Лука 4
4
Глава 4
Дявал Иисусу Христосу яруттан
1Иисус Хиргэбэнь Хирань#4:1Хиргэбэн Хиран – Святой Дух. хиранатты Иордандук мучурин, нян таду Хиранду ониӈагтаки хөруврин, 2таду-нян дыгэнмяр инэӈу Ноӈан дявалду ярутаврин, таралду инэӈэлду яв-да эч дептэ, тедэ энтэкэе демэлрин. 3Тарбач дявал Ноӈантакин гөнин:
– Хэвки Хутэн бими, эрэк дӫл килеб одан овкали.
4Иисус барагрин:
– Хэвки дукундулан дукуттан: «Бэй килебэчтэкэн этэн ин, тарбач унэт Хэвки төрэндин-дэ индин».
5Тарбач дявал Ноӈман гудла урэкчэндулэ ойчивканиди, төр мудаклин тэгэмэрэдекэлбу бисилбу Иисусту өмнэкэнтэ ичувкэнин. 6Нян дявал Ноӈантакин гөнин:
– Хинду эрэлбу чэлэвэн тэгэмэрэдекэлбу дявуттас бөдим, эӈив-дэ дявучинмайгас, эӈэевутэн, эскэмутэн-дэ бөдим, эрэк эйду минду бөпчэ, теми-дэ би ӈиду-ккэ бөмсэм, таду-да бөдим. 7Тек, хи мину дэпки нэӈникэн хэнӈэнди тикрэкэс, эрэк чэлэди Хинӈи бидин.
8Иисус ноӈантакин барагрин:
– Анчиндукув хөрли, хайтан, Хэвки дукундулан дукуттан: «Мэн-тэкэн Хунӈиткий Хэвкитки нэӈгэрэли, Ноӈман-такан өмэм долчиграли».
9Тарбач дявал Иисусу Иерусалимтаки ӈэнурин, нян ойлэ Хэвки Дюн хурэлэн ноӈман ойчивканин, нян Иисустэки гөнин:
– Хэвки Хутэн бими, мэни хэссэки улэли, 10тарбач эчин дукуттакан: «Мэн ангелалби гөндин Хину этудэтэн, 11тарал Хину ӈалдюр хэпкэндир, бөдэлди дӫлла эдэс нисэӈчир».
12Иисус ноӈантакин барагрин:
– Хэвки дукундулан дукуттан: «Эди Хунӈий Хэвкив яруткарар».
13Нян дявал Иисусу гэрбэтэӈэч яруттай оддин, Ноӈман адыклан-да эмэнин.
Иисусу Христосу Назареттук эрэсэдек
14Иисус Хиргэбэн Хирандин эӈилэтты Галилеяла мучурин. Эрэли төрли бисил Ноӈман долдаритан. 15Ноӈан нэӈэдекэлдули дюлдули хупкучиддин, эйду-дэ Ноӈман эскэритэн.
16Өмнэкэн Иисус мэн иргэпчэптэкий городтаки Назареттаки хөррин, нян субботала, мэн неккөчигчими, нэӈэдеклэ дюла ӈэнрин, таду таӈаддай илрин. 17Ноӈандун мэтумӈэ Исайя книгаван бөритэн; Ноӈан, книгав аӈариди, эчин дукуттыв бакрин: 18«Хунӈит Хиранни Миндулэ бисни, Ноӈан Мину хинмарин. Мину дӫгрилтэки Өрэлдэм Мэтум болганавканин, танӈалчал дэлмилкэн одывутан, баликачил-да коерил одывутан болганавканин, хилгичиврилбу дэлмивкэндэку мину хөрукэнин, 19Хэвки илралнидякан анӈан одыван болганадаку гөнин». 20Нян книгав нипкуриди, бэлэмӈэду тарав бөриди, тэгрин; эйду нэӈэдеклэ чэлэн бичэл Ноӈантакин коечидилритэн, 21Нян Ноӈан ноӈартакитан төрэдилрин:
– Хун долдачасан дукутты мэтун эрэв инэӈу один.
22Эйдучэндюр тарав тэдевкэм очаван орэритэн, мяӈчиритан-да нодач төрэнь төрэривэн, улгэмиритэн-дэ:
– Эсни-нян Ноӈан Иосиф хутэн бис?
23Ноӈан ноӈартакитан гөнин:
– Ху, айдит, минтэки эрэв төрэм гөндис: «Бэгдэчимӈэ! Мэни бэгдэтли! Долдачагчумун Капернаумна некчэвус, элэ-нян, мэн төрэӈнэй, некли».
