SAN MARCOS 5

Lapanak yu ixlakpach'apata makxkay'un jamacha'a Gadara

(Mt. 8:28-34; Lc. 8:26-39)

1Tacha'alhcha ixtapiktutam an lakxkan la ixlakaat'unk'ancha an jamacha'an Gadara. 2An Jesús takutlhicha an laka barco. Walh xajnichilh pumatam lapanak an kampusantu yu lakpach'apata makxkay'un. 3An tan ixlak'aknukani ixtawlay, chi jantucha xamati lay ixch'i'ulay masi laka cadena. 4Mu a'lhuwchaa ixch'i'ulakan laka cadena pero ixlaj'ex'ulay, pus jantu xamati lay ilhajay. 5Stakcha ixt'asajtsukuyi tunkuw chi puts'ista an lakak'iwin chi an kampusantu. Chi ixlakamak'atsanikancha laka chiwx. 6Walh, akxni la'ts'inkalhcha an Jesús akxni ma'atka ix'antachalh, la'ats'alaj'ankalhcha chi tatso'ottanikalhcha. 7P'ascha ixa'alakan an Jesús, ixjunkan:

―¡Jesús, isTs'alh Dios yu wilhchalh talhman! ¿Tasicha k'ilhtuyani? Iksk'iniyan la ixtalakask'i Dios, jant'u ak'imama'alh'ajnit'i.

8Chuncha ixnajun an makxkay'un mu an Jesús juniy:

―¡Makxkay'un, k'amak'awcha ani lapanak! 9¿T'asich'a unk'an? ―juniy.

―Legión, mu wanaj kilhuwk'an, ―najun.

10Sawalhcha tapayniniya an makxkay'un an Jesús li ma jantu kajatamakxtulhi an tan tat'ajun. 11Chi mu waniy ancha a'stitawk'a ixta'exwayt'ajun lhuw p'axnin, 12pus an lakmakxkay'un tatapaynisk'iniycha an Jesús, tajuniy:

―Yu'uncha an p'axnincha ajkalakpach'apayaw. Anchacha akilamak'aw.

13Jamakawnilhi an Jesús, pus tamakawlhcha an lapanak. Yucha an p'axnincha talakpach'apalh, ka tacha la'at'uy milh p'axnin. Talakats'alaj'alhi an p'axnin an tan a'talhman chi tata'aj'ajulh, chi talaj'aksk'anj'u'olh an lakxkan. 14An yu ixtalhist'ak'a an p'axnin talakats'alalh chi ixtajamak'atsaaninincha an la'acha'an chi masi tan wa jalhi'ay tacha an tapasalh. Pus ta'alhcha la'ts'inini tuchini tapasaycha. 15Tala'cha'alhcha an Jesús, chi tala'ts'incha an yu ixlakpach'apata makxkay'un tan sa'cha ixwilh, ixmala'ch'inincho'otacha, oxicha ixjalakpastaknancho'oy, pus ixtalaktalhanancha an lapanakni. 16An yu tala'ts'ilh tani tapasalhcha an yu ixlakpach'apata makxkay'un, ixtat'alajuniycha an ali'in, chi tani talalhcha an p'axnin. 17Pus tatapayninilhcha an Jesús li ma kataxtucho'olhcha.

18Akxni tajucho'olhcha an laka barco an Jesús, an yu ixlakpach'apata makxkay'un sawalhcha tapayniniya li ma kat'a'ana'. 19Pero an Jesús jantu makawnilh, yucha juniy:

―K'ap'inchicha mincha'a'. K'ajala'p'inchicha yu t'a jalhila'ts'in, k'aja'una'acha li an Dios yucha k'uch'un chi li yucha mapaynin. 20Pus alhcha, chi tsukulhcha laknajuni an xala'acha'anaxni Decápolis tani lhik'uch'ulhcha an Jesús. Sawalhcha ixtalhi'a'niy.

Pumatam lapanak junkan Jairo lhitapaynisk'in istsi'

(Mt. 9:18-26; Lc. 8:40-56)

21Akxni pupatakutcho'ochalhcha an barco an Jesús an ixtakilhtutamcha lakxkan, lhuwcha tala'cha'ampalh. Wa an ixkilhtucha lakxkani ixyalh yucha. 22Walh la'cha'alh pumatam lapanak yu ixjunkan Jairo, yu ixla'ts'ilhi'an laka cha'a tan ixtata'ayxt'o'a an judiojnin, tatso'ottanilhcha an Jesús. 23Sawalhcha tapayniniy, juniy:

―An kintsi nit'ajuncha. Ak'int'ap'it'i. K'alakp'ach'ap'aya'a para li kata'oxilh chi kala'awcho'olh.

