Hechos 8
8
Ni sondikin Saulo ñayiu ka skuaꞌa
1Te Saulo, chi ni junkuaan ini de ja ni ka jaꞌni de Esteban. Te vi kiuu yun ni jinkondee tnundoꞌo siki ñayiu ka skuaꞌa ja ka oo Jerusalén. Te ndiꞌi ñayiu ka skuaꞌa yun ni ka ndutenuu kuaꞌankuei sava ñuu ja tnii Judea, vi sava kuaꞌankuei ñuu ja tnii Samaria, te nani tee ni chitniuu ña Jesús ni ka kendoo. 2Te ni ka oo tee ka chiñuꞌu ia Dios ja ni ka tayuꞌu de yiki kuñu Esteban, te ni ka ndaꞌi ni ka kana de ja ni jiꞌi de. 3Yun te ni saꞌa Saulo ja ni oo kuaꞌa tnundoꞌo siki ñayiu ka skuaꞌa, chi ni jika de veꞌe veꞌe, ni okakuiko de ñayiu yun, kuu teyii kuu ñasiꞌi, te ni otnaa ña de vekaa.
Ni kenta tnoꞌo vaꞌa Jesús nuu ñayiu Samaria
4Su ñayiu ni ka yagua ja kuaꞌankuei inka ñuu, chi ndiꞌi nuu ñayiu ñuu jinokuei ka kaxtnoꞌi tnoꞌo vaꞌa Jesús. 5Yun te makenuu Felipe kuaꞌan de ñuu kaꞌnu Samaria, te yun ni kaxtnoꞌo de nuu ñayiu tnoꞌo vaꞌa Kristu, ia ni tetniuu Dios. 6Te ni ka okututu kuaꞌa ñayiu ka nini guaguaꞌi tnoꞌo kaꞌan Felipe yun, ka nini vi ka ndiaꞌi javii javaꞌa saꞌa ia Dios jin maꞌñu sagua de. 7Chi kuaꞌa ñayiu ka ñuꞌu ña tachi ni ka nduvaꞌa, te vi ka kana koꞌo tachi yun, te kanakuei ña jin ñayiu yun. Te suni kuaꞌa ñayiu ni ka ndutuchiin vi ñayiu ka kuꞌu siꞌin ni ka nduvaꞌa. 8Te yun guaa ni ka kusii ndevaꞌa ini ñayiu ñuu yun.
9Suni ñuu Samaria yun ni oo in tee nani Simón, tee ni oskuaꞌa tnoꞌo tasi ndee ama ka, te ni xndaꞌu de ñayiu yun ja in tee kaꞌnu kuu de. 10Ndiꞌi ñayiu ni ka onini guaꞌa tnoꞌo kaꞌan de ndee ñayiu naꞌnu vi ndee ñayiu kuechi ka, te ka kaꞌin:
―Tee yaꞌa kuu tee ni niꞌi tniuu kaꞌnu nuu maa ia Dios.
11Te ni ka onini ñayiu tnoꞌo kaꞌan de, chi kuaꞌa ndevaꞌa kuia ni oxndaꞌu ña de jin tniuu tasi ni osaꞌa de yun. 12Su nuu ni kaxtnoꞌo Felipe tnoꞌo vaꞌa naxa tatnuni ia Dios, vi tnoꞌo maa Jesukristu, te ni ka kandija ñayiu, guaa ni ka jandute teyii vi ñasiꞌi. 13Te suni ni kandija maa Simón yun, te ni jandute de, te ndiꞌi kiuu ni ka oo de jin Felipe, vi ni osaꞌu kuii ini de ni ondiaꞌa de javii javaꞌa vi jakaꞌnu ja ni osaꞌa tee yun.
14Te nuu ni ka onini tee ni chitniuu Jesús ka oo Jerusalén ja ñayiu Samaria ni ka kandija tnoꞌo vaꞌa ia Dios, te ni ka tetniuu de Pedro jin Juan ja kuaꞌankuei de ñuu yun. 15Su nuu ni jinokuei de, te ni ka ndakuatu de nuu ia Dios ja jaꞌa ñayiu ka kandija ja ka oo ñuu yun, nagua ja na vi niꞌi Espíritu ia Dios. 16Chi chiaꞌan ka ja kii Espíritu ia Dios siki ni in ñayiu yun, chi suaꞌa ni ni ka jandutei jin sivi Jesús. 17Yun te ni ka sonee Pedro jin Juan ndaꞌa de siki ñayiu yun, te ni ka niꞌi Espíritu ia Dios.
18Te nuu ni jini Simón ja ni ka niꞌi ñayiu Espíritu ia Dios nuu ni ka sonee Pedro vi Juan ndaꞌa de, te ni skanduu Simón xuꞌun nuu nduu tee yun ja ndakiꞌin de tniuu kaꞌnu yun. 19Te jiñaꞌa de:
―Vi taa ni jakaꞌnu jian na konevaꞌa san, nagua ja suni ndee ni ñayiu xiin siki sonee san ndaꞌa san, te niꞌi Espíritu ia Dios ―jiñaꞌa Simón.
20Yun te jiñaꞌa Pedro:
―Junaa ni jin xuꞌun ni, chi ni ndakani ini ni ja in nagua kutaꞌuo nuu ia Dios, te kiꞌon jin xuꞌon. 21Su maa ni, chi tu na tniuu ni ja nagua niꞌi ni, ni ja konevaꞌa ni nuu tniuu kaꞌnu yaꞌa, chi tu oo ndaa anu ni nuu ia Dios. 22Ndatnaꞌu ini ni nuu jakueꞌe yaꞌa, te kakantaꞌu ni nuu ia Dios axi saa naxa kuakaꞌnu ini ya ja siun ndakani ini ni jin anu ni. 23Chi ndiaꞌa san ja kukuasun ndevaꞌa ini ni, te jasi ña jakueꞌe jasuaꞌa jian jin ni ―jiñaꞌa Pedro.
