awˇ, kʼaˬ kʼoeˬ kʼoeˇ mawˇ-ahˇ aˬ yawꞈ tiˬ poˆ paˇ pyehˬ doˆ gʼeh-euˬ meh. 11Uˬ ciꞈ uˬ taw taw laˇ ngeh, kʼaˬ kʼoeˬ kʼoeˇ mawˇ aˇ bawˇ-ahˇ toˆ tsehˆ laꞈ-euˬ tiˬ dehˬ pyeuꞈ-eu saˬ loˬ aˇ paꞈ tiˬ paꞈ tsehꞈ-awˇ gʼoꞈ keuˆ laˇ-euˬ meh. Kʼoeˇ ngeh, iˇ cuꞈ gui-iˇ-euˬ gaˇ Noˇaˬ ya siˬ-euˬ meh. 12Kʼoeˇ naˇ, shiꞈ nah paˇ dawˬ-awˇ, kʼaˬ kʼoeˬ kʼoeˇ mawˇ-ahˇ tiˬ poˆ paˇ pyehˬ doˆ gʼeh-euˬ meh. Kʼoeˇ ngeh poˆ jawˇ, kʼaˬ kʼoeˬ kʼoeˇ mawˇ maˬ paˇ gʼoꞈ laˇ ni iˇ byoˆ gʼeh-euˬ meh.
13Noˇaˬ koꞈ yaˇ tiꞈ kʼoꞈ byah ngeh kʼoꞈ, ba la yaw beh siˬ aˇ nah yaw beh nah-ahˇ, iˇ cuꞈ gui-iˇ-euˬ meh. Aˬ yawꞈ saˇ baoˬ nymˇ mˬ leuꞈ dzeh-awˇ, doe doe-ehˇ haw gʼeh ngeh, miˇ tsaˬ gui-iˇ luꞈ gaˇ ya mawˇ-euˬ meh. 14Ba la nyiˬ siˬ tiˬ siˬ nyiˬ tseˇ shiꞈ nah-ahˇ, miˇ tsaˬ gui coˇ ni pyeuꞈ-iˇ-euˬ meh.
15Noˇaˬ-ahˇ Miˬyehˇ heu loꞈ-ehˇ ehˇ nehˬ-euˬ meh. 16“Nawˬ-euˬ miˬ zaˬ, nawˬ-euˬ aˬ li deuˬ hawˇ-eu, nawˬ-euˬ kuiˬ ma deuˬ nehˬ-ehˇ saˇ baoˬ laꞈ nyiˇ doˆ-iˇ-awˬ. 17Jeˬ zaˬ hawˇ-eu ho zaˬ nga jiˇ dawˬ tawˆ luꞈ kʼawꞈ paˇ myaˬ paˇ behˇ laˇ-awˇ, miˇ tsaˬ kʼoeˇ taˆ byah-iˇ nya ni, laꞈ nyiˇ paw pyehˬ doˆ gʼeh-awˬ.” 18Kʼoeˇ ngeh, Noˇaˬ-aˬ, aˬ yawꞈ-euˬ miˬ zaˬ, aˬ yawꞈ-euˬ aˬ li deuˬ hawˇ-eu, aˬ yawꞈ-euˬ kuiˬ ma deuˬ sheuˬ-awˇ, saˇ baoˬ laꞈ nyiˇ doˆ-iˇ-euˬ meh. 19Jeˬ zaˬ hawˇ-eu ho zaˬ nga jiˇ dawˬ tawˆ luꞈ kʼawꞈ, yawˬ ha-euˬ aˇ jeuˬ yawˬ ha aˇ muˇ muˇ muˇ-ehˇ, saˇ baoˬ laꞈ nyiˇ doˆ-iˇ-euˬ meh.
Noˇaˬ lawˇ-euˬ shehˇ-euˬ
20Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, lawˇ duˬ tiˬ tsahˇ Noˇaˬ tsoˆ-euˬ meh. Zahˇ jahˇ gaˇ geuꞈ nya-eu jeˬ zaˬ aˇ jiˇ yaw shawˇ jeˬ dawˬ tawˆ luꞈ laꞈ kʼoeˇ, tiˬ jeˬ-euˬ tiˬ gu yuˇ-awˇ, gʼawˇ mawˇ mawˇ lah-ehˇ lawˇ duˬ kʼoeˇ taˆ dzah puiˆ-awˇ lawˇ-euˬ meh. 21Aˬ yawꞈ neh lawˇ nehˬ-euˬ yaw saꞈ kʼoeˇ Sahˬpaˬ Miˬyehˇ-ahˇ saw leˇ ngeh, Sahˬpaˬ Miˬyehˇ nui kʼahˇ shiˇ-awˇ, yawˬ haˇ yawˬ ha heu loꞈ-ehˇ ehˇ-eu meh. “Aˬ kaˇ naˇ, tsawˇ haˬ zaˬ yaw lehˬ jeˬ mˇ-eu baˬ da neh, miˇ tsaˬ-ahˇ yaˬ kʼehˇ yaˬ-awˇ tiˬ jawˇ-iˬ maˬ paˇ kʼehˬ nehˬ ma. Tsawˇ haˬ zaˬ-euˬ nui noeˬ-aˬ, yaw nyiˇ gʼeh ngeh neh maˬ tsaˬ maˬ dawˇ-a lehˇ ngaˇ siˬ nya ma. Heu poˆ loꞈ-ehˇ, kʼaˇ dehꞈ kʼaˇ jawˇ-eu jeˬ-ahˇ ngaˇ tiˬ jawˇ-iˬ maˬ paˇ laˆ cawˆ nehˬ ma. 22Miˇ tsaˬ heu li-iˇ ngeh keuˆ ni, ka-eu aˇ yamˬ hawˇ-eu yehˬ-eu aˇ yamˬ baw tehꞈ-a. Yaw tsehꞈ hawˇ-eu yaw lahˇ, tsahˬ gaˆ hawˇ-eu jawˇ la, uˬ ciꞈ hawˇ-eu nah gʼahˇ aˬ myah luꞈ jaˆ tehꞈ-a” lehˇ ehˇ-eu meh.
Currently Selected:
Aˇ dahˬ 8: AHK
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Akha Bible Revision (Latin Script) © Thailand Bible Society, 2011.
