Matta 12
12
Ɓii-Neɗɗo woni jawmu nyannde-fooftiinde
(Markus 2.23-28 ; Luka 6.1-5)
1*Nyannde-fooftiinde feere, Yeesu e almaajiri'en muuɗum ndaacii nder gese alkamaari. Almaajiri'en ma'ako e nana dolo, sey ɓe puɗɗi ɓorgo butaali eɓe murjoo eɓe ƴakka. 2Ammaa nde *Fariisa'en ngi'i ɗum, ɓe mbi'i Yeesu :
— A yi'ii, almaajiri'en maaɗa e mbaɗa ko haɗaa waɗeego nyannde-fooftiinde !
3O toontii ɓe, o vi'i :
— On njanngaay ko *Dawda waɗi nde o nani dolo, kanko e yahadiɗɗaaɓe ma'ako naa ? 4O natti *Wuro Allah Seniingo, kanko e yahadiɗɗaaɓe ma'ako, ɓe nyaami buroodi desanaaɗum Allah, ɗum neɗɗo fuu hokkaaka laawol nyaamgo, sey *aardiiɓe diina tan. 5Nakay on njanngaay nder *Tawreeta Muusa, no aardiiɓe diina kuurata nder *Wuro Allah Seniingo, faa e nyannde-fooftiinde. Koo nde eɓe kuulta dooka nyannde-fooftiinde ndeen, e noon fuu ɗum laatanaaki ɓe feloore. 6Emi vi'a on : raa ɓurɗo Wuro Allah Seniingo teddungal ɗo'o. 7To on pahamuno ma'ana nde'e voliinde vi'inde : « Yurmeende ngiɗmi, wanaa *kirseteeɗi »#12.7 Hooseya 6.6, daa on layfataano yimɓe ɓe ngalaa layfi. 8Gam *Ɓii-Neɗɗo woni jawmu nyannde-fooftiinde.
Yeesu yamɗitinii mo junngo waatngo
(Markus 3.1-6 ; Luka 6.6-11)
9Yeesu dilli ɗoon yahi natti *suudu-wa'ajordu Yahuudu'en. 10Nder suudu-wa'ajordu nduun e woodi goɗɗo gorko mo junngo muuɗum waati. Wonɓe ɗoon ƴami Yeesu, ɓe mbi'i :
— Koo *Tawreeta meeɗen hokkii en yamɗitingo goɗɗo *nyannde-fooftiinde naa ?
Ɓe ƴamii mo ƴamƴamre ndeen gam ɓe keɓa ko ɓe ngullorii mo. 11Yeesu toontii ɓe vi'i :
— To goɗɗo nder mooɗon e woodi mbaalu ngo'otu, ndeen ngu yoolake nder waawru nyannde-fooftiinde, o yahataa o vurtina ngu naa ? 12Daahir neɗɗo ɓurii mbaalu darajja to woɗɗi ! Gam ma'ajum, huwango neɗɗo ko vooɗi nyannde-fooftiinde haɗaaka.
13Ndeen o vi'i gorko oon :
— Foortu junngo maaɗa.
O foorti ngo, ngo yamɗiti kama ngoon yamo. 14Sey *Fariisa'en ɓeen mburtii, ndarvi no mbardata Yeesu.
Kuwoowo mo Allah suɓi
15Nde Yeesu annditi dabaree maɓɓe, o ɗali yaayre ndeen, o dilli. Sey jama'aare tokki mo, o yamɗitini nyawɓe maɓɓe fuu. 16Ammaa o vaggini ɓe o vi'i, to' ɓe njaɓ yeccaago koo moye habaru ma'ako. 17Ɗum ɗoon fuu waɗii gam ɗum hebbina ko annabi *Ecaaya vi'i, nde o vi'inoo :
18Raa kuwoowo am giɗaaɗo, mo cuɓmi.
Emi nana belɗum ma'ako korey.
