San Mateo 2
2
On tlakamej intoka magos, yejuan kimixmatij on sitlalimej, oualajkej para kitaskej on konetsintli Jesús
1Ijkuak Herodes rey katka, Jesús otlakat ne ipan on kalpan itoka Belén yejuan onkaj ne Judea. Niman más sakin*, oyejkokej ne ipan on ueyikalpan itoka Jerusalén sekimej tlakamej yejuan magos. Yejuamej oualejkej ipan on país yejuan nokaua neka ikisayan tonaltsintli. 2Yejuamej otetlajtoltijkej:
—¿Kanon nemi inrey on hebreos* yejuan kemach otlakat? Tej, desde ipan topaís yejuan onkaj ikisayan on tonaltsintli, otikitakej on sitlalin yejuan otechititij ika yotlakat on rey. Yejua ika otiualajkej para tikmauistiliskej.
3Ijkuak on rey Herodes ijkon okak, sanoyej* omojkamik, niman nochi tlakatl ne Jerusalén no omojkamik. 4Kemaj on rey okinnots nochimej on tlayekankej tiopixkej niman on yejuan temachtijkej ikan on tlanauatiltin, niman okintlajtoltij kanon tlakatis on Cristo yejuan kiteneuaj ika Dios okitlapejpenij para tlamandaros. 5Yejuamej okijlijkej:
—Tlakatis ipan on kalpan itoka Belén nikan Judea, pampa on tiotlajtojketl ijkin okijkuiloj:
6Tejua Belén yejuan tiónkaj ne ipan iueyitlalpan Judá,
xtejua más tipitentsin intsajlan on oksekimej uejueyikalpanmej,
pampa motech tejua Belén kisas sen tlayekanketl yejuan kinyekanas on nokoneuan hebreos*.
7Kemaj Herodes okinmichtakanots on magos, niman okintlajtoltij tlen tonajli ones on sitlalin. 8Kemaj okintitlan Belén niman ijkin okinnauatij:
—Xuiyan Belén, niman kuajli xtejtemokan on konetsintli. Ijkuak nenkinextiskej, xnechijlijtikisakan para nejua no nias nikonmauistilis.
9Ijkuak okakkej itlanauatil on rey, on magos oyajkej. Niman on sitlalin yejuan okitakej ne ipan impaís kampaka ikisayan tonaltsintli, yaya inyakapan, niman onoteltito ne kampa nemiya on konetsintli. 10Ijkuak on magos okitakej onoteltij on sitlalin, sanoyej opakilistlamatkej*. 11Yejuamej okalakitoj ne ipan on kajli, niman okitakej on konetsintli iuan María on inanaj. Kemaj onotlakuantelketskej ixpan on konetsintli niman okimauistilijkej. Kemaj okitlapojkej on incaja niman okitlayokolijkej oro, kopajli yejuan tlatla, niman on ajuiyalistli mirra. 12Ijkuak ye kisaskiaj para yaskej ipan impaís, Dios okinnauatij ipan sen temiktli maka ma nokuepakan itech on rey Herodes. Yejua ika on magos onokuepkej ipan okse ojtli.
José okuikak Jesús iuan inanaj para Egipto
13Ijkuak yoyajkej on magos, sen ángel yejuan toTEKO okuajtitlan okinotitij José itemikpan, niman okijlij:
—Xmokuiteua niman xkuika on konetsintli iuan inanaj para Egipto. Ompa xnemikan hasta ijkuak nimitsijlis kuajli para nenkisaskej, pampa Herodes kineki kimiktis on konetsintli.
14Yejua ika, José onoketsteu sano ipan on tlayoua, niman okuikak on konetsintli iuan inanaj, niman okajsikej on ojtli para oyajkej Egipto. 15Ompa onenkej hasta ijkuak omik Herodes. Yejua in onochiu para onocumpliroj on tlen okijtojka toTEKO itechkopa on tiotlajtojketl yejuan okijtoj: “Oniknots nokoneu para ma kisa ne Egipto.”
Herodes okinnauatij on isoldados ma kinmiktikan on tlakakokonej ne Belén
16Ijkuak Herodes okimat ika on magos yokajkayajkej, sanoyej okualan, niman okinnauatij isoldados para ma kinmiktikan nochi on tlakakokonej de ome xipan para tlatsintlan yejuan chantiyaj ne Belén niman iyeualkan. Yejua san ipan nouikaya on tonaltin yejuan on magos okijlijkej. 17Ijkuak nochi on tlakakokonej yomikkej, onocumpliroj tlen okijtoj on tiotlajtojketl Jeremías ijkuak ijkin okijkuiloj:
18Okakistik sen ajmankatsajtsilistli ne ipan on kalpan itoka Ramá.
Onkatka ajmankachokistli niman ueyi nejeltilistli,
pampa Raquel chokaya impampa ikoneuan.
Yejua xokinek onoyoltlalij, pampa nochimej ikoneuan omikkej.
José okuajuikak Jesús iuan inanaj para Israel
19Pero más sakin*, ijkuak Herodes yomik, sen ángel yejuan toTEKO okuajtitlan okinotitij José ipan temiktli ne Egipto, niman okijlij:
20—Xmokuiteua, niman xmokuepa iuan on konetsintli iuan inanaj ne ipan on mopaís de Israel, pampa on yejuan kinekiya kimiktis in konetsintli, aman yomik.
21Kemaj José onokuiteu niman okuikak on konetsintli iuan inanaj para Israel. 22Pero ijkuak José okimat ika Arquelao tlamandarouaya ken rey ne Judea kampa achtoj rey katka Herodes on itataj, onomojtij ompa onchantis. Kemaj Dios okinauatij ipan sen temiktli ma uiya ne Galilea, niman yejua ompa oyaj. 23Ijkuak ompa oajsikej, ochantitoj ipan on kalpan itoka Nazaret. Yejua in onochiu san para onocumpliroj on tlen okijtojka on tiotlajtojketl ijkuak okijkuiloj ika Jesús kitokayotiskej nazareno.
Currently Selected:
San Mateo 2: nguNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 1987, 2012 Wycliffe Bible Translators, Inc. All rights reserved.
