Susumo 14
14
Abram a sey Lɔt
1E jeng de Amrafɛl, gbɔng gwɔ̀m Babilɔn, na Ariyɔk, gbɔng gwɔ̀m Ɛlasar, na Kɛdor-Lawɔmɛr, gbɔng gwɔ̀m Ɛlam, tanga Tidal, gbɔng gwɔ̀m Gɔyim, 2yɛn benaas ba wɔ́, na be bin to como tanga begwɔ̀m betungun: Bera, gwɔ̀m Sɔdɔm, na Birsha, gwɔ̀m Gɔmɔra, na Shinap, gwɔ̀m Adma, na Shɛmɛbɛr, gwɔ̀m Zɛbɔyim, tanga gwɔ̀m Bela. Bé tâng repomo mo, à Zowar a remo. 3Mwa begwɔ̀m vemo betungun ba wuna tó mɛn e nɛk Sidim, wɛ à Gbɔng Rep Nevwashe a remo, na be bin wɔ tó como. 4Yɛn a kana sè e nɛ̂n gbɔng gwɔ̀m Kɛdor-Lawɔmɛr neshey kuru na nɛ neba, ko e shey hê kuru na hɛ tat yɛn a kyɛ́ ɛn, ba sogo nehywɛ.
5E ji shey hê kuru na he naas Kɛdor-Lawɔmɛr tanga begbɔng begwɔ̀m de ba wuna hɛn na yɛ ba vey to como. Ba susu di wɛng e ra BeRɛfa e Ashtɛrɔt-Karnayim, na BeZus e Ham, na BeƐmi e tyɛl Kiriyatayim, 6na BeHori e vwêl bahwôl Seyir wɔ̀ sɛ̀ Ɛl-Paran pere wɔ wul hey. 7E bama mo, yɛn a to ɛn, ba raa rwa bato vey e Ɛn-Mishpat de be tang hɛ, à Kadɛsh a remo. Yɛn a re neyɛnɛ̂ vwêl BeAmalɛk mwa na como, tanga BeAmɔr arɔng de ba sé na sangal e Hazazɔn-Tamar.
8Ano kwong, begwɔ̀m Sɔdɔm, na Gɔmɔra, na Adma, na Zɛbɔyim, tanga Bela ba nusu na bemât como mɛn, yɛn a tó como e nɛk Sidim, 9na begbɔng begwɔ̀m bavwêl Ɛlam, na Gɔyim, na Babilɔn, tanga Ɛlasar, begbɔng begwɔ̀m benaas e ra begwɔ̀m betungun. 10Nɛk o wa vɔk ɛ̀ bavɔng pyak de ba sɛ̀ ɛ̀ kwolta. A sé e ji bavɔng o de begwɔ̀m Sɔdɔm tanga Gɔmɔra ba yel ɛ jeng de ba tele yi e de como. Bwang mɛn ba tele, ba wɔ̀ dalas e beraku. 11Ano de bemât repugu mɛn ba di wɛng e ra yɛn, ko ba hashe pyɛ̂ mwa e ji Sɔdɔm na Gɔmɔra, tanga pyɛ̂ re mɛn mwa, ba kyè mɛ̀. 12Yɛn a vo Lɔt arɔng, hwêy gwà Abram, de a sé sangal e Sɔdɔm. Ba kyè na yɛ na pyɛ̂ nedanerey mɛ mwa.
13Ko mwat hwak de a hywit ɛ a vey, a ha a Abram, WoIbrani, yɛ de a sé na sangal e kwɔ̂n cɔ́gɔt ouk yê Mamrɛ WoAmɔr. Mamrɛ na begwa mɛ Ɛshkɔl tanga Anɛr, yɛn a wuna to na Abram. 14Jeng de Abram a wok, ba ga vo cang mɛ e de como, a hwo jut bemat naga betat na kuru na vɛ rwit (318) de ba tɔk râ como. Mwa hɛn de ba tɔs ɛn e lɔ mɛ. Yɛn a raa bol begbɔng begwɔ̀m benaas vane wɔ̀ sɛ̀ bak vwêl Dan. 15Yɛn a wul, ko a gas bemat mɛ bazap o, a hwo e ra bemât repugu mo e ji turuk o, ko a di wɛng e ra yɛn. A ró ɛn pere wɔ̀ sɛ̀ mɛ̀ Hoba e rwa batô Damaskus. 16A to sey ɛ̀ pyɛ̂ mwa de ba ga kana hashe, ko a to toyo na Lɔt, cang mɛ, na pyɛ̂ nedanerey mɛ, na beha, tanga bwâng bemat de ba kana vos.
Mɛlkisɛdɛk a tɛ̀ a Abram nerat
17Jeng de Abram a toyo e bamâ dî wɛng e ra Kɛdor-Lawɔmɛr tanga begbɔng begwɔ̀m betat de ba sé tanga yɛ, gwɔ̀m Sɔdɔm a nusu, na a vey man na yɛ e Nɛk Shavɛ, de be to tang wɛ, à Nɛk Gwɔ̀m. 18Ko Mɛlkisɛdɛk a vey arɔng. Yɛ à gwɔ̀m Salem, a to sé piris Dagwi De A Dal Na Reto Mwa. A vɔk a Abram kpam-tuk tanga nshî anap. 19Ko a tɛ̀ a yɛ nerat, a ye,
“Tik na Dagwi a tɛ̀ a yɛ nerat,
yɛ Dagwi De A Dal Na Reto Mwa,
yɛ de a yong lagwi tanga jey!
20Tik na be somo Dagwi,
Yɛ De A Dal Na Reto Mwa,
yɛ wɛ de a nɔng o wɛng e ra bemât repugu mō!”
Abram kwong a nɔ̂ng Mɛlkisɛdɛk pyɔlɔ̂ kayɛ pyɛ jining e ji pyɛ́ kuru.
21Ko gwɔ̀m Sɔdɔm a yâng Abram, “Nɔ́ng me bemat hom, ko hwo vɔk pyɛ̂ mwa.”
22Ko Abram a toyo a yɛ, “Ma ga kana sira me e nuyêl Dagwi Darwey, Dagwi De A Dal Na Reto Mwa, yɛ de a yong lagwi tanga jey: 23Ma rɔda ró mɛ̀ na pyɛ cak de ya sé myo wɛt, kɛ a ka sé keshwey kɛ retsɛ̂p kpatak ayi. Ano hwà rɔda vɔk nu wɛt, na hwo ye, ‘Me wɛ, ma tɛ̀ Abram a tɛ́ ɛ darwey.’ 24Ma rɔda jut pyɛ cak yaga me pyɛ hom wɛt, sɛ̌ pyɛ́ de bemat hom ba ga kana re. Ko tik na Anɛr, na Ɛshkɔl tanga Mamrɛ de yɛn a kyè tanga me be jut numo mɛn.”
Currently Selected:
Susumo 14: bomBI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