24Yun te jiñaꞌa Simón:
―Vi kakantaꞌu ni ja jaꞌa san nuu Jitoꞌo, nagua ja ma kii tnoꞌo xeen ni kaꞌan ni jian siki san ―jiñaꞌa de.
25Yun te nuu ni ka ndakani Pedro vi Juan naxa saꞌa Jesús vi tnoꞌo vaꞌa ya, te ni ka ndajiokuiin de kuanoꞌokuei de Jerusalén. Su nuu kuanoꞌokuei de, te ni ka kaxtnoꞌo de tnoꞌo vaꞌa Jesús nuu ñayiu ka oo kuaꞌa ñuu kueli ja tnii Samaria.
Ni kaxtnoꞌo Felipe nuu tee netniuu ñuu Etiopía
26Yun te in ia jinokuechi nuu Jitoꞌo ni kaꞌan jin Felipe, te jiñaꞌa ya:
―Ndakoo te kuaꞌan ichi ja kee Jerusalén ja kuaꞌan ñuu Gaza, ja yaꞌa kuaꞌan ichi ñuꞌu teꞌa.
27Yun te ni ndakoo Felipe te kuaꞌan de, te ichi yun ni ka junkuntnaꞌa de jin in tee Etiopía ja nee de in tniuu kaꞌnu, chi yindaꞌa de xuꞌun Candace, ñaꞌa kuu reina ñuu Etiopía yun, te ni ndajiokuiin tee yun ja ni oo de Jerusalén nuu ni chiñuꞌu de ia Dios. 28Te nuu ni ndajiokuiin de kuanoꞌo de ñuu de nukoo de nuu carreta de, te kaꞌu de nuu tutu ii ni tee Isaías, tee ni ndakani tnoꞌo ia Dios ndee janaꞌa.
29Te jiñaꞌa Espíritu ia Dios nuu Felipe:
―Majintnaꞌa yatni carreta jian.
30Te nuu ni juntnaꞌa ña Felipe, te ni onini de kaꞌu tee Etiopía yun nuu ni tee Isaías, tee ni ndakani tnoꞌo ia Dios ndee janaꞌa, te jiñaꞌa de:
―¿A jinkuiꞌnu ini ni naxa kaꞌan nuu tutu kaꞌu ni jian?
31Te jiñaꞌa tee Etiopía yun:
―¿Naxa jinkuiꞌnu ini sein, te tu na in kaxtnoꞌo?
Yun te ni kaꞌan de jin Felipe ja na kaa de nuu carreta de, te na jinkoo de xiin maa tee yun. 32Te nuu tutu ii kaꞌu de yun yoso suaꞌa:
Ni ka jaka ña ñayiu jin de na kuinio in ndikachi ja kuu ti,
vi na kuinio in lelu ja tu ndaꞌi ti nuu ka sete ti.
Te saa tu ni june de yuꞌu de ja kaꞌan de.
33Te ni ka saꞌa ndaꞌu ndevaꞌa ña jin de.
Tu na ni saꞌa ndaa siki de.
Te tu na in kondakakuneꞌe ndikin tata de,
chi ni ka jaꞌni ña jin de ja ma koo ka de nuu ñuyiu yaꞌa,
suaꞌa ni tee Isaías nuu kaꞌu tee yun.
34Yun te ni jikan tnoꞌo ña tee Etiopía yun jin Felipe, te jiñaꞌa de:
―Jikantaꞌu san ja kaxtnoꞌo ni: ¿Na in kaꞌan jin tee ni ndakani tnoꞌo ia Dios ndee janaꞌa yaꞌa, a siki maa de axi siki inka ñayiu?
35Yun te ni jinkondee Felipe ndee nuu kaꞌu maa tee Etiopía yun, ni kaxtnoꞌo de tnoꞌo vaꞌa Jesús, ja jaꞌa maa ya kuu ja kaꞌan nuu tutu ii yun, jiñaꞌa de. 36Te kuaꞌankuei de ichi yun, te ni kentakuei de guaa ndee nuu ñuꞌu ndute, te jiñaꞌa tee Etiopía yun:
―Yaꞌa ñuꞌu ndute. ¿Nagua kuu ja jaꞌni ña jin san ja kuu kuandute san?
37Te jiñaꞌa Felipe:
―Nuu ja kandija ni ndiꞌi ni jin anu ni, te kuu kuandute ni.
Te ni kaꞌan tee Etiopía yun:
―Kandija san ja Jesukristu kuu Seꞌe ia Dios.
38Te ni tatnuni de ja ni ka junkani carreta yun. Te nduu de ni kekuei nuu ndute, te ni skuandute ña Felipe jin tee Etiopía yun. 39Su nuu ni nanakuei de nuu ndute yun, te vi sanaa ni ni ndakuaka ña Espíritu Jitoꞌo jin Felipe, te tu ni jini uun ka ña tee Etiopía yun. Su kusii ndevaꞌa ini de kuanoꞌo de. 40Su Felipe, chi vi sanaa ni ni ndenta de ñuu Azoto. Te nuu ni yaꞌa de yun, ni kaxtnoꞌo de tnoꞌo vaꞌa Jesús nuu ñayiu ndiꞌi ñuu yun guaa ndee ni ndenta de ñuu Cesarea.
Currently Selected:
Hechos 8: xtnNTplus
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016, Wycliffe Bible Translators, Inc. All rights reserved.
