SAN MARCOS 15

An Jesús talhi'anilhcha an Pilato

(Mt. 27:1-2,11-14; Lc. 23:1-5; Jn. 18:28-38)

1Sawalhka wats'isin, tata'ayxto'opalhcha an xalaj'ajin sacerdotejnin, chi an laktatanin, chi an xamaestrojnin lhamap'a'sin, chi ixchuxk'an an judiojnin yu ixtach'alhkatnan la ixla'acha'ank'an. Tach'ilhi'anilhcha an Jesús an Pilato. 2An Pilato lhisakmiy, juniy:

―¿Uxint'i ixrejk'an judiojnin?

Yucha alhtaylh juniy:

―Uxint'ich'a nawt'a'un.

3Pus an xalaj'ajin sacerdotejnin ixta'alhtasuycha, pero an Jesús jantu tu'u ja'alhtaylh. 4A'tam lhisakmipalhi an Pilato juniy:

―Tacha an stak talhimuk'ayan, ¿jant'u t'u'u k'at'ija'alht'ayan?

5An Jesús masi chuncha jantu k'is ja'alhtayanalh, pus an Pilato ixli'a'niycha.

T'acha'ankalhcha li an Jesús katama'niyacha

(Mt. 27:15-31; Lc. 23:13-25; Jn. 18:38—19:16)

6An Pilato akxni k'atan ixjun ixmakajuni watichicha tach'in yu ixtask'ini an lapanakni. 7An laka pulach'in ixtanun pumatam tach'in ixjunkan Barrabás, ixjat'atanun ixkompañerojnin yu ixtat'ajama'nininta akxni tat'alasalh jamach'alhkatni. 8Ts'anan tala'cha'alhi an Pilato, tajuniy li ma tacha a'tajcha ilhtuyi ka'ilhtulh. 9Pus an Pilato jajuniy:

―¿Lak'ask'inat'iti li akmakawlh an ixrejk'an judiojnin?

10Chuncha jajunilh an Pilato mu yucha ixjak'atsaaniya li an xalaj'ajin sacerdotejnin xliyu ixtalhima'axta'niy an Jesús li wa ixtaxkajiy. 11Wachuncha an xalaj'ajin sacerdotejnin tachiwiwalhi an lapanakni para li katajunilhi an Pilato li yucha an Barrabasi kamakawlh. 12Pus akxni jaxa'alapalh an Pilato, jajumpalay:

―¿Pus t'asuch'a nawnat ak'ilhtulh an yu unat li ixrejk'an judiojnini?

13Yu'uncha ixchuxk'ani talakt'asa'opalh tanajun:

―¡K'amakxt'ukmuk'acha laka cruz!

14An Pilato jajuniy:

―¿Tisuncha tala'alhini ilhtuta?

Pero yu'uncha wa palay p'as ixtalakt'asapalay ixtanajun:

―¡K'amakxt'ukmuk'acha laka cruz!

15Pus an Pilato mu sa'cha ixja'ulaputuni an lapanakni tacha an ixtala'talh'amanta, jamakawnilhcha an Barrabás. Chi an Pilato lhinawlhcha an Jesús li kastakcha ta'ayna'lhi, xli'astan ma'axta'lhicha para li kamakxtukmuk'akalhcha. 16Wachuncha an soldadojnin talhi'alhcha tan jalhi'ay junita an laka palacio tan tawlay jamach'alhkat, chi tat'alat'asanilhcha an ali'in ixt'asoldadojnink'an. 17Tamala'ch'inilhcha xmumuw la'ch'it, chi tama'tanulhcha corona de jalhtukun. 18Tsukulhcha tamat'asay ixtajuniy:

―¡K'ajama'alht'axt'uncha ixrejk'an judiojnin!

19Chi ixtala'pana'acha laka aktiyak chi ixtala'achujwaycha chi ixtatatso'ottaniycha, chi ixtatapayniniycha. 20Akxni stakcha tamamaxani'olh, tamaxtunicho'olhcha an xmumuw la'ch'it chi tamala'ch'inicho'olhcha an yu ixla'ch'it tukan. Xli'astan talhi'alhcha tan tamakxtukmuk'alhcha laka cruz.

Makxtukmuk'akalhcha an Jesús chi niilhcha

(Mt. 27:32-44; Lc. 23:26-43; Jn. 19:17-27)

21Pumatam lapanak yu ancha ixla'pust'ajun, wa tanuchilhka an la'acha'an, junkan Simón, jamacha'a Cirene, ixpayk'an Alejandro chi Rufo, ta'asi t'amalhi'anilhi an ixcruz an Jesús, 22tanchun junkan Gólgota, nawputun la Ixla'pa'axi Sue'elukut. 23Chi ixtama'ot'oputuncha jamaskajanti xaxkan uva yu ixtalhiyawnita mirra, pero jantu otlhi. 24Akxni tamakxtukmuk'alhcha an Jesús, an soldadojnin talamala'pitsilhcha an ixla'ch'it, wa ta'amanalh suerte, para li tuchini katalhi'alhcha atamj atamj. 25Wats'isini tamakxtukmuk'alh, katacha las nueve. 26An la ix'akpuxni ixtats'o'nitacha tuchini talhima'nilhcha, ixtats'o'nita: “IxRejk'an judiojnin”. 27Wachu jat'amakxtukmuk'akalh ixt'uyunk'an ja'alhawnan, ixtapiktutamincha ixjat'ayawkanta tan la ixcruzchak'an, lhilaxjama'xi chi tan oxi ixmaka'. [28Ts'awjcha tapasalh tacha an najunta la ixchiwinti Dios, tan najunta: “Wa tachanu wa aycha ma'lhta'alhini wachu talhimalakxtulh.”]

