Yauhas 1
1
Txojlus Uas Cawm Neeg Txojsia
1Thaum chivkeeb, Txojlus twb yeej muaj nyob lawm; Txojlus ibtxwm nrog Vajtswv nyob, thiab Txojlus ntawd yog Vajtswv. 2Thaum chivkeeb, Txojlus yeej ibtxwm nrog Vajtswv nyob. 3Vajtswv tsim ibpuas tsavyam los ntawm Txojlus ntawd; yog tsis muaj Nws, ibpuas tsavyam ntawd yeej yuav tsis muaj ib yam twg uas yuav tshwmsim tau los li. 4Txojlus yog lub hauvpaus txojsia,#1:4: Txojlus yog lub hauvpaus txojsia; lossis Yam uas tsim tau los ntawd ua kom txojsia cog ruaj rau ntawm Txojlus. thiab txojsia ntawd yog qhov kaj rau neeg pomkev. 5Qhov kaj ntawd ci hauv qhov tsaus, thiab qhov tsaus yuav kov tsis yeej qhov kaj.
6Vajtswv txib ib tug txivneej uas yog Nws tus tub cevlus hu ua Yauhas 7los ua timkhawv txog qhov kaj, kom txhua tus thiaj tau hnov Txojlus ntawd thiab ntseeg. 8Yauhas tsis yog qhov kaj; nws tsuas los ua timkhawv txog qhov kaj xwb. 9No thiaj yog qhov kaj uas tseeb tiag: qhov kaj tau los rau hauv lub ntiajteb thiab ci rau txhua haivneeg.
10Txojlus twb los nyob hauv ntiajteb no lawm, thiab Vajtswv tsim lub ntiajteb no yog los ntawm Nws, tiamsis neeg ntiajteb tsis paub Nws. 11Nws los rau hauv Nws lub teb lub chaw, tiamsis Nws haivneeg tsis lees yuav Nws. 12Tiamsis txhua tus uas los lees yuav Nws thiab ntseeg Nws, Nws pub lawv muaj cai los ua Vajtswv cov menyuam. 13Lawv tau los ua Vajtswv cov menyuam tsis yog rawsli neeg nqaijtawv ibtxwm muaj menyuam, uas yog muaj niam muaj txiv yug; tiamsis Vajtswv tuskheej yog lawv txiv ntag.
14Txojlus ntawd tau los yug ua neeg, Nws puvnpo txoj hmoovhlub thiab qhov tseeb, thiab Nws nyob nruabnrab hauv peb. Peb pom Nws tus tshwjchim ci ntsa-iab, Leejtxiv pub tus tshwjchim ntawd rau Nws, rauqhov Nws yog Leejtxiv tibleeg Tub.
15Yauhas ua timkhawv txog Tus ntawd zaj. Nws qw nrov-nrov hais tias, “Tus no lau, yog tus uas kuv qhia rau nej lawm hais tias, ‘Nws lawv kuv qab los, tiamsis Nws muaj hwjchim loj dua kuv, rauqhov Nws yeej ibtxwm muaj nyob uantej yug kuv lawm.’ ”
16Los ntawm Nws txoj hmoovhlub uas nplua-mias, Nws thiaj foom koobhmoov rau peb sawvdaws, pub koobhmoov rau peb ib zaug dhau rau ib zaug. 17Vajtswv muab txoj Kevcai rau peb los ntawm Mauxes, tiamsis Nws muab txoj hmoovhlub thiab qhov tseeb rau peb los ntawm Yexus Khetos. 18Yeej tsis tau muaj leejtwg pom Vajtswv ib zaug li. Tsuas yog Leejtub uas yog Vajtswv thiab nyob ntawm Leejtxiv lub xubntiag, thiaj qhia Vajtswv rau sawvdaws paub xwb.
Yauhas Tus Uas Muab Neeg Ua Kevcai Rausdej Tej Lus Qhia
(Mathais 3:1-12; Malakaus 1:1-18; Lukas 3:1-18)
19Cov Yudais cov nomtswv uas nyob hauv lub nroog Yeluxalees tso cov povthawj hlob thiab cov Levis qeeleej mus nug Yauhas hais tias, “Koj yog leejtwg?”