24Pus an Jesús t'a'alh. Lhilhuwi ixch'a'o'akanta, wa ixtapa'asicho'oycha.

An Jesús k'uch'ulh pumatam t'aku'

25Pumatam t'aku la'akawt'uycha k'ata ixta'an'ay, wa ixmaj'an ixjak'alhni. 26Jantu layi ixta'oxiy masi ix'ancha laka jak'uch'unun, apalijcha wa ixlita'o'slay, chi ixmakamin'ojotacha ixtumin. 27Akxni asmatlhi li tanchuncha t'ajun an Jesús, ch'a'o'ayawlh, japujatanulhi an lapanakni chi ch'apanichalhi an ixla'ch'it. 28Mu ixnajun: “Masi wa akch'apanichalh an ixla'ch'it, aktak'uch'uya'.” 29Walh watukan sa' aninilhi an ixjak'alhni, oxicha lakak'atsancho'olh li ta'oxilhcha tacha an ixma'alh'ajnajt'ajun. 30Xli'astan an Jesús mu k'atsayi li xamati k'uch'ulh, tala'asp'itlhi, jajuniy:

―¿Tisiyuchacha kinch'apanichalh an kila'ch'it?

31An ixt'alhtanan tajuniy:

―Pero sawalhcha tapa'asiyan ch'i lhasakminini tichini aych'apacha'ancha.

32Pero yucha sa'cha jalakawanani tichini yuchacha kawalh. 33Pus an t'aku xk'ip'ip'icha lay talhanancha, mu k'atsaycha tacha tapasalh, pus la'alh, tatso'ottanilhi an Jesús, chi jun'olh. 34An Jesús juniy:

―Amijakiklaka'inti p'ut'ak'uch'ut'icha, kintsi'. Lhi'ach'ach'a k'ap'inch'o'ochi', mu t'ak'uch'ut'icha.

Mala'awnicho'olhi an Jesús an istsi Jairo

35Walh ixchiwint'ajunka an Jesús, tacha'alhcha yu taminchalh la ixcha'a an yu ixla'ts'ilhi'an laka cha'a tan ixtata'ayxt'o'a an judiojnin, tajuniy:

―Amintsi nilhcha, jant'uch'a ali k'ama'ach'ap'u an Maestro.

36Walh mu asmat'a an Jesús, pus juniy an yu ixla'ts'ilhi'an laka cha'a yu ixputa'ayxto'kan:

―Jant'u k'at'alhan. Wa k'ajak'iklaka'incha.

37Chi jantu xamati makawnilh li kat'a'alh an Jesús, wa yucha an Pedro chi Jacobo chi Juan ixt'ala'ajuncha an Jacobo. 38Ta'alhcha la ixcha'a an yu ixla'ts'ilhi'an laka cha'a tan ixtata'ayxt'o'a an judiojnin. An Jesús jala'ts'incha tacha sawalhcha tala'ta'oxila'alhiy chi wa tilh tilhcha ixtalay chi ixtalaj'alhuncha. 39Pus jala'tanuchalh an Jesús, jajuniy:

―¿T'asu li wa t'ilh tilhch'a layat'iti ch'i laj'alhunatcha? An jatsi jantu nita, wa lhtatay.

40Pero yu'uncha wa ixtalhits'i'in. Pus jatamakxtu'olh, wa yucha an ixpay chi an ixnati jatsi chi an yu ixtat'a'anta an Jesusi tat'atanulh an tan ixmalh an jatsi'. 41Ma'ch'apachalhi an jatsi an Jesús, juniy:

―Talita, kumi ―yucha nawputun: Jatsi', uxint'i ijkunan, ¡k'a'ost'aycha! 42Watukan ostayalhi an jatsi, tsukulhcha jalhtanan. Mu la'akawt'uycha k'ata ixpakxanta. Chi sawalhcha ixtalhi'a'niya an lapanakni an yu tala'ts'ilh. 43Wachuncha jajuniy an Jesús li jantu xamati katajunilh tacha an tala'ts'ilh, chi lhinawlhcha li kamawakalhcha an jatsi'.

Currently Selected:

SAN MARCOS 5: tpp

ማድመቅ

ያጋሩ

ኮፒ