29Yu ancha ixtala'pusa xkayajcha ixtajuniy chi wili, wilicha ixtatalakpayajuy. Ixtajuniy:

―¡Li k'a'ixlakt'ilhi tajtan, chi li wa la'at'utu wilhchan, k'a'ixla'oxich'o'ocha! 30¡Chaway k'ama'alht'axt'uk'acha mi'akstu, ch'i k'at'a'alht'a'ut'icha an laka cruz!

31An xalaj'ajin sacerdotejnin chi an xamaestrojnin lhamap'a'sin chi an fariseojnin, wanajcha chuni ixtamamaxaniy, ixtajuniy:

―Ali'in jama'alhtaxtulh chi yucha jantucha layi ma'alhtaxtukan ix'akstu. 32¡Kata'alhtajulhcha an laka cruz an Cristo, xaRey Israel, kala'ts'inawcha, chuncha kakiklaka'iyawcha!

Chi masi an yu anchacha ixjat'amakxtukmuk'akanta, wachu ixtamamaxaniya an Jesús.

Nilhcha an Jesús

(Mt. 27:45-56; Lc. 23:44-49; Jn. 19:28-30)

33Atunkulhcha, taputs'isi'olhi chux an lakaat'un, sta las tres akxni ta'oxaycha. 34Pus las trescha an Jesús, p'asi chiwinilh, najun:

―Eloí, Eloí, ¿lama sabactani? ―nawputun: KiDios, kiDios, ¿t'asu li k'imak'a'unt'acha?

35Akxni ta'alha'asmatlhi an yu ancha ixtayanalh, talajuniy:

―¡Jo'! T'asaniy an Elías.

36Pumatam jats'alaj'alh, mala'ch'uch'uwalh la'atam wa tacha panimak laka vinagre, chi kinkach'imuk'alhcha ma'atam k'iw, para li kapuma'ot'ulhcha, chi jajuniy an ali'in:

―K'amak'a'unt'itcha, kala'ts'inawcha li kamina ma'alhtajunu an Elías.

37Walh an Jesús p'asi chiwimpalh, nilhcha. 38Wa akxni an la'ch'it yu ix'uk'alh an laka tajtan lht'it'in tapu'exli, aklht'uyi walh, an talhmani pu'a'taynichalh sta talaktsin. 39An ixkapitank'an an soldadojnin oxi la'ts'ilh an Jesús akxni t'asalh chi niilh, pus najun:

―Chun sawalh, ani lapanak isTs'alhi an Dios.

40Ali'in t'akunin wachu ani ixtayanalh wa ma'atcha ixtalaka'an. Ancha ixma'yalh an María Magdalena, chi an María yu ixnatik'an José chi Jacobo xalakat'ikt'i, chi pumatam t'aku yu ancha ixjat'ayapalh yucha an Salomé. 41Ani t'akunin ixtach'a'o'ayi an Jesús chi ixta'a'tayjuy akxni ixt'awnachalh Galilea, chi ali'incha t'akunin yu wachu ixtat'a'anta Jerusalén ancha wachu ixtayanalh.

Maknukalh an Jesús

(Mt. 27:57-61; Lc. 23:50-56; Jn. 19:38-42)

42Tats'isilhcha, chi mu akxni ixmala'asijnikan para li kajastaknankana katunkunanta, 43an José, jamacha'a Arimatea jantu talhanan, la'alhi an Pilato, kiisk'inilhi an ixlakatunaj an Jesús. Mu yucha wachu ixpakxan'iya an ixlich'alhkat Dios, chi yucha wachu ay lapanaki ixjunita an tan ix'alin lakchiwinti laka ay junta. 44Jantu ixliwilayi an pilato li ixnitacha an Jesús, pus t'asanilhi an ixcapitank'an soldadojnin chi lhisakmilhcha. 45An capitán juniya li chun sawalh, pus an José makawnikalhcha an ixlakatunaj an Jesús. 46Ixtamajutacha alhtam sábana, yuchacha pula'apamililh akxni ma'alhtajulhcha, chi maknulhcha tanchun ixtantilhpatakanta laktalhpa, an tan ixputanukan yawnilhcha aya chiwx. 47An María Magdalena chi an María ixnati José tala'ts'ini tan maknukalh.

Currently Selected:

SAN MARCOS 15: tpp

ማድመቅ

ያጋሩ

ኮፒ