Madyu 4
4
Seden, Jisas nɨp gasɨ ñɨnö nan si nan naij gɨnɨm a göm nɨŋa
(Mak 1:12-13; Luk 4:1-13)
1Ñɨn anɨbu God Ana u, Seden nɨbi bɨ gau kalɨp pör gɨmɨdöp rö, Jisas nɨp u rö nöp gɨnɨm a göm, Jisas nɨp uɫ gɨ, ram mɨnöŋ nɨbi bɨ mɨdagmɨdal, ram mɨnöŋ kabö nöp mɨdöp aŋ gau ud arö, Seden nɨpe Jisas nan si nan naij rɨmnap gɨnɨm aka göm ga.#Hib 2:18; 4:15 2Jisas ram mɨnöŋ nöp aŋ anɨb gau nan ñɨŋöm wasö, ñɨn unbö ñɨn juöl mɨhöp (40) mailö abe sɨbön abe yɨharɨŋ nöp mɨdeia. Anɨg göm yɨharɨŋ nöp mɨdö, nɨp kɨyö kub yabɨƚ u gö,#Eks 34:28 3Seden Jisas nɨp gasɨ ñɨnö, naij gɨnɨm a göm apöm, Jisas nɨp haga, “Yad God Ñɨ nɨpe mɨdpin a gɨpan u, kabö gai i hagö, bred rö laŋ,” a ga. 4Hageia, Jisas pen haga, “God Manö u kalɨ kƚiñ rɨköm hagla,
‘Nɨbi bɨ gau, bred nöp ñɨŋöm
kamɨŋ mɨdageinaböl;
God manö hagöp anɨbu magöŋhalö nɨŋ udöm me,
kamɨŋ mɨdeinaböl,’ a gɨla,” a ga.#Dud 8:3
5Jisas anɨg hagö, kɨjaki Jisas nɨp uɫ gɨ dam daun kub uɫ Jerusalem amöm, God sabe gep ram i adö gɨlaŋ gɨla u löm haga, 6“Yad God Ñɨ nɨpe mɨdpin a gɨpan u, ujaŋdi mɨnöŋ yaŋ lɨ. God Manö u kalɨ kƚiñ rɨköm hagla,
‘God ejol nɨpe gau hagö, nöp ñɨmagö kale udeinaböl me,
kabö ma nöp u bɨnɨŋ gagnab,’ a gɨla,” a ga.#Sam 91:11-12
7Hageia, Jisas pen haga, “Wasö! God Manö u manö rɨmnap halö kalɨ kƚiñ rɨköm hagla, ‘God Bɨ Kub u, nɨpe bɨ nɨŋö aka bɨ pir alep, a gagmim,’ a gɨla,” a ga.#Dud 6:16
8Hagö, Seden Jisas nɨp dam dum kub yabɨƚ ap amöm, ram mɨnöŋ aij aij bɨ kub ke ke abadpal gau Jisas nɨp yamöm haga, 9“Ne kugom yɨmmön, hib yad hagö adö laŋ arö, yad ram mɨnöŋ anɨb gai i magöŋhalö nape nöp ñɨnabin,” a ga.
10Hageia, Jisas Seden nɨp haga, “Ne ke gau aru! God Manö u kalɨ kƚiñ rɨköm hagla, ‘God Bɨ Kub hib nɨpe u nöp hagpe adö arnɨm; wög nɨp nöp gɨmim,’ a gɨla,” a ga.#Dud 6:13
11Jisas anɨg hageia nɨŋöm kɨjaki, Jisas nɨpe nan naij rɨmnap gɨnɨm a göm gɨ gɨ wasö nɨŋöm, nɨp arö göm arö nɨŋöl gɨ, ejol rɨmnap apöm, nɨp ap aɫ ba göm abad mɨdeila.
Jisas ram mɨnöŋ Galili iƚ göm nɨbi bɨ gau God manö hag ña
(Mak 1:14-15; Luk 4:14-15)
12Ñɨn anɨbu Jon bɨ ñɨg pak ñeb u nɨp nagɨ leila, Jisas manö anɨbu apdi nɨŋöm, ram mɨnöŋ Galili ado gɨ ara.#Mad 14:3; Mak 6:17; Luk 3:19-20 13Amöm daun nɨpe Nasared am mɨdageia; am mɨdeia daun pro Kapaneam, ram mɨnöŋ Sebyulan Napdalai aŋ au mɨdöp Ñɨg Waŋö Galili goƚ au. 14Jisas ram mɨnöŋ anɨbu amöm, nɨbi bɨ gau kalɨp manö aij u hag ñɨ ajmɨdöp u me, bɨ God manö hagep Aisaia gɨnab a göm kalɨ kƚiñ rɨka rö nöp ga. Nɨpe haga,
15-16“Ram mɨnöŋ Sebyulan abe Napdalai abe, Ñɨg Waŋö Galili goƚ au,
Ñɨg Jodan sɨdö wad arab böŋ lau,
Juda nɨbi bɨ wasö ram mɨnöŋ Galili au mɨdpal gau
kale mailö kub yabɨƚ nɨŋbal.