20Yauhas teb qhov tseeb thiab lees hais tias, “Kuv tsis yog tus Mexiyas.”
21Lawv nug hais tias, “Yogli, koj ho yog leejtwg? Koj puas yog Eliyas?”
Yauhas teb tias, “Kuv tsis yog.”
Lawv nug hais tias, “Koj puas yog tus xibhwb cev Vajtswv lus?”#1:21: tus xibhwb cev Vajtswv lus Yog tus uas tos kom tshwm los thiab tshajtawm hais tias tus Mexiyas yuav los.
Yauhas teb tias, “Kuv tsis yog.” #Mlakis 4:5; 2Kev 18:15, 18
22Lawv hais tias, “Yogli, koj qhia rau peb seb koj yog leejtwg tiag, peb thiaj paub rov mus qhia rau cov uas txib peb tuaj. Koj qhia seb koj yog leejtwg?”
23Yauhas teb lawv rawsli Yaxayas, uas yog tus xibhwb cev Vajtswv lus tau sau tseg li no:
“Kuv yog ‘lub suab ntawm ib tug neeg uas qw nrov-nrov
tom roob mojsab qhua hais tias:
Ciali kho txojkev kom ncaj rau tus Tswv taug!’ ”
24Cov neeg uas cov Falixais txib mus ntawd,#1:24: Cov neeg uas cov Falixais txib mus ntawd; lossis Cov neeg uas raug txib mus ntawd puavleej yog cov Falixais. 25lawv thiaj nug Yauhas hais tias, “Yog koj hais tias koj tsis yog tus Mexiyas, tsis yog Eliyas, thiab tsis yog tus xibhwb cev Vajtswv lus, vim licas koj ho muab neeg ua kevcai rausdej?”
26Yauhas teb tias, “Kuv muab neeg ua kevcai raus los ntawm dej, tiamsis muaj ib tug nrog nej nyob ntawm no, nej twb tsis paub Nws. 27Nws yog tus uas tabtom lawv kuv qab los, txawm yog Nws nkawm khau xwb los kuv twb tsis tsimnyog mus daws txoj nyuag hlua.”
28Txhua yam no tshwmsim hauv lub zos Npethanis uas nyob ntawm ntug dej Yauladees sab hnubtuaj, uas yog qhov chaw Yauhas muab neeg ua kevcai rausdej.
Vajtswv Tus Menyuam Yaj
29Hnub tomqab, Yauhas pom Yexus taug kev tuaj rau ntawm nws, Yauhas thiaj hais tias, “Nej saib seb, tus ntawd yog Vajtswv tus menyuam Yaj uas yuav ris neeg ntiajteb lub txim! 30Tus no ntag lau, yog tus uas kuv qhia hais tias, ‘Muaj ib tug tabtom lawv kuv qab los, Nws muaj hwjchim loj dua kuv, rauqhov Nws yeej ibtxwm muaj nyob uantej yug kuv lawm.’ 31Kuv tsis tau paub tias Nws yuav yog leejtwg, tiamsis kuv los muab neeg ua kevcai raus los ntawm dej kom cov Yixalayees paub Nws.”
32Yauhas ua timkhawv hais tias, “Kuv pom Vaj Ntsujplig zoo ib yam li tus nquab los saum ntuj los nyob saum Nws. 33Kuv tseem tsis tau paub tias Nws yog leejtwg, tiamsis Vajtswv tus uas txib kuv los muab neeg ua kevcai rausdej hais rau kuv tias, ‘Koj yuav pom Vaj Ntsujplig los thiab tsaws rau saum ib tug txivneej; Nws yog tus uas yuav muab neeg ua kevcai raus hauv Vaj Ntsujplig tus Dawbhuv.’ ” 34Yauhas hais tias, “Kuv twb pom Nws lawm, thiab kuv qhia rau nej hais tias, Nws yog Vajtswv tus Tub.”