24Нян гөнин:
– Айдиту хунтэки гөнэм, өмэн-дэ мэтумӈэ мэн төрэӈнэй эсни алимачиммотта. 25Айдиту хунтэки гөнэм, Илия инэӈэӈнэн Израилла хоя навур биситэн, илан анӈан нюӈэн-дэ аткикан эсэкэн мудна, эйдулин төрли таракам эгден демкэн один. 26Өмэнтэки-дэ навунтаки Илия эч хөрукэмрэ, өмэнтэки-ткэн навунтаки Сарептала Сидонскийла биситки хөрукэмрин. 27Тачин-да хоял игатапчил#4:27 Игатапчил – здесь: прокаженные. бутэнрил Израилла мэтумӈэ Елисей инэӈэӈнэн биситэн, өмэн-дэ эч аибта, Нееман-такан Сириянкан ай один. 28Тарав долдаридюр, эйдучэндюр нэӈэдеклэ дюла бичэл тыкулритан. 29Хэкэркинидюр, ноӈартан Иисусу урэкчэнду бисидук городдук Назареттук эрэсситэн, тарак урэкчэн унэт хэеткин Иисусу илбэритэн, тадук кадардук Ноӈман улэдэвур. 30Нян Ноӈан, ноӈартан элгэлитэн гиркариди, хөррин.
Иисус Христос хилри бэй эмдэдукун ариӈкав нёвкэнни
31Иисус Капернаумна, Галилеяла бисилэ городла, ӈэнрин, субботаннан хупкучидилрин. 32Нян Ноӈан хупкучинмэйён мяӈчиритан, төрэнни иткапчи бисэкэн. 33Нэӈэдеклэ дюла өмэн бэй ариӈкаду хилри бисин, нян тарак ариӈка бэй эмдэлэн бичэ дылгурач иркалрин:
34– Хөрли час, мунтэки янарис, Иисус Назареянкан? Хи муну көкэвкэндэй эмрис; Хину ӈи-дэ бисивус би харам, Хи Хэвки хиргэпчэн бисэнри.
35Иисус ноӈман нуруттин, гөникэн:
– Хикутывчили, нян ноӈандукун нёли!
Ариӈка, нэӈэдек дю дулукандулан бэю тыкукэниди, эмдэн додукун нёрин, эникэн онда-тит ноӈман хойра. 36Чэлэдюр бичэл хэӈулритэн, мэр доливур укчэнэдилритэн:
– Як нян эрэк Ноӈан иткан эррөчинни, эӈин-дэ, арисагал хирантакитан гөнэкэн тарал-нян нёвэттэ?
37Нян эрэли бисили төрли Ноӈман тэлэӈ илрин.
Иисус Христос хояв бэилбу бэгдэттэн
38Нэӈэдектук дюдук нёриди, Иисус Симон дюлан ирин. Симон аткин энтэкэеч хөксич хилгэнь бутэнрин, нян Иисусу тарав бутэнрив айдан гасчиритан. 39Ноӈантакин дагамриди, Иисус бутэм нуруттин, нян тарак асидук нёрин. Аси-нян таридит илрин, ноӈарбутан тойнэчидилрин. 40Нӫлтэн тыкэддэкэн, чэлэн бэил, ӈи-ккэ дялтан бутэнрил биситэн, таралбу Иисустэки эмуритэн, нян Ноӈан эйдучэндулэн бутэнрилдулэ ӈали каптаттин, тачин ноӈарбутан эйдучэмэн бэгдэттин. 41Хан-да эмдэтэн додукутан арисагал нёвэнритэн, ирканикан:
– Хи Христос, Хэвки Хутэн бисэнри!
Ноӈан-нян таралбу нуруттин, харивур Ноӈан Христос бисивэн эдэтэн тэлэӈрэ.
42Гя инэӈ одакан, Ноӈан дюдук нёриди, энтэрэнтэки төртэки хөррин, бэил Ноӈман гэлэттитэн, нян Ноӈандулан ӈэнридюр, гасчидилритан, Иисус ноӈардукутан эдэн хөррэ. 43Тарбач Ноӈан ноӈартакитан гөнин:
– Хөнтэлбу-дэ городалбу Би Хэвки Тэгэмэрэдеккон Өрэлдэм Мэтум болгананнаву. Эрэв некэннэгэй эмчэ бисэм.
44Нян Галилея нэӈэдекэлдулэн дюлдула Иисус хупкучидилрин.
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