Mi hebbiney mo *Ruhu am,
o anndiney leƴƴi duuniyaaru habaru aadilaaku.
19O jokkirtaake, o ɗemɗataa,
voliinde ma'ako nanataake dow ɗate.
20O yevataa ƴommbel baggel,
o nyifataa pe'etel yiite,
gam faa o waɗa aadilaaku heɓa jaalorgal dow halleende.
21Leƴƴi duuniyaaru boo, no ndesey tammunde mu''en dow innde ma'ako.#12.21 Ecaaya 42.1-4
Yeesu e Ba'aljabul
(Markus 3.20-30 ; Luka 11.14-23 ; 12.10)
22Sey ɗum waddani Yeesu goɗɗo mo ginnol vumni fahaɗini. Yeesu yamɗitini mo, faa o hooti e volvugo e yi'igo. 23Ɗum haaynii yimɓe fuu, ɓe mbi'i :
— Woy, o'o naa kam woni ɓii-Dawda naa ?
24Ammaa nde *Fariisa'en nani ɗum, ɓe mbi'i :
— O'o neɗɗo e baawɗe Ba'aljabul#12.24 Ba'aljabul ɗum innde feere gam Ceyɗaan. mawɗo ginnaaji o vurtinirta *ginnaaji ɗiin.
25Yeesu e anndi nyumooji maɓɓe, gam ma'ajum o vi'i ɓe :
— Laamu fuu sennditii e haɓa hakkunde muuɗum ngu do''oto. Noon boo, si'ire koo wuro ngo yimɓe muuɗum narraay hakkunde mu''en fuu, no sankitoto. 26To *Ceyɗaan e vurtina Ceyɗaan, ndeen o senndake nde ɗiɗi, emo hona hoore ma'ako. To o waɗii noon, noye laamu ma'ako darorto ? 27On mbi'ii e baawɗe Ba'aljabul laamiiɗo ginnaaji mburtinireymi ginnaaji. To ɗum laatake noon, tokkuɓe on e baawɗe moye mburtinirta ɗi ? Gam ma'ajum ɓe laatoto sernaneyɓe on dow ma'ajum ! 28Ammaa miin, to e baawɗe *Ruhu Allah mburtinireymi ginnaaji, ndeen e ɗum holla *laamu Allah warii to mooɗon.
29Yeesu ɓesdi vi'igo :
— Walaa baawɗo nattugo wuro neɗɗo cemmbiɗɗo te'eta jawdi ma'ako, to naa o aarti o haɓɓi mo tawo. Ammaa to o aartii o haɓɓii mo, ndeen emo waawi hooygo ko woni nder wuro ma'ako fuu.
30Mo waldaa e am fuu, no ganyo am. Mo vallaay yam hawritgo fuu, no cankitoowo. 31Gam ma'ajum, emi vi'a on : yimɓe e mbaawi ya'afaneego hakkeeji e haalaaji yavaare ɗi mbolvi dow Allah fuu, ammaa bolvuɗo haala yavaare dow *Ruhu Ceniiɗo ya'afantaake sam. 32Koo moye huɗi *Ɓii-Neɗɗo no heɓey ya'afaneego, ammaa kuɗɗo Ruhu Ceniiɗo fuu ya'afantaake, gada e duuniyaaru faa *nyannde-darngal.
Lekki e annditiree ɓikkon muuɗum
(Luka 6.43-45)
33— Lekki booɗki no rimey ɓikkon mbooɗkon, lekki ki vooɗaa boo no rimey ɓikkon kon mbooɗaa, gam lekki e annditiree ɓikkon muuɗum. 34Onon ɓiɓɓe bo'ole kalluɗe ! Noye mbaawroton volvugo ko vooɗi, nde laatii on halluɓe ? Gam ko woni nder ɓernde, kanjum vurtotoo e honnduko. 35Neɗɗo mo ɓernde vooɗnde no vurtiney ko vooɗi nder ndesaari muuɗum. Neɗɗo kalluɗo boo, no vurtiney ko halli nder ndesaari ɓernde muuɗum. 36Emi vi'a on : *nyannde-darngal yimɓe no toontanto ko'e mu''en dow e bolle kalluɗe ɗe mbolvunoo fuu. 37Gam dow e bolle maaɗa cernanteɗaa, koo ko mbiiɗaa nanngu ma, koo ɗum vurtin ma.