Yexus Thawj Cov Thwjtim
35Hnub tomqab, Yauhas rov nrog nws ob tug thwjtim sawv uake ntawm qhov chaw ntawd dua, 36thaum ntawd nws pom Yexus taug kev tuaj. Nws thiaj hais tias, “Nej saib seb, tus ntawd yog Vajtswv tus menyuam Yaj!”
37Yauhas ob tug thwjtim hnov Yauhas hais li ntawd, ces nkawd txawm nrog Yexus mus lawm. 38Yexus tig thiab pom nkawd tabtom lawv Nws qab, Nws thiaj nug nkawd hais tias, “Neb nrhiav dabtsi?”
Nkawd teb tias, “Lanpis,” (Lolus no txhais hais tias “Xibhwb”) “Koj so qhovtwg?”
39Yexus teb tias, “Los saib maj.” (Thaum ntawd yog plaub teev hnubqaij.) Yogli ntawd, nkawd thiaj nrog Yexus mus thiab pom qhov chaw uas Yexus nyob, thiab siv sijhawm ib hnub nkaus nrog Yexus nyob.
40Ob tug ntawd, muaj ib tug yog Asnrus, uas yog Ximoos Petus tus kwv. 41Tamsim ntawd Asnrus txawm mus ntsib nws tus tijlaug Ximoos thiab hais tias, “Wb twb ntsib tus Mexiyas lawm.” (Lolus Mexiyas no txhais hais tias “Khetos.”) 42Ces Asnrus thiaj coj Ximoos mus cuag Yexus.
Yexus ntsiantsoov Ximoos thiab hais tias, “Koj lub npe hu ua Ximoos uas yog Yauhas tus tub, tiamsis yuav muab koj hu ua Kefas.” (Lub npe Kefas kuj zoo tibyam li Petus thiab, lub npe ntawd txhais hais tias “lub pobzeb.”)
Yexus Hu Filiv Thiab Nathana-ees
43Hnub tomqab Yexus tau txiavtxim siab mus rau pem Kalilais. Nws mus pom Filiv thiab Nws hu Filiv hais tias, “Koj ciali nrog Kuv mus!” ( 44Filiv yog tuaj hauv lub nroog Npexaidas tuaj, uas yog lub nroog uas Asnrus thiab Petus nkawd nyob.) 45Filiv mus nrhiav tau Nathana-ees thiab hais rau nws hais tias, “Peb twb ntsib tus uas Mauxes sau nyob rau hauv phau ntawv Kevcai thiab cov xibhwb cev Vajtswv lus sau txog Nws lawm. Nws yog Yexus, Yauxej tus tub, uas yog neeg Naxalev.”
46Nathana-ees nug Filiv hais tias, “Puas yuav muaj ib yam dabtsi zoo uas tshwm tau hauv Naxalev tuaj maj?”
Filiv teb tias, “Los saib maj.”
47Thaum Yexus pom Nathana-ees tabtom tuaj cuag Nws, Nws txawm hais txog Nathana-ees hais tias, “Tus no lau, yog tseem-tseem neeg Yixalayees; nyob hauv nws yeej tsis muaj kev dag li!”
48Nathana-ees nug Yexus hais tias, “Koj paub kuv tau licas?”
Yexus teb tias, “Kuv twb pom koj thaum koj nyob hauvqab tsob txiv ncuavpias uantej uas Filiv hu koj lawm.”
49Nathana-ees teb tias, “Xibhwb, Koj yog Vajtswv tus Tub! Koj yog cov Yixalayees tus vajntxwv tiag!”
50Yexus hais rau Nathana-ees hais tias, “Vim Kuv hais rau koj tias, Kuv twb pom koj nyob hauvqab tsob txiv ncuavpias, koj thiajli ntseeg lov? Koj tseem yuav pom ntau yam tseemceeb loj dua qhov no thiab!” 51Thiab Yexus hais rau lawv tias, “Kuv qhia tseeb rau nej hais tias: nej yuav pom roojntug qhib thiab pom Vajtswv cov timtswv nce mus thiab nqis los ntawm Neeg Leejtub.”
Currently Selected:
Yauhas 1: MWW2022
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2022 United Bible Societies. All rights reserved.