Sɨbön gau mɨdöm umöl rö la u
pen mailö kub u hadö nɨŋbal,” a ga.#Ais 9:1-2
17Jisas ñɨn anɨbu iƚ göm, nɨbi bɨ gau kalɨp God manö aij u hag ñɨ ajöl gɨ haga, “Nan si nan naij gɨpim adö u, nɨhön gɨnɨg anɨg gɨpun a gɨmim, arö gɨmim. Söl mɨdöp, God nɨbi bɨ udöm kumi kabö adö laŋ au abad mɨdeinab; ñɨn hain pör abad mɨdmɨdim u, mɨñi auöp!” a ga.#Mad 3:2; 19:27
Jisas bɨ mɨhau mɨhau, “Kale yad aip aumim,” a ga
(Mak 1:16-20; Luk 5:1-11)
18Jisas Ñɨg Waŋö Galili goƚ adö au ap lug aramöm nɨŋa, bɨ kabsaƚ udep mamil mɨhau, uben yumil kabsaƚ udailö. Bɨ madöl mɨhau, nɨmam ap hib nɨpe u Saimon, nɨmam ap hib nɨpe u Edru. Saimon nɨp hib ap Pida a gɨmɨdal. 19Jisas kalɨp mɨhöŋ nɨŋöm haga, “Yɨp hain gɨmil. Yad kalöp gɨnö, kale mamil mɨhau, kabsaƚ udep bɨ wasö, nɨbi bɨ udep bɨ mɨdeinabil,” a ga. 20Hagö, haga rö nöp nɨŋmil, kabsaƚ udailö uben gau arö gɨmil, Jisas aip ajmɨdil.
21Pen magö ap rapɨn amöm nɨŋa, Jems aip Jon aip nap Sebedi aip ñɨg magɨb mɨgan u apɨlap mɨdöl göm, uben ƚuöl udöl gɨ mɨdeila. Jisas nɨŋöm, kalɨp mɨhöŋ wɨñ alö, 22kale nap Sebedi ñɨg magɨb au arö gɨmil, Jisas aip arla.
Jisas gau ajöm nɨbi bɨ kalɨp manö hag ña
(Luk 6:17-19)
23Jisas ram mɨnöŋ Galili aŋ gau gɨ ajöl göm, Juda magum gep ram gau gau amöm, God nɨbi bɨ udöm abad mɨdeinab manö aij u, nɨbi bɨ gau kalɨp hag ñɨ ajöl gɨ, nan nɨhön nɨhön nɨbi bɨ gau kalɨp ga gau gö kamɨŋ lɨmɨdöp.#Mad 9:35; Mak 1:39; Ap 10:38 24Anɨg gö, ram mɨnöŋ Siria nɨbi bɨ gau magöŋhalö manö anɨbu nɨŋöm, nɨbi bɨ nan nɨhön nɨhön ga gau daulö, Jisas gö kamɨŋ lɨmɨdöp. Nɨbi bɨ anɨb gau, rɨmnap nan ga; rɨmnap hañ romaŋ ilön kub ga; rɨmnap kɨjaki abaŋ ala; rɨmnap amgö mɨmainö auö, ap lug paköm gɨl gɨl gɨmɨdal; rɨmnap ñɨn ma kɨƚa ga; pen nɨbi bɨ nan nɨhön nɨhön ga gau daulö, Jisas gö magöŋhalö kamɨŋ la.#Mak 6:55 25Pen Galili nɨbi bɨ löm, Dekapolis nɨbi bɨ löm, Jerusalem nɨbi bɨ löm, Judia nɨbi bɨ löm, ñɨg Jodan nö lödaŋ au nɨbi bɨ löm, iru nöp Jisas arö nɨŋöl gɨ, hain arla.#Mak 3:7-8
Currently Selected:
Madyu 4: kpw
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2005, Wycliffe Bible Translators, Inc. All rights reserved.