Yimɓe jaamaniiru hallundu
(Markus 8.11-12 ; Luka 11.29-32)
38Sey woɓɓe nder *moodiɓɓe Tawreeta e *Fariisa'en mbi'i Yeesu :
— Moodibbo, emin ngiɗi mbaɗanaa min goɗɗum kaayniiɗum, kolleyɗum min Allah liloyi ma.
39O toontii ɓe, o vi'i :
— Yimɓe ndu'u jaamaniiru ɓe halluɓe, ɓe kulataa Allah, eɓe ngiɗi yi'igo kaayniiɗum, ammaa walaa kaayniiɗum ɗum ɓe kolletee, to naa ɗum annabi Yuunaana. 40Gam kama no Yuunaana wa'ari nyalawmaaje tati e jemmaaje tati nder reedu liyngu manngu, noon *Ɓii-Neɗɗo wa'arata nyalawmaaje tati e jemmaaje tati nder lesdi. 41*Nyannde-darngal, yimɓe Niniwe no ummodoto e yimɓe ndu'u jaamaniiru, ɓe ngulloo ɓe. Gam yimɓe Niniwe tuubii nde nani wa'aji annabi Yuunaana. Raa ɓurɗo Yuunaana manngu ɗo'o ! 42Nyannde-darngal, laamiiɗo debbo mo lesdi foombina no ummanto yimɓe ndu'u jaamaniiru, o wulloo ɓe. Gam gada keerol duuniyaaru o ivoyi, o wari gam o nana bolle *Suleymaanu keeɓɗe hikima. Too, raa ɓurɗo Suleymaanu manngu ɗo'o !
Bittoyki ginnol
(Luka 11.24-26)
43— To *ginnol vurtake neɗɗo, ngol yiiloyto nder jaaje ɗe ngalaa ndiyam, ngol yilloo to ngol foofti. Ammaa kul ngol heɓaay to ngol foofti, 44ndeen ngol vi'ey : « Mi vittey suudu ndu mburtoyinoomi. » To ngol vittii ngol tawii suudu nduun vuuvaama siryaama, walaa gonɗo nder. 45Sey ngol yaha, ngol hooƴoya ginnaaji joveeɗiɗi ɓurɗi ngol hallugo, ɗi natta nder suudu nduun, ɗi njooɗoo. Ndeen timmoode neɗɗo oon no ɓurey fuɗɗoode ma'ako hallugo. Noon ɗum laatantoo yimɓe ndu'u jaamaniiru hallundu.
Minyiraaɓe Yeesu e inna muuɗum
(Markus 3.31-35 ; Luka 8.19-21)
46Yeesu e nder volidgo e jama'aare, sey inna ma'ako e minyiraaɓe ma'ako worɓe ngarii. Ɓe ndarii yaasi, eɓe ngiɗi volididgo e ma'ako. 47Sey goɗɗo vi'i mo :
— Raa inna maaɗa e minyiraaɓe maaɗa ɗoon ndarii yaasi e ngiɗi yi'igo ma.
48O toontii neɗɗo oon, o vi'i mo :
— Moye woni inna am ? Ɓeye ngoni minyiraaɓe am ?
49O sappii almaajiri'en ma'ako, o vi'i :
— Raa inna am e minyiraaɓe am. 50Gam inna am e minyiraaɓe am worɓe e rewɓe ngoni ɓeen huuɓe ko *Baaba am gonɗo toon dow asama yiɗi.
Currently Selected:
Matta 12: fuq
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2015, Wycliffe Bible Translators, Inc. All rights reserved.